MHAN dẹ wẹnna kaka mhan kuẹ sabọ miẹn ọfure, ranmhude agbọn nin ọfure iye mhan da nyẹnlẹn. Ahamiẹn mhan bha dọnmhegbe, obhiọ khere nin mhan mhọnlẹn sabọ rẹ yulua. Be bhọ iBaibo ha rẹ sabọ rẹkpa mhan miẹn ọfure ọsaje yẹ, nọn ida sabọ yulua? Be imhan ha rẹ rẹkpa ẹbho miẹn ọfure ọsaje yẹ?

Nin mhan rẹ ha mhọn ọfure ọsaje, ọbha khẹke nin mhan ha kpokpo egbe gbe, mhan ki ji ọkhọle mhan lọ. Ọ yẹ khẹke nin mhan ne ẹbho ha mhọn ikolu nọn dinmhin. Ikolu nin mhan bi Osẹnobulua ko mhọnlẹn kokhun nẹ, ranmhude ọfure ọsi imọẹ ọle ida yulua. Be imhan ha rẹ ha yi ikolu nọnsi Osẹnobulua yẹ?

Be imhan ha rẹ rẹman Jehova yẹ ghe ọle mhan mun udu tẹẹ, ghe mhan ho nin mhan bi ọle ha mhọn ikolu? Mhan ki ha re obọ rẹkhan uhi bi emhanmhan nesọle. (Jer. 17:7, 8; Jas. 2:22, 23) Bhiriọ ọle ki si mhan kẹ egbe, yẹ re ọfure ọsaje nin mhan. Isaiah 32:17 yọle: “Emhin nọn ha nanbhi ikhiakhiale vae ki ha yi ọfure. Ije rebhe ki lọre ranmhude ikhiakhiale.” Mhan da ha lu rẹkhan uwedẹ nọnsi Jehova, mhan ki sabọ ha mhọn ọfure ọsaje.—Isa. 48:18, 19.

Ẹsele nin Aba mhan nọn ribhi okhun rẹ nin mhan dẹ yẹ sabọ rẹkpa mhan rẹ ha mhọn ọfure ọsaje nọn ida yulua. Ọne ẹsele hi, ẹlinmhin nọn khiale nọnsọle.—Acts 9:31.

Paul nin odibo da ka ọfure ba ikpẹ ọsi ẹlinmhin nọn khiale. (Gal. 5:22, 23) Mhan da ha lu rẹkhan adia ọsi ẹlinmhin nọn khiale, mhan ki ha mhọn ọfure ọsaje, ranmhude ọfure deba ikpẹ ọsi ẹlinmhin nọn khiale. Bha ji mhan fẹ uwedẹ eva ghe nin ẹlinmhin nọn khiale ha rẹ re obọ kpa mhan rẹ ha mhọn ọfure.

 Ọhẹnhẹn, mhan dẹ sabọ miẹn ọfure sade mhan tie Baibo ẹghe rebhe. (Ps. 1:2, 3) Mhan da ha ria eria nyan ebi mhan tiele bhi Baibo, ẹlinmhin nọn khiale ki rẹkpa mhan lẹn ebi Jehova rẹ ghe emhin yẹ. Bhi ọsi ijiẹmhin, mhan ki dọ luẹ ebezẹle nin Jehova da yi ọria ọfure, bi ebẹzẹle nin ọfure da yi emhin kpataki rẹji ọle. Mhan da ha lu rẹkhan ene emhin kpataki nin mhan luẹ bhi Baibo, mhan ki dọ miẹn ọfure ọsaje bhi iẹnlẹn.—Prov. 3:1, 2. 

Ọzeva, ọkhẹke nin mhan nan erọnmhọn nin Osẹnobulua re ẹlinmhin nọn khiale nọnsọle nin mhan. (Luke 11:13) Jehova taman mhan ghe, mhan ha bhii ọle nin ọle rẹkpa mhan, ọfure nọnsọle nọn gbera ẹwanlẹn rebhe nọnsẹmhan ki gbega ọkhọle nọnsẹmhan bi iria-eria nọnsẹmhan. (Phil. 4:6, 7) Mhan da ha nan erọnmhọn ji Jehova ẹghe rebhe, yẹ bhii ọle nin ọle re ẹlinmhin nọn khiale nọnsọle nin mhan, mhan ki miẹn ọfure ọsaje nin Jehova rẹ nin imọẹ ọle.—Rom. 15:13.

Adia ne ribhi Baibo sẹ sabọ rẹkpa ẹbho ne bunbun fidẹnọ bhi iẹnlẹn, beji ele ha da sabọ deba Jehova ha ribhi ọfure. Sẹyẹ, ele ki yẹ sabọ deba ẹbho nekẹle bi egbe ele ha ribhi ọfure.

Ẹbho eso ribhi agbotu nọnsi Jehova ẹlẹnan nian, ne ka rẹ ha yi ẹbho ne kẹ re ohu. Ọkpakinọn, ọfure, ifuẹkẹ, bi izẹngbe ele ki rẹ deba ẹbho nekẹle lu emhin ejayenan nian. * (Prov. 29:22) Iriọ ọ rẹ sunu ji ibhio mhan eva nan re urẹkpa nan. Ranmhude ọnan, ele da dọ sabọ rẹban ohu, yẹ ha deba ẹbho nekẹle nyẹnlẹn bhi ọfure.

Uwedẹ nin obhio mhan ọkpa natiọle David rẹ ha nyẹnlẹn da dọ rẹ so ọta nin ọle ta. Ọkuẹsẹ ọle re egbe guẹ nin Osẹnbulua, ọle bha ha re ẹlo esili ghe ẹbho, ọle i mun ekpẹn nin ẹbho ne ribhi azagba-uwa nọnsọle. Akizẹbue, David da daghe ghe ọkhẹke nin ọle fidenọ dọ ha yi ọria ọfure. Be ki rẹkpa ọle rẹ fidenọ? Ọle da yọle, “Mẹn da munhẹn ha re obọ rẹkhan adia ne ribhi Baibo, bhiriọ, mhan wo mun ekpẹn nin egbe nian bhi ẹkẹ azagba-uwa mhan.”

Eji obhio mhan ọkpa natiọle Rachel da wanre wo rẹ so iẹnlẹn nọnsọle. Rachel da yọle, “Rẹsẹbhi ejayenan, idọnmhegbe mẹn ye nin ohu hẹi yẹ kẹ ha re mẹn, ranmhude azagba-uwa nin ọrebhe  da kẹ re ohu mẹn da wanre.” Be bhọ rẹkpa iRachel rẹ ha khu ọbhi ọfure? Ọle da yọle, “Mẹn mun udu nyan Jehova yẹ nan erọnmhọn ji ọle.”

Ijiẹmhin ọsi David bi Rachel deba ijiẹmhin ne bunbun ne rẹman ghe, mhan a ha rẹkhan adia ne ribhi Baibo, yẹ bhii Osẹnobulua nin ọle re ẹlinmhin nọn khiale nin mhan, mhan ki sabọ miẹn ọfure. Arẹmiẹn agbọn nin ọfure iye mhan da nyẹnlẹn, mhan dẹ sabọ ha mhọn ọfure nọn ha ku mhan bi azagba-uwa mhan, bi ibhio mhan bhi agbotu kugbe. Jehova taman mhan ghe: “Ji a miẹn ghe uwẹ bi eria rebhe koko ribhi ọfure.” (Rom. 12:18) Mhan dẹ gene sabọ deba ọrebhe ha nyẹnlẹn bhi ọfure? Elele nela mhan ha miẹn bhọ sade mhan khu ọbhi ọfure.

Iwẹnna itẹmhọn Osẹnobulua, ọle mhan rẹ rẹkpa ẹbho nin ele da miẹn elele bhi uhọnmhunje ọsi Agbejele nọnsi Osẹnobulua. (Isa. 9:6, 7; Matt. 24:14) Ọtii mhan bhọ ghe ẹbho ne bunbun wo re ehọ bhọ. Bhiriọ, ele iyẹ re ohu, la dọ ha khọ ẹkẹ ranmhude emhin ne sunu nẹga ele. Ejayenan nian, ele ki mhọn ikhuaẹloghe. Sẹyẹ, ele wo mun egbe nin ele rẹ ha khu ọbhọ ọfure.—Ps. 34:14.

Ọkpakinọn, ọiyi ọrebhe nin mhan taman wo miẹn mhan ọbhi egbe bhi ọsi ọhẹnhẹn. (John 3:19) Ọrẹyiriọ, ẹlinmhin nọn khiale nọnsi Osẹnobulua dẹ rẹkpa mhan rẹ re ekpẹn bi ọfure rẹ ta ọne uhọnmhunje nan man ele. Ọnan ki rẹman ghe mhan rẹkhan uwedẹ nin Jesu yọle nin mhan rẹ ha lu ọne iwẹnna nan. Bhi Matthew 10:11-13, Jesu da yọle: “Ahamiẹn bha nanbhi uwa soso, tuẹ ene nyan ọne uwa. Ele ha miẹn bha ọbhi egbe, ọfure nin bha mun ji ele ki deba ele dia; a ha ki miẹn ele bha miẹn bha ọbhi egbe, ọfure nin bha rẹ mun re ki rẹkhan bha kpanọ.” Mhan ha rẹkhan ebe iJesu ta, ọkhọle mhan ki sẹyẹ lọ, a ha rẹ miẹn ẹbho bha ka mhan ehọ. Bhiriọ, mhan ki sabọ re ekpẹn rẹ ze ọne ọria obọ yẹ ha khuaẹloghẹ ẹghe nin ọle ha rẹ kaehọ bhi odalo.

Mhan dẹ yẹ sabọ khu ọbhi ọfure sade mhan re ekpẹn rẹ nin ẹbho ne wẹnna bhi government lu emhin, rẹsẹbhi ene kpokpo mhan. Bhi ọsi ijiẹmhin, ene gbẹloghe bhi agbaẹbho ọkpa bhi Africa bha ka re obọ ọbhọ nin mhan rẹ bọn ikindọn họọ, ranmhude ene ẹbho zọn mhan. Ranmhude mhan ho nin mhan re uwedẹ ọfure rẹ ta ọne ẹmhọn nan ọbhi ekpẹn, a da ji obhio mhan ọkpa nọn ka lu iwẹnna imissionary bhi ọne agbaẹbho bu High Commissioner ọsi ọne agbaẹbho. Eje ọne Commissioner da wẹnna bhi London, England, ọle ọne obhio mhan da bu ọle. Uwedẹ nin Esali Jehova rẹ re ọfure lu iwẹnna nọnsele bhi ọne agbaẹbho bhi africa, ọle ọne obhio mhan nan dọ taman ọne Commissioner. Be bhọ ki sunu ẹghe nin obhio mhan rẹ bu ọle?

Ọne obhio mhan da tale ghe, ọle ki sẹbhi eji a ka sẹ bhi ọfisi ọsi ọne commissioner, ọle da daghe ọne okhuo nọn wẹnna bhi enin. Ranmhude uwedẹ nin ọne okhuo rẹ mun egbe, ọle da dọ lẹn sẹbhọ ghe agbaẹbho ọkpa nin ọle luẹ urolo nọnsele, ọle ọne okhuo na vae. Bhiriọ, ọle da re urolo ọsi ọne okhuo rẹ tuẹ ọle. Ọnan da wo han ọle ilo, ọle da nọọn mẹn yọle, ‘Be uwẹ dọ lu bhi enan?’ Mẹn da re ekpẹn rẹ taman ọlẹn ghe Commissiọner mẹn dọ miẹn. Bhiriọ, ọle da re telephone rẹ tie ọne commissioner. Ọne commissioner da dagbare, ọle da re urolo nọnsọle rẹ tuẹ mẹn. Mhan ki tuẹ egbe fo, ọle da wo kaehọ nọnsẹn beji mẹn ki rẹ ha tamanlẹn ẹmhọn iwẹnna ọfure nin mhan lu.”

Ranmhude ekpẹn nin ọne obhio mhan nan rẹ deba ọne commissioner talọ, ọle bha yẹ wo dọ ha re ẹlo ọbe rẹ ghe mhan. Akizẹbue, ene gbẹloghe bhi ọne agbaẹbho da dọ re obọ ọbho nin mhan rẹ ha bon uwa oga. Ibhio mhan da wo ha ghọnghọn ranmhude ọfure a ki rẹ kpẹn ọne ẹmhọn nan. Gene gene, elele ne bunbun nanbhọre sade mhan re ekpẹn re deba ẹbho ha lu emhin. Ọkpa bhi ene elele hi ọfure.

Ene ga iJehova ẹlẹnan nian wo mhọn ọfure ọsaje bhi ẹwẹ ele. Uwẹ ha dọnmhegbe ha khu ọbhi ọne ikpẹ ọsi ẹlinmhin nọn khiale nan, uwẹ ki sabọ ha tuẹn ọfure nọn ribhi ẹwẹ mhan okhun. Sẹyẹ, Jehova ki re ẹlo esili ha ghe ẹ, uwẹ ki yẹ miẹn ọfure nọn ida fo ghee bhi ẹkẹ agbọn ọsọgbọn.—2 Pet. 3:13, 14.