UHỌNMHỌN-ỌTA NỌNZI 20
ILLO 67 Tẹmhọn Osẹnobulua
Ji Oyẹẹ Wo Re Uwẹ Ha Tẹmhọn Osẹnobulua!
“A dẹ ka ta ọne ọta nọn mhẹn na bhi ene agbaẹbho rebhe.” —MAK 13:10.
EBI A HA LUẸ BHỌ
Ebi oyẹẹ rẹ re mhan re ọhubhudu bi ọkhọle rebhe rẹ ha tẹmhọn Osẹnobulua yẹ.
1. Be imhan luẹ bhi ikolo ukpe nan do bhi ukpe 2023?
BHI ikolo ukpe ọsi 2023 nan do, a a da tẹmhọn emhin eso nan fidenọ rẹji ebi mhan ka rẹ rẹọ i. A da yẹ ta emhin eso man mhan rẹji iwẹnna itẹmhọn Osẹnobulua nin mhan lu. Bhi ọsi ijiẹmhin, mhan da luẹ ghe, asabọmiẹn eria eso dẹ miẹn ọne isẹhoa rẹ deba ẹbho nesi Jehova aharẹmiẹn a dunmhun Babilọn Nọn Khua fo. A da yẹ ji mhan lẹn ghe, rẹ na bhi Novẹmba 2023, ọ i yẹ yi emhin rebhe nin mhan lu bhi inẹbho mhan da yẹ ha gbẹn ọbhi otọ. Ene emhin nan fidenọ nan ki be rẹman ghe iwẹnna itẹmhọn Osẹnobulua nin mhan lu bha yẹ lu uhọnmhọn emhin, sẹyẹ ọ bha yẹ khẹke nin mhan situa ha lu ọle? Eye!
2. Bezẹle nin iwẹnna itẹmhọn Osẹnobulua nin mhan lu da wo manman kiẹn emhin nọn lu uhọnmhọn emhin beji ẹghe rẹ ha gbera? (Mak 13:10)
2 Beji ẹdẹ rẹ ha gbera, iriọ iwẹnna itẹmhọn Osẹnobulua nin mhan lu rẹ kie manman ha lu uhọnmhọn emhin ọbhọ. Bezẹle? Ranmhude ẹghe i yẹ ribhọ. Fẹ ebi Jesu ta bhi otọ rẹji iwẹnna itẹmhọn Osẹnobulua nin mhan lu bhi ọne ẹghe ọkike nan. (Tie Mak 13:10.) Beji ebe ọsi Matiu rẹman, Jesu da yọle ghe, a dẹ wewe ọne ọta nọn mhẹn na bhi ọne otọ nan rebhe ọkuẹsẹ “ọkpẹnlẹn” vae. (Mat. 24:14) Ẹghe nan ha rẹ fuẹn ọne agbọn Esu nan sẹsẹsẹ, ọle a rẹ ọne ẹmhọn nan ha talọ je. Jehova bhọ re ọne ‘ukpẹdẹ bi ọne uriagogo’ yi, nin ọle ha rẹ lu ọnan. (Mat. 24:36; 25:13; Iwẹnna 1:7) Beji ẹdẹ rẹ gbera, iriọ mhan rẹ sikẹ ọne ẹghe nin ọle rẹ yi. (Rom 13:11) Ọkuẹsẹ ọne ẹghe nin, mhan dẹ wo ha tẹmhọn Osẹnobulua khian.
3. Be re mhan dọ ha tẹmhọn Osẹnobulua?
3 Ọkhẹke nin mhan ria eria nyan ene inọnta nan beji mhan rẹ lu iwẹnna itẹmhọn Osẹnobulua: Bezẹle nin mhan da tẹmhọn Osẹnobulua man ẹbho? Oyẹẹ re mhan lu ọle. Mhan da ha tẹmhọn Osẹnobulua, mhan rẹman ghe, mhan hoẹmhọn ọne ọta nọn mhẹn, sẹyẹ, mhan hoẹmhọn ẹbho. Ọnọn ke okhun nẹ hi, mhan hoẹmhọn Jehova bi elin nọnsọle. Bha ji mhan zilo nyan ọdeọde bhi ene emhin nan.
MHAN TẸMHỌN OSẸNOBULUA RANMHUDE MHAN HOẸMHỌN ỌNE ỌTA NỌN MHẸN
4. Be egbe dia mhan yẹ sade mhan họn ọta nọn mhẹn?
4 Uwẹ be yẹ yere ebi egbe dia uwẹ yẹ beji a ta ọta nọn mhẹn bhi ehọ man ẹn, ọta bii, ọria bhi azagba-uwa nọnsẹ biẹ, la, a tie uwẹ bhi iwẹnna nin uwẹ mọn da guanọ? Edandan i ribhọ ghe ọ wo ha ghọn uwẹ rẹ tẹmhọn ọlẹn man ẹbho ebhebhe bhi azagba-uwa nọnsẹ bi imọẹ ẹ. Emhin nọn sẹ inian be yẹ sunu ji uwẹ beji uwẹ họn ọta nọn mhẹn nẹ, nọn yi ọne ọta nọn mhẹn ọsi Agbejele?
5. Be egbe dia uwẹ yẹ bhi ẹghe ọhẹnhẹn nin uwẹ rẹ luẹ ẹmhọanta ne ribhi Baibo? (Yẹ fẹ ene ifoto ghe.)
5 Re ọkhọ ria ẹmhọn ọlẹn ebi egbe dia uwẹ yẹ bhi ẹghe ọhẹnhẹn nin uwẹ họn ọta nọn mhẹn ne ribhi Baibo. Uwẹ da dọ kere ghe, Aba ẹ nọn ribhi okhun hoẹmhọn ẹn, ghe ọle guanọ nin uwẹ dọ deba azagba-uwa nọnsọle ne ga ọle. Uwẹ da yẹ luẹ ghe, ọle dẹ re ọkpẹnlẹn ọbhi ọbalọ bi iloya, ghe uwẹ dẹ kie miẹn eria nesẹ ne yu bhi agbọn ọsọgbọn, bi erọnmhọn ebhebhe ne bunbun. (Mak 10:29, 30; Jọni 5:28, 29; Rom 8:38, 39; Arẹm. 21:3, 4) Ene ẹmhọanta nan da wo re uwẹ ha ghọnghọn. (Luk 24:32) Uwẹ da wo manman hoẹmhọn ebi uwẹ luẹ rẹ sẹbhọ ghe, ọ da ha ghọn uwẹ rẹ tẹmhọn ọlẹn man ẹbho ebhebhe!—Yẹ fẹ Jeremiah 20:9 ghe.
Ọ wo ha ti mhan beji mhan luẹ ẹmhọanta ne ribhi Baibo, sẹyẹ, mhan da ha ho nin mhan tẹmhọnlẹn man ẹbho! (Fẹ uduọle nọnzi 5 ghe)
6. Be uwẹ miẹn luẹ bhi isẹlobhemhin ọsi Ernest bi Rose?
6 Mhan fẹ ọne isẹlobhemhin nan ghe. Ikpe igbe obhio mhan nin Ernest b ha ye beji aba ọle yu. Ernest da yọle: “Mẹn da ha riale: ‘Okhun aba mẹn be diọ i? La, ọsọle be fo sẹsẹsẹ?’ Ẹmhọn ibhokhan ebhebhe ne mhọn aba da wo ha dan mẹn.” Ẹghe-ẹghe Ernest rẹ ha yo eji a da re aba ọle tọ. Ọle ha sẹbhi enin, ọle ki diguẹ bhi idin nan da re ọle tọ ha nan erọnmhọn yọle: “Huẹan Osẹnobulua, mẹn ho nin mẹn lẹn eji aba mẹn ye.” Ikpe 17 ki gbera nin aba Ernest yu, Esali Jehova da dọ tẹmhọn Osẹnobulua man ọlẹn. Ọle da ka nin ọle rẹ deba ele ha luẹ Baibo. Ọ da wo manman ti ọle bhọ beji ọle dọ luẹ kere ghe, ene yu bha lẹn emhin soso, ghe inian ọ diabe owe ele ye, sẹyẹ a dẹ riọ ele kpanọ. (Eccl. 9:5, 10; Iwẹnna 24:15) Bhi ọkike ọle, ọle da miẹn ewanniẹn rẹji inọnta nọn mọn da kpokpo ọle bhi ọkhọle. Ẹmhọanta nin Ernest ha luẹ bhi Baibo wo manman ti ọle bhọ, sẹyẹ okhuo ọle nin Rose da deba ọle bhi ọne iluẹmhin. Iriọ ọle yẹ rẹ hoẹmhọn ene emhin nin ọle ha luẹ. Bhi 1978 ele da mianmẹn. Ele da wo re ọhubhudu ha tẹmhọn emhin nin ele rẹọ i man ẹbho bhi azagba-uwa nọnsele, imọẹ ele, bi ọria nọn hi ki rẹ khin nọn muegbe rẹ kaehọ. Ranmhude ọnan, Ernest bi okhuo ọle nin Rose sẹ wo rẹkpa ẹbho ne bun gbera itue 70 rẹ dọ kiẹn Esali Jehova.
7. Be sunu sade mhan hoẹmhọn ẹmhọanta nin mhan luẹle? (Luk 6:45)
7 Bhi ọsi ẹmhọanta, ahamiẹn mhan gene hoẹmhọn ẹmhọanta nin mhan luẹ bhi Baibo, ọ dẹ ha ghọn mhan rẹ ha tẹmhọn ọlẹn man ẹbho. (Tie Luk 6:45.) Egbe ki dọ dia mhan beji ọ dia edibo nesi Jesu le bhi ore nin ọhẹnhẹn. Ele da yọle: “Mhan ida sabọ miẹn ghe, mhan bha yẹ ta ebi mhan daghe bi ebi mhan họnlẹn.” (Iwẹnna 4:20) Mhan wo manman hoẹmhọn ẹmhọanta nin mhan luẹle rẹ sẹbhọ ghe, mhan muegbe rẹ taman eka ẹbho nin mhan ha sabọ taman.
MHAN TẸMHỌN OSẸNOBULUA RANMHUDE MHAN HOẸMHỌN ẸBHO
8. Be re mhan dọ ha tẹmhọn ọne ọta nọn mhẹn man ẹbho? (Fẹ ọne ẹkpẹti ghe nọn yọle “ Hoẹmhọn Ẹbho—Re Ele Kiẹn Edibo.”) (Yẹ fẹ ifoto ghe.)
8 Mhan hoẹmhọn ẹbho beji Jehova bi Jesu rẹ hoẹmhọn ele. (Prov. 8:31; Jọni 3:16) Mhan wo manman mhọn ẹkẹ-ẹjẹjẹ da ẹbho ne bha “lẹn Osẹnobulua,” bi ẹbho ne i “mhọn ikhuaẹloghe.” (Ẹfẹ. 2:12) Ene ẹbho nan wo kuẹlo da ọkakale kẹkẹ, ọkpakinọn, mhan mhọn emhin nọn ha sabọ rẹkpa ele, ọnin hi, ọne ọta nọn mhẹn ọsi Agbejele. Oyẹẹ bi ẹkẹ-ẹjẹjẹ nin mhan mhọn da ẹbho ne sẹ inian re imhan dọnmhegbe rẹ ha wewe ọne ọta nọn mhẹn man ele. Ọne uhọnmhunje kpataki nan dẹ sabọ re ele ha mhọn ikhuaẹloghe, rẹkpa ele rẹ sabọ ha mhọn iẹnlẹn nọn mhẹn nian, yẹ re ọne isẹhoa nin ele rẹ ha mhọn “iẹnlẹn ọsaje,” nọn yi iẹnlẹn ọsi ighegheghe bhi agbọn ọsọgbọn.—1 Tim. 6:19.
Oyẹẹ bi ẹkẹ-ẹjẹjẹ nin mhan mhọn da ẹbho re mhan dọnmhegbe rẹ dọ ha tẹmhọn Agbejele man ele (Fẹ uduọle nọnzi 8 ghe)
9. Emhin nela mhan taman ẹbho rẹji ẹghe odalo? Bezẹle? (Ezekiel 33:7, 8)
9 Oyẹẹ nin mhan mhọn da ẹbho yẹ re imhan dọ ha taman ele ghe, ọkpẹnlẹn ọsi ọne agbọn nan nọn i mhẹn sire. (Tie Ezekiel 33:7, 8.) Mhan mhọn itohan da idiake nesẹmhan bi ẹbho bhi azagba-uwa nọnsẹmhan ne i yi Esali Jehova. Ẹbho ne bunbun wo nyẹn iẹnlẹn nọnsele khian, ele bha lẹn ebe vade. Sẹyẹ ele bha lẹn ghe ‘ekpokpo nọn khua nan bha sẹ ka miẹn egbọle khẹ rẹ na bhi umunhẹn ọsi ọne agbọn nan ha vade’ dẹ kẹ sunu. (Mat. 24:21) Mhan ho nin mhan rẹkpa ele rẹ lẹn ebe da sunu bhi ẹghe ibhuohiẹn—ghe, a dẹ fuẹn oga ohoghe rebhe a, yẹ fuẹn ọne agbọn Esu nan an bhi okhọn Amagẹdọn. (Arẹm. 16:14, 16; 17:16, 17; 19:11, 19, 20) Mhan bhii nin ẹbho ne bunbun re ehọ ọbhi uhọnmhunje nin mhan wewe, yẹ dọ deba mhan ha ga Jehova nian. Ọkpakinọn, be ha ki sunu ji ẹbho ne bha re ehọ ọbhi uhọnmhunje nin mhan wewe nian, rẹ dọ sẹbhi eria bhi azagba-uwa nọnsẹmhan?
10. Bezẹle nọn da khẹke nin mhan wo ha tẹmhọn emhin ne da kẹ sunu man ẹbho?
10 Beji mhan ka luẹ bhi uhọnmhọn-ọta nọn gbera, asabọmiẹn iho nọnsi Jehova nọn nin ọle rẹ hinmhin eria ne fi ọkhọle denọ sade ele daghe a dunmhun Babilọn Nọn Khua a. Ahamiẹn iriọ nọn, ọ manman wo lu uhọnmhọn emhin nin mhan rẹ wo ha wewe ọne uhọnmhunje nian. Ria ẹmhọn ọnan ghe: Emhin nin mhan taman ele nian dẹ rẹkpa ele rẹ miẹn emhin nin ele ha ria eria nyan bhi ọne ẹghe nin. (Yẹ fẹ Ezekiel 33:33 ghe.) Asabọmiẹn ele dẹ ye ene emhin nin mhan taman ele re, sẹyẹ, ọ dẹ re ele ha ho nin ele dọ ha ga Jehova ọkuẹsẹ ọkpẹnlẹn vae. Beji ọne okpea nọn ha gbẹloghe ighan bhi agbaẹbho ọsi Filipai rẹ fi ọkhọle denọ beji otọ mun vẹa fo, asabọmiẹn eria eso ne bha re ehọ ọbhi uhọnmhunje nin mhan wewe nian, dẹ fi ọkhọle denọ sade ele daghe a dunmhun Babilọn Nọn Khua a fo.—Iwẹnna 16:25-34.
MHAN TẸMHỌN OSẸNOBULUA RANMHUDE MHAN HOẸMHỌN JEHOVA BI ELIN NỌNSỌLE
11. Be imhan rẹ re uyi, ahu bi ọghọ nin Jehova yẹ? (Arẹman 4:11) (Yẹ fẹ ene ifoto ghe.)
11 Oyẹẹ nin mhan mhọn da Jehova bi elin nọn khiale nọnsọle manman zẹ nin mhan da wewe ọne ọta nọn mhẹn. Inian mhan ghe itẹmhọn Osẹnobulua nin mhan lu bii uwedẹ ọkpa nin mhan rẹ re ogen ji Osẹnobulua nin mhan hoẹmhọn ọlẹn. (Tie Arẹman 4:11.) Mhan wo gene rẹọbhọ ghe, Jehova nin Osẹnobulua nọnsẹmhan ọkpa ọkhẹke nọn miẹn ọne uyi, ọghọ bi ahu nọn khẹke ọle. Mhan re uyi bi ọghọ nin Osẹnobulua sade mhan taman ẹbho ghe, ọle “hi ọnọn man emhin rebhe,” sẹyẹ, ọle zẹle mhan nyẹnlẹn. Mhan noo ahu nọnsẹmhan nin Jehova sade mhan noo ẹghe, egbe nọnsẹmhan bi emhin nin mhan mhọn rẹ tẹmhọn ọlẹn man ẹbho beji ahu nọnsẹmhan gbe. (Mat. 6:33; Luk 13:24; Kol. 3:23) Bhi ọsi ẹmhọanta, ọ yẹẹ mhan rẹ ha tẹmhọn Osẹnobulua ranmhude mhan hoẹmhọn ọlẹn. Sẹyẹ, ọ ghọn mhan rẹ ha tẹmhọn elin nọnsọle bi unan ọria nin ọle khin man ẹbho. Bezẹle?
Mhan noo ahu nọnsẹmhan nin Jehova sade mhan noo ẹghe, egbe nọnsẹmhan, bi emhin nin mhan mhọn rẹ tẹmhọn ọlẹn beji ahu nọnsẹmhan sẹ (Fẹ uduọle nọnzi 11 ghe)
12. Bhi iwẹnna itẹmhọn Osẹnobulua nin mhan lu, be imhan rẹ kpe elin nọnsi Jehova khia yẹ?
12 Oyẹẹ nin mhan mhọn da Jehova rẹ mhan kpe elin nọnsọle khia. (Mat. 6:9) Mhan guanọ nin mhan deba kpe elin nọnsi Osẹnobulua khia bhi ohoghe rebhe nin Esu rẹ sin ọlẹn. (Gen. 3:1-5; Job 2:4; Jọni 8:44) Bhi iwẹnna itẹmhọn Osẹnobulua nin mhan lu, ọ wo ghọn mhan rẹ ha tẹmhọn unan ọria nin Jehova khin man ọrebhe ne muegbe rẹ kaehọ. Mhan ho nin mhan rẹkpa ọrebhe rẹ lẹn ghe, oyẹẹ hi ikpẹ nọnsọle nọn ke okhun nẹ, ghe, uwedẹ nin ọle rẹ gbẹloghe khiamhin, sẹyẹ ọ gbamhin. Rẹ deba ọnin, mhan ho nin ẹbho lẹn ghe, Agbejele nọnsọle dẹ kẹ re ọkpẹnlẹn ọbhi iloya, yẹ re ọfure bi eghọnghọn ji ọrebhe bhi ọne otọ nan. (Ps. 37:10, 11, 29; 1 Jọni 4:8) Mhan kpe elin nọnsi Jehova khia sade mhan tẹmhọn ene emhin nan man ẹbho bhi inẹbho. Sẹyẹ, ọ manman wo re imhan ghọnghọn ranmhunde mhan lu emhin nin ọle guanọ bhi obọ mhan bọsi Esali nesọle. Be ọ rẹ yi iriọ yẹ?
13. Bezẹle nọn da re egbe bọbọ mhan ghe a tie mhan Esali Jehova? (Isaiah 43:10-12)
13 Jehova tie mhan nin mhan dọ ha yi “Esali” nesọle. (Tie Isaiah 43:10-12.) Bhi ikpe eso ne gbera nian, ilẹta ọkpa nin Otu Nọn Sun Oga gbẹn da yọle: “Ekpẹn nọn ke okhun nẹ nan ha sabọ mun ọria nọn hi ki rẹ khin bhi egbe hi, nan rẹ ha tie ọle Ọsali Jehova.” c Bezẹle nọn da yi iriọ? Bha ji mhan fẹ ọne ijiẹmhin nan ghe. Nan man yọle ghe, a bha uwẹ ohoghe ghe uwẹ lu emhin ọbe. Bhiriọ uwẹ da ha guanọ ọria nọn ha rẹkpa ẹbho rẹ lẹn ghe ohoghe a bha uwẹ le, ghe ọria esili uwẹ khin. Ọria nela uwẹ ha zẹ nọn rẹkpa uwẹ? Edandan i ribhọ ghe, ọria nin uwẹ lẹn, bi ọria nin uwẹ gbaẹkẹ ọle uwẹ ha zẹ, sẹyẹ ọ ki ha yi ọria nọn nyẹn nọnsẹn beji ẹbho ha da sabọ rẹọbhi ebi ọle ta. Nin Jehova rẹ zẹ mhan nin mhan dọ ha yi Esali nesọle rẹman ghe, ọle manman lẹn mhan nọnsẹn, sẹyẹ ọle gbaẹkẹ mhan bii eria ne ha sabọ sọsali nanlẹn ghe, ọle ọkpa Osẹnobulua ọsi ẹmhọanta. Udede ekpẹn nọn nin mhan rẹ ha yi Esali nesọle. Ranmhude ọnan, mhan wo noo isẹhoa nọn hi ki rẹ khin nin mhan miẹn rẹ tẹmhọn elin nọnsọle man ẹbho, yẹ rẹkpa ẹbho rẹ lẹn ghe, ohoghe a bha ọle le. Mhan da ha lu iriọ, mhan ki wo gene ha lu iwẹnna nọn khẹke mhan, ọnin hi nin mhan rẹ ha sọsali nin Jehova.—Ps. 83:18; Rom 10:13-15.
MHAN DẸ WO HA TẸMHỌN OSẸNOBULUA RẸ DỌ SẸBHI ỌKPẸNLẸN
14. Emhin eso nela ha sabọ sunu bhi ẹghe odalo nọn ha re mhan ha ghọnghọn?
14 Emhin nin mhan khuaẹloghe ne ha sunu bhi ẹghe odalo wo re mhan ghọnghọn. Bhi ahu nọnsi Jehova, mhan re ẹlo ọbhọ ghe ẹbho ne bunbun dẹ deba mhan dọ ha ga ọle ọkuẹsẹ ekpokpo nọn khua munhẹn. Sẹyẹ, ọ wo re mhan ghọnghọn rẹ lẹn ghe, bhi ẹghe ekpokpo nọn khua nin emhin i da rẹ zẹwẹ lẹkhẹ, asabọmiẹn ẹbho ne bunbun dẹ sibhi ibo ọsi Esu re dọ deba mhan ha gẹn elin nọnsi Jehova.—Iwẹnna 13:48.
15-16. Iwẹnna nela mhan ha wo ha lu? Ẹghela mhan ha lu ọle sẹ?
15 Bhi ejayenan nian, iwẹnna kpataki ribhọ nọn khẹke nin mhan lu—iwẹnna nin mhan i da kie lu ghe sade mhan lu ọle fo nian. Ọne iwẹnna hi, nin mhan rẹ ha wewe ẹmhọn Agbejele nọnsi Osẹnobulua man ẹbho bhi ọne otọ agbọn nan rebhe. Nin mhan rẹ sabọ lu ọnan, ọ sẹyẹ khẹke nin mhan ha taman ẹbho ebe da kẹ sunu nian. Ọkhẹke nin ẹbho lẹn ghe ọkpẹnlẹn ọsi ọne agbọn Esu nan manman wo sire. Bhiriọ, ẹghe nin ibhuohiẹn ha ki rẹ munhẹn, ele ki dọ daghe ọle ghe, obọ Osẹnobulua nin Jehova, ọle uhọnmhunje nin mhan wewe na vae.—Ezek. 38:23.
16 Bhiriọ, be imhan ki muegbe rẹ lu? Ranmhude oyẹẹ nin mhan mhọn da ọne ọta nọn mhẹn, nin mhan mhọn da ẹbho, bi nin mhan mhọn da Jehova bi elin nọnsọle, mhan dẹ wo re ọkhọle rebhe, ọhubhudu bi ẹjẹje rẹ ha tẹmhọn Osẹnobulua ọkuẹsẹ ọle yọle, “ọne iwẹnna mhẹn bhi riọ!”
ILLO 54 “Ọnan Hi Ọne Uwedẹ”
a Ọtoba 7, 2023, ọle a do ọne ikolo ukpe. Newburgh Assembly Hall of Jehovah’s Witnesses bhi New York, U.S.A. a da do ọne ikolo ukpe. A re emhin rebhe nan rẹman bhi ọne ikolo ukpe man bhi JW Broadcasting®. Novẹmba 2023 a re obọle nin ọhẹnhẹn dagbare, a da re obọle nọnzi eva dagbare bhi Jẹnuare 2024.
b Fẹ ọne uhọnmhọn-ọta ghe nọn yọle, “Ẹmhọanta Nọn Ribhi Baibo Fi Iẹnlẹn Ọsi Eria Denọ—Ewanniẹn Nin Mẹn Miẹn bhi Baibo Da Mun Mẹn Ẹlo Kore,” nọn ribhi Watchtower ọsi Fẹbuare 1, 2015.
c Fẹ ọne ebe natiọle Yearbook of Jehovah’s Witnesses, ọsi 2007, apapale nọnzi 3.