1. Bezẹle nin Jesu da bhii Jehova nin ọle ha gbega edibo nesọle?

ỌNE ukpasọn ọkuẹsẹ Jesu yu, ọle da wo ha ria ẹmhọn ọnọghọ nin edibo nesọle ha miẹn. Ranmhude oyẹẹ nin ọle ha mhọn da ele, ọle da bhii Aba ọle yọle: “Mẹn bhii ẹ nin uwẹ gbẹloghe ele, ranmhude ọnọn lu emhin ebe.” (John 17:​14, 15) Jesu lẹnmhin ghe, ọle ha kpanọ ha khian okhun fo, Esu dẹ sẹyẹ wo ha kpokpo ẹbho ne guanọ ne ga iJehova. Ranmhude ọnan, ọ wo khẹke nin Jehova ha gbega ẹbho nesọle.

2. Be re imhan lẹn ghe Jehova dẹ wanniẹn erọnmhọn nọnsẹmhan?

² Ranmhude oyẹẹ nin Jehova ha mhọn da Jesu, ọle da wo ha wanniẹn erọnmhọn nọnsọle. Ahamiẹn mhan lu ebe ti Jehova bhọ, ọle ki hoẹmhọn mhan. Ọle ki yẹ ha họn erọnmhọn nin mhan nan ji ọle nin ọle gbega mhan yẹ rẹkpa mhan. Ranmhude Jehova hi Aba mhan, ọle dẹ wo ha gbẹloghe mhan ranmhude imọn nesọle mhan khin. Ọ dẹ re itọn ọbhi elin nọnsi Jehova sade ọle bha gbega imọn nesọle.

3. Bezẹle nin mhan da guanọ nin Jehova gbega mhan ẹlẹnan?

³ Mhan wo manman guanọ ugbega nọnsi Jehova ẹlẹnan nian. Bezẹle? Ranmhude, a khu Esu sibhi okhun re vae bhi ọne otọ nan. Ranmhude ọnan, ọle wo manman ha khọẹkẹ. (Rev. 12:12) Ọle re ẹbho rẹọbhọ ghe, ahamiẹn ele kpokpo mhan, Osẹnobulua ele lu ọle nan. (John 16:2) Ẹbho ne bhọ bha rẹọbhọ ghe Osẹnobulua ribhọ bhọ yẹ kpokpo mhan ranmhude mhan iribhi ibo ọsi ọne agbọn nan. Emhin nọn hi ki rẹ khin nọn zẹle nin ẹbho da kpokpo mhan, mhan ida ji ofẹn ha mun mhan. Bezẹle? Ranmhude Baibo taman mhan yọle: “Ebeanlẹn mhan ida zẹ mhan obọ. Ọle dẹ re ahu nin mhan yẹ gbega mhan bhi obọ ọnọn imhẹn.”  (2 Thess. 3:3) Be iJehova rẹ gbega mhan yẹ? Bha ji mhan zilo nyan uwedẹ eva.

4. Beji Ephesians 6:​13-17 rẹman, be iJehova mun nin mhan nọn ha gbega mhan?

⁴ Jehova mun ukpọn ẹlọnmhọn ọsi eyokhọnlẹn nin mhan, nọn ha sabọ gbega mhan bhi obọ Esu. (Tie Ephesians 6:​13-17.) Ọne ukpọn nan wo manman zeze, ọ yẹ wo sabọ gbega mhan. Ọkpakinọn, nọn da sabọ gbega mhan, ọkhẹke nin mhan yọ obọ ọle rebhe. Sẹyẹ, mhan ki situa nin mhan hẹi kuọ ọle. Be obọ ọle kẹkẹ bhi ọne ukpọn nan mundia nan? Bha ji mhan fẹ ele ghe.

5. Be bhọ hi ugbakun ọsi ẹmhọanta? Be imhan ha rẹ sabọ re ọle gbakun yẹ?

⁵ Ugbakun ọsi ẹmhọanta nọn ribhọ mundia nin ẹmhọanta ne ribhi Baibo. Bezẹle nọn da khẹke nin mhan ha yọ ọne ugbakun nan? Ranmhude Esu nin aba ohoghe wo bha ohoghe nẹga. (John 8:44) Ọle sẹ wo gbe ikpe ne bunbun rẹ ha bha ohoghe rẹ hiẹ ẹbho bhi ọne agbọn nan. Bhiriọ, ọle wo guẹ ebi a rẹ bha ohoghe yẹ. (Rev. 12:9) Ọrẹyiriọ, ẹmhọanta ne ribhi Baibo dẹ sabọ gbega mhan nin ọle hẹi hiẹ mhan. Be imhan rẹ sabọ re ọne ugbakun nan rẹ gbakun yẹ? Mhan dẹ sabọ lu iriọ sade mhan luẹ ẹmhọanta rẹji Jehova, sade mhan ga ọle bhi uwedẹ ẹmhọanta bi sade mhan ta ẹmhọanta bhi emhin rebhe nin mhan lu bhi iẹnlẹn.​—John 4:24; Eph. 4:25; Heb. 13:18.

6. Be a re awegbe ẹlọnmhọn ọsi ikhiakhiale ta? Bezẹle nin mhan ha da ha yọ ọle?

⁶ Awegbe ẹlọnmhọn ọsi ikhiakhiale mundia nin adia ne gbale nesi Jehova. Bezẹle nọn da khẹke nin mhan yọ ọle? Beji awegbe ọsi ẹlọnmhọn rẹ gbega udu ọsi ọyokhọnlẹn nin emhin hẹi sabọ ha ọle, iriọ awegbe ọsi ikhiakhiale rẹ gbega udu nọnsẹmhan nin Ojuu hẹi sabọ kọ emhin ebe ọbhọ. (Prov. 4:23) Jehova guanọ nin mhan hoẹmhọn ọlẹn yẹ re ọkhọle rebhe ha ga ọle. (Matt. 22:​36, 37) Ọrẹyiriọ, Ojuu ki ha si mhan ọbhọ nin mhan hoẹmhọn emhin ne ribhi ọne agbọn nan beji a ha da miẹn ghe, mhan bha yẹ ha re ọkhọle rebhe ga iJehova. (Jas. 4:4; 1 John 2:​15, 16) Ahamiẹn ọnan bha wẹnna nanlẹn, ọle ki ha kpokpo mhan beji a ha da miẹn ghe, mhan ki gbobọrauhi nesi Jehova.

7. Be a rẹ yọ awegbe ẹlọnmhọn ọsi ikhiakhiale yẹ?

⁷ Be a rẹ yọ ọne awegbe ẹlọnmhọn ọsi ikhiakhiale yẹ? Mhan yọ ọle sade mhan miẹn adia nesi Jehova ọbhi egbe yẹ re obọ rẹkhan ele bhi iẹnlẹn nọnsẹmhan. (Ps. 97:10) Ẹbho eso sabọ rẹ ha riale ghe, uhi nesi Jehova iji ele da zẹ-obọ zẹ-oẹ. Ahamiẹn mhan zobọ bhọ rẹ ha noo adia ne ribhi Baibo bhi iẹnlẹn nọnsẹmhan, mhan ki diabe ọyokhọnlẹn nọn kuọ awegbe ẹlọnmhọn nọnsọle bhi adesẹ okhọnlẹn mun fia, ranmhude ọle riale ghe ọ khua ọle. Ọnin izẹwẹ yi emhin ẹwanlẹn. Ahamiẹn mhan hoẹmhọn iJehova, mhan ida ha ghe uhi nesọle bii ihẹ. Sokpan, mhan ki ha ghe ele bii emhin ne ha sabọ miẹn mhan fan.​—1 John 5:3.

8. Be bhọ a re ọle ta nan rẹ gba ibata ọbhi oẹ rẹ dọ wewe ọta nọn mhẹn ọsi ọfure?

⁸ Paul yẹ taman mhan ghe, nin mhan gba ibata ọbhi oẹ rẹ dọ wewe ọta nọn mhẹn ọsi ọfure. Ebi ọle re ọnan ta hi, nin mhan muegbe rẹ ha tẹmhọn Agbejele nọnsi Osẹnobulua ẹghe rebhe. Ahamiẹn mhan tẹmhọn Osẹnobulua man ẹbho, urẹọbhọ nọnsẹmhan ki wo kie ha ziẹn ọbhọ. Emhin eghọnghọn nọn ghe, ẹbho nesi Jehova bhi ọne otọ agbọn nan rebhe wo noo isẹhoa nin ele mhọn rẹ tẹmhọn Osẹnobulua man ẹbho bhi isiku, bhi isi iwẹnna, bhi eji a da do ẹki, sade ele tẹmhọn Osẹnobulua rẹ na bhi uwa rẹ sẹbhi uwa, sade ele ribhi hospital, sade ele rẹnẹ ji eria nesele ne iga iJehova bi sade ele ne idiake nọnsele zilo. Ahamiẹn mhan zobọ bhọ rẹ ha tẹmhọn Osẹnobulua ranmhude ofẹn mun mhan, mhan ki diabe ọyokhọnlẹn  nọn kuọ ibata nọnsọle bhi adesẹ okhọnlẹn. Bhi ọsi ẹmhọanta, ọyokhọnlẹn nọn sẹnian dẹ kuan bhi oẹ. Bhiriọ, ọ ki ha nọghọ ọle rẹ re obọ rẹkhan ebi ọnọn sun ele tale. Ọnan ki re ọle lẹkhẹ nin eghian ọlẹn rẹ mun ọlẹn.

9. Bezẹle nọn da khẹke nin mhan ha mun ugue ọsi urẹọbhọ nọnsẹmhan mhọnlẹn?

⁹ Ugue nọn khua ọsi urẹọbhọ nin Paul tẹmhọnlẹn mundia nin urẹọbhọ nin mhan mhọn da Jehova. Mhan mhọn urẹọbhọ ghe Jehova dẹ mun ive nesi ọle rebhe sẹ. Urẹọbhọ nọn sẹnian dẹ sabọ rẹkpa mhan rẹ fuẹn ifẹnmhẹn ọsi ene imhẹn an. Bezẹle nọn da khẹke nin mhan ha mun ọne ugue nọn khua nan mhọnlẹn? Ranmhude ọ dẹ gbega mhan nin iman-emhin ọsi ẹbho ne de sibhi oga re hẹi hiẹ mhan. Sẹyẹ, ọ dẹ re izebhudu nin mhan sade ẹbho zuọzuọ mhan ranmhude mhan ga iJehova. Ahamiẹn mhan imhọn urẹọbhọ, ọ ki wo lẹkhẹ nin ẹbho rẹ lẹlẹ mhan ọbhọ nin mhan gbobọrauhi nesi Jehova. Bhi obọ nọnkẹle, ẹghe nọn hi ki rẹ khin nin mhan bha rẹ ka nin ẹbho lẹlẹ mhan bhọ rẹ lu emhin nin Jehova hele, ọ ha rẹ ha yi bhi isiku la bhi isi iwẹnna, urẹọbhọ nọnsẹmhan gbega mhan riọ. (1 Pet. 3:15) Ẹghe nọn hi ki rẹ khin nin uwẹ rẹ fikeke gbe iwẹnna nọn ida re ẹghe nin uwẹ rẹ manman ha ga iJehova, aharẹmiẹn uwẹ dẹ ha miẹn udede igho bhọ, urẹọbhọ nọnsẹ gbega uwẹ riọ. (Heb. 13:​5, 6) Ẹghe nọn hi ki rẹ khin nin mhan rẹ mun oga nọnsi Jehova  mhọnlẹn aharẹmiẹn mhan ribhi ẹkẹ ekpokpo, urẹọbhọ nọnsẹmhan gbega mhan riọ.​—1 Thess. 2:2.

10. Be imhan rẹ yọ ukparu ẹlọnmhọn ọsi umiẹnfan yẹ? Bezẹle nin mhan ha da ha yọ ọle?

¹⁰ Ukparu ẹlọnmhọn ọsi umiẹnfan nin Paul tẹmhọnlẹn mundia nin ikhuaẹloghe nin Jehova re nin mhan. Jehova ve nin mhan ghe, ọle dẹ miẹn mhan fan bhi obọ uu, yẹ re elele nin ẹbho ne lu iho nọnsọle. (1 Thess. 5:8; 1 Tim. 4:10; Titus 1:​1, 2) Beji ukparu rẹ gbega uhọnmhọn ọsi ọyokhọnlẹn, iriọ ikhuaẹloghe nin mhan mhọn rẹ gbega iria-eria nọnsẹmhan. Be ọ rẹ gbega iria-eria nọnsẹmhan yẹ? Ọne ikhuaẹloghe nan rẹkpa mhan rẹ mun ọkhọle ọbhi ive nesi Osẹnobulua. Bhiriọ, mhan ha rẹ ha ribhi ọnọghọ, mhan ida ha kpokpo egbe gbe. Be imhan rẹ yọ ọne ukparu ọsi ẹlọnmhọn nan yẹ? Mhan yọ ọle sade mhan ji iria-eria nọnsẹmhan diẹn mun iria-eria nọnsi Osẹnobulua. Bhi ọsi ijiẹmhin, mhan ida ha mun ọkhọle bhi ẹfe ọsi ọne agbọn nan. Ọkpakinọn, mhan ki ha khuaẹloghe ive nesi Osẹnobulua.​—Ps. 26:2; 104:34; 1 Tim. 6:17.

11. Be bhọ hi agbada ọsi ẹlinmhin nọn khiale nin Jehova re nin mhan? Bezẹle nọn da khẹke nin mhan ha noo ọle?

¹¹ Agbada ọsi ẹlinmhin nọn khiale nin Paul tẹmhọnlẹn mundia nin Ọta nesi Osẹnobulua ne ribhi Baibo. Ọta nọnsi Osẹnobulua dẹ sabọ rẹkpa mhan rẹ lẹn iman-emhin ohoghe kẹkẹ nin ẹbho man. Bhiriọ, ene ohoghe ida sabọ hiẹ mhan. Ọ yẹ rẹkpa mhan rẹ rẹban uwedẹ iẹnlẹn ne imhẹn. (2 Cor. 10:​4, 5; 2 Tim. 3:​16, 17; Heb. 4:12) Mhan dẹ sabọ lẹn iBaibo nọnsẹn, sade mhan re ẹghe ọbhi otọ rẹ luẹ ọle, bi sade mhan luẹ emhin nin agbotu zẹ ọle egbe dagbare. (2 Tim. 2:15) Rẹ deba ukpọn ọsi ọyokhọnlẹn nin Jehova mun nin mhan, emhin ọbhebhe yẹ ribhọ nin ọle rẹ gbega mhan. Be bhọ ọne emhin?

12. Emhin ọbhebhe nela ha sabọ rẹkpa mhan? Bezẹle?

¹² Ọyokhọnlẹn lẹn sẹbhọ ghe, ọle ọkpa ida sabọ khọn usun eyokhọnlẹn ne mun okhọn bu ele, ghe, ọkhẹke nin ibo ọle rẹkpa ọle. Iriọ yẹ nọn rẹji mhan. Mhan ọkpa ida sabọ ne Esu bi ene rẹkhan ọle suan. Ọkhẹke nin ibhio mhan nin mhan ko ga rẹkpa mhan. Jehova ne ibhio mhan nin mhan ko ga nin mhan ne ha rẹkpa mhan.​—1 Pet. 2:17.

13. Beji Hebrews 10:​24, 25 rẹman, elele nela nabhọre sade mhan yo ikolo oga?

¹³ Ikolo oga deba uwedẹ nin mhan rẹ sabọ miẹn urẹkpa bhi obọ ibhio mhan. (Tie Hebrews 10:​24, 25.) Ẹghe nọn hi ki rẹ khin nin ahu rẹ fo mhan bhọ, ahamiẹn mhan yo ikolo oga, ahu ki wo kie do mhan bhọ. Ewanniẹn nin ibhio mhan re ọbhi inọnta bhi enin sabọ ziẹn mhan udu. Ọta nin ibhio mhan rẹman bhi enin, yẹ sabọ re ọhubhudu nin mhan rẹ sẹyẹ wo ha situa bhi oga nọnsi Jehova. Mhan yẹ wo miẹn izebhudu beji mhan rẹ deba ibhio mhan sọnyẹnmhẹn ọkuẹsẹ a mun ikolo oga hẹn la sade a zobọ bhọ. (1 Thess. 5:14) Sẹyẹ, ikolo oga re isẹhoa nin mhan rẹ ha rẹkpa ẹbho, bhiriọ mhan ki sabọ miẹn eghọnghọn nọn nabhọre sade a rẹkpa ọria. (Acts 20:35; Rom. 1:​11, 12) Uwedẹ ebhebhe sẹyẹ ribhọ nin ikolo oga rẹ rẹkpa mhan. Ọ rẹkpa mhan rẹ guẹ ebi a rẹ sabọ tẹmhọn Osẹnobulua yẹ. Bhi ọsi ijiẹmhin, bhi ikolo oga, mhan luẹ uwedẹ nan rẹ noo emhin kẹkẹ nin agbotu zẹ ọle egbe dagbare nan rẹ tẹmhọn Osẹnobulua. Bhiriọ, ha muegbe ọbhi otọ nọnsẹn vae bhi ikolo oga. Ha gbehọkotọ nọnsẹn sade a do ọne ikolo. Sẹyẹ, dọnmhegbe ha re obọ rẹkhan ene emhin nin uwẹ luẹle. Uwẹ ha lu enan rebhe, uwẹ ki ha yi “ọyokhọnlẹn nọnsi Jesu Kristi” nọn manman guẹ emhin.​—2 Tim. 2:3.

14. Uwedẹ ọbhebhe nela mhan ha rẹ sabọ miẹn urẹkpa?

¹⁴ Jehova yẹ noo ẹhi nesọle rẹ rẹkpa mhan. Yere ghe, ukpasọn ọkpa, ọle ẹhi ukpọkpa rẹ fuẹn eyokhọnlẹn ne bun sẹbhi 185,000 an. (Isa. 37:36) Ahamiẹn ẹhi ọkpa sabọ lu ọnan, riale ebi  usun ẹhi ne bunbun nan isabọ ka ha sabọ lu! Bhi ọsi ẹmhọanta, ẹghe iribhọ nin eria, la ẹlinmhin ebe ha rẹ sabọ khọn ẹhi nesi Jehova miotọ. Ahu nọnsi Jehova imhọn eji ọ sẹle. Bhiriọ, ahamiẹn ọle re imhan bhi ikeke, mhan ki mhọn ahu gbera eghian mhan aharẹmiẹn ele manman bun. (Judg. 6:16) Ẹmhọanta ọne ọta nan wo khin! Bhiriọ, ẹghe nọn hi ki rẹ khin nin uwẹ rẹ miẹn edọnmhẹn bhi obọ eria nin bha ko wẹnna, ene ibha ko yo isiku la bhi obọ ene ribhi azagba-uwa nọnsẹ ne iga iJehova, ha yere ghe, Jehova, ẹhi nesọle bi ibhio ẹ nin bha ko ga ribhi ikeke ẹ.

15. Beji Isaiah 54:​15, 17 rẹman, bezẹle ọria soso ida sabọ mun ọkpẹnlẹn ọbhi iwẹnna itẹmhọn Osẹnobulua nin mhan lu?

¹⁵ Emhin ne bunbun ribhọ nọn zẹle nin ọne agbọn nan nin Esu gbẹloghe da he mhan. Ele he mhan ranmhude mhan ideba ele lu ilọnmhọn efinẹfi bi ranmhude mhan ideba yo okhọnlẹn. Ele yẹ he mhan ranmhude mhan wo re obọ rẹkhan adia nesi Jehova bhi iẹnlẹn nọnsẹmhan, bi ranmhude mhan wewe elin nọnsi Jehova bi Agbejele nọnsọle nẹga. Mhan rẹkpa ẹbho rẹ lẹn ghe, ọria ọbe, ọle gbẹloghe ọne agbọn nan. (John 8:44) Mhan yẹ wo wewe ọle man ẹbho ghe, Osẹnobulua dẹ kẹ dọ fuẹn ọne agbọn nan an. Ọrẹyiriọ, Esu bi ene ribhi ibo nọnsọle bha sẹ sabọ mun ọkpẹnlẹn ọbhi iwẹnna itẹmhọn Osẹnobulua nin mhan lu. Mhan dẹ sẹyẹ wo ha noo emhin rebhe nin mhan mhọnlẹn rẹ gẹn iJehova. Arẹmiẹn Esu mhọn ahu, ọle bha sabọ lu ọle nin ẹmhọn Osẹnobulua hẹi sabọ gba ije rebhe bhi ọne otọ nan. Bezẹle? Ranmhude Jehova gbega mhan.​—Tie Isaiah 54:​15, 17.

16. Be iJehova ha rẹ gbega ẹbho nesọle yẹ sade ekpokpo nọn khua munhẹn?

¹⁶ Emhin nela ha sunu bhi ẹghe odalo? Uwedẹ eva Jehova ha rẹ miẹn ẹbho nesọle fan bhi ẹghe nin ekpokpo nọn khua ha rẹ munhẹn. Ọhẹnhẹn, Jehova dẹ gbega ele ẹghe nin ene gbẹloghe ha rẹ ha fuẹn oga ohoghe rebhe a. (Rev. 17:​16-18; 18:​2, 4) Ọzeva, ọle dẹ gbega ele ẹghe nin ọle ha rẹ noo okhọn Armageddon rẹ dọ fuẹn ọne agbọn nan an sẹsẹsẹ.​—Rev. 7:​9, 10; 16:​14, 16.

17. Elele nela mhan ha miẹn sade mhan manman sikẹ Jehova?

¹⁷ Ahamiẹn mhan sikẹ Jehova nọnsẹn, Esu ida sabọ lu mhan emhin soso nọn ha sabọ si ikuan-egbe ji mhan rẹ sẹbhi ighegheghe. Bhi ọsi ẹmhọanta, ọle hi ọnọn ha miẹn ugbekhuelo. (Rom. 16:20) Bhiriọ, mun ukpọn ẹlọnmhọn nin Jehova mun nin mhan yọ. Hẹi kuọ ọle! Hẹi ha riale ghe uwẹ ọkpa dẹ sabọ khọn ọne okhọn nan. Hẹi si egbe sibhi ẹwẹ ibhio ẹ nin ibha ko ga re. Sẹyẹ, wo ha rẹkhan adia nin Jehova zẹ ọle egbe dagbare. Uwẹ ha lu enan rebhe, Jehova nin Aba mhan nọn ribhi okhun ki mun uwẹ ziẹn yẹ gbega ẹ.​—Isa. 41:10.