1. Beji Matthew 24:9 rẹman, Bezẹle mhan ida ji ọle da han mhan ilo sade ẹbho he mhan?

JEHOVA man imhan bhi uwedẹ nin mhan ha rẹ ha hoẹmhọn ẹbho, bi nin ẹbho yẹ rẹ ha hoẹmhọn mhan. Bhiriọ, ọ manman ba mhan bhi egbe sade ẹbho bha hoẹmhọn mhan. Ofẹn bhọ sabọ rẹ ha mun mhan. Bhi ọsi ijiẹmhin, obhio mhan natiọle Georgina nọn nyẹnlẹn bhi Europe da yọle: “Ẹghe nin mẹn rẹ ha ribhi ikpe 14, inẹn mẹn da wo he mẹn ranmhude mẹn ga iJehova. Ọnan da re imẹn ha riale ghe, ọria soso bha hoẹmhọn mẹn. Sẹyẹ, mẹn da ha riale ghe mẹn iyi ọria esili.” * Obhio mhan natiọle Danylo da yẹ yọle: “Ẹghe nin eyokhọnlẹn rẹ fi mẹn emhin, zuọzuọ mẹn, yẹ yọle ghe ele dẹ kuan mẹn ranmhude ọkpa bhi Esali Jehova mẹn khin, ofẹn da wo manman ha mun mẹn.” Emhin nọn sẹnian wo manman ba bhi egbe. Ọkpakinọn, mhan ida ji ọle da han mhan ilo. Jesu ka taman mhan ghe a dẹ he mhan.​—Tie Matthew 24:9.

2-3. Bezẹle nan da he ẹbho ne rẹkhan iJesu?

² Ẹbho bhi ọne agbọn nan wo he ẹbho ne rẹkhan iJesu. Bezẹle? Ranmhude, bọsi Jesu, mhan iyi ibo ọsi ọne agbọn nan. (John 15:​17-19) Arẹmiẹn mhan mun ekpẹn nin ene gbẹloghe, mhan iga ele, la iflag nin ele noo. Mhan ida yẹ deba ha so ilo nan rẹ gẹn agbaẹbho. (national anthem.) Jehova ọkpa mhan ga. Mhan rẹọbhọ ghe, Osẹnobulua ọkpa ọkhẹke nọn gbẹloghe mhan, arẹmiẹn Esu bi ene ribhi ibo ọle bha rẹọbhọ. (Gen. 3:​1-5, 15) Mhan yẹ wo wewe ọle man ẹbho ghe, Agbejele nọnsi Osẹnobulua ọkpa ha sabọ re iloya kie bhi ọne otọ nan. Sẹyẹ, ẹbho ne bha re obọ ọbhi ọne Agbejele, Osẹnobulua dẹ gbe ele khuelo. (Dan. 2:44; Rev. 19:​19-21) Ọta  esili ọnan khin rẹji ẹbho ne ga iJehova. Sokpan, ọ iyi ọta esili rẹji eria ebe.​—Ps. 37:​10, 11.

³ Ẹbho sẹyẹ wo he mhan ranmhude mhan re obọ rẹkhan uhi nesi Osẹnobulua. Uwedẹ nin mhan rẹ nyẹnlẹn wo dikẹ bhi uwedẹ nin ẹbho bhi ọne agbọn nan rẹ nyẹnlẹn. Bhi ọsi ijiẹmhin, ẹlẹnan nian, ẹbho ne bunbun wo ne obọ ọbhi ilọnmhọn oghẹ. Ene ilọnmhọn oghẹ nin ele lu wo diabe ọne ibhokhan Sodom bi Gomorrah ha lu nọn zẹle nin Jehova da fuẹn ele a! (Jude 7) Ranmhude mhan inyẹnlẹn beji ele rẹ nyẹnlẹn, ele ki ha zuọzuọ mhan, yẹ yọle ghe mhan imiẹn ẹbho ọbhi egbe.​—1 Pet. 4:​3, 4.

4. Ikpẹ nela ha rẹkpa mhan rẹ sabọ ziẹngbe sade ẹbho he mhan?

⁴ Be ha rẹkpa mhan rẹ ha mhọn iziẹngbe ahamiẹn ẹbho he mhan yẹ ha re unun ji mhan? Ọkhẹke nin mhan ha mhọn urẹọbhọ ghe, Jehova dẹ rẹkpa mhan. Beji ugue rẹ gbega ọyokhọnlẹn, iriọ urẹọbhọ nọnsẹmhan ha yẹ rẹ rẹkpa mhan rẹ fuẹn ifẹnmhẹn ọsi Esu a. (Eph. 6:16) Rẹ deba urẹọbhọ, ọ yẹ khẹke nin mhan ha mhọn oyẹẹ. Bezẹle? Ranmhude, ọria nọn mhọn oyẹe ikẹ re ohu. Ọle sabọ ziẹngbe ọnọghọ nọn hi ki rẹ khin nin ọle miẹn bhi egbe. (1 Cor. 13:​4-7, 13) Bha ji mhan fẹghe ebi oyẹẹ nin mhan mhọn da Jehova, eghian mhan, bi ibhio mhan nin mhan ko ga ha rẹ rẹkpa mhan rẹ ziẹngbe sade ẹbho he mhan.

5. Be oyẹẹ nin Jesu mhọn da Aba ọle rẹ rẹkpa ọle yẹ?

⁵ Ọne ukpasọn ọkuẹsẹ eghian iJesu gbe ọle a, Jesu da taman ene rẹkhan ọlẹn yọle: “Mẹn lu beji aba mẹn taman mẹn tee, . . . [ranmhude] mẹn hoẹmhọn Aba mẹn.” (John 14:31) Oyẹẹ nin Jesu mhọn da iJehova da rẹkpa ọle rẹ sabọ ziẹngbe ọnọghọ nin ọle miẹn. Oyẹẹ nin mhan mhọn da iJehova dẹ yẹ sabọ rẹkpa mhan rẹ ziẹngbe ọnọghọ nin mhan miẹn.

6. Beji Romans 5:​3-5 rẹman, be ẹbho ne ga iJehova lu yẹ ahamiẹn ẹbho ne ribhi ọne agbọn nan he ele?

⁶ Rẹ na bhi ẹghe ẹdẹlẹ ha vade, ọle ẹbho ne ga Osẹnobulua rẹ sabọ ha ziẹngbe ekpokpo ranmhude oyẹẹ nin ele mhọn da Osẹnobulua. Bhi ọsi ijiẹmhin, ẹghe nin ẹbho ne mun ọkalo bhi ẹwẹ ibhokhan iJew rẹ taman etuegbe nesi Jesu nin ele hẹi yẹ tẹmhọn Osẹnobulua, ele da ranmhude oyẹẹ nin ele mhọn da Osẹnobulua taman ele ghe, Osẹnobulua ele ha hẹnmhọn nan, ọ iyi eria. (Acts 5:29; 1 John 5:3) Ẹlẹnan nian, oyẹẹ nin ibhio mhan mhọn da iJehova, ọle rẹkpa ele rẹ sẹyẹ sabọ ha ga Ọle aharẹmiẹn ghe, ene gbẹloghe kpokpo ele. Aharẹmiẹn ghe, ẹbho bhi ọne agbọn nan kpokpo mhan, mhan ida ji egbe lọ mhan. Mhan bhọ ki re eghọnghọn ha ziẹngbe ọle.​—Acts 5:41; tie Romans 5:​3-5.

7. Be ọkhẹke nin mhan lu yẹ ahamiẹn ene ribhi azagba-uwa mhan kpokpo mhan?

⁷ Ekpokpo nin mhan miẹn bhi obọ ene ribhi azagba-uwa mhan dẹ sabọ ha yi ekpokpo nọn nọghọ nẹ nan rẹ ziẹngbe ọle. Ahamiẹn mhan munhẹn ha luẹ ẹmhọn iJehova, eso bhi ene ribhi azagba-uwa mhan sabọ ha riale ghe, mhan ho nin mhan dọ nabhi oga ohoghe. Eso sabọ yẹ ha riale ghe, uhọnmhọn mhan bha yẹ gba. (Yẹ fẹ Mark 3:21 ghe.) Bhiriọ, ele ki ha re obọ nọn kaka mun mhan. Ọ bha khẹke nọn han mhan ilo ghe, ele re inian ha nin mhan lu emhin. Bezẹle? Ranmhude Jesu yọle: “Ẹkẹ azagba-uwa nọnsi ọria, ọle oghian ọlẹn ha na vae.” (Matt. 10:36) Bhi ọsi ẹmhọanta, uwedẹ nọn hi ki rẹ khin nin ene ribhi azagba-uwa mhan rẹ nin mhan lu emhin, mhan ida ha ghe ele bii eghian mhan. Sokpan, beji oyẹẹ nin mhan mhọn da Jehova ha rẹ ha ziẹn ọbhọ, iriọ oyẹẹ nin mhan mhọn da ẹbho ha yẹ rẹ ha ziẹn ọbhọ. (Matt. 22:​37-39) Ọrẹyiriọ, mhan ida fikeke gbe adia ne ribhi Baibo ranmhude mhan ho nin mhan re eria ha ghọnghọn.

8-9. Be rẹkpa obhio mhan ọkpa rẹ sabọ ha mhọn urẹọbhọ nọn ziẹnlẹn arẹmiẹn ọle kuẹlo da ekpokpo?

⁸ Georgina nin mhan ka tẹmhọn ọlẹn, da dọnmhegbe rẹ mun oga nọnsi Jehova mhọn arẹmiẹn inẹn ọlẹn wo manman ha kpokpo ọle. Ọle da yọle: “Ẹghe ọkpa mẹn bi inẹn mẹn rẹ ko munhẹn  deba Esali Jehova ha luẹ iBaibo. Uki ehan ki gbera, mẹn da ha guanọ nin mẹn ha yo ikolo oga. Ọkpakinọn, inẹn mẹn bha re obọ ọbhọ, ọle da ha kpokpo mẹn. Mẹn da dọ luẹ kere ghe, ọle dọ ha re ehọ ọbhi ọta ọsi ene de sibhi oga re. Ọle da dọ ha noo ọta nin ọle họn bhi unun ele rẹ nin mẹn gbugan. Ọle ki ha ghunmhun mẹn, si mẹn eto, piẹn mẹn uru, yẹ ne ebe nesẹmhẹn kua. Mẹn ki sẹ bhi ikpe 15, mẹn da mianmẹn. Ranmhude inẹn mẹn guanọ nin mẹn zobọ bhi oga nọnsi Jehova, ọle da re mẹn ha khian uwa nan ne elasẹre ne wo bhi uhọnmhọn ọi. Eso bhi ene elasẹre nan ki wo ha noo ikpẹ-ikhunmhun ne imhẹn yẹ lu emhin ọbe kẹkẹ. Ọ iyi emhin nọn lẹkhẹ nin uwẹ rẹ ziẹngbe ekpokpo bhi obọ ọria nọn khẹke nin ọle hoẹmhọn uwẹ.”

⁹ Be rẹkpa Georgina rẹ sabọ ziẹngbe? Ọle da yọle: “Ukpẹdẹ nin mẹn tie Baibo rebhe fo, ẹdẹnin inẹn mẹn munhẹn ha kpokpo mẹn. Bhi ọne ẹghe nan, mẹn da wo dọ rẹọbhọ ghe, mẹn miẹn oga ẹmhọanta. Mẹn da wo yẹ manman dọ sikẹ iJehova. Ẹghe rebhe mẹn wo rẹ ha nan erọnmhọn je ọle. Ọle da wo yẹ ha wanniẹn mẹn. Ẹghe nin mẹn ki rẹ ha nyẹnlẹn bhi eji inẹn mẹn re mẹn ọi, obhio mhan ọkpa da tie mẹn vae bhi uwa nọnsọle. Mhan da wo yẹ ko tie Baibo kugbe. Bhi ọne ẹghe nan, ibhio mhan nin mhan ko ga da wo ha re izebhudu nin mẹn. Ele da wo manman miẹn mẹn ọbhi egbe. Ọnan da wo rẹman mẹn ghe, Jehova mhọn ahu nẹ ọria nọn hi ki rẹ khin nọn kpokpo mhan.”

10. Be ọkhẹke nin mhan ha mhọn bhi ọkhọle ghe Jehova dẹ lu nin mhan?

¹⁰ Paul nin odibo da gbẹn yọle ghe, emhin soso ida sabọ “ne mhan sibhi oyẹẹ nọnsi Osẹnobulua re.” (Rom. 8:​38, 39) Aharẹmiẹn ghe, mhan dẹ loya bhi ẹgheso, Jehova dẹ ha ko mhan udu re, yẹ re ahu nin mhan. Beji okha nọnsi Georgina rẹman, Jehova dẹ yẹ noo ibhio mhan nin mhan ko ga rẹ rẹkpa mhan.

11. Be oyẹẹ nin Jesu tẹmhọnlẹn bhi John 15:​12, 13 ha rẹ rẹkpa edibo nesọle yẹ? Re ijiẹmhin man.

¹¹ Ọne ukpasọn ọkuẹsẹ Jesu yu, ọle da taman edibo nesọle ghe, nin ele hoẹmhọn egbe ele. (Tie John 15:​12, 13.) Ọle lẹnmhin ghe, ahamiẹn ele mhọn oyẹẹ nọn ibeghe da egbe, ọ ki rẹkpa ele rẹ sabọ ha mhọn okugbe. Sẹyẹ, ele ki yẹ sabọ ziẹngbe ekpokpo nin ele ha miẹn bhi obọ ẹbho. Bha ji mhan fẹ ebe sunu ji agbotu nọn ribhi Thessalonica ghe. Rẹ na bhi ẹghe nan rẹ mun ọne agbotu nan gbọ, ọle ene ribhọ rẹ wo ha miẹn ekpokpo bhi egbe. Ọrẹyiriọ, ene ha ribhi ọne agbotu da wo ha yi ijiẹmhin ọsi ẹbho ne mhọn iziẹngbe bi oyẹẹ. (1 Thess. 1:​3, 6, 7) Paul da taman ele ghe, nin ele hẹi zobọ bhọ rẹ ha re oyẹẹ  man. Nin ele wo manman ha re ọle man gbera ọnikhẹ. (1 Thess. 4:​9, 10) Oyẹẹ ha re ele sabọ ha rẹkpa ene wẹghẹ, bi ene egbe lọ le bhi ẹwẹ ele. (1 Thess. 5:14) Ele da wo re obọ rẹkhan ebi Paul taman ele. Mhan lẹn ọnan ranmhude, ọ ki ha bu ukpe ọkpa nin Paul ka gbẹn ebe ji ele, ọle da gbo kie gbẹn je ele yọle: “Oyẹẹ nin bha mhọn da egbe wo ha tuẹn okhun.” (2 Thess. 1:​3-5) Oyẹẹ nin ele ha mhọn bhi ẹwẹ ele da wo rẹkpa ele ziẹngbe ọnọghọ, bi ekpokpo nin ele miẹn.

12. Be ibhio mhan rẹ re oyẹẹ man yẹ bhi ẹghe nin okhọn rẹ de bhi agbaẹbho ọkpa?

¹² Bha ji mhan fẹghe ebe sunu ji obhio mhan nin Danylo nin mhan ka tẹmhọn ọlẹn, bi okhuo ọle. Arẹmiẹn okhọn de bhi eji ele da nyẹnlẹn, ele da wo sẹyẹ ha yo ikolo oga, yẹ ha lu eka nin ele ha sabọ lu bhi iwẹnna itẹmhọn Osẹnobulua. Sẹyẹ, ele da yẹ ha gha ebale nin ele mhọnlẹn nin ibhio ele nin ele ko ga. Ẹdẹ ọkpa, eyokhọnlẹn da bu Danylo re. Be bhọ ele ki taman ọlẹn? Danylo da yọle: “Ele da taman mẹn ghe, nin mẹn zobọ bhi oga nọnsi Jehova. Mẹn ki he, ele da gbe mẹn, yẹ man lu ghe ele ho nin ele fi mẹn, sokpan, ele bha fi mẹn. Ọkuẹsẹ ele kpanọ, ele da yọle ghe ele dẹ kie vae, ghe ele ha vae, ele dẹ mun okhuo mẹn ho. Ibhio mhan nin mhan ko ga da wo re ẹjẹje ne mhan ọbhi itrain ha khian agbaẹbho ọbhebhe. Mẹn ida yelea ghee, oyẹẹ nin ene ibhio mhan nan rẹman mhan. Mhan ki sẹbhi enin, ibhio mhan ne ribhi enin da wo miẹn mhan ọbhi egbe, yẹ ne ebale nin mhan. Ele da yẹ rẹkpa mẹn guanọ iwẹnna bi uwa nin mhan da ha dia. Ranmhude ọnan, mhan da yẹ sabọ ha rẹkpa ibhio mhan nin okhọn yẹ khu bhi eji ele da nyẹnlẹn.” Ijiẹmhin ne sẹnian rẹkpa mhan rẹ lẹn ghe, oyẹẹ nin mhan mhọn dẹ sabọ rẹkpa mhan rẹ ziẹngbe ekpokpo.

13. Be ahu ẹlinmhin nọn khiale ha rẹ rẹkpa mhan rẹ ziẹngbe yẹ ahamiẹn ẹbho kpokpo mhan?

¹³ Jesu da taman edibo nesọle nin ele ha hoẹmhọn eghian ele. (Matt. 5:​44, 45) Ọnan iyi emhin nọn lẹkhẹ nan rẹ lu. Ọkpakinọn, mhan dẹ sabọ lu ọle sade ahu ẹlinmhin nọn khiale nọnsi Osẹnobulua rẹkpa mhan. Ahu ẹlinmhin nọn khiale nọnsi Osẹnobulua, rẹkpa ọria mhọn ikpẹ bọsi oyẹẹ, iziẹngbe, ifuẹkẹ, ẹkẹ nọn fu, bi imun-egbe-ọbhi-ibẹẹ. (Gal. 5:​22, 23) Ene ikpẹ nan rẹkpa ọria rẹ sabọ ha ziẹngbe ekpokpo. Ẹbho ne bunbun ne ka rẹ ha kpokpo mhan khẹ iyẹ kpokpo mhan nian ranmhude, ọdọ ele, okhuo ele, ọmọn nọnsele, la ediake nọnsele nin ele ka rẹ ha kpokpo ne ga iJehova, lu ele nọnsẹn. Ahamiẹn ọnọghọ uwẹ rẹ ha hoẹmhọn ẹbho ne kpokpo uwẹ ranmhude uwẹ ga iJehova, bhii Jehova nin ọle re ẹlinmhin nọn khiale nọnsọle nin uwẹ.  (Luke 11:13) Ha mhọn ọlẹn bhi ọkhọle ghe, nin mhan rẹ ha ga iJehova, ọle hi uwedẹ nọn mhẹn nẹ.​—Prov. 3:​5-7.

14-15. Be ọta ne ribhi Romans 12:​17-21 rẹ rẹkpa Yasmeen yẹ, nin ọle da sẹyẹ ha re oyẹẹ man ọdọ ọle arẹmiẹn ọdọ ọle kpokpo ọle?

¹⁴ Bha ji mhan fẹ ijiẹmhin ọsi Yasmeen ghe nọn nyẹnlẹn bhi Middle East. Ẹghe nin ọle rẹ kiẹn ọkpa bhi Esali Jehova, ọdọ ọle da ha riale ghe ọle deba oga ohoghe. Ọle da ha kpokpo ọle nin ọle zobọ bhi oga nọnsi Jehova. Ọle da ha ghunmhun ọlẹn. Sẹyẹ, ọle da tie ibhio ọle, ọnọn mun ọkalo bhi otuẹ, bi ọbọ vae nin ele dọ gbe ofẹn ọle bhi ẹkẹ, yẹ ha taman ọlẹn ghe ọle ho nin ọle zakha azagba-uwa nọnsọle a. Ọdọ ọle bhọ da yẹ vae dọ ha ghunmhun ibhio mhan bhi eji ele da do ikolo oga. Ẹghe rebhe Yasmeen rẹ viẹ ranmhude uwedẹ nin ọdọ ọle rẹ nanlẹn lu emhin.

¹⁵ Bhi Kindọn Họọ, ibhio mhan ki wo ha ko Yasmeen udu re, yẹ re izebhudu nanlẹn. Ewanlẹn bhi agbotu da taman ọlẹn nin ọle dọnmhegbe rẹ re obọ rẹkhan ọta ne ribhi Romans 12:​17-21. (Tie ọle.) Yasmeen da yọle: “Ọnan bha ha yi emhin nọn lẹkhẹ. Ọkpakinọn, mẹn da bhii Jehova nin ọle rẹkpa mẹn. Mẹn da yẹ wo dọnmhegbe ha re obọ rẹkhan adia ne ribhi Baibo. Bhiriọ, ọdọ mẹn ha re ohu zakha iku ọbhi kitchen, mẹn ki gbọnọ ọle a. Ọle ha ghunmhun imẹn, mẹn ki re ekpẹn rẹ wanniẹn ọlẹn. Sẹyẹ, ahamiẹn ọle khọnmhọn, mẹn ki gbẹloghe ọle.”

16-17. Be uwẹ miẹn luẹ bhi okha nọnsi Yasmeen?

¹⁶ Yasmeen da miẹn elele ranmhude ọle sẹyẹ ha re oyẹẹ man ọdọ ọle. Ọle da yọle: “Ọdọ mẹn da wo kie dọ manman ha gbaẹkẹ mẹn. Ranmhude ọle lẹnmhin ghe, mẹn ida bha ohoghe man ọlẹn. Ọle ki re ekpẹn ka mẹn ehọ nian sade mhan ko tẹmhọn oga. Ọle bhọ da muegbe nin ọle rẹ ha lu emhin nọn ha si ọfure re bhi uwa. Ọle bhọ hi ọnọn ki taman mẹn nian nin mẹn ha khian ikolo oga. Bhi ejayenan nian, mẹn bi ọdọ mẹn ki wo ko lu emhin kugbe bhi uwa. Mhan ki wo mhọn ọfure. Mẹn wo khuaẹloghe ọne ẹghe nin ẹmhọanta nọnsi Jehova ha rẹ sẹ ọdọ mẹn otọ ẹkẹ nin ọle da dọ deba mẹn ha ga iJehova.”

¹⁷ Ijiẹmhin ọsi Yasmeen rẹman ghe oyẹẹ sabọ “miẹn emhin rebhe ọbhi egbe, . . . ọ mhọn ikhuaẹloghe da emhin rebhe, ọ ziẹngbe emhin rebhe.” (1 Cor. 13:​4, 7) Ọ ba mhan bhi egbe sade ẹbho kpokpo mhan. Ọkpakinọn, oyẹẹ dẹ rẹkpa mhan rẹ sabọ ziẹngbe. Ahamiẹn mhan mhọn oyẹẹ da ẹbho ne kpokpo mhan, ọ dẹ sabọ re ele fi ọkhọle denọ nin ele hẹi yẹ kpokpo mhan. Ahamiẹn mhan re inian ha re oyẹẹ man, Jehova ki wo ha ghọnghọn. Ọkpakinọn, aharẹmiẹn ẹbho bha zobọ bhọ rẹ ha kpokpo mhan, mhan dẹ sabọ sẹyẹ ha ghọnghọn. Be ọnan ha rẹ sabọ sunu yẹ?

18. Bezẹle nin mhan ha da sabọ ha ghọnghọn aharẹmiẹn a kpokpo mhan?

¹⁸ Jesu da yọle: “Eghọnghọn hi ọsẹbha ẹghe nọn hi ki rẹ khin nin ẹbho rẹ he bha.” (Luke 6:22) Ọ iyẹẹ mhan ahamiẹn ẹbho kpokpo mhan. Bhiriọ, bezẹle nin mhan ha da sabọ ha ghọnghọn ahamiẹn ẹbho kpokpo mhan? Emhin ea ne zẹle hi: Ọhẹnhẹn, ahamiẹn mhan sabọ ziẹngbe ekpokpo, Osẹnobulua ki ha re ẹlo esili ghe mhan. (1 Pet. 4:​13, 14) Ọzeva, ekpokpo dẹ sabọ re urẹọbhọ nọnsẹmhan kie ha ziẹn ọbhọ. (1 Pet. 1:7) Ọzea, mhan ha sabọ ziẹngbe ekpokpo sotọ, Osẹnobulua ki re iẹnlẹn ighegheghe nin mhan.​—Rom. 2:​6, 7.

19. Bezẹle nin edibo nesi Jesu da sẹyẹ ha ghọnghọn arẹmiẹn a gbe ele?

¹⁹ Ọ bha sẹ bue egbe nin Jesu riọkpanọ ha khian okhun, edibo nesọle da miẹn eghọnghọn nin ọle yọle ọ dẹ nabhọre sade a kpokpo ele. Ẹghe nan rẹ gbe ele yẹ taman ele nin ele hẹi yẹ tẹmhọn Osẹnobulua, ele da wo ha ghọnghọn. Bezẹle? “Ranmhude a ka ele ba ene a re oya nan ranmhude elin [nọnsi Jesu].” (Acts 5:​40-42) Ranmhude ele wo manman hoẹmhọn Jesu nin Ebeanlẹn nọnsele, ele bha ha manman mun ofẹn eghian ele. Ele da re ọne oyẹẹ nan man bhi uwedẹ nin ele bha ka rẹ zobọ bhọ rẹ ha tẹmhọn Osẹnobulua. Ẹlẹnan nian, ibhio mhan ne bunbun sẹyẹ wo ga iJehova arẹmiẹn ele kuẹlo da ọnọghọ kikẹ. Ele lẹn sẹbhọ ghe, Jehova ida yele iwẹnna nọnsele a, bi oyẹẹ nin ele mhọn da elin nọnsọle.​—Heb. 6:10.

20. Be imhan ha zilo nyan bhi uhọnmhọn-ọta nọn ki sẹ ọle bhi egbe?

²⁰ Ẹbho bhi ọne agbọn nan dẹ wo he mhan rẹ sẹbhi ẹghe nin Jehova ha rẹ dọ fuẹn ọlẹn an. (John 15:19) Ọkpakinọn, mhan ida ji ofẹn ha mun mhan. Bhi uhọnmhọn-ọta nọn ki sẹ ọle bhi egbe, mhan dẹ zilo nyan ebi Jehova rẹ re ahu nin ẹbho nesọle yẹ, bi ebi ọle rẹ gbega ele yẹ. (2 Thess. 3:3) Bhiriọ, bha ji mhan ha hoẹmhọn iJehova, ibhio mhan nin mhan ko ga, bi eghian mhan. Mhan ha lu iriọ, okugbe nọn ribhi ẹwẹ mhan ki wo manman ha ziẹn ọbhọ. Mhan ki yẹ manman sikẹ iJehova nọnsẹn. Sẹyẹ, mhan ki yẹ ha re ogẹn ji Jehova. Mhan ki yẹ rẹman ghe, oyẹẹ dẹ rẹkpa mhan rẹ sabọ khọn ekpokpo miotọ.