JESU tale ghe, bhi ẹghe ọkpẹnlẹn, ene rẹkhan ọlẹn dẹ wo manman miẹn emhin ha rọ bhi ẹmhọn Osẹnobulua nin ele kọ. (Matt. 9:37; 24:14) Bha ji mhan zilo nyan uwedẹ nin ọta nọnsọle sẹ rẹ mun sẹ yẹ bhi agbaẹbho natiọle Transcarpathia nọn ribhi Ukraine. Agbotu 50, ọle ribhi agbaẹbho ea ne sikẹ egbe ne ribhi Transcarpathia. Ọ gbera Esali Jehova 5,400 * ne ribhi ene agbaẹbho ea nan. Uwẹ ha ku ẹbho rebhe ne ribhi ene agbaẹbho ea nan kugbe, uwẹ dẹ ha miẹn Ọsali Jehova bhi ẹwẹ itu enẹn!

Ẹbho ne ribhi ene agbaẹbho nan be re ehọ bhi ẹmhọn Osẹnobulua? Obhio mhan ọkpa natiọle Vasile nọn nyẹnlẹn bhi enin da yọle: “Ene ẹbho manman mun ekpẹn nin Baibo. Ọ ti ele bhọ rẹ lu emhin bhi uwedẹ nọn diale, ene ko ribhi azagba-uwa ọkpa wo manman sikẹ egbe, sẹyẹ, ele wo gene dọnmhegbe rẹ rẹkpa ọdeọde. Ọiyi iman-emhin nesẹmhan rebhe ele rẹọ. Ọrẹyiriọ, uwẹ ha re emhin man ele bhi Baibo, ele ki ka uwẹ ehọ nọnsẹn.”

Arẹmiẹn Esali Jehova wo bun bhi ene agbaẹbho nan, ọnọghọ yẹ wo ribhọ nin ele miẹn sade ele tẹmhọn Osẹnobulua. Bhi ọsi ijiẹmhin, uwa 50 ọkpa ribhi eji agbotu ọkpa da tẹmhọn Osẹnobulua, ọkpakinọn, itue 134 ribhi ọne agbotu! Be bhọ ene ibhio mhan ki lu yẹ?

Ibhio mhan ne bunbun dọnmhegbe nin ele dọ tẹmhon Osẹnobulua bhi eji a da guanọ urẹkpa bhi iwẹnna itẹmhọn Osẹnobulua. Obhio mhan natiọle Ionash nọn yi ikpe 90 da tale ghe, uwẹ ha gha uwa ne ribhi eji agbotu nọnsele da tẹmhọn Osẹnobulua nin ẹbho rebhe bhi ọne agbotu, uwa eva ọkpa ha sẹ ọdeọde obọ. Ọ da yọle: “Ẹghe nin egbe rẹ daan mẹn, mẹn ki ha noo urolo Hungarian rẹ ha tẹmhọn Osẹnobulua bhi agbaẹbho nin a bha da sẹ manman tẹmhọn Osẹnobulua, nọn ree sẹbhi ukpọwala 100 (100 miles la 160 km).” Esali Jehova wo zegbere nin ele rẹ re obọ kpa bhi ọne iwẹnna itẹmhọn Osẹnobulua bhi agbaẹbho ebhebhe. Ionash da yẹ yọle: “Agogo enẹn mẹn rẹ riọ bhi owe ọsewewiẹ nin mẹn da sabọ miẹn train nai rẹ ha khian. Mẹn ki tẹmhọn Osẹnobulua sẹbhi agogo ehan ọsemuan ẹghe nin ọne train ha ki rẹ ha vade uwa. Ikpẹdẹ eva la ea bhi uzana mẹn rẹ lu ọnan.” Ọle be miẹn elele bhọ? Ọle da yọle: “Mẹn wo miẹn eghonghọn bhi iwẹnna itẹmhọn Osẹnobulua, mẹn yẹ sabọ dọ rẹkpa azagba-uwa ọkpa dọ lẹn Osẹnobulua.”

Ẹmhọanta nọn ghe, ọiyi ẹbho rebhe bhi agbotu ha sabọ ha yo eje manman ree dọ ha tẹmhọn Osẹnobulua. Ọrẹyiriọ, ẹbho rebhe ne ribhi agbotu, rẹsẹbhi ene ki manman bue bhi ẹkẹ ọle, yẹ wo dọnmhegbe nin ele rẹ re ẹmhọn Osẹnobulua sẹbhi eji a gha nin ele. Ranmhude ọnan, ẹbho ne vae bhi Ayere ọsi Uyumhin nọnsi Jesu bhi ukpe 2017 bhi ene agbaẹbho ea nan, wo manman bun gbera Esali Jehova ne ribhi enin. Edandan i ribhọ ghe eji imhan i ki rẹ ha yẹ, ẹsọn yẹ wo ribhọ nin mhan ha miẹn bhi iwẹnna nọnsi Jehova.—1 Cor. 15:58.