1, 2. (a) Emhin nela Jesu taman edibo nesọle ọkuẹsẹ ọle yu? (Fẹ adudu nọn ribhi eji a da munhẹn ghe.) (b) Bezẹle nọn da khẹke nin mhan ha yere ebezẹle nin mhan da tẹmhọn Osẹnobulua? (c) Emhin nela mhan ha zilo nyan?

ỌNE ukpasọn ọkuẹsẹ Jesu yu, ọle da ne ituegbe nesọle zilo, ọle da taman ele ghe ọle manman hoẹmhọn ele. Beji mhan luẹle bhi uhọnmhọn-ọta nọn gbera, ọle da re okporan rẹ lu ijiẹmhin nin ele. Ọle da noo ọne ijiẹmhin nan rẹ re izebhudu nin ele ghe nin ele ha “mọn ikpẹ ne bunbun.” Ebi ọle re ọnan ta hi, nin ele ha re iziẹngbe rẹ tẹmhọn Agbejele.—John 15:8.

² Ọkpakinọn, ọiyi ebi ele ha lu ọkpa Jesu taman edibo nesọle, ọle da yẹ taman ele ebezẹle nin ele ha da lu ọle. Ọle da taman ele ebezẹle nin ele ha da ha tẹmhọn ọne Agbejele. Bezẹle nọn da khẹke nin mhan zilo nyan emhin nin Jesu tale? Ranmhude, mhan ha lẹn ebezẹle nọn da khẹke nin mhan ha tẹmhọn Agbejele, mhan ki sabọ ha tale nanbhi agbaẹbho rebhe. (Matt. 24:13, 14) Bhiriọ, bha ji mhan zilo nyan emhin enẹn nin Baibo tẹmhọnlẹn nọn zẹle nin mhan da tẹmhọn Agbejele. Sẹyẹ, mhan ki dọ fẹ emhin enẹn ghe nin Jehova rẹ rẹkpa mhan, nin mhan da sabọ ha re iziẹngbe lu ọne iwẹnna nan.

3. (a) Be John 15:8 yọle ọ zẹle nin mhan ha da ha tẹmhọn Osẹnobulua? (b) Bhi ijiẹmhin nọnsi Jesu, be ene ikpẹ nin ọne oran mọn mundia nan? Bezẹle nin Jesu da re ọne ikpẹ khọkhọ ọle?

³ Emhin nọn manman zẹ mhan tẹmhọn Osẹnobulua, ọle hi nin mhan rẹ re ogẹn ji Jehova, yẹ kpe elin nọnsọle khia. (Tie John 15:1, 8.) Jesu da re Aba ọle khọkhọ ọria nọn mun ugbo ọsi emhin ekọnọ. Jesu da re egbe ọle khọkhọ ọne okporan, ọle da re ene rẹkhan ọlẹn khọkhọ ikpabọ ọsi ọne okporan. (John 15:5) Bhiriọ, ọne ikpẹ ọsi ọne oran mundia nin ẹmhọn Agbejele nin ene rẹkhan Jesu ta. Jesu da taman ituegbe nesọle yọle: “Ọ wo re ogẹn ji Aba mẹn sade bha mọn ikpẹ ne bunbun.” Beji okporan nọn mọn ikpẹ nọnsẹn rẹ re ọnọn nyan ọlẹn ghọnghọn, iriọ Jehova yẹ rẹ ghọnghọn sade mhan re ahu nọnsẹmhan rebhe rẹ ha tẹmhọn Agbejele.—Matt. 25:20-23.

4. (a) Uwedẹ nela mhan ha rẹ sabọ re itọn kie bhi elin nọnsi Jehova? (b) Isẹhoa nin uwẹ mhọn nin uwẹ rẹ re itọn kie bhi elin nọnsi Jehova be ti uwẹ bhọ?

⁴ Elin nọnsi Osẹnobulua wo manman khia, mhan bha miẹn emhin ọbhebhe nin mhan ha lu rẹ kie kpe ọle khia. Bhiriọ, be iwẹnna itẹmhọn Osẹnobulua nin mhan lu rẹ re itọn sibhi elin nọnsọlẹ re yẹ? Isaiah nin akhasẹ da yọle: “Jehova ọsi eyokulo—ọle ibha ha ghe bọsi ọria nọn khiale.” (Isa. 8:13) Ọkpa bhi ene uwedẹ nin mhan ha rẹ re itọn sibhi elin nọnsi Osẹnobulua re hi sade mhan re ẹlo ikẹ ghe ọne elin, bi sade mhan yẹ rẹkpa ẹbho rẹ ha ghe ọle bọsi elin nọn khiale. (Matt. 6:9, ftn.) Bhi ọsi ijiẹmhin, mhan da ha wewe ikpẹ bi iho nesi Jehova man ẹbho, mhan ki sabọ ha re itọn nin Ojuu rẹ sin ọne elin kie. (Gen. 3:1-5) Sẹyẹ, mhan dẹ re itọn kie bhi elin nọnsi Jehova sade mhan rẹkpa ẹbho rẹ lẹn ghe ọle “ọkhẹke nọn ha miẹn ọne uyi, ọghọ bi ahu.” (Rev. 4:11) Obhio mhan natiọle Rune nọn sẹ lu iwẹnna ọkanẹfan nanbhi ikpe 16 da yọle: “Isẹhoa nin mẹn mhọnlẹn rẹ ha sọsali nin ọnọn man otọ bi okhun wo gene ti mẹn bhọ. Ọnan zẹle nọn da yẹẹ mẹn rẹ ha lu iwẹnna itẹmhọn Osẹnobulua.”

5. (a) Be John 15:9, 10 tẹmhọnlẹn nọn zẹle nin mhan ha da ha tẹmhọn Osẹnobulua? (b) Be iJesu rẹ rẹman yẹ ghe ọkhẹke nin mhan ha mhọn iziẹngbe?

⁵ Tie John 15:9, 10. Emhin ọbhebhe nọn zẹle nin mhan da tẹmhọn Agbejele, ọle hi oyẹẹ nin mhan mhọn dai Jehova bi Jesu. (Mark 12:30; John 14:15) Jesu bha wo gheghe taman edibo nesọle ghe nin ele vae bhi oyẹẹ nọnsọle, ọle da taman ele ghe nin ele ha ribhi oyẹẹ nọnsọle. Bezẹle nin ọle da ta iriọ? Ranmhude, iziẹngbe ha sabọ rẹkpa ọria rẹ ha nyẹnlẹn bhi uwedẹ nọn khẹke nin iKristiẹn rẹ ha nyẹnlẹn ukpẹdẹ-ukpẹdẹ. Jesu wo manman noo ọne ọta nọn yọle “ha ribhi” bhi ọta nin ọle tale bhi John 15:4-10, nin ọle rẹ ji edibo nesọle lẹn ghe ọkhẹke nin ele ziẹngbe.

6. Be imhan ha rẹ rẹman yẹ ghe mhan ho nin mhan ha ribhi oyẹẹ nọnsi Jesu?

⁶ Mhan da ha re obọ rẹkhan uhi nesi Jesu, mhan ki ha rẹman ghe mhan guanọ nin mhan ha ribhi oyẹẹ nọnsọle, beji ọle ha da sabọ re ẹlo esili ha ghe mhan. Jesu taman mhan yọle, ‘Bha ha lu rẹkhan ebi mẹn tale.’ Bhi ọsi ẹmhọanta, emhin nin Jesu lu, ọle Jesu yọle nin mhan lu. Ọle bhọ da tale ghe: ‘Mẹn lu rẹkhan uhi nọnsi Aba mẹn nin mẹn da ha ribhi oyẹẹ nọnsọle.’ Jesu wo re ijiẹmhin esili man.—John 13:15.

7. Be ihẹnmhọn bi oyẹẹ rẹ rẹso yẹ?

⁷ Ranmhude oyẹẹ bi ihẹnmhọn wo manman sikẹ egbe, Jesu da yọle, “Ọria nọn irẹ khin nọn lẹn uhi nesẹmẹn, nọn yẹ re obọ rẹkhan ọlẹn, ọle ọria nọn hoẹmhọn mẹn.” (John 14:21) Imhan da ha guanọ  nin mhan rẹman ghe mhan gene hoẹmhọn Jehova bi Jesu, mhan ki lu rẹkhan uhọnmhuje nin Jesu je mhan le, ranmhude ọta nin Jesu tale rẹman ebe ribhi ọkhọle nọnsi Jehova. (Matt. 17:5; John 8:28) Jehova bi Jesu dẹ rẹkpa mhan rẹ ha ribhi oyẹẹ nọnsele.

8, 9. (a) Emhin ọbhebhe nela zẹle nin mhan da tẹmhọn Osẹnobulua? (b) Bezẹle nin ọta nọnsi Jehova nọn ribhi Ezekiel 3:18, 19 bi 18:23 da ze mhan udu rẹ ha tẹmhọn ọlẹn?

⁸ Emhin ọbhebhe yẹ ribhọ nọn ha zẹ mhan bha zobọ bhi itẹmhọn Osẹnobulua. Mhan tẹmhọn Osẹnobulua man ẹbho nin mhan rẹ sekhae nin ele. Baibo da tie Noah “ọria nọn tẹmhọn Osẹnobulua.” (Tie 2 Peter 2:5.) Ẹmhọn Osẹnobulua nin Noah ha tẹmhọnlẹn ọkuẹsẹ ọne okpamẹn rọle, da yẹ dọ ha yi isekhae rẹji ene ẹbho. Bezẹle nin mhan da ta iriọ? Ranmhude Jesu yọle: “Beji ele ha ye bhi ene ikpẹdẹ nin, ọkuẹsẹ ọne ologho amẹn vae, ele da ha le ebale yẹ da anyọn. Ikpea da ha ne ikhuo, a da ha ne ikhuo nin ọdọ. Ọkuẹsẹ ukpẹdẹ nin Noah nanbhi ẹkẹ ọne okọ; ele bha gbẹlokotọ ọkuẹsẹ ọne Ologho amẹn vae dọ gbono ele rebhe kie, iriọ ẹghe ọsi Ọmọn nọnsi okpea ha yẹ dia.” (Matt. 24:38, 39) Arẹmiẹn ghe ẹbho bha guanọ nin ele kaehọ, Noah da yẹ dọnmhegbe rẹ ha ta ọne ẹmhọn nin Osẹnobulua je ọle.

⁹ Ẹlẹnan nian, mhan wo yẹ tẹmhọn Agbejele man ẹbho nin ele da sabọ lẹn iho nọnsi Osẹnobulua. Jehova guanọ nin ẹbho re ehọ bhi ọne ẹmhọn nan, nin ele da sabọ ha nyẹnlẹn. Iriọ yẹ imhan. (Ezek. 18:23) Bhiriọ, mhan da ha tẹmhọn Osẹnobulua rẹ nanbhi uwa rẹsẹbhi uwa la bhi ogbakha, mhan ki ha sekhae man ẹbho ghe, Agbejele nọnsi Osẹnobulua dẹ vae dọ kpẹn ọne agbọn ọsi Esu nan.—Ezek. 3:18, 19; Dan. 2:44; Rev. 14:6, 7.

10. (a) Be Matthew 22:39 tale ghe ọ zẹle nin mhan ha da ha tẹmhọn Osẹnobulua? (b) Gbotọle fanọan ebi Paul bi Silas rẹ rẹkpa ọnọn gbẹloghe ighan yẹ bhi Philippi.

¹⁰ Emhin ọbhebhe nọn zẹle mhan tẹmhọn Osẹnobulua, ọle hi: Ranmhude mhan hoẹmhọn ẹbho. (Matt. 22:39) Ọne oyẹẹ nan zẹle mhan bha zobọ bhi ọne ẹsọn nan. Iẹnlẹn ha fidenọ nin ẹbho, ọnan sabọ re ele ha guanọ nin ele họn ẹmhọn nọnsi Osẹnobulua. Nin mhan dọ fẹghe ebe sunu ji Paul bi Silas bhi agbaẹbho natiọle philippi. Ene bha ghanọ ne henmhọn osẹnobulua da mun ele fiọ bhi ighan. Ọsasọn ẹdẹnin, otọ da wo mun lueghe, odẹ ọsi ọne ighan da tujea. Ọnọn ha gbẹloghe ọne ighan da rẹ ha guanọ nin ọle gbegbea, ranmhude ọle rẹ ha riale ghe Paul bi Silas nẹgbe. Paul da reso taman ọlẹn: ‘Hẹi gbegbea!’ Ọnọn ha gbẹloghe ọne ighan ki da nọọn yọle: ‘Be imẹn ha lu nin mẹn da miẹn aribhọ?’ Ele da taman ọlẹn yọle: ‘Mhọn urẹọbhọ da iJesu nin Ebealẹn mhan, nin uwẹ da miẹn aribhọ.’—Acts 16:25-34.

11, 12. (a) Be okha ọsi ọne okpea nọn ha gbẹloghe ighan rẹ rẹso itẹmhọn Osẹnobulua nin mhan lu ẹlẹnan yẹ? (b) Bezẹle nọn bha da khẹke nin mhan zobọ bhi itẹmhọn Osẹnobulua?

¹¹ Be okha ọsi ọne okpea nọn ha gbẹloghe ighan rẹ rẹso itẹmhọn Osẹnobulua  nin mhan lu ẹlẹnan yẹ? Uwẹ dẹ daghe ghe, ẹghe nin otọ ki rẹ mun lueghe fo, ọle ọne ọkpea nan ki dọ rẹ fi ọkhọle denọ. Iriọ yẹ nọn ẹlẹnan, asabọ miẹn ẹbho eso ne ika ka mhan ehọ khẹ, emhin eso nọn ha ki sunu bhi iẹnlẹn nọnsele ki dọ ri ele munhẹn ha ka mhan ehọ. Bhi ọsi ijiẹmhin, bhi eji mhan da tẹmhọn Osẹnobulua, asabọ miẹn a khu eso bhi iwẹnna, azagba-uwa nọnsi eso sabọ re zagha a, asabọ miẹn eso dọ mun emianmhẹn ọbe, la ọria nin ele hoẹmhọnlẹn yu. Iẹnlẹn ha dinian fidenọ, eso sabọ rẹ dọ ha ria ẹmhọn inọnta kpataki rẹji iẹnlẹn nin ele bha rẹ ka ha ria ẹmhọnlẹn khẹ. Inọnta bọsi, ‘Be imẹn ha rẹ sabọ miẹn umiẹnfan yẹ?’ Bhi ọsi ọhẹnhẹn bhi iẹnlẹn nọnsele, ele sabọ rẹ dọ re ehọ bhi uhọnmhuje nọnsẹmhan.

¹² Bhiriọ, ahamiẹn mhan bha zobọ bhi itẹmhọn Osẹnobulua, mhan ki sabọ re ọne uhọnmhuje nan rẹ ko ẹbho udu re, ẹghe nin ele ha rẹ muegbe nin ele rẹ ka mhan ehọ. (Isa. 61:1) Obhio mhan nọn ki sẹ lu iwẹnna ọkanẹfan nanbhi ikpe 38 da yọle: “Ẹlẹnan nian, ẹbho ne bunbun wo yulua. Ele wo guanọ nin ele họn ọta esili.” Ọria ọbhebhe natiole Ejvor nọn ki sẹ lu iwẹnna ọkanẹfan nanbhi ikpe 34 da yẹ yọle: “Ẹlẹnan nian manman, iẹnlẹn wo khan ẹbho ne bunbun. Mẹn gene guanọ nin mẹn rẹkpa ele. Ọnan zẹle nin mẹn da deba bhi itẹmhọn Osẹnobulua.” Ranmhude oyẹẹ nin mhan mhọn da ẹbho, mhan ida zobọ bhi ọne iwẹnna nan!

13, 14. (a) Emhin nela John 15:11 tẹmhọnlẹn nọn ha sabọ rẹkpa mhan? (b) Be ọnyẹnmhẹn nọnsi Jesu ha rẹ ha yi ọsẹmhan yẹ? (c) Be ọnyẹnmhẹn ha rẹ rẹkpa mhan yẹ bhi iwẹnna itẹmhọn Osẹnobulua?

¹³ Ọne ukpasọn ọkuẹsẹ Jesu yu, ọle da taman ituegbe nesọle emhin eso nọn ha rẹkpa ele rẹ re iziẹngbe ha mọn ikpẹ. Be bhọ ene emhin nan? Be ele ha rẹ sabọ rẹkpa mhan yẹ?

¹⁴ Ọnyẹnmhẹn. Ọne iwẹnna itẹmhọn Osẹnobulua nin Jesu mun nin mhan ha lu, dẹ be kiẹn ihẹ rẹji mhan? Hiehie. Ẹghe nin Jesu ki rẹ tẹmhọn ọne ijiẹmhin ọsi okporan fo, ọle da yọle ghe, ene ha tẹmhọn Agbejele dẹ miẹn ọnyẹnmhẹn. (Tie John 15:11.) Ọle da yọle ghe ọnyẹnmhẹn nọnsọle dẹ ha yi ọsẹmhan. Be ọnan ha rẹ sunu yẹ? Beji mhan ka ta, Jesu tobọle yọle ghe ọle hi ọne okporan, ghe ene odibo nesọle hi ene ikpabọ ọsi ọne okporan. Okporan mun ikpabọ ọsi eran mhọnlẹn. One okporan si amẹn ji ene ikpabọ sade ele bha khuẹnẹ kua. Iriọ yẹ nọn rẹ ji mhan, ahamiẹn mhan bha zẹ iJesu obọ, mhan ki miẹn eghọnghọn nin ọle miẹn bhi iho nọnsi Aba ọle nin ọle lu. (John 4:34; 17:13; 1 Pet. 2:21) Obhio mhan natiọle Hanne nọn ki sẹ lu iwẹnna ọkanẹfan nanbhi ikpe 40 da yọle, “Ọnyẹnmhẹn nin mẹn miẹn bhọ sade mẹn lu iwẹnna itẹmhọn Osẹnobulua, ọle rẹkpa mẹn rẹ sẹyẹ wo mun oga nọnsi Jehova mhọnlẹn.” Gene gene, ọnyẹnmhẹn re ahu nin mhan rẹ ha tẹmhọn Osẹnobulua, a ha rẹ miẹn ẹbho ika manman re ehọ ọbhọ bhi eji mhan da tale.—Matt. 5:10-12.

15. (a) Emhin nela John 14:27 tẹmhọnlẹn nọn ha sabọ rẹkpa mhan? (b) Bezẹle nin Ọfure ha da sabọ rẹkpa mhan rẹ ha mọn ikpẹ?

¹⁵ Ọfure. (Tie John 14:27.) Ọne ọsemuan ọkuẹsẹ Jesu yu, ọle da taman ituegbe nesọle yọle: ‘Mẹn re ọfure nọnsẹmẹn nin bha.’ Be bhọ ọne ọfure nan ha rẹ rẹkpa mhan rẹ ha mọn ikpẹ yẹ? Mhan da ha mhọn iziẹngbe, mhan ki dọ lẹn ghe Jehova bi Jesu rẹ ẹlo esili ghe mhan, ranmhude ọnan, egbe ki fu mhan re . (Ps. 149:4; Rom. 5:3, 4; Col. 3:15) Obhio mhan nin Ulf nọn ki sẹ lu iwẹnna ọkanẹfan nanbhi ikpe 45 yọle: “Arẹmiẹn egbe lọ mẹn sade mẹn yo itẹmhọn Osẹnobulua, ọne iwẹnna nan rẹ mẹn miẹn ọkhọnlẹn bi eghọnghọn bhi iẹnlẹn.” Ọ wo ti mhan bhọ ghe mhan mhọn ọfure ọsaje!

16. (a) Emhin nela John 15:15 tẹmhọnlẹn nọn ha sabọ rẹkpa mhan? (b) Be ha rẹkpa ituegbe nesi Jesu nin ele da sabọ mun ikolu nin ele bi Jesu ko mhọnlẹn ziẹn?

 ¹⁶ Ukolu nin mhan bi Jesu ko mhọnlẹn. Beji Jesu ki taman ituegbe nesọle ghe ọle guanọ nin ọnyẹnmhẹn nọnsele ha tuẹn okhun, ọle da yẹ taman ele ghe emhin kpataki nọn nanrẹ ha re oyẹẹ man. (John 15:11-13) Ọle da yẹ yọle ‘Ọmọẹ, ọle mẹn tie bha.’ Emhin esili wo nọn nanrẹ ha yi ọmọẹ iJesu! Be khẹke nin ituegbe nesi Jesu lu nin ele rẹ gbega ukolu nin ele bi Jesu ko mhọnlẹn? Ọkhẹke nin ele dọ ha mọn ikpẹ. (Tie John 15:14-16.) Ikpe eva ne gbera ọkuẹsẹ Jesu ta ene ẹmhọn nan man odibo nesọle, ọle da taman ituegbe nesọle ghe: “Bha da ha khian, bha ha tẹmhọn Osẹnobulua yọle: ‘Ejele nọn ribhi okhun sire.’” (Matt. 10:7) Ọne ọsemuan nin Jesu deba odibo nesọle zẹ ọne illo nan, ọle da yẹ re izebhudu nin ele, beji ele ha da sabọ ha ziẹngbe bhi ọne iwẹnna nan nin ele ki munhẹn fo. (Matt. 24:13; Mark 3:14) Arẹmiẹn ele wo ha miẹn ọnọghọ bhi ọne iwẹnna nan nin Jesu mun nin ele, ele da sẹyẹ sabọ luọle, bhiriọ ele da dọ ha yi imọẹ ọle. Bha ji mhan tẹmhọn emhin ọbhebhe nọn yẹ rẹkpa ele rẹ sabọ lu ọnan.

17, 18. (a) Emhin nela John 15:16 tẹmhọnlẹn nọn ha sabọ rẹkpa mhan? (b) Be ọnan ha rẹ sabọ rẹkpa edibo nesi Jesu yẹ? (c) Ẹsele nela ha sabọ mun mhan ziẹn ẹlẹnan?

¹⁷ Erọnmhọn. Jesu da yọle: “Emhin nọn irẹ khin nin bha noo elin nọnsẹmẹn rẹ bhii Aba mẹn le . . . ọle ki luọle nin bha.” (John 15:16) Asabọ miẹn ọne ọta nin Jesu tale nan wo manman re izebhudu nin ituegbe nesọle! * Ele bha lẹn sẹ bhọ ghe Jesu dẹ kẹ yu. Ọkpakinọn, ọle ha rẹ yu, ele dẹ miẹn urẹkpa. Ele ha nan erọnmhọn ji Jehova nọn rẹkpa ele bhi ọne iwẹnna nan, Jehova muegbe nin ọle rẹ wanniẹn ọne erọnmhọn. Gene gene, ọbha sẹ bue gbe, ele da ha daghe ewanniẹn nin Jehova ha re ọbhi erọnmhọn nọnsele.—Acts 4:29, 31.

¹⁸ Ẹlẹnan nian yẹ, mhan ha re iziẹngbe rẹ ha mọn ikpẹ, mhan ki kiẹn ọmọẹ iJesu. Mhan ha nan erọnmhọn ji Jehova nin ọle rẹkpa mhan bhi ọnọghọ kikẹ nin mhan miẹn sade mhan lu ọne iwẹnnan nan, mhan lẹnmhin ghe ọle wo muegbe nin ọle rẹ họn ọne erọnmhọn. (Phil. 4:13) Ẹsele nọn khua wo nọn ghe Osẹnobulua họn erọnmhọn nọnsẹmhan, ghe mhan dẹ sabọ deba iJesu ha mhọn ikolu! Ene ẹsele nan wo gene ze mhan udu rẹ ha mọn ikpẹ.—Jas. 1:17.

19. (a) Bezẹle nin mhan ha da ha re iziẹngbe rẹ lu iwẹnna itẹmhọn Agbejele? (b) Emhin nela ha rẹkpa mhan rẹ lu ọne iwẹnna nan sẹbhi ọkpẹlẹn?

¹⁹ Beji mhan luẹ bhi ọne uhọnmhọn-ọta nan, mhan dẹ ha deba lu iwẹnna itẹmhọn Osẹnobulua beji mhan ha da re ogẹn ji Jehova yẹ kpe itọn sibhi elin nọnsọle re, nin mhan rẹ rẹman Jehova bi Jesu ghe mhan hoẹmhọn ele, nin mhan rẹ sekhae nin ẹbho, bi nin mhan rẹ re oyẹẹ nin mhan mhọn da ẹbho mhan. Mhan da yẹ luẹ emhin nin Osẹnobulua rẹ ziẹn mhan udu nin mhan da sabọ lu iwẹnna nọnsọle sotọ. Ene emhin hi: ọnyẹnmhẹn, ọfure, ikolu nin mhan bi Jesu ko mhọnlẹn bi erọnmhọn. Ọ gene wo ti Jehova bhọ rẹ daghe ghe, ọkhọle rebhe mhan rẹ wẹnna kaka nin mhan rẹ mọn ikpẹ.