1-3. (a) Ẹlo nela mhan ha rẹ ha ghe ẹmhọanta ne ribhi Baibo? Re ijiẹmhin man. (Fẹ adudu nọn ribhi eji a da munhẹn ghe.) (b) Inọnta nela mhan ha zilo nyan bhi ọne uhọnmhọn-ọta nan?

ỌRIA ha dẹ emhin, ọle sabọ rẹ kie re ọne emhin fikie bu ọne ọle ne dẹ sade ọne emhin imhẹn, la ọne emhin iyi ọne ọle guanọ. Emhin nin ẹbho dẹ bhi itanẹt, ọle ẹbho kẹ re fikie nẹ. Ọria ha re emhin nin ọle dẹ fikie bu ọne ọle ne dẹ, ọle ki yọle nin ọne ọria re igho nin ọle rẹ dẹ nanlẹn la nin ọle re emhin ọbhebhe nanlẹn.

² Arẹmiẹn mhan dẹ sabọ re emhin nin mhan dẹ fikie bu ọne imhan ne dẹ, mhan ida lu iriọ rẹji ẹmhọanta nin mhan “dẹ” la nin mhan luẹle bhi Baibo. Mhan ida “khiẹn” ene ẹmhọanta la zi ele obọ. (Tie Proverbs 23:23; 1 Tim. 2:4) Bhi uhọnmhọn-ọta nọn gbera, mhan da luẹ ghe, ẹghe mhan re ọbhi otọ rẹ luẹ ẹmhọanta ne ribhi Baibo. Mhan da yẹ luẹ ghe asabọ miẹn mhan fi ikeke gbe emhin eso ranmhude ẹmhọanta nin mhan luẹle. Bhi osi ijiẹmhin, asabọ miẹn mhan fi ikeke gbe iwẹnna nọnsẹmhan, ikolu eso nin mhan mhọnlẹn, uwedẹ nin mhan rẹ lu emhin la iluemhin ne bha diẹn mun iBaibo. Ọkpakinọn, ene emhin nin mhan fi ikeke gbe nan bha ghan sẹbi elele nin mhan miẹn bhi ene ẹmhọanta na.

 ³ Bhi ijiẹmhin ọkpa nin Jesu tẹmhọnlẹn, ọle da tẹmhọn okpea nọn ha guanọ emhin nọn ghanlẹn. Ọne okpea ki miẹn emhin ọkpa nọn manman ghan, ọle da re ẹjẹje khiẹn emhin rebhe nin ọle mhọnlẹn nin ọle da sabọ dẹ ọne emhin. Agbejele nọnsi Osẹnobulua, ọle ọne emhin nọn ghanlẹn mundia nan. (Matt. 13:45, 46) Bhiriọ, Jesu re ọne ijiẹmhin nan rẹman ghe, ranmhude emhin nọn ghanlẹn ẹmhọanta nọnsi Osẹnobulua khin rẹji ene guanọ ọlẹn, ele muegbe rẹ fi ikeke gbe emhin nọn irẹ khin beji ele ha da miẹn ọlẹn. Ahamiẹn mhan sẹyẹ ghe ene ẹmhọanta nan bii ẹmhin ne ghanlẹn, mhan ida zi ele obọ. Ọ ba bhi egbe a ghe eso ne ga Osẹnobulua iyẹ ghe ẹmhọanta nin ele luẹle bọsi emhin ne ghanlẹn. Eso bhọ fi ikeke gbe ene ẹmhọanta. Mhan iguanọ nin ọnan sunu ji mhan! Mhan ha re obọ rẹkhan adia nọn ribhi Baibo ghe nin mhan “wo ha khian nọnsẹn bhi uwedẹ ẹmhọanta,” mhan ki rẹman ghe ene ẹmhọanta wo ghan bhi ẹlo nọnsẹmhan, ghe mhan ida zi ele obọ. (Tie 3 John 2-4.) Ebi a re ọle ta nan rẹ ha khian nọnsẹn bhi uwedẹ ẹmhọanta hi, nan rẹ ha mun ene ẹmhọanta kalo bhi iẹnlẹn yẹ ji uwedẹ iẹnlẹn nọnsẹmhan diẹn mun ele. Bha ji mhan zilo nyan ene inọnta nan: Be ẹbho eso rẹ fi ikeke gbe ẹmhọanta nin ele luẹle yẹ? Bezẹlẹ nin ele da fi ikeke gbe ene ẹmhọanta nan? Be ha rẹkpa mhan nin mhan hẹi regbe khọkhọ ele? Be ha rẹkpa mhan rẹ muegbe, ghe mhan dẹ “khian nọnsẹn bhi uwedẹ ẹmhọanta”?

4. Bezẹle nin ẹbho eso da fi ikeke gbe iJesu bhi ore nin ọhẹnhẹn?

⁴ Bhi ore nin ọhẹnhẹn, eso ne rẹkhan iJesu da fi ikeke gbe ọle, ele bha yẹ ha rẹkhan ọlẹn. Bhi ọsi ijiẹmhin, ẹghe nin ọle ki rẹ re uwedẹ ọhan-ilo re ebale nin usun ẹbho fo, ene usun ẹbho da rẹkhan ọlẹn ha khian egbegbe okpẹdẹ ọsi Galilee. Bhi enin Jesu da taman ele yọle: “Ahamiẹn ghe ibha bha le efun ọsi Ọmọn nọnsi okpea yẹ wọn aranlẹn nọnsọle, bha ida ha mhọn iẹnlẹn bhi egbe nọnsẹbha.” Ele bha zẹwẹ taman iJesu nin ọle gbe otọ ebi ọle ta fanọan man ele. Ele da ji ene ọta nan dua ele oẹ. Ele da yọle: “Ọta nan isabọ re ehọ họn khọnan; họ bhọ la sabọ kaehọ ọnan?” Bhiriọ, “ene bunbun bhi edibo nesọle da fikie diọ bhi emhin ne ribhi ikeke. Ele bha yẹ ha rẹkhan ọlẹn.”—John 6:53-66.

5, 6. (a) Bezẹle nin ẹbho eso da fi ikeke gbe ẹmhọanta ẹlẹnan? (b) Uwedẹ nela eso rẹ sibhi oga re?

⁵ Ẹlẹnan nian, eso bha yẹ mun ẹmhọanta nin ele luẹle mhọnlẹn. Eso ji ebi ibhio mhan lu, la ebi ibhio mhan ta, da dua ele oẹ. Eso yẹ ji iman-emhin Baibo na fidenọ da dua ele oẹ. Ranmhude adia nan re nin eso, ele ki miẹn ohu zi ẹmhọanta nin ele luẹle obọ. Sẹyẹ, eso fi ikeke gbe ẹmhọanta nin ele luẹle ranmhude ele bi ọria bhi ẹkẹ agbotu ko miẹn ẹmhọn. Ranmhude eso deba ene de sibhi oga re, bi ene kpokpo mhan mun obọ, ele sibhi ibo nọnsi Jehova bi agbotu nọnsọle re. (Heb. 3:12-14) Ọ rẹ wo khẹke nin ene ibhio mhan nan re egbe khọkhọ ijiẹmhin nọnsi Peter. Ẹghe nin ene usun ẹbho rẹ fi ikeke gbe iJesu ranmhude ebi ọle ta, Jesu da nọọn etuegbe nesọle si ele ida yẹ rẹkhan ele kpanọ. Bhi ọsi ẹjẹje, Peter da wanniẹn Jesu yọle: “Ebeanlẹn, họbhọ mhan da bu? Uwẹ mhọn ọta nọn re aribhọ ọsi ighegheghe re.”—John 6:67-69.

⁶ Beji ahoho rẹ fẹkẹ si okọ nan mun ọbhi egbe ẹdẹ diọbhi adesẹ ẹdẹ, iriọ yẹ nọn rẹji eso ne sibhi oga re. Khere-khere ele rẹ sibhi oga re. Baibo taman mhan nin mhan gbẹlokotọ nin mhan hẹi re inian si egbe sibhi oga ẹmhọanta re. (Heb. 2:1) Arẹmiẹn ọria nin ọnan sunu je bha muegbe ghe ọle dẹ sibhi oga re, ikolu nin ọle bi Jehova ko mhọnlẹn ribhi okhẹnan. Be imhan ha lu nin ọnan hẹi sunu ji mhan?

7. Be ha rẹkpa mhan nin mhan hẹi fi ikeke gbe ẹmhọanta nin mhan luẹle?

⁷ Nin mhan rẹ sabọ ha khian bhi uwedẹ ẹmhọanta, ọkhẹke nin mhan miẹn adia rebhe nesi Jehova ọbhi egbe yẹ ha re obọ rẹkhan ene adia. Sẹyẹ, mhan ki ha mun ẹmhọanta nin mhan luẹle kalo bhi iẹnlẹn. David nin ojie da nan erọnmhọn ji Jehova yọle: ‘Mẹn dẹ khian bhi uwedẹ ẹmhọanta nọnsẹ.’ (Ps. 86:11) David wo muegbe nin ọle rẹ lu beji ọle ta. Ahamiẹn mhan bha muegbe rẹ khian bhi uwedẹ ẹmhọanta beji David lu, mhan sabọ rẹ dọ ha ria ẹmhọn ene emhin nin mhan fi ikeke gbe ọkuẹsẹ mhan miẹn ẹmhọanta, mhan bhọ ki ho nin mhan fikie bu ele. Ẹmhọanta rebhe nin mhan luẹle, okhẹke nin mhan mun ele mhọn nọnsẹn, mhan ida sabọ mun eso mhọn yẹ zi eso obọ. Jehova guanọ nin mhan khian bhi uwedẹ ẹmhọanta rebhe nin ọle man mhan le. (John 16:13) Bhi uhọnmhọn-ọta nọn gbera, mhan da zilo nyan emhin isẹn nin mhan fi ikeke gbe beji mhan ha da sabọ luẹ ẹmhọanta ne ribhi Baibo yẹ ha lu rẹkhan ele. Ejayenan nian, bha ji mhan zilo nyan ebe ha rẹkpa mhan nin mhan hẹi fikie bu ene emhin nin mhan fi ikeke gbe.—Matt. 6:19.

8. Ahamiẹn ọria bha noo ẹghe nọnsọle nọnsẹn, be ọnan ha rẹ sabọ si ọle sibhi ibo nọnsi Jehova re yẹ? Re ijiẹmhin man.

⁸ Ẹghe. Ahamiẹn mhan bha re ẹwanlẹn ha noo ẹghe nọnsẹmhan nọnsẹn, ọnan sabọ rẹ mhan ha si egbe sibhi ibo nọnsi Jehova re khere khere. Ahamiẹn ghe mhan bha gbẹlokotọ nọnsẹn, mhan sabọ rẹ do ha noo ẹghe rebhe nọnsẹmhan rẹ lu iregbe re ahoho, rẹ noo ifoni la intanẹt, la rẹ ghe itelevision. Ẹmhọanta nọn ghe, ene emhin nan iyi emhin ọbe. Ọkpakinọn, ene ẹghe nin mhan gbe rẹ noo ele sabọ rẹ ha gbe mhan ẹghe nin mhan ka noo khẹ rẹ luẹ ẹmhọn iJehova. Ọnan ebe sunu ji obhio mhan ọkpa natiọle Emma. * Rẹ na bhi egbe obhokhan ha vade, o wo manman yẹẹ Emma rẹ ha hẹn akasi. Ọle ha wo ha mhọn obhi ẹghe khere, ọle ki dọ ha hẹn akasi. Akizẹbue, ọkhọle da ha gbe ọle asan ranmhude ẹghe rebhe nin ọle noo rẹ hẹn akasi. Ọle da fi uwedẹ nin ọle rẹ lu emhin denọ. Khere khere, ọle da dọ lẹn ebi ọle ha rẹ ha lu ọne iregbe re ahoho bhi uwedẹ nọn khẹke. Okha nọnsi okhuo natiọle Cory Wells, nọn ka wo ha yo ije kẹkẹ dọ ha hẹn akasi, yẹ rẹkpa ọle. * Ejayenan nian, Emma ki wo ghọnghọn ranmhude ẹghe nin ọle noo bhi iwẹnna oga, bi ẹghe nin ọle rẹ deba ibhio ọle bhi ẹkẹ agbotu mun obọ. Ọle wo dọ sikẹ Jehova. Sẹyẹ, ranmhude ọle ki noo ẹghe nọnsọle nọnsẹn, ọkhọle nọnsọle iyẹ gbe ọle asan.

9. Be emhin ẹfe rẹ re ẹbho eso mun ẹmhọn oga kike bhi iẹnlẹn nọnsele yẹ?

⁹ Igho Bi Emhin Nin Igho Sabọ Dẹ. Ahamiẹn mhan guanọ nin mhan sẹyẹ ha khian bhi uwedẹ ẹmhọanta, ọbha khẹke nin mhan mun ene emhin nan kalo bhi iẹnlẹn nọnsẹmhan. Ẹghe nin mhan rẹ dọ lẹn ẹmhọanta ne ribhi Baibo, emhin oriọn mhan ki ha mun kalo bhi iẹnlẹn nọnsẹmhan. Mhan da wo re eghọnghọn fi ikeke gbe emhin eso, nin mhan da sabọ khian bhi uwedẹ ẹmhọanta. Ọkpakinọn, ahamiẹn mhan daghe uwedẹ nin ibo mhan wo rẹ dẹ emhin ọsọgbọn ne dabgare, ọkhọle nọnsẹmhan sabọ rẹ ha sua mhan nin mhan fikie bu ene emhin nin mhan fi ikeke gbe. Bhiriọ, asabọ miẹn ebi mhan mhọnlẹn iyẹ da khọn mhan, mhan ki mun ẹmhọn oga ọbhi otọ ha re iẹnlẹn nọnsẹmhan khu ẹfe. Ọnan wo rẹkpa mhan yere ebi sunu ji Demas bhi Baibo. Ranmhude emhin ne ribhi ẹkẹ ọne agbọn nan wo ha ti ọle bhọ, ọle da zi Paul obọ. Ọle bha yẹ ha rẹkhan iPaul ha lu iwẹnna oga. (2 Tim. 4:10) Bezẹle nin Demas da zi Paul obọ? Baibo bha taman  mhan. Asabọ miẹn ẹfe ọle ki hoẹmhọnlẹn gbera emhin oriọn, la egbe lọ ọle rẹ ha fi ikeke gbe emhin eso beji ọle rẹ rẹkhan iPaul lu iwẹnna oga. Iriọ yẹ nọn rẹji mhan, asabọ miẹn ẹghe nin khẹ, mhan ka manman hoẹmhọn igho. Ahamiẹn mhan bha gbẹlokotọ, ọne oyẹẹ sabọ kie na mhan bhi ọkhọle, bhiriọ egbe ki lọ mhan rẹ ha mun emhin oriọn kalo bhi iẹnlẹn.

10. Hela mhan ha deba ha mun obọ ahamiẹn mhan guanọ nin mhan khian rẹkhan uwedẹ ẹmhọanta?

¹⁰ Ikolu nin mhan bi ẹbho ko mhọnlẹn. Mhan dẹ sabọ khian rẹkhan uwedẹ ẹmhọanta sade mhan bha ji ibo mhan sua mhan ha rẹkhan uwedẹ nọnsele. Ẹghe nin mhan rẹ dọ luẹ ẹmhọanta ne ribhi Baibo, ikolu nin mhan bi ene iga iJehova ko mhọnlẹn da fidenọ, iriọ yẹ nọn rẹji ene ribhi azagba-uwa nọnsẹmhan. Asabọ miẹn eso re obọ ọbhi ebi mhan luẹ. Asabọ yẹ miẹn eso bha re obọ ọbhọ. (1 Pet. 4:4) Mhan guanọ nin mhan bi ene ribhi azagba-uwa nọnsẹmhan ko ha ribhi ọfure. Mhan guanọ nin mhan yẹ ha lu ele nọnsẹn. Ọkpakinọn, mhan dẹ gbẹlokotọ nọnsẹn nin mhan hẹi fi ikeke gbe ẹmhọanta nin mhan luẹle aharẹmiẹn ọnan dẹ re ele ha ghọnghọn. Ranmhude adia nọn ribhi 1 Corinthians 15:33, ene deba iJehova mhọn ikolu mhan guanọ nin mhan manman deba ha mun obọ.

11. Be ọkhẹke nin mhan ha mhọn bhi ọkhọle ahamiẹn mhan ho nin mhan khia?

¹¹ Iria-eria ne bha gba bi ilọnmhọn ne imhẹn. Ọkhẹke nin ọrebhe ne khian bhi uwedẹ ẹmhọanta khia. (Isa. 35:8; tie 1 Peter 1:14-16.) Ẹghe nin mhan rẹ vae bhi oga ẹmhọanta, mhan rebhe da fi iẹnlẹn nọnsẹmhan denọ nọn da diẹn mun adia ne ribhi Baibo. Ọbha lẹkhẹ nin eso rẹ fidenọ, ọkpakinọn, ele da sẹyẹ dọnmhegbe rẹ fidenọ. Ejayenan nian, mhan ida ze iẹnlẹn nọn khiale obọ, yẹ fikie dọ ha nyẹnlẹn iẹnlẹn nọn bha khia. Be ha rẹkpa mhan nin mhan hẹi ze iẹnlẹn nọn khiale obọ? Ahamiẹn mhan ye ẹmhọn Ọmọn nọnsi Jehova re, nin ọle rẹ zọese nin mhan ranmhude ọle guanọ nin mhan khia, mhan ida ze iẹnlẹn nọn khiale obọ. (1 Pet. 1:18, 19) Nin mhan sabọ ha yi ọria nọn khiale bhi ẹlo nọnsi Jehova, ọkhẹke nin mhan ha mun ẹmhọn izọese nọnsi Jesu ọbhi ọkhọle ẹghe rebhe.

12, 13. (a) Bezẹle nọn da khẹke nin mhan ha yere ẹghe rebhe ẹlo nin Jehova rẹ ghe ene iluemhin nan? (b) Be imhan ha ki zilo nyan nian?

¹² Iluemhin ne bha diẹn mun iBaibo. Ene iga iJehova ne ribhi azagba-uwa nọnsẹmhan, ene imhan ko wẹnna la ene imhan ko yo isiku sabọ rẹ ha guanọ nin mhan deba ele ha lu iluemhin nin ele lu. Be ha rẹkpa mhan nin mhan hẹi deba ele, ahamiẹn ele sua mhan nin mhan dọ deba ele ha lu iluemhin nin Jehova bha re obọ i? Ahamiẹn ẹghe rebhe mhan rẹ yere ẹlo nin Jehova rẹ ghe ene iluemhin nan, mhan ida deba ele. Mhan dẹ yẹ miẹn urẹkpa sade mhan tie emhin nan gbẹn ọbhi ebe nesẹmhan rẹji ene iluemhin nan. Ahamiẹn mhan yere ẹghe rebhe ghe ene iluemhin nan bha diẹn mun iBaibo, urẹọbhọ nọnsẹmhan ki mun zeze ghe, ọ dẹ ha ti Osẹnobulua bhọ sade mhan bha deba ha lu ene iluemhin. (Eph. 5:10) Mhan ha mun udu nyan iJehova bi Ọta nesọle, ofẹn eria ida ha mun mhan.”—Prov. 29:25.

¹³ Mhan muegbe nin mhan rẹ khian bhi uwedẹ ẹmhọanta rẹsẹbhi ighegheghe. Ọkpakinọn, be ha rẹkpa mhan rẹ sabọ lu iriọ? Bha ji mhan zilo nyan emhin ea ne ha sabọ rẹkpa mhan.

14. (a) Ahamiẹn mhan bha zobọ bhi Baibo nan luẹ, be ọnan ha rẹ rẹkpa mhan yẹ? (b) Be ilẹn-otọ emhin, ẹwanlẹn bi adia ha rẹ rẹkpa mhan yẹ?

¹⁴ Ọhẹnhẹn, hẹi zobọ bhi Baibo na luẹ. Wo ha luẹ ẹmhọanta ne ribhi ẹkẹ ọle, uwẹ a  yẹ ha ria eria nyan ele. Ahamiẹn uwẹ re ẹghe ọbhi otọ rẹ lu ọnan ẹghe rebhe, ene ẹmhọanta nin uwẹ luẹ ki manman ha ti uwẹ bhọ, uwẹ ki yẹ sabọ mun ele mhọn nọnsẹn. Proverbs 23:23 da tale ghe uwẹ ha lu iriọ, rẹ deba ẹmhọanta kẹkẹ nin uwẹ ha miẹn, uwẹ ki yẹ miẹn “ẹwanlẹn bi adia bi ilẹn-otọ emhin.” Ilẹn-otọ emhin dẹ rẹkpa mhan daghe ebi ọta nesi Jehova rebhe rẹ diẹn kugbe yẹ. Ẹwanlẹn ki rẹkpa mhan ha re obọ rẹkhan ebi mhan luẹle. Ọkhẹke nin mhan ha re obọ rẹkhan ene ẹmhọanta nin mhan luẹle, ọi wo gheghe yi nin mhan rẹ lẹn ele ọkpa. Ẹghe eso, ẹmhọanta nin mhan luẹ ki rẹkpa mhan daghe eji mhan ha da fidenọ bhi iẹnlẹn. Bha ji mhan ha re ẹjẹje fidenọ sade mhan daghe ije soso bhi iẹnlẹn nọnsẹmhan nin mhan ha da fidenọ. Baibo tale ghe, adia nin Osẹnobula re nin mhan ghan gbera isiliva.—Prov. 8:10.

15. Be ẹmhọanta rẹ gbega mhan yẹ bọsi ugbakun?

¹⁵ Ọzeva, wo muegbe ghe uwẹ de ha nyẹnlẹn bhi uwedẹ ẹmhọanta ukpẹdẹ-ukpẹdẹ. Osẹnobulua re ẹmhọanta ne ribhi Baibo rẹ khọkhọ ugbakun nin ene eyokhọnlẹn rẹ gbakun. (Eph. 6:14) Ẹghe ẹdẹlẹ, eyokhọnlẹn mhọn ugbakun nin ele rẹ gbakun yo okhọnlẹn. Ọne ugbakun gbega akun nọnsele. Ọkpakinọn, ọkuẹsẹ ọne ugbakun gbega ele, ọkhẹke nin ele re ọle gbakun nọnsẹn. Be bhọ ugbakun oriọn la ẹmhọanta ne ribhi Baibo ha rẹ sabọ gbega mhan yẹ? Ahamiẹn mhan re ene ẹmhọanta gbakun nọnsẹn la mhan mhọn ele bhi ọkhọle ẹghe rebhe, ele ki gbega mhan nin mhan hẹi ha ria eria bhi uwedẹ nọn bha kiẹọnlẹn. Sẹyẹ, ele ki rẹkpa mhan ha mhan-mhan emhin bhi uwedẹ nọn diale. Ahamiẹn mhan ribhi edọnmhẹn la ekpokpo, ẹmhọanta ne ribhi Baibo ha ziẹn mhan udu rẹ lu ebe gbale. Beji ọyokhọnlẹn ida ha khian okhọnlẹn sade ọle bha re ugbakun gba, ọkhẹke nin mhan mun ẹmhọanta kalo bhi emhin rebhe nin mhan lu bhi iẹnlẹn. Ọyokhọnlẹn yẹ re agbada nọnsọle rọ bhi ugbakun. Bha ji mhan zilo nyan ebi mhan ha rẹ lu emhin nọn dia inian yẹ.

16. Ahamiẹn mhan zegbere rẹ ha mhan ẹbho ẹmhọanta nin mhan luẹ, be ọnan ha rẹ rẹkpa mhan rẹ ha khian bhi uwedẹ ẹmhọanta yẹ?

¹⁶ Ọzea, manman zegbere ha man ẹbho ẹmhọanta nin uwẹ luẹ bhi Baibo. Bhiriọ, uwẹ ki sabọ mun agbada ọsi oriọn la “ọta nọnsi Osẹnobulua” mhọn nọnsẹn. (Eph. 6:17) Ọkhẹke nin mhan rebhe ha lu re alo bhi uwedẹ nin mhan rẹ mhan ẹbho emhin. (2 Tim. 2:15) Ahamiẹn mhan rẹkpa ẹbho miẹn ẹmhọanta ne ribhi Baibo, yẹ rẹkpa ele rẹban iman-emhin ohoghe, ọta nesi Osẹnobulua ki manman deziẹn nọnsẹn bhi ọkhọle nọnsẹmhan. Bhiriọ, mhan ki sabọ wo muegbe rẹ ha khian bhi uwedẹ ẹmhọanta.

17. Bezẹle nin ẹmhọanta nin uwẹ luẹ da yi emhin nọn ghanlẹn rẹji uwẹ?

¹⁷ Ẹsele nọn na bhi obọ iJehova vae, ọle ẹmhọanta nin mhan luẹ khin. Ene ẹmhọanta zẹle mhan sabọ deba Aba mhan nọn ribhi okhun mhọn ikolu nọn dinmhin. Bhi ọsi ẹmhọanta, arẹmiẹn emhin ne bunbun mhan sẹ luẹ bhi obọ iJehova, obhiọ khere enan sẹ khin. Ọle ve ive nin mhan ghe ọle dẹ re iẹnlẹn ọsi ighegheghe nin mhan, bhiriọ, mhan ki sabọ luẹ emhin ne bunbun ba ene imhan sẹ luẹ. Ha ghe emhin nin uwẹ sẹ luẹ bọsi emhin ne ghanlẹn. Hẹi zobọ bhọ rẹ ha luẹ ẹmhọanta ne ribhi Baibo. Uwẹ ha lu iriọ, uwẹ ki diabe David nọn taman iJehova yọle: “Mẹn dẹ khian rẹkhan uwedẹ ẹmhọanta nọnsẹ.”—Ps. 86:11.