1. Ijiẹmhin nela Jesu re ọbhi otọ nin edibo nesọle? Be ele ki lu yẹ? (Fẹ adudu nọn ribhi odalo ọne ebe nan ghe.)

ẸGHE nin Jesu rẹ ha ribhi ọne otọ nan, ọle da wo ha tẹmhọn Osẹnobulua man ẹbho. Ọle da ha mhọn ọlẹn bhi ọkhọle ghe, ele dẹ ka ọle ehọ. Ọle yẹ ha guanọ nin edibo nesọle yẹ lu beji ọle lu. (John 4:​35, 36) Ọ da wo ha yẹẹ edibo nesi Jesu rẹ ha lu iwẹnna itẹmhọn Osẹnobulua, ẹghe nin ọle rẹ ha ribhi ẹwẹ ele. (Luke 10:​1, 5-11, 17) Ọkpakinọn, ẹghe nan ki rẹ mun Jesu yẹ gbe ọle a, iwẹnna itẹmhọn Osẹnobulua bha yẹ manman ha ti ele bhọ. (John 16:32) Sokpan, ẹghe nin Jesu rẹ riọkpanọ bhi uu, ọle da re izebhudu nin edibo nesọle. Ọle da taman ele nin ele situa ha tẹmhọn Osẹnobulua. Ẹghe nin ọle ki rẹ ha khian okhun fo, edibo nesọle da re ọyaya rẹ ha tẹmhọn Osẹnobulua rẹ sẹbhọ ghe, eghian ele da ha taman ele yọle: “Ibha re iman-emhin nọnsẹbha gba iJerusalem rebhe.”​—Acts 5:28.

2. Uwedẹ nela Jehova sẹ rẹ nan erọnmhọn ọbhi iwẹnna itẹmhọn Osẹnobulua nin ẹbho nesọle lu?

² Jesu wo ha dia iwẹnna itẹmhọn Osẹnobulua nin Kristiẹn bhi ore nin ọhẹnhẹn ha lu. Jehova da wo rẹkpa ele. Ẹbho ne bunbun da wo ka ele ehọ. Bhi ọsi ijiẹmhin, bhi Pentecost bhi ukpe 33 C.E., ebe sẹbhi itue 3,000 da mianmẹn. (Acts 2:41) Sẹyẹ, ẹbho ne dọ kiẹn edibo nesi Jesu da wo ha bun ọbhọ. (Acts 6:7) Jesu da yẹ yọle ghe, bhi ẹghe ọkike ọsi ọne agbọn nan, ẹbho ne bunbun dẹ re ehọ ọbhi ẹmhọn Osẹnobulua nan ha taman ele.​—John 14:12; Acts 1:8.

3-4. Bezẹle nin iwẹnna itẹmhọn Osẹnobulua bha da lẹkhẹ nan rẹ lu bhi agbaẹbho eso? Be imhan ha zilo nyan bhi ọne uhọnmhọn-ọta nan?

³ Imhan rebhe wo dọnmhegbe nin mhan rẹ ha re ọyaya tẹmhọn Osẹnobulua. Bhi agbaẹbho eso, ọnan wo lẹkhẹ nan rẹ lu. Bezẹle? Ranmhude, ẹbho ne bunbun wo guanọ nin mhan dọ ha man ele iBaibo, rẹ sẹbhọ ghe, eso bhi ẹwẹ ele dẹ mundia khẹ ẹghe nan ha rẹ miẹn Ọsali Jehova nọn ha dọ ha man ele emhin. Sokpan, bhi agbaẹbho eso, ọ ilẹkhẹ nin ibhio mhan rẹ ha tẹmhọn Osẹnobulua.  Ele bhọ ikẹ ke ẹbho re bhi uwa. Ele ha bhọ rẹ ke ẹbho re bhi uwa, ọ imanman ti ele bhọ rẹ luẹ iBaibo.

⁴ Ahamiẹn agbaẹbho nin ẹbho ida kẹ re ehọ ọbhi ẹmhọn Osẹnobulua uwẹ da nyẹnlẹn, ebi mhan ha zilo nyan bhi ọne uhọnmhọn-ọta nan dẹ sabọ rẹkpa uwẹ. Mhan dẹ zilo nyan ebi ibhio mhan sẹ lu, nin ele da sabọ miẹn ẹbho ne bunbun ha tẹmhọn Osẹnobulua man. Mhan dẹ yẹ zilo nyan ebi mhan ha rẹ sabọ re ọyaya ha tẹmhọn Osẹnobulua khian, aharẹmiẹn ẹbho ka mhan ehọ, la ele bha ka mhan ehọ.

5. Ọnọghọ kẹkẹ nela ibhio mhan kuẹlo da bhi iwẹnna itẹmhọn Osẹnobulua?

⁵ Ọ manman nọghọ ibhio mhan ne bunbun rẹ miẹn ẹbho ne talọ bhi uwa nọnsele. Ibhio mhan eso tẹmhọn Osẹnobulua bhi agọ eso nan da manman gbega uwa ne ribhọ. Ẹbho ne gbega ene uwa nan iji ẹbho da nabhi ene uwa, sade ẹbho ne nyẹnlẹn bhi ene uwa bha tie ele. Bhi ijeso, ọ wo lẹkhẹ nin ibhio mhan rẹ ha tẹmhọn Osẹnobulua rẹ na bhi uwa rẹ sẹbhi uwa. Ọkpakinọn, ele imanman ke ẹbho re bhi uwa. Sẹyẹ, ibhio mhan eso tẹmhọn Osẹnobulua bhi agọ nin ẹbho bha da manman bun. Ibhio mhan eso sabọ yẹ rẹ khian okhian nọn manman ree, nin ele rẹ dọ tẹmhọn Osẹnobulua man ọria bhi uwa. Asabọmiẹn ghe, ele ha sẹbhi enin, ele ida ke ọne ọria re bhi uwa. Ọ bha khẹke nin mhan ji egbe lọ mhan ahamiẹn mhan kuẹlo da ene ọnọghọ nan. Be imhan ha sabọ lu nin mhan rẹ khọn ene ọnọghọ nan, yẹ manman ha tẹmhọn Osẹnobulua man ẹbho?

6. Be iwẹnna itẹmhọn Osẹnobulua nin mhan lu rẹ diabe iwẹnna ọsi ẹbho ne gbe ehẹn yẹ?

⁶ Jesu da re iwẹnna itẹmhọn Osẹnobulua rẹ khọkhọ iwẹnna nin ọria nọn gbe ehẹn lu. (Mark 1:17) Ikpea eso ne gbe ehẹn sabọ rẹ guanọ ehẹn na bhi ikpẹdẹ eso, sokpan, ele ida miẹn ehẹn soso gbe. Ọrẹyiriọ, ele iji egbe da lọ ele. Ele ki fi uwedẹ nin ele rẹ gbe ehẹn denọ. Bhi ọsi ijiẹmhin, ele ki fi ẹghe nin ele rẹ gbe ehẹn, eji ele da gbe ehẹn, bi uwedẹ nin ele rẹ gbe ehẹn denọ. Bọsi ene gbe ehẹn, mhan dẹ yẹ sabọ fi uwedẹ nin mhan rẹ tẹmhọn Osẹnobulua denọ. Ejayenan nian, bha ji mhan zilo nyan emhin eso nin mhan ha sabọ lu.

7. Elele nela ha sabọ nabhọre sade mhan lu iwẹnna itẹmhọn Osẹnobulua bhi ẹghe nin mhan ha rẹ ke ẹbho re bhi uwa?

⁷ Dọnmhegbe rẹ ha tẹmhọn Osẹnobulua bhi ẹghe nin uwẹ ha rẹ ke ẹbho re. Mhan dẹ miẹn ẹbho ne talọ sade mhan dagbare dọ tẹmhọn Osẹnobulua bhi ẹghe nin mhan ha rẹ ke ele re bhi uwa. Eji ele hi ki rẹ yo, ele dẹ vae bhi uwa. Ibhio mhan ne bunbun tẹmhọn Osẹnobulua bhi ọsodanmhẹn la ọsemuan, ranmhude ọne ẹghe nan ele ha rẹ manman ke ẹbho re bhi uwa. Deba ọnin, asabọmiẹn ọne ẹghe nan ha fu eria bhi egbe nẹ nin ele rẹ deba mhan zilo. Emhin nin okpea ọkpa natiọle David nọn yi ọwanlẹn bhi agbotu lu dẹ yẹ sabọ rẹkpa mhan. Ọle da yọle ghe, ele ha zẹ lu iwẹnna itẹmhọn Osẹnobulua, ọle bi obhio mhan ne ko ha tẹmhọn Osẹnobulua ki fikie diọbhi uwa nin ele bha da ka ke ẹbho re. Ọle da yọle: “Ọ wo han mẹn ilo rẹ miẹn ẹbho ne bunbun bhi uwa nin mhan bha da ka ke ẹbho re sade mhan kie yo.” *

8. Be imhan ha rẹ re obọ rẹkhan adia nọn ribhi Ecclesiastes 11:6 yẹ bhi iwẹnna itẹmhọn Osẹnobulua?

⁸ Mhan hẹi ji egbe lọ mhan rẹ ha guanọ ẹbho bhi uwa nọnsele. Baibo nọn mun ọne uhọnmhọn-ọta nan mhọn rẹkpa mhan rẹ lẹn emhin nọn khẹke nin mhan ha lu bhi idia nọn sẹ inian. (Tie Ecclesiastes 11:6.) David nin mhan ka tẹmhọnlẹn bha ji egbe lọ ọle. Ẹghe ọkpa ribhọ nin ọle rẹ ke ọria re bhi uwa nin ọle mọn da yo. Ọ da wo ha yẹẹ ọne okpea nin ọle kere bhi uwa rẹ  luẹ iBaibo. Ọne okpea da yọle: “Ọ ki bu ikpe elẹnlẹn nin mẹn mọn da nyẹnlẹn bhi enan, mẹn bha sẹ miẹn Ọsali Jehova soso nọn dọ tẹmhọn Osẹnobulua man mẹn.” David da yọle: “Mẹn dọ kere ghe, ahamiẹn mhan miẹn ẹbho tẹmhọn Osẹnobulua man bhi uwa nọnsele, ele dẹ wo ka mhan ehọ.”

9. Be ibhio mhan eso sẹ lu nin ele da miẹn ẹbho tẹmhọn Osẹnobulua man?

⁹ Dọnmhegbe dọ tẹmhọn Osẹnobulua bhi eji uwẹ ha da ke ẹbho re. Nin ibhio mhan da sabọ miẹn ẹbho nan ikẹ kere bhi uwa ne talọ, ele ki dọ ha tẹmhọn Osẹnobulua bhi eji ele ha da sabọ miẹn ẹbho. Bhi ọsi ijiẹmhin, iwẹnna itẹmhọn Osẹnobulua nan da re ebe wa, bi ẹmhọn Osẹnobulua nan taman ẹbho ne gbera bhi uwedẹ, rẹkpa mhan rẹ tẹmhọn Osẹnobulua man ẹbho ne nyẹnlẹn bhi uwa nọn bha lẹkhẹ nan rẹ na ọi. Bhi ọsi ijiẹmhin, ibhio mhan ne bunbun dọ kere ghe, ọ ti ẹbho bhọ rẹ ha ka mhan ehọ, yẹ ne ebe nesẹmhan bhi eji a da nabhi motọ bi ẹki. Obhio mhan natiọle Floiran, nọn lu iwẹnna ọfẹotughe bhi Bolivia da yọle: “Agogo 1:00 rẹ sẹbhi agogo 3:00 bhi ọsodanmhẹn, ọle mhan rẹ dọ ha tẹmhọn Osẹnobulua bhi eji a da do ẹki, ranmhude, ọne uri-ẹghe nan ene khiẹn emhin bhi enin ha rẹ miẹn ẹghe rẹ ka mhan ehọ. Mhan miẹn ẹghe rẹ ko zilo, yẹ munhẹn ha man ele iBaibo.”

10. Uwedẹ nela uwẹ ha sabọ noo rẹ tẹmhọn Osẹnobulua man ẹbho?

¹⁰ Dọnmhegbe rẹ noo uwedẹ ọbhebhe rẹ ne ẹbho talọ. Asabọmiẹn ẹghe rebhe uwẹ rẹ sẹbhi uwa ọsi ọria nin uwẹ nanlẹn zilo. Ọkpakinọn, uwẹ ike ọle re bhi uwa. Uwedẹ ọbhebhe nela uwẹ ha sabọ noo rẹ nin ọne ọria nan zilo? Katarína da yọle: “Mẹn ki gbẹn ilẹta je ẹbho nin mẹn ikere bhi uwa, rẹ taman ele emhin nin mẹn ha rẹ taman ele sade mẹn ke ele re bhi uwa.” Be imhan miẹn luẹ bhi  ọnan? Ọkhẹke nin mhan ha dọnmhegbe rẹ noo uwedẹ kẹkẹ rẹ tẹmhọn Osẹnobulua man ẹbho.

11. Bezẹle nin ẹbho eso ida ka mhan ehọ sade mhan tẹmhọn Osẹnobulua man ele?

¹¹ Ọ iyẹẹ ẹbho eso rẹ ka mhan ehọ sade mhan tẹmhọn Osẹnobulua. Ele ki ha riale ghe, ọ bha khẹke nin ele lẹn Osẹnobulua, la ẹmhọanta ne ribhi Baibo. Ẹbho eso bha rẹọbhi Osẹnobulua, ranmhude uwedẹ nin iloya kẹkẹ rẹ vuọn ọne agbọn nan. Ẹmhọn iBaibo iyẹ ẹbho eso, ranmhude, ene mun ọkalo bhi otuẹ ire obọ rẹkhan ebi ele tie bhọ. Sẹyẹ, ranmhude ẹbho wo ria ẹmhọn iwẹnna nọnsele, azagba-uwa nọnsele, bi ọnọghọ nin ele ye, ele imhọn ọne ẹghe rẹ luẹ ebi Baibo ha rẹ sabọ rẹkpa ele yẹ. Be imhan ha rẹ sabọ ha ghọnghọn yẹ, aharẹmiẹn ẹbho ghe uhọnmhunje nin mhan taman ele bii emhin nọn ida sabọ rẹkpa ele?

12. Be Philippians 2:4 ha rẹ sabọ rẹkpa mhan yẹ bhi iwẹnna itẹmhọn Osẹnobulua?

¹² Ha rẹman ghe ẹmhọn ẹbho rẹtẹ uwẹ. Ẹbho ne bunbun ne bha rẹ guanọ nin ele ka ibhio mhan ehọ da kaehọ, ranmhude ele daghe uwedẹ nin ibhio mhan rẹ ji ẹmhọn ele da rẹtẹ ele. (Tie Philippians 2:4.) Bhi ọsi ijiẹmhin, David nin mhan ka tẹmhọn ọlẹn da yọle: “Ahamiẹn ọria bha guanọ nin ọle ka mhan ehọ, mhan ida sẹyẹ ha guanọ nin mhan ha tie iBaibo man ọlẹn, la ne ebe nesẹmhan nanlẹn. Ọle ki taman ọne ọria yọle: ‘Mẹn ho nin mẹn lẹn ebezẹle nin uwẹ bha da guanọ nin uwẹ ka mhan ehọ.’” Ẹbho dẹ lẹn sade mhan ji ẹmhọn ele da rẹtẹ mhan. Ele sabọ rẹ yelea, ọta nin mhan taman ele. Ọkpakinọn, ele dẹ sẹyẹ ha yere ebi mhan rẹ ne ele lu emhin yẹ. Aharẹmiẹn ghe, ẹbho bha guanọ nin ele ka mhan ehọ, ọkhẹke nin mhan ji uwedẹ nin mhan ha rẹ ha nin ele lu emhin rẹman ghe, ẹmhọn ele rẹtẹ mhan.

13. Be imhan ha lu nin ẹmhọn Osẹnobulua nin mhan taman ẹbho da ha yẹẹ ele?

¹³ Mhan dẹ rẹman ghe, ẹmhọn ẹbho rẹtẹ mhan, sade mhan ji ebi mhan ha taman ele ha yi ebe ha sabọ rẹkpa ele. Bhi ọsi ijiẹmhin, ahamiẹn mhan tẹmhọn Osẹnobulua bhi uwa nin ibhokhan ye, ọ sabọ rẹ ha yẹẹ ene biẹ ene ibhokhan nin ele rẹ lẹn adia bhi Baibo nọn ha sabọ rẹkpa ele bẹẹ imọn nọnsele wanre, la adia bhi Baibo nọn ha sabọ rẹkpa ele ha mhọn azagba-uwa nin eghọnghọn ye. Ahamiẹn uwa nin ẹbho da fino asigbe ọbhi odẹ mhan sẹ, mhan sabọ rẹ taman ẹbho ne ribhi ọne uwa ghe, ẹghe vade nin ofẹn iyẹ da ha mun ọria soso. Ọnan dẹ sabọ rẹkpa ele ha guanọ nin ele lẹn ẹghe nọn ha rẹ sunu. Ẹghe nọn hi ki rẹ khin nin mhan rẹ miẹn ẹbho ne guanọ nin ele ka mhan ehọ, mhan dọnmhegbe rẹ rẹkpa ele lẹn ebi adia ne ribhi Baibo ha rẹ sabọ rẹkpa ele yẹ. Katarína nin mhan ka tẹmhọnlẹn da yọle: “Ẹghe rebhe mẹn rẹ ye egbe mẹn re ebi ẹmhọanta nin mẹn luẹ bhi Baibo rẹ rẹkpa mẹn yẹ.” Bhiriọ, uwedẹ nin Katarína rẹ ne ẹbho talọ da rẹman ghe, ọle rẹọbhi ebi ọle ta. Ẹbho  da wo daghe ọnan bhi uwedẹ nin ọle rẹ ne ele talọ.

14. Beji Proverbs 27:17 rẹman, be imhan ha rẹ sabọ rẹkpa egbe yẹ sade mhan ribhi inẹbho?

¹⁴ Ibhio mhan dẹ sabọ rẹkpa uwẹ. Bhi ore nin ọhẹnhẹn, Paul da man iTimothy uwedẹ kẹkẹ nin ọle ha rẹ ha tẹmhọn Osẹnobulua. Ọle da yẹ taman ọlẹn, nin ọle yẹ man ẹbho ebhebhe ene emhin nan. (1 Cor. 4:17) Bọsi Timothy, mhan dẹ sabọ miẹn emhin luẹ bhi obọ ibhio mhan ne deziẹn bhi oga. (Tie Proverbs 27:17.) Bha ji mhan fẹ ijiẹmhin ọsi obhio mhan natiọle Shawn ghe. Ijeso ribhọ nin ọne obhio mhan nan da dọ lu iwẹnna ọkanẹfan. Ẹbho ne bunbun ne nyẹnlẹn bhi enin iguanọ nin ele kaehọ, ranmhude ele ka mhọn otuẹ nin ele yo. Be rẹkpa ọne ibhio mhan nan rẹ sẹyẹ ha ghọnghọn bhi iwẹnna itẹmhọn Osẹnobulua nin ọle ha lu. Ọle da yọle: “Mẹn wo dọnmhegbe nin mẹn bi ibhio mhan ko dagbare bhi inẹbho. Beji mhan ha rẹ ha khian bu ẹbho bhi uwa nọnsele, mhan ki ha tẹmhọn uwedẹ kẹkẹ nin mhan ha rẹ sabọ ha tẹmhọn Osẹnobulua nọnsẹn. Bhi ọsi ijiẹmhin, mhan ki zilo nyan ebi ọria nin mhan kere bhi uwa tale, bi ebi mhan rẹ wanniẹn ọne ọria yẹ. Bhiriọ, mhan ki zilo nyan uwedẹ ọbhebhe nin mhan ha rẹ ne ọria ọbhebhe zilo sade mhan kuẹlo da idia nọn sẹ iriọ.”

15. Bezẹle nọn da khẹke nin mhan nan erọnmhọn ji Jehova nin ọle rẹkpa mhan bhi iwẹnna itẹmhọn Osẹnobulua nin mhan lu?

¹⁵ Nan erọnmhọn ji Jehova nin ọle rẹkpa uwẹ. Ha nan erọnmhọn ji Jehova ẹghe rebhe nin ọle rẹkpa uwẹ sade uwẹ ribhi inẹbho. Ahamiẹn Jehova bha noo ahu ẹlinmhin nọnsọle rẹ rẹkpa mhan, mhan ida sabọ lu emhin soso. (Ps. 127:1; Luke 11:13) Ahamiẹn uwẹ nan erọnmhọn ji Jehova nin ọle rẹkpa uwẹ, wo taman ọlẹn tee emhin nin uwẹ guanọ nin ọle lu nin uwẹ. Bhi ọsi ijiẹmhin, uwẹ sabọ rẹ taman ọlẹn, nin ọle rẹkpa uwẹ rẹ miẹn ẹbho ne muegbe rẹ luẹ ẹmhọn ọlẹn. Bhiriọ, uwẹ ki dọnmhegbe rẹ ha tẹmhọn Osẹnobulua man ọria nọn hi ki rẹ khin nin uwẹ miẹn.

16. Be iluẹmhin Baibo nin mhan tobọmhan lu rẹ rẹkpa mhan bhi iwẹnna itẹmhọn Osẹnobulua yẹ?

¹⁶ Dọnmhegbe ha lu iluẹmhin Baibo nọnsẹ. Baibo yọle: “Lẹn iho nọn mhẹn nọnsi Osẹnobulua, nọn gbale, nin Osẹnobulua miẹn ọbhi egbe.” (Rom. 12:2) Ahamiẹn mhan luẹ iBaibo ẹghe rebhe, mhan ki manman sabọ dọ lẹn Osẹnobulua nọnsẹn. Bhiriọ, ahamiẹn mhan tẹmhọn Osẹnobulua man ẹbho, ele ki daghe ọle ghe, imhan tobọmhan rẹọbhi ebi mhan taman ele. Katarína nin mhan ka tẹmhọnlẹn da yọle: “Bhi ẹghe nọn bha ree gbe nian, mẹn da dọ kere ghe, ọkhẹke nin mẹn bọn urẹọbhọ nọnsẹmhẹn okhun rẹji iman-emhin eso ne ribhi Baibo. Bhiriọ, mẹn da dọ luẹ emhin kẹkẹ ne rẹman ghe, Aman ribhọ nọn man emhin, ghe ọta nọnsi Osẹnobulua Baibo khin. Sẹyẹ, Osẹnobulua mhọn agbotu nin ọle noo bhi ọne otọ nan ẹlẹnan.” Katarína da yọle ghe, iluẹmhin Baibo nin ọle lu rẹkpa ọle rẹ bọn urẹọbhọ nọnsọle okhun. Ọ da sẹyẹ rẹkpa ọle rẹ manman ha ghọnghọn bhi iwẹnna itẹmhọn Osẹnobulua nin ọle lu.

17. Bezẹle nin Jesu da sẹyẹ wo re ọyaya ha tẹmhọn Osẹnobulua?

¹⁷ Jesu da sẹyẹ wo ha tẹmhọn Osẹnobulua arẹmiẹn ẹbho eso bha ka ọle ehọ. Bezẹle? Ranmhude ọle lẹnmhin ghe, ọkhẹke nin ẹbho ne bunbun lẹn ẹmhọanta. Bhiriọ, ọle da ha guanọ nin ọle rẹkpa ele rẹ luẹ ene ẹmhọanta nan. Ọle yẹ lẹnmhin ghe, ẹbho ne bha guanọ nin ele kaehọ, dẹ kaehọ sade akizẹbue. Bha ji mhan fẹghe, ebe sunu bhi azagba-uwa nọnsọle. Bhi ikpe ea bi ukhiọnmhẹn nin Jesu rẹ lu iwẹnna itẹmhọn Osẹnobulua bhi ọne otọ nan, a bha miẹn obhio ọle soso nọn kiẹn odibo nọnsọle. (John 7:5) Ọkpakinọn, ẹghe nin Jesu ki rẹ riọkpanọ fo bhi uu, ele da dọ kiẹn iKristiẹn.​—Acts 1:14.

18. Bezẹle nin mhan ida zobọ bhọ rẹ ha tẹmhọn Osẹnobulua?

¹⁸ Mhan bha lẹn ọria nọn ha dọ deba mhan ha  ga iJehova ewiẹ. Ẹbho eso sabọ wo re ẹjẹje dọ ha ga iJehova. Ọkpakinọn, ọ sabọ rẹ re ẹghe ọkuẹsẹ eso vae dọ ha ga ọle. Ẹbho ne ika mhan ehọ ha daghe uwedẹ esili nin mhan rẹ nyẹnlẹn bi uwedẹ nin mhan rẹ re ọyaya tẹmhọn Osẹnobulua, ele sabọ ranmhude ọnan ha re ogẹn ji Osẹnobulua.​—1 Pet. 2:12.

19. Be 1 Corinthians 3:​6, 7 ji mhan lẹn rẹji iwẹnna itẹmhọn Osẹnobulua nin mhan lu?

¹⁹ Beji mhan ha rẹ ha tẹmhọn Osẹnobulua yẹ man ẹbho iBaibo, ọkhẹke nin mhan ha mhọnlẹn bhi ọkhọle ghe, Osẹnobulua hi ọnọn si ẹbho vae nin ele dọ ga ọle. (Tie 1 Corinthians 3:​6, 7.) Obhio mhan natiọle Getahun nọn ga bhi Ethiopia da yọle: “Ọ gbera ikpe 20 nin mẹn ọkpa rẹ ha yi Ọsali Jehova bhi agọ nin mẹn ye. Ẹlẹnan nian, ibhio mhan ne bun sẹbhi itue 14 ki ribhi enan. Itue igbea bhi ẹwẹ ele mianmẹn fo rẹ deba okhuo mẹn bi imọn ea nesẹmhẹn. Ẹbho ne vae bhi ikolo oga bun sẹbhi itue 32.” Getahun wo ha ghọnghọn ghe, ọle sẹyẹ wo ha tẹmhọn Osẹnobulua beji ọle rẹ ha ziẹngbe khẹ ẹghe nin Jehova ha rẹ si ẹbho vae dọ ga ọle.​—John 6:44.

20. Uwedẹ nela mhan rẹ diabe ẹbho ne miẹn ẹbho fan?

²⁰ Iẹnlẹn ọsi ẹbho rebhe wo manman ghan bhi ẹlo nọnsi Jehova. Ọle re ọne isẹhoa nin mhan rẹ deba Ọmọn nọnsọle ha si ẹbho koko bhi ọne otọ agbọn nan rebhe, nin ele dọ ga ọle ọkuẹsẹ ọkpẹnlẹn vae. (Hag. 2:7) Mhan sabọ re iwẹnna itẹmhọn Osẹnobulua nin mhan lu rẹ khọkhọ iwẹnna nin eria lu rẹ miẹn ẹbho fan sade ene ẹbho ribhi okhẹnan. Inian mhan diabe eria ne miẹn ẹbho fan sade okọ nọnsele gberuẹ bhi ẹdẹ. Arẹmiẹn ikpeta ẹbho ha miuhọnmhọn, iwẹnna nin ene ẹbho nan lu wo lu uhọnmhọn emhin. Iriọ yẹ nọn rẹji iwẹnna itẹmhọn Osẹnobulua nin mhan lu ẹlẹnan. Mhan bha lẹn eka ẹbho ne ha yẹ miuhọnmhọn bhi ọne agbọn Esu nan. Ọkpakinọn, Jehova dẹ sabọ noo ọnọn hi rẹ khin bhi ẹwẹ mhan rẹ rẹkpa ele. Obhio mhan natiọle Andreas nọn nyẹnlẹn bhi Bolivia da yọle: “Mẹn lẹnmhin ghe, ọkuẹsẹ ọria vae dọ luẹ ẹmhọn iJehova yẹ mianmẹn, ibhio mhan ne bunbun, ele rẹkpa ọle.” Ọ yẹ khẹke nin mhan ha mhọn ọnan bhi ọkhọle beji mhan rẹ lu iwẹnna itẹmhọn Osẹnobulua. Mhan ha lu inian, Jehova ki nan erọnmhọn nin mhan. Mhan ki yẹ wo ha miẹn eghọnghọn bhi iwẹnna itẹmhọn Osẹnobulua nin mhan lu.