1. Ọnọghọ nela ene bunbun bhi ẹwẹ mhan kuẹlo da?

 UWẸ sẹ ka mhanmhan emhin khẹ nin uwẹ ho nin uwẹ lu bhi oga nọnsi Jehova, sokpan ọ nọghọ uwẹ rẹ mun ọlẹn sẹ? b Ọ ha yi riọ, ọ iyi uwẹ ọkpa ọ sẹ sunu je. Bhi ọsi ijiẹmhin, Philip da ha ho nin ọle ha nan erọnmhọn ji Jehova ẹghe rebhe, sẹyẹ nin ọne erọnmhọn manman ha deọbhọ. Ọkpakinọn, ọ bha lẹkhẹ nanlẹn rẹ ha miẹn ẹghe rẹ ha nan erọnmhọn. Erika da mhanmhanlẹn nin ọle rẹ kẹ ha vae bhi ikolo nan do ọkuẹsẹ a khian inẹbho; ọrẹyiriọ, ọle gbo ikẹ vae. Tomáš da dọnmhegbe igba ne bunbun nin ọle rẹ tie Baibo sotọ. Ọle da yọle: “Bhi ọsi ẹmhọanta, ọ iti mẹn bhọ rẹ ha tie Baibo. Igba ea mẹn dọnmhegbe rẹ tie Baibo sotọ, ọkpakinọn, bhi ene igba ea, ebe ọsi Leviticus mẹn sabọ tie ọle sẹ.”

2. Bezẹle nọn bha da khẹke nin mhan ji ọ re egbe lọ mhan sade mhan mhọn emhanmhan nin mhan bha sẹ sabọ mun sẹ nian?

² Ahamiẹn uwẹ mhọn emhanmhan nian nin uwẹ bha sẹ sabọ munsẹ, huẹan hẹi ji ọ re egbe lọ uwẹ. Ọ re ẹghe nan bhọ rẹ sabọ mun obhi emhanmhan sẹ, sẹyẹ a dẹ manman wẹnna ọbhọ. Nin uwẹ rẹ ha dọnmheghe nin uwẹ rẹ sẹyẹ mun emhanmhan nọnsẹ sẹ rẹman ghe, ikolu nin uwẹ bi Jehova ko mhọnlẹn manman ghan bhi ẹlo nọnsẹ, sẹyẹ uwẹ ho nin uwẹ lu eka nin ahu nọnsẹ gbe nanlẹn. Uwedẹ nin uwẹ rẹ ha dọnmhegbe ti Jehova bhọ. Bhi ọsi ẹmhọanta, ọle bha yọle nin uwẹ lu gbera beji ahu nọnsẹ sẹ. (Ps. 103:14; Mic. 6:8) Bhiriọ, ahamiẹn uwẹ mhanmhan emhin nin uwẹ ha lu, ji ọ ha yi emhin nin uwẹ ha sabọ lu, emhin nin idia nọnsẹ ha re otọ nin uwẹ rẹ lu. Ahamiẹn uwẹ re inian mhanmhan emhin nin uwẹ ha lu fo, be uwẹ ha lu beji uwẹ ha da sabọ mun ọlẹn sẹ? Bha ji fẹ emhin eso ghe ne ha sabọ rẹkpa mhan.

3. Bezẹle nin ọhubhudu da manman lu uhọnmhọn emhin?

³ Ahamiẹn mhan mhọn ọhubhude, ọ ki rẹkpa mhan rẹ mun emhanmhan nesẹmhan sẹ. Ọria nọn mhọn ọhubhudu dọnmhegbe kaka nin ọle rẹ mun emhanmhan nesọle sẹ. Mhan dẹ sabọ re ọhubhudu rẹ khọkhọ ahoho nọn dia okọ diọbhi eji ọ khian. Ahamiẹn ọne ahoho wo ha fi, ọria nọn gua ọne okọ dẹ sẹbhi eji ọle khian. Ọne ahoho ha manman ha fi, ọle bhọ ki kẹ sẹbhi eji ọle khian. Iriọ yẹ nọn, ahamiẹn mhan manman mhọn ọhubhudu da emhin nin mhan ho nin mhan lu, asabọmiẹn ọ ki rẹkpa mhan rẹ kẹ mun ọlẹn sẹ. Obhio mhan nin okpea natiọle David nọn na bhi El Salvador vae da yọle: “Ahamiẹn uwẹ mhọn ọhubhudu, uwẹ ki manman ha dọnmhegbe. Uwẹ ida ji emhin soso da re uwẹ miẹn ghe uwẹ bha mun emhanmhan nesẹ sẹ.” Bhiriọ, be uwẹ ha lu beji uwẹ ha da sabọ manman ha mhọn ọhubhudu?

4. Emhin nela mhan ha sabọ bhii Jehova bhi erọnmhọn? (Philippians 2:13) (Yẹ fẹ ifoto ghe.)

⁴ Bhii Jehova nin ọle rẹkpa uwẹ rẹ manman ha mhọn ọhubhudu. Jehova dẹ sabọ re ẹlinmhin nọnsọle rẹ rẹkpa uwẹ rẹ mun emhanmhan nesẹ sẹ. (Tie Philippians 2:13.) Ẹgheso, mhan mhanmhanlẹn nin mhan rẹ lu emhin eso ranmhude ọkhẹke nin mhan lu iriọ. Emhin nọn mhẹn khọnan. Ọkpakinọn, asabọmiẹn ọ ida manman ha hu mhan bhi udu rẹ lu ọle. Ọnan hi emhin nọn sunu ji ọbhio mhan nin okhuo natiọle Norina nọn na bhi Uganda vae. Ọne obhio mhan nan da mhanmhanlẹn nin ọle rẹ munhẹn ha man ọria Baibo, arẹmiẹn ọ imanman hu ọle bhi udu nin ọle rẹ lu iriọ, ranmhude nin ọle rẹ ha riale ghe ọle iguẹ rẹ man emhin. Be rẹkpa ọle? Ọle da yọle: “Mẹn da ha bhii ji Jehova ukpẹdẹ-ukpẹdẹ nin ọle rẹkpa mẹn rẹ manman ha mhọn ọne ọhubhudu rẹ munhẹn ha man ọria Baibo. Sẹyẹ mẹn da lu rẹkhan beji mẹn bhii, mẹn da dọnmhegbe ha lu re alo bhi uwedẹ nin mẹn rẹ man emhin. Uki eso ki gbera, mẹn da dọ kere ghe ọhubhudu nin mẹn mhọn rẹ munhẹn ha man ẹbho Baibo manman tuẹn okhun. Sẹyẹ bhi ọne ukpe nin, mẹn da munhẹn ha man itue eva Baibo.”

5. Emhin nela mhan ha ria eria nyan ne ha sabọ re mhan manman ha mhọn ọhubhudu?

⁵ Ha ria eria nyan emhin nin Jehova sẹ lu nin uwẹ. (Ps. 143:5) Pọl nin odibo da wo ha ria eria nyan itohan nọn bha khẹke ọle nin Jehova mhọn da ọle. Ọnan da re ọle ha hu ọle bhi udu rẹ manman wẹnna nin Jehova. (1 Cor. 15:9, 10; 1 Tim. 1:12-14) Bọsi Pọl, ahamiẹn uwẹ wo ha ria eria nyan ene emhin nin Jehova sẹ lu nin uwẹ, ọ ki manman ha hu uwẹ bhi udu rẹ mun emhanmhan nọnsẹ sẹ. (Ps. 116:12) Bha ji mhan fẹ emhin nọn rẹkpa obhio mhan nin okhuo nọn na bhi Honduras vae rẹ sabọ mun emhanmhan nọnsọle sẹ nin ọle rẹ kiẹn ọkanẹfan ọsi ẹghe rebhe. Ọle da yọle: “Mẹn da ria eria nyan ebi Jehova rẹ manman hoẹmhọn mẹn yẹ. Ọle tie mẹn vae bhi agbotu nọnsọle. Ọle gbẹloghe mẹn yẹ gbega mẹn. Ene emhin nan nin mẹn ria eria nyan da kie re oyẹẹ nin mẹn mhọn da Jehova deziẹn, yẹ re mẹn ha mhọn ọne ọhubhudu rẹ mun emhanmhan nọnsẹmhẹn sẹ.”

6. Emhin ọbhebhe nela ha sabọ rẹkpa mhan rẹ manman ha mhọn ọhubhudu?

⁶ Denọ ẹlo ọbhi elele ne ha nabhọre sade uwẹ mun emhanmhan nesẹ sẹ. Mhan fẹ emhin nọn rẹkpa Erika nin mhan ka tẹmhọnlẹn rẹ sabọ mun emhanmhan nọnsọle sẹ, nin ọle rẹ kẹ ha vae bhi ikolo nan do ọkuẹsẹ a dagbare bhi inẹbho. Ọle da yọle: “Mẹn  dọ kere ghe udede isẹhoa mẹn wo ha mun fia nin mẹn irẹ kẹ vae bhi ọne ikolo. Ọkpakinọn, nin mẹn ki rẹ kẹ ha vae, mẹn da miẹn isẹhoa rẹ ha tuẹ ene ibhio mhan, yẹ deba ele ha gbẹghe. Sẹyẹ, mẹn da sabọ ha kaehọ emhin kẹkẹ nan tẹmhọnlẹn bhi ọne ikolo rẹji uwedẹ nin mhan ha rẹ sabọ ha lu re alo bhi iwẹnna itẹmhọn Osẹnobulua, yẹ rẹ ha sọnyẹnmhẹn bhọ.” Erika da denọ ẹlo ọbhi elele nin ọle ha miẹn bhọ sade ọle kẹ ha vae bhi ọne ikolo, ọnan da rẹkpa ọle rẹ mun emhanmhan nọnsọle sẹ. Elele nela uwẹ ha sabọ denọ ẹlo ọi? Ahamiẹn nin uwẹ rẹ ha lu re alo bhi uwedẹ nin uwẹ rẹ tie Baibo, la nan erọnmhọn hi emhanmhan nọnsẹ, ria eria nyan ebi ọ ha rẹ ziẹn ikolu nin uwẹ bi Jehova ko mhọnlẹn yẹ. (Ps. 145:18, 19) Ahamiẹn nin uwẹ rẹ ha mhọn ikpẹ ne khẹke Kristiẹn nọn, denọ ẹlo ọbhi ebi ọ ha rẹ rẹkpa uwẹ rẹ sabọ deba ẹbho ha mhọn ikolu nọ mhẹn yẹ. (Col. 3:14) Uwẹ sabọ rẹ gbẹn emhin kẹkẹ ọbhi ebe ne re uwẹ ha guanọ nin uwẹ mun emhanmhan nesẹ sẹ, uwẹ ha yẹ ha fẹ ọne ebe ghe ẹghe-ẹghe. Tomáš nin mhan tẹmhọnlẹn da yọle: “Mẹn ha lẹn sẹ ghe emhin esili ne bunbun dẹ nabhi emhanmhan nesẹmhẹn re, mẹn ki wo ha dọnmhegbe nin mẹn rẹ mun ele sẹ.”

7. Be rẹkpa Julio bi okhuo ọle rẹ sabọ mun emhanmhan nọnsele sẹ?

⁷ Deba ẹbho ne ha sabọ rẹkpa uwẹ rẹ mun emhanmhan nesẹ sẹ ha gbẹghe. (Prov. 13:20) Mhan fẹ emhin nọn rẹkpa obhio mhan nin Julio bi okhuo ọle rẹ sabọ mun emhanmhan nọnsele sẹ, nin ele rẹ manman ha tẹmhọn Osẹnobulua. Julio da yọle: “Mhan da zẹ imọẹ ne re obọ ọbhi emhanmhan nọnsẹmhan, yẹ deba ele ha zilo ọle. Ene bunbun bhi ẹwẹ ele ki ka mun ọne emhanmhan nin mhan mhọn sẹ, bhiriọ ele dẹ sabọ ta emhin ne ha rẹkpa mhan man mhan. Ene imọẹ mhan da yẹ ha nọọn mhan ebi mhan ki rẹ re emhanmhan nọnsẹmhan khian yẹ, yẹ ha re izebhudu nin mhan ẹghe-ẹghe nin mhan rẹ guanọ ọle.”

8. Be ha sabọ sunu sade ẹghe nọn rẹ ghọn mhan ọkpa mhan rẹ wẹnna ọbhi emhanmhan nọnsẹmhan? (Yẹ fẹ ifoto ghe.)

⁸ Bhi ọsi ẹmhọanta, ọ iyi ẹdẹ-ẹdẹ ọ da rẹ ha hu mhan bhi udu rẹ lu emhin nin mhan mhanmhanlẹn. Ọkpakinọn, ọnan ki rẹman ghe mhan ida sabọ mun emhanmhan nesẹmhan sẹ? Eye. Fẹ ọne ijiẹmhin nan ghe: Ahoho rẹkpa ọria nọn gua okọ rẹ sabọ ha dia okọ nọnsọle khian bhi ẹkẹ ẹdẹ. Ọrẹyiriọ, ọ iyi ẹghe rebhe ahoho rẹ manman fi, sẹyẹ, asabọmiẹn ẹgheso ahoho ida fi hiehie. Ọnan ki rẹman ghe ọria nọn gua ọne okọ dẹ mundia bhi ijian ọkpa? Eye. Bhi ọsi ijiẹmhin, okọ eso mhọn ẹgine, sẹyẹ eso mhọn ukpokpo nan rẹ gua ọle. Ọria nọn gua okọ dẹ yẹ sabọ ha noo ene emhin nan rẹ gua okọ nọnsọle khian aharẹmiẹn ahoho bha fi. Mhan dẹ sabọ re ọhubhudu nin mhan mhọn rẹ khọkhọ ọne ahoho nin. Asabọmiẹn ọ iyi ẹdẹ-ẹdẹ mhan ha rẹ manman ha mhọn ọhubhudu. Ẹgheso ọ sabọ rẹ wo ha ghọn mhan rẹ lu bhi emhanmhan nọnsẹmhan, ẹgheso, ọ ida ha ghọn mhan. Bhiriọ, ahamiẹn ukpẹdẹ nọn rẹ ghọn mhan ọkpa mhan rẹ wẹnna ọbhi emhanmhan nọnsẹmhan, asabọmiẹn mhan ida mun ọlẹn sẹ ghẹdẹ. Ọkpakinọn, beji ọria nọn gua okọ rẹ guanọ uwedẹ ọbhebhe nin ọle rẹ sabọ gua okọ nọnsọle sẹbhi eji ọle khian, mhan dẹ yẹ sabọ khu ọbhi emhanmhan nọnsẹmhan aharẹmiẹn ọ bha manman hu mhan bhi udu. Ẹmhọanta nọn ghe ọnan ida lẹkhẹ, ọkpakinọn, uwẹ dẹ wo ha ghọnghọn sade uwẹ mun emhanmhan nọnsẹ sẹ. Ọkuẹsẹ mhan zilo nyan  emhin ne ha sabọ rẹkpa mhan, bha ji mhan zilo nyan inọnta nọn ha sabọ zegbere.

9. Emhin ọbe be nọn nin mhan rẹ sẹyẹ ha khu ọbhi emhanmhan nọnsẹmhan, aharẹmiẹn ọ imanman hu mhan bhi udu? Re otọle man.

⁹ Jehova guanọ nin oga nọnsẹmhan na ọkhọle vae yẹ re eghọnghọn ha ga ọle. (Ps. 100:2; 2 Cor. 9:7) Bhiriọ, ọ be sẹyẹ khẹke nin mhan ha khu ọbhi emhanmhan nọnsẹmhan, aharẹmiẹn mhan imanman mhọn ọne ọhubhudu? Bha ji mhan fẹ ijiẹmhin ọsi Pọl nin odibo ghe. Ọle da yọle: “Mẹn dọnmhegbe rẹ mun egbe mẹn mhọn yẹ ha sun ọlẹn bii igbọn.” (1 Cor. 9:25-27, study note nọn ribhi ulọnlẹn nọnzi 27) Arẹmiẹn ọ bha ha hu Pọl bhi udu rẹ lu emhin nin Osẹnobulua guanọ nin ọle lu, ọle da sẹyẹ dọnmhegbe beji ọle ha da sabọ lu ọle. Jehova be miẹn oga ọsi Pọl ọbhi egbe? Ehe! Jehova da nan erọnmhọn nanlẹn bhi uwedẹ nin ọle rẹ dọnmhegbe.—2 Tim. 4:7, 8.

10. Elele nela nabhọre sade mhan dọnmhegbe rẹ ha khu ọbhi emhanmhan nọnsẹmhan, aharẹmiẹn mhan imhọn ọne ọhubhudu rẹ lu ọle?

¹⁰ Iriọ yẹ nọn, ọ ti Jehova bhọ rẹ daghe ọle ghe mhan khu ọbhọ rẹ mun emhanmhan nesẹmhan sẹ, aharẹmiẹn ọ imanman hu mhan bhi udu. Aharẹmiẹn ọ iyi oyẹẹ nin mhan mhọn da ọne emhin rẹ mhan lu ọle, ọ re Jehova ghọnghọn ranmhude ọle lẹnmhin ghe oyẹẹ nin mhan mhọn da ọle re mhan lu ọle. Jehova dẹ nan erọnmhọn nin mhan bhi uwedẹ nin mhan rẹ dọnmhegbe beji ọle rẹ nan erọnmhọn nin Pọl. (Ps. 126:5) Beji mhan ha rẹ ha daghe uwedẹ nin Jehova ha rẹ ha nan erọnmhọn nin mhan, ọ sabọ rẹ re mhan dọ ha mhọn ọhubhudu. Obhio mhan nin okhuo natiọle Lucyna nọn na bhi Poland vae da yọle: “Ẹgheso, ọ iti mẹn bhọ rẹ dagbare bhi inẹbho, manman nọn sade egbe lọ mẹn. Ọrẹyiriọ, udede ẹsele eghọnghọn nin mẹn miẹn khin sade mẹn dọnmhegbe dagbare.” Bhiriọ, bha ji mhan zilo nyan emhin eso nin mhan ha sabọ lu sade mhan iyẹ mhọn ọhubhudu.

11. Be Jehova ha rẹ rẹkpa mhan rẹ sabọ manman ha mun egbe ọbhi ibẹẹ yẹ?

¹¹ Bhii Jehova nin ọle rẹkpa uwẹ rẹ ha mun egbe ọbhi ibẹẹ. Ebi a re imun-egbe-ọbhi ibẹẹ rẹ ta hi, nin ọria rẹ mun egbe ọle mhọn nin ọle hẹi lu emhin nọn bha gba. Ọkpakinọn, ọ yẹ khẹke nin mhan ha mhọn ọne ikpẹ nan nin mhan da sabọ ha lu emhin ne mhẹn, manman nọn sade emhin nin mhan ho nin mhan lu manman kaka, la sade mhan imhọn ọhubhudu rẹ lu ọle. Yere ghe, imun-egbe-ọbhi-ibẹẹ, obọ ọkpa nọn bhi ikpẹ ọsi ẹlinmhin nọn khiale. Bhiriọ, bhii Jehova nin ọle re ẹlinmhin nọn khiale nọnsọle rẹ rẹkpa uwẹ rẹ sabọ ha mhọn ọne ikpẹ nan. (Luke 11:13; Gal. 5:22, 23) David nin mhan ka tẹmhọnlẹn da tẹmhọn ebi erọnmhọn rẹ rẹkpa ọle yẹ. Ọle da ha ho nin ọle hẹi iyẹ ha gbẹdẹ bhi iluẹmhin Baibo nọnsọle. Ọle da yọle: “Mẹn da wo ha bhii Jehova nin ọle rẹkpa mẹn rẹ sabọ ha mun egbe ọbhi ibẹẹ. Ranmhude urẹkpa nọnsọle, mẹn da sabọ dọ ha mhọn emhanmhan nin mẹn rẹ luẹ emhin, yẹ wo ha re obọ rẹkhan ọlẹn.”

12. Be adia nọn ribhi Ecclesiastes 11:4 ha rẹ rẹkpa mhan rẹ sabọ mun emhanmhan nesẹmhan sẹ yẹ?

¹² Hẹi ha khẹ ẹghe nin emhin rebhe ha rẹ wo dia nọnsẹn. Bhi ọne agbọn nan, asabọmiẹn ẹghe ida ha ribhọ nin emhin rebhe ha rẹ wo dia nọnsẹn. Mhan da ha khẹ ẹghe nọn sẹnian, asabọmiẹn mhan ida mun emhanmhan nesẹmhan sẹ ghẹdẹ. (Tie Ecclesiastes 11:4.) Obhio mhan nin okpea natiọle Dayniel da yọle: “Ẹghe nọn mhẹn nẹ iribhọ. Bhiriọ ọ bha khẹke nin mhan wo ha khẹ ẹghe nin emhin rebhe ha rẹ deọbhọ, sokpan, mhan munhẹn nian.” Obhio mhan nin okpea natiọle Paul nọn na bhi Uganda vae da tẹmhọn emhin ọbhebhe nọn zẹle nọn bha da khẹke nin mhan ha mun ẹsọn ya khẹ ẹghe ọbhebhe. Ọle da yọle: “Ahamiẹn mhan dọnmhegbe rẹ munhẹn aharẹmiẹn idia nin mhan ye bha lẹkhẹ, Jehova ki miẹn emhin nan erọnmhọn ọi.”—Mal. 3:10.

13. Bezẹle nọn da yi emhin nọn mhẹn nin mhan rẹ re obhi emhin khere rẹ munhẹn?

¹³ Re obhi emhin khere rẹ munhẹn. Ahamiẹn emhin nin mhan mhanmhanlẹn nin mhan lu kaka gbe, asabọmiẹn mhan ida ha mhọn ọne ọhubhudu rẹ lu ọle. Ahamiẹn inian ọ dia rẹji uwẹ, uwẹ sabọ rẹ deobọre bhi ene emhin nin uwẹ mhanmhanlẹn rẹ lu. Ahamiẹn nin uwẹ rẹ ha mhọn ikpẹ ne khẹke Kristiẹn hi emhanmhan nọnsẹ, uwẹ sabọ rẹ zẹ nin uwẹ rẹ  munhẹn ha re ọle man khere-khere. Ahamiẹn nan rẹ tie Baibo rebhe fo nọn, uwẹ sabọ rẹ re obhi ẹghe khere rẹ munhẹn ha tie ọle. Ọ bha lẹkhẹ nin Tomáš nin mhan ka tẹmhọn ọlẹn rẹ sabọ mun emhanmhan nọnsọle sẹ, nin ọle rẹ tie Baibo fo bhi ukpe. Ọle da yọle: “Mẹn da dọ kere ghe eji mẹn zẹ nin mẹn rẹ ha tie ukpẹdẹ-ukpẹdẹ kpọnọ gbe. Bhiriọ mẹn da dọnmhegbe rẹ kie munhẹn. Ọkpakinọn bhi ọne ẹghe nan, mẹn da mhanmhanlẹn nin mẹn rẹ fẹkẹ ha tie ọle khere-khere ukpẹdẹ-ukpẹdẹ, yẹ ha ria eria nyan ebi mẹn tiele. Ranmhude ọnan, mẹn da munhẹn dọ ha sọnyẹnmhẹn bhi Baibo nin mẹn tie.” Beji Tomáš ki rẹ manman ha sọnyẹnmhẹn bhi Baibo nin ọle tie, ọle da munhẹn ha re ẹghe nọn tanlẹn rẹ tie ọle. Khere-khere, ọle da sabọ tie Baibo sotọ. c

14. Emhin nela ha sabọ si mhan obọ re ikeke rẹ mun emhanmhan nesẹmhan sẹ?

¹⁴ Ọ ba bhi egbe a ghe ebi mhan hi ki rẹ dọnmhegbe sẹ yẹ, la mhọn ọhubhudu sẹ yẹ, emhin dẹ ha ribhọ ne ha sabọ si mhan re ikeke. Bhi ọsi ijiẹmhin, ebi a bha mhan-kọ sabọ rẹ sunu ji mhan, ọnan sabọ rẹ gbe mhan ẹghe nin mhan ha rẹ noo rẹ lu bhi emhanmhan nọnsẹmhan. (Eccl. 9:11) Mhan sabọ rẹ kuẹlo da ọnọghọ nọn wo re egbe lọ mhan, la gbe mhan ahu. (Prov. 24:10) Ranmhude ọ bha gba nin mhan, mhan sabọ rẹ dọ ha lu emhin ne iyi ọle ne ha sabọ gbe mhan ẹghe nin mhan ha rẹ khu ọbhi emhanmhan nọnsẹmhan. (Rom. 7:23) La, egbe sabọ wo rẹ lọ mhan. (Matt. 26:43) Be imhan ha sabọ lu sade emhin si mhan obọ re ikeke rẹ khu ọbhi emhanmhan nesẹmhan?

15. Ahamiẹn emhin si mhan obọ re ikeke, ọnin ki be rẹman ghe mhan ida yẹ sabọ mun emhanmhan nọnsẹmhan sẹ? Gbotọle fanọn an. (Psalm 145:14)

¹⁵ Yere ghe emhin ha si uwẹ obọ re ikeke bha rẹman uwẹ ida yẹ sabọ mun emhanmhan nọnsẹ sẹ. Baibo yọle ghe mhan sabọ rẹ kuẹlo da ọkakale igba ne bunbun. Ọkpakinọn, ọ da yẹ ji mhan lẹn ghe bhi ahu nọnsi Jehova, mhan dẹ sabọ khọn ọlẹn. (Tie Psalm 145:14.) Obhio mhan natiọle Philip nin mhan ka tẹmhọnlẹn da yọle: “Mẹn idenọ ẹlo ọbhi ene ẹghe nin mẹn bha rẹ sabọ mun emhanmhan nesẹmhẹn sẹ, sokpan, ene emhin nin mẹn kie ha lu  beji mẹn ha da sabọ mun ele sẹ mẹn denọ ẹlo ọi.” David nin mhan ka yẹ tẹmhọnlẹn da yọle: “Mẹn dọnmhegbe nin mẹn hẹi ha ghe emhin ne si mẹn obọ re ikeke bii idobolọ, ọkpakinọn, bii isẹhoa nin mẹn rẹ rẹman Jehova ebi mẹn hoẹmhọnlẹn sẹ yẹ.” Bhi ọsi ẹmhọanta, ahamiẹn mhan dọnmhegbe rẹ ha khu ọbhọ rẹ mun emhanmhan nọnsẹmhan sẹ, aharẹmiẹn emhin sunu ne ha rẹ si mhan obọ re ikeke, mhan ki rẹman Jehova ghe mhan ho nin mhan ha lu emhin ne ti ọle bhọ. Ria ẹmhọn ebi Jehova ha rẹ ha ghọnghọn yẹ, sade ọle daghe uwẹ dọnmhengbe nin uwẹ rẹ mun emhanmhan nọnsẹ sẹ.

16. Be emhin ne si mhan obọ re ikeke ha sabọ man mhan le?

¹⁶ Luẹ emhin bhi ọne emhin nọn si uwẹ obọ re ikeke. Ria ẹmhọn ebi si ọne emhin, uwẹ ha yẹ nọọn egbe uwẹ ọne inọnta nan, ‘Ọ dẹ be khẹke nin mẹn fi emhin denọ beji a ha da miẹn ọne emhin bha yẹ kie sunu?’ (Prov. 27:12) Ahamiẹn ọ nọghọ mhan rẹ mun emhanmhan nọnsẹmhan sẹ ẹgheso, asabọmiẹn ọnin rẹman ghe emhin nin mhan mhanmhan nin egbe mhan kpọnọ gbe. Ahamiẹn inian ọ dia rẹji uwẹ, kie fẹ emhanmhan nọnsẹ ghe nin uwẹ rẹ lẹn si emhin nọn ha yẹ fo uwẹ nọn. d Jehova ida ghe uwẹ bii ọria nọn bha sabọ mun emhanmhan nọnsọle sẹ sade emhin nin uwẹ mhanmhan nin egbe uwẹ kpọnọ gbe.—2 Cor. 8:12.

17. Bezẹle nọn da khẹke nin mhan ha ye ene emhin nin mhan sẹ sabọ lu re?

¹⁷ Ha ye ene emhin nin uwẹ sẹ sabọ lu re. Baibo yọle ghe “Osẹnobulua ilu emhin nọn bha gba. Ọle ida yele iwẹnna nọnsẹbha a.” (Heb. 6:10) Bhiriọ, ọ bha yẹ khẹke nin uwẹ ye ene emhin nin uwẹ sẹ sabọ lu a. Ha ria eria nyan emhanmhan nin uwẹ sẹ sabọ munsẹ—ọ sabọ rẹ ha yi emhin nin uwẹ lu rẹ manman ziẹn ikolu nin uwẹ bi Jehova ko mhọnlẹn, nin uwẹ rẹ tẹmhọn ọlẹn man ẹbho, la nin uwẹ rẹ mianmẹn. Beji uwẹ rẹ lu re alo rẹ sabọ mun emhanmhan nọnsẹ sẹ bhi ẹghe nọn gbera, uwẹ dẹ yẹ sabọ ha lu re alo nin uwẹ rẹ mun emhanmhan nin uwẹ mhọn nian sẹ.—Phil. 3:16.

18. Be ọkhẹke nin mhan yere rẹ ha lu beji mhan rẹ dọnmhegbe rẹ mun emhanmhan nesẹmhan sẹ? (Yẹ fẹ ifoto ghe.)

¹⁸ Bhi ahu nọnsi Jehova, uwẹ dẹ sabọ mun emhanmhan nesẹ sẹ, bọsi ọria nọn gua okọ nọn re eghọnghọn sẹbhi eji ọle khian. Ọkpakinọn, yere ghe eria ne bunbun ne gua okọ wo sọnyẹnmhẹn bhi ọne okhian. Iriọ yẹ nọn, beji uwẹ ha rẹ ha khu ọbhọ nin uwẹ rẹ mun emhanmhan nọnsẹ sẹ, dọnmhegbe ha gbẹlokotọ bhi ebi Jehova rẹ rẹkpa uwẹ yẹ. Ọnan ki rẹkpa uwẹ rẹ sabọ ha ghọnghọn. (2 Cor. 4:7) Uwẹ dẹ wo manman miẹn erọnmhọn sade uwẹ bha ji egbe lọ ẹ.—Gal. 6:9.