1. Emhin kpataki nela ọkhẹke nin ẹbho rebhe zẹ rẹ lu?

 ẸLẸNAN nian, ẹbho mhọn emhin kpataki nin ele ha zẹ rẹ lu. Ele dẹ be re obọ ba ugbẹloghe nọnsi Jehova, la ele dẹ be re obọ ba ugbẹloghe nọnsi Esu nin oghian ọlẹn? Ọdeọde dẹ zẹ ọne ọle ha re obọ ba. Ọne ele zẹ ha rẹman si ele dẹ miẹn iẹnlẹn ighegheghe, la si ele ida miẹn iẹnlẹn ighegheghe. (Matt. 25:31-33, 46) Bhi ẹghe ekpokpo nọn khua, iyaman nan ha re nin ele ha rẹman si ele dẹ miuhọnmhọn, la si ele dẹ miẹn ugbekhuelo.​—Rev. 7:14; 14:9-11; Ezek. 9:4, 6.

2. (a) Be bhọ Hebrews 10:35-39 yọle nin mhan lu? (b) Be ebe ọsi Revelation ha rẹ sabọ rẹkpa mhan yẹ?

² Tie Hebrews 10:35-39. Ahamiẹn uwẹ zẹ nin uwẹ rẹ re obọ ba ugbẹloghe nọnsi Jehova, uwẹ wo zẹ nọnsẹn. Ejayenan nian, uwẹ yẹ wo guanọ nin uwẹ rẹkpa ẹbho zẹ nọnsẹn. Uwẹ dẹ sabọ noo ẹmhọn nọn ribhi ebe ọsi Revelation rẹ rẹkpa ele. Ọne ebe tẹmhọn ebe ha sunu ji ẹbho ne nin Jehova ha suan. Ọ da yẹ ta emhin kikẹ nin ẹbho ne re obọ ba ugbẹloghe nọnsọle ha miẹn. Ọkhẹke nin mhan luẹ ene ẹmhọanta kpataki nan. Mhan ha lu iriọ, ọ ki rẹkpa mhan rẹ ha mhọn ọne ọhubhudu rẹ ha ga Jehova. Yẹ rẹ deba ọnan, mhan dẹ sabọ noo ebi mhan luẹle rẹ rẹkpa ẹbho rẹ zẹ rẹ ga Jehova, yẹ wo ha sun rẹkhan ọlẹn.

3. Be imhan ha zilo nyan bhi ọne uhọnmhọn-ọta nan?

³ Bhi ọne uhọnmhọn-ọta nan, mhan dẹ zilo nyan ene inọnta nan: Be ha sunu ji ẹbho ne re obọ ba ugbẹloghe nọnsi Osẹnobulua? Bhi obọ nọnkẹle, be ha sunu ji ẹbho ne re iyobọ nin ọne elanmhẹn ẹwẹ nọn gian nan tẹmhọnlẹn bhi ebe ọsi Revelation?

4. Usun nela Joni nin odibo daghe bhi imianlo nin ele bi Jesu ko ha ribhi okhun?

⁴ Joni nin odibo da daghe usun ẹbho eva bhi imianlo ne re obọ ba ugbẹloghe nọnsi Jehova yẹ miẹn iẹnlẹn ighegheghe. Itue 144,000 da ha ribhi usun ọhẹnhẹn. (Rev. 7:4) A da zẹ ele bhi ọne otọ nan nin ele dọ deba Jesu gbẹloghe bhi okhun. Ele dẹ daba Jesu gbẹloghe ọne otọ nan. (Rev. 5:9, 10; 14:3, 4) Bhi ọne imianlo, Joni da daghe ele deba Jesu mundia bhi Oke ọsi Zaiyọn bhi okhun.​—Rev. 14:1.

5. Be ha kẹ sunu ji enanzẹle ne yẹ ribhi ọne otọ nan?

⁵ Rẹ na ẹghe etuegbe nesi Jesu rẹ sẹbhi ọne ẹghe nan, ọle a rẹ ha zẹ ẹbho ne bunbun ne deba ene itue 144,000 nan. (Luke 12:32; Rom. 8:17) Ọkpakinọn, a da taman Joni ghe, ọbhi usun khere bhi ẹwẹ enanzẹle ha kẹre bhi ẹghe ọkike ọsi ọne agbọn nan. Ene ẹbho ne kẹre bhi ẹwẹ enanzẹle dẹ miẹn iyaman nọnsele nọn kike nin ele rẹ ha khian okhun, ọkuẹsẹ ekpokpo nọn khua munhẹn. (Rev. 7:2, 3; 12:17) Bhiriọ, bhi ẹghe ekpokpo nọn khua, enanzẹle ne kẹre bhi ọne otọ nan ki ha khian okhun, nin ele dọ deba enanzẹle nekẹle, ne sun rẹkhan Osẹnobulua ọkuẹsẹ ele yu. Bhi enin, ele ki deba Jesu ha gbẹloghe bhi Agbejele nọnsi Osẹnobulua.​—Matt. 24:31; Rev. 5:9, 10.

6-7. (a) Usun ẹbho nela Joni kie daghe? Be imhan miẹn luẹ rẹji ele? (b) Bezẹle nọn da khẹke nin ẹmhọn nọn ribhi Revelation uhọnmhọnlẹn 7 ha ti enanzẹle bi ene “usun ẹbho ne bunbun” bhọ?

⁶ Joni ki daghe usun ẹbho ne khian okhun fo, ọle da yẹ daghe “usun ẹbho ne bunbun.” Mhan ida sabọ lẹn eka ẹbho ne da ha ribhi ọne usun nan beji mhan rẹ lẹn eka ẹbho ne ribhi ọne usun ne da ha khian okhun. (Rev. 7:9, 10) Be imhan luẹle rẹji ele? A da taman Joni yọle: “Enan hi ene dagbare bhi ọne ekpokpo nọn khua. Ele re aranlẹn ọsi ọne ohuan rẹ họ ukpọn nọnsele khia nọn da ha fua.” (Rev. 7:14) Ene usun ẹbho nan ne bunbun ha miuhọnmhọn bhi ekpokpo nọn khua fo, ele ki ha nyẹnlẹn bhi ọne otọ nan, yẹ miẹn elele ne bunbun.​—Ps. 37:9-11, 27-29; Prov. 2:21, 22; Rev. 7:16, 17.

⁷ Aharẹmiẹn a zẹ imhan nin mhan ha khian okhun, la ọne otọ nan mhan ha da nyẹnlẹn, mhan be rẹọbhọ ghe, ẹlo mhan dẹ sẹbhi umunsẹ ọsi ebi a tẹmhọnlẹn bhi Revelation uhọnmhọnlẹn 7? Ọkhẹke nin mhan rẹọbhọ. Ẹghe nọn mhẹn an ọnan da wo ha khin rẹji ene usun eva nan ne yi eguọmhandia nesi Osẹnobulua! Mhan dẹ wo manman ha ghọnghọn ghe, mhan zẹ rẹ re obọ ba ugbẹloghe nọnsi Jehova. Emhin ọbhebhe nela ebe ọsi Revelation taman mhan rẹji ọne ekpokpo nọn khua?​—Matt. 24:21.

8. Be ekpokpo nọn khua ha rẹ munhẹn yẹ? Be ẹbho ne bunbun ha rẹ lu emhin yẹ?

⁸ Mhan luẹ bhi uhọnmhọn-ọta nọn gbera ghe, ugbẹloghe ọsi ọne agbọn nan dẹ kẹ denọ ẹlo da Babilọn nọn Khua, nọn mundia nin oga ohoghe rebhe ne ribhi ọne otọ agbọn nan. (Rev. 17:16, 17) Ọnan dẹ ha yi umunhẹn ọsi ekpokpo nọn khua. Ọnan dẹ be re ẹbho ne bunbun vae dọ ha ga Jehova? Eye. Sokpan Revelation uhọnmhọnlẹn 6 rẹman ghe, bhi ọne ẹghe nin nọn bha lẹkhẹ, ẹbho ne iga Jehova dẹ dọ ha guanọ ugbega bhi obọ ẹbho ne gbẹloghe, bi ene do ẹki bhi ọne agbọn nan, nan rẹ khọkhọ ene oke. Ranmhude ọ iyi Agbejele nọnsi Osẹnobulua ele re obọ ba, Jehova ki ghe ele bii ene nanlẹn ha suan.​—Luke 11:23; Rev. 6:15-17.

9. Be ẹbho nesi Jehova ha rẹ lu emhin yẹ bhi ẹghe ekpokpo nọn khua? Be ha sunu ji ele?

 ⁹ Bhi ọsi ẹmhọanta, ẹbho ne sun rẹkhan Jehova dẹ re uwedẹ ikẹ rẹ lu emhin bhi ọne ẹghe nin nọn bha lẹkhẹ​—bhi ẹghe ekpokpo nọn khua. Ele ọkpa da ha yi usun ẹbho bhi ọne otọ nan ne da ha ga Jehova. Sẹyẹ, ele ida ka nin ele rẹ re iyobọ nin ọne elanmhẹn ẹwẹ. (Rev. 13:14-17) Ranmhude ele sun rẹkhan Jehova, ẹbho ne nin Jehova ha suan dẹ wo manman ha khọẹkẹ. Ranmhude ọnan, usun agbaẹbho ne ribhi ọne otọ nan kẹkẹ ki mun okhọnlẹn bu ẹbho nesi Osẹnobulua ne ribhi ọne otọ agbọn nan rebhe. Ọne okhọnlẹn nan Baibo tiọle, okhọnlẹn ọsi Gọgi ọsi Megọgi.​—Ezek. 38:14-16.

10. Beji Revelation 19:19-21 rẹman, be Jehova ha lu ene ẹbho yẹ ne mun okhọnlẹn bu ẹbho nesọle?

¹⁰ Be Jehova ha lu ene ẹbho yẹ ne mun okhọnlẹn bu ẹbho nesọle? Ọle taman mhan yọle: “Okpohu dẹ re mẹn.” (Ezek. 38:18, 21-23) Revelation uhọnmhọnlẹn 19 da tẹmhọn ebe ha kie sunu. Jehova da ji Ọmọn Nọnsọle nin ọle dọ gbega ẹbho nesọle, yẹ khọn eghian ele miotọ. “Eyokulo ne ribhi okhun” ne yi ẹhi nesọle ne sun rẹkhan ọlẹn bi ene itue 144,000 dẹ deba Jesu bhi ọne okhọnlẹn nan. (Rev. 17:14; 19:11-15) Be ha ki sunu sade ele khọn ọne okhọn nan fo? Usun rebhe bi ẹbho rebhe ne nin Jehova ha suan iyẹ da ha ribhọ!​—Tie Revelation 19:19-21.

11. Be bhọ hi emhin nọn lu uhọnmhọn emhin nẹ, nan tẹmhọnlẹn bhi ebe ọsi Revelation?

¹¹ Ria ẹmhọn ebi emhin ha dia ẹbho ne sun rẹkhan Jehova bhi egbe yẹ bhi ọne otọ nan, nin ele rẹ miuhọnmhọn bhi ugbekhuelo nọn sunu ji eghian Osẹnobulua! Ọrebhe bhi ọne otọ nan dẹ wo ha ghọnghọn! Arẹmiẹn eghọnghọn dẹ ha ribhi okhun ẹghe nan ha rẹ fuẹn Babilọn nọn Khua a fo, emhin ọbhebhe yẹ ribhọ nọn ha manman re eghọnghọn re. (Rev. 19:1-3) Emhin nọn manman lu uhọnmhọn emhin nọn nin ebe ọsi Revelation tẹmhọnlẹn​—Ibọdọ bi ireokhuo ọsi ọne Ohuan.​—Rev. 19:6-9.

12. Beji a rẹman bhi Revelation 21:1, 2, ẹghela a ha rẹ lu ibọdọ bi ireokhuo ọsi ọne Ohuan?

¹² Ẹghela a ha rẹ lu ọne ibọdọ bi ireokhuo? Ene itue 144,000 rebhe dẹ ha ribhi okhun fo, ọkuẹsẹ a mun okhọn Amagẹdọn hẹn. Ọrẹyiriọ, ọ iyi ọne ẹghe nin a ha rẹ lu ọne ibọdọ bi ireokhuo ọsi ọne Ohuan. (Tie Revelation 21:1, 2.) A dẹ lu ọne ibọdọ bi ireokhuo ọsi ọne Ohuan sade a khọn okhọn Amagẹdọn fo, bi sade a fuẹn eghian nesi Osẹnobulua a fo sẹsẹsẹ.​—Ps. 45:3, 4, 13-17.

13. Be ha sunu bhi ọne ibọdọ bi ireokhuo ọsi ọne Ohuan?

¹³ Be ha sunu bhi ọne ibọdọ bi ireokhuo ọsi ọne Ohuan? Beji ibọdọ bi ireokhuo rẹ ku okpea bi okhuo kugbe, iriọ ọne ibọdọ bi ireokhuo ọsi ọne Ohuan ha rẹ ku Jesu Kristi nin Ojie bi amhẹn ọlẹn nin itue 144,000 kugbe. Ọne emhin kpataki nan nọn ha sunu dẹ mun gọvamẹnt ọsọgbọn gbọ, nọn ha gbẹloghe ọne otọ nan na bhi ikpe 1,000.​—Rev. 20:6.

14-15. Be Revelation uhọnmhọnlẹn 21 rẹ khọkhọ ene itue 144,000? (Fẹ adudu nọn ribhi odalo ọne ebe nan ghe.)

¹⁴ Revelation uhọnmhọnlẹn 21 da re itue 144,000 rẹ khọkhọ agbaẹbho nọn manman mhọn-ose natiọle Jerusalẹm Ọsọgbọn. (Rev. 21:2, 9) Ọne agbaẹbho da ha mhọn udo ọsi ayotọ 12, nan gbẹn elin 12 ọsi ene etuegbe 12 ọsi ọne Ohuan ọi. Bezẹle nin ọnan da ti Joni bhọ? Ranmhude ọle daghe a gbẹn elin nọnsọle ọbhi ọkpa bhi ene udo nin.  Udede ekpẹn wo khọnan!​—Rev. 21:10-14; Eph. 2:20.

¹⁵ Ọne agbaẹbho nan wo dikẹ bhi agbaẹbho nekẹle. Igolu nan bha re emhin soso gua, ọle a rẹ lu uwedẹ nọn na ọne agbaẹbho gbera. Ọ da yẹ ha mhọn gati 12 nan re ileghe ne manman ghan rẹ lu. A da yẹ noo ikpudo ne manman ghan rẹ lu ayotọ bi egbe-uwa nesọle ne ha mhọn-ose. A da yẹ maan egbe-uwa nesọle nọnsẹn. (Rev. 21:15-21) Sẹyẹ, emhin da ha ribhọ nọn bha re ọle gba! Joni da taman mhan yọle: “Mẹn bha daghe uwa oga bhi enin, ranmhude Jehova nin Osẹnobulua nọn Ke Okhun Nẹ, bi ọne Ohuan hi uwa oga nọnsọle. Ọ bha yẹ khẹke nin ovuẹn la uki ha bhala ọbhi ọne agbaẹbho, ranmhude ẹfua nọnsi Osẹnobulua ha bhala bhi enin, sẹyẹ, ọne Ohuan da ha yi ukpa nọnsọle.” (Rev. 21:22, 23) Ene deba Jerusalẹm Ọsọgbọn dẹ ha ribhi eji Jehova ye. (Heb. 7:27; Rev. 22:3, 4) Bhiriọ, Jehova bi Jesu hi uwa oga nọn ribhi ọne agbaẹbho.

16. Emhin esili kikẹ nela ẹbho ha miẹn ẹghe nin Jesu ha rẹ gbẹloghe bhi Ukpe Uli bhi Agbejele nọnsi Osẹnobulua?

¹⁶ Ọ dẹ wo manman re enanzẹle ha ghọnghọn rẹ ria ẹmhọn ọne agbaẹbho nan. Ọkpakinọn, ọkhẹke nin ẹbho ne ha nyẹnlẹn bhi ọne otọ nan yẹ ji ẹmhọn ọne agbaẹbho nan rẹtẹ ele. Bhi Ukpe Uli nin Jesu ha rẹ gbẹloghe bhi Agbejele nọnsi Osẹnobulua, ẹbho dẹ miẹn erọnmhọn ne bunbun nin Jerusalẹm Ọsọgbọn ha mun vae bhi ọne otọ nan. Joni da daghe ene erọnmhọn nan nẹ bii ẹdẹ ọsi iẹnlẹn. Sẹyẹ, eran ọsi iẹnlẹn da ha ribhi obọ veva bhi ọne ẹdẹ, nan noo ebe nesọle rẹ ha re egbe daan ene agbaẹbho. (Rev. 22:1, 2) Ẹbho rebhe ne da ha nyẹnlẹn ẹghenin, dẹ ha mhọn ọne isẹhoa nin ele rẹ miẹn elele bhi ene emhin esili nan. Khere-khere ẹbho ne hẹnmhọn nin Jehova ha rẹ dọ ha yi eria ne gbale. Ekhọnmhọn, ọbalọ bi eviẹ ida yẹ ha ribhọ.​—Rev. 21:3-5.

17. Beji Revelation 20:11-13 rẹman, ẹbho nela ha miẹn elele bhi Ukpe Ulin nin Jesu ha rẹ gbẹloghe?

¹⁷ Ẹbho nela ha miẹn ọne elele nan bhi ẹghe odalo? Ẹbho ọhẹnhẹn hi, ene usun ẹbho ne ha miuhọnmhọn bhi okhọn Amagẹdọn, rẹ deba imọn nesele nin ele ha biẹ bhi agbọn ọsọgbọn. Sokpan, Revelation uhọnmhọnlẹn 20 da yẹ yọle ghe, a dẹ riọ ẹbho ne yu kpanọ. (Tie Revelation 20:11-13.) A dẹ riọ ẹbho ne yu ne ga Jehova  nọnsẹn bhi ẹghe nọn gbera kpanọ bhi uu, bi ẹbho ne bha miẹn ọne isẹhoa rẹ luẹ ẹmhọn Jehova. (Acts 24:15; John 5:28, 29) Ọnan be rẹman ghe, ọrebhe a ha riọkpanọ bhi ẹghe nin Jesu ha rẹ ha gbẹloghe bhi Ukpe Uli? Eye. Ẹbho ne bha ka ga Jehova ọkuẹsẹ ele yu ida riọkpanọ. Ele bha noo isẹhoa nin ele ha mhọnlẹn rẹ ga Jehova. Bhiriọ, ele da rẹman ghe, ele bha sẹ eria ne ha nyẹnlẹn bhi Agbọn Ọfubhegbe.​—Matt. 25:46; 2 Thess. 1:9; Rev. 17:8; 20:15.

18. Ahamiẹn ọne ikpe 1,000 sotọ, be emhin ha diayẹ bhi ọne otọ nan?

¹⁸ Ẹghe nin ọne ikpe 1,000 ha rẹ sotọ, ẹbho rebhe ne ha ki ha nyẹnlẹn bhi ọne otọ nan ẹghenin, ki ha yi ẹbho ne gbale. Ẹbho ne ha ki ha nyẹnlẹn ẹghenin iyẹ da ha mhọn olukhọ nin mhan le bhi uku bhi obọ Adamu. (Rom. 5:12) Ihẹn nọn rẹkhan olukhọ ọsi Adamu ida yẹ ha ribhọ. Bhiriọ, ẹbho bhi ọne otọ nan ki kiẹn eria ne gbale bhi ẹghe nin ọne ikpe 1,000 ha rẹ sotọ.​—Rev. 20:5.

19. Bezẹle nin edọnmhẹn nọn kike ha da ha ribhọ?

¹⁹ Mhan lẹnmhin ghe, Jesu wo sun rẹkhan Jehova, arẹmiẹn Esu wo dọnmhẹn ọlẹn. Ọkpakinọn, ẹbho rebhe ne gbale ha be sun rẹkhan Jehova sade a re isẹhoa nin Esu rẹ dọnmhẹn ele? Ọdeọde dẹ rẹman si ọle dẹ sun rẹkhan Jehova ẹghe nan ha rẹ fan Esu fia bhi ighan sade ọne ikpe 1,000 sotọ. (Rev. 20:7) Ẹbho ne sun rẹkhan Jehova bhi ẹghe ọne edọnmhẹn nọn kike nan dẹ miẹn iẹnlẹn ẹdẹdẹmhẹndẹ, bi isẹhoa ọsaje. (Rom. 8:21) Esu bi ẹlinmhin ebe nesọle bi ẹbho ne sọtẹ bhi obọ Jehova, dẹ miẹn ugbekhuelo ọsi ẹdẹdẹmhẹndẹ.​—Rev. 20:8-10.

20. Be ọ dia uwẹ bhi egbe yẹ nin uwẹ rẹ dọ luẹ ene ọta akhasẹ ne ribhi ebe ọsi Revelation?

²⁰ Be ọ dia uwẹ yẹ bhi egbe beji mhan zilo nyan emhin ne ribhi ebe ọsi Revelation? Ọ bha be ti uwẹ bhọ rẹ lẹn ghe, uwẹ ribhi ẹghe nin ene ọta akhasẹ rẹ ha munsẹ? Ọnan ida be re ọne ọhubhudu nin uwẹ rẹ ha tie ẹbho nin ele dọ deba mhan ha ga Osẹnobulua bhi uwedẹ ẹmhọanta? (Rev. 22:17) Beji a miẹn mhan zilo nyan ene emhin nan ne da sunu bhi ẹghe odalo, ọ wo re imhan ha ghọnghọn, yẹ ha guanọ nin mhan ta ebi Joni nin odibo tale ẹghe nin ọle rẹ yọle: “Isẹ! Vae, Jesu nin Ebeanlẹn.”​—Rev. 22:20.