1, 2. (a) Iwẹnna nela Jesu mun kalo bhi iẹnlẹn? Bezẹle nin ọle da mun ọne iwẹnna nan kalo? (b) Be imhan ha lu nin mhan da sabọ deba Osẹnobulua ha wẹnna nọnsẹn?

IWẸNNA ikapẹnta bi iwẹnna oga, ele Jesu Kristi lu ẹghe nin ọle rẹ ha ribhi ọne otọ nan. (Mark 6:3; Rom. 15:8) Ọle wo manman guẹ ene iwẹnna nan veva. Ọle da wo guẹ ebi a rẹ noo emhin nin kapẹnta rẹ wẹnna beji ọle rẹ ha kanọ emhin kẹkẹ. Bhi iwẹnna oga nin ọle ha lu, ọle da wo noo emhin nin ọle luẹle rẹ rẹkpa ẹbho dọ lẹn ẹmhọanta nọnsi Osẹnobulua. (Matt. 7:28; Luke 24:32, 45) Jesu ki wanre sẹbhi ikpe 30, ọle da zi iwẹnna ikapẹnta obọ, ranmhude ọle lẹn sẹbhọ ghe iwẹnna oga kokhun nẹ. Ọle da tale ghe, emhin ọkpa nọn zẹle nin ọle da vae bhi ọne agbọn nan hi, nin ọle dọ wewe ẹmhọn Agbejele nọnsi Osẹnobulua man ẹbho. (Matt. 20:28; Luke 3:23; 4:43) Iwẹnna oga Jesu wo mun kalo bhi iẹnlẹn nọnsọle. Ọle da yẹ ha guanọ nin ẹbho ebhebhe dọ deba bhi ọne iwẹnna.—Matt. 9:35-38.

² Ọiyi iwẹnna ikapẹnta mhan rebhe lu, ọkpakinọn, mhan rebhe lu iwẹnna oga. Iwẹnna kpataki ọnan khin ranmhude ọ rẹtẹ Osẹnobulua. Ọle zẹ nin mhan da yi “ene deba Osẹnobulua wẹnna.” (1 Cor. 3:9; 2 Cor. 6:4) Mhan lẹn sẹbhọ ghe, ẹmhọanta, ọle ọta nọnsi Osẹnobulua khin. (Ps. 119:159, 160) Bhiriọ, ọkhẹke nin mhan ha tale mhan ẹbho beji ọ khin tee sade mhan tẹmhọn Osẹnobulua. (Tie 2 Timothy 2:15.) Ọnan zẹle nin mhan da dọnmhegbe nin mhan rẹ guẹ ebi a rẹ noo iBaibo yẹ sade mhan tẹmhọn Osẹnobulua. Baibo hi emhin nin mhan manman noo rẹ man ẹbho ẹmhọn iJehova, Jesu, bi Agbejele nọnsi Osẹnobulua. Emhin ebhebhe yẹ ribhọ nin agbotu nọnsi Jehova  ne nin mhan ne ha sabọ rẹkpa mhan bhi iwẹnna itẹmhọn Osẹnobulua. Ọkhẹke nin mhan dọnmhegbe guẹ ebi a rẹ noo ene emhin nan yẹ. Emhin kpataki nin mhan rẹ lu iwẹnna itẹmhọn Osẹnobulua, ọle ene emhin nan khin.

3. Be bhọ ọkhẹke nin mhan re ọne obhi ẹghe nọn kẹre nan rẹ lu? Eria nela Acts 13:48 rẹman ghe ọkhẹke nin mhan ha guanọ?

³ Ene emhin kpataki nan nin mhan rẹ lu iwẹnna itẹmhọn Osẹnobulua, a lu ele beji mhan ha da sabọ ha noo ele rẹ man ẹbho iBaibo. Ebi a rẹ ọle ta nan rẹ man ọria iBaibo hi, nan rẹ re ebi a gbẹn ọbhọ rẹ mun ọria ẹlo kore nọn da sẹ ọle otọ ẹkẹ. Bhiriọ, ọne ọria ki sabọ re obọ rẹkhan ebi ọle luẹ. Obhi ẹghe khere kẹre ọkuẹsẹ Osẹnobulua kpẹn one agbọn nan. Bhiriọ, ọkhẹke nin mhan gbẹlokotọ ha man ẹbho iBaibo. Ọnan rẹman ghe “ọrebhe ne muegbe nin ele rẹ nyẹnlẹn bhi uwedẹ nin ele ha da miẹn aribhọ ọsi ighegheghe,” ele mhan ha gbẹlokotọ ha guanọ.—Tie Acts 13:44-48.

4. Be imhan ha rẹ sabọ miẹn ẹbho ne mhọn ọkhọle esili yẹ?

⁴ Be bhọ ha rẹkpa mhan miẹn ẹbho “ne muegbe nin ele rẹ nyẹnlẹn bhi uwedẹ nin ele ha da miẹn aribhọ ọsi ighegheghe”? Mhan dẹ sabọ miẹn ele sade mhan dọ ha tẹmhọn Osẹnobulua man ẹbho. Iriọ a yẹ ha lu bhi ore nin ọhẹnhẹn. Bhiriọ, ọkhẹke nin mhan lu rẹkhan ebi Jesu tale. Jesu da yọle: “Agbaẹbho nọn i rẹ khin nin bha ha yo, bha guanọ ene mhọn ọkhọle esili bhi enin.” (Matt. 10:11) Mhan lẹnmhin ghe ọiyi ẹbho rebhe la ka mhan ehọ ranmhude, ẹbho ne mhọn okpẹhio bi ẹbho nin ẹmhọn Osẹnobulua iyẹẹ sabọ rẹ fi ikeke gbe mhan. Ẹbho ne mhọn ọkhọle esili, ẹbho ne mhọn idegbere, bi ẹbho nin ẹmhọn Osẹnobulua ti ele bhọ, ele mhan guanọ. Mhan sabọ re ọnan khọkhọ iwẹnna ikapẹnta nin Jesu ha lu. Asabọ miẹn ghe, ọkuẹsẹ Jesu kanọn aga la emhin ọbhebhe, ọle ki ka guanọ oran esili nọn ha ji ọle rẹ lu ebi ọle ho nin ọle lu. Ọle ha ki miẹn oran nin ọle guanọ, ọle ki noo emhin nin kapẹnta rẹ wẹnna bi ẹwanlẹn nin ọle mhọn bhi iwẹnna ikapẹnta rẹ lu ebi ọle ho nin ọle lu. Iriọ mhan ha yẹ rẹ guanọ ẹbho ne mhọn ọkhọ esili nin ele dọ ga Osẹnobulua.—Matt. 28:19, 20.

5. Be ọkhẹke nin mhan lẹn rẹji ene emhin nin mhan noo bhi itẹmhọn Osẹnobulua? Re ijiẹmhin man. (Fẹ adudu nọn ribhi eji a da munhẹn ghe.)

⁵ Ene emhin nin mhan noo bhi itẹmhọn Osẹnobulua mhọn ebi ele lu kẹkẹ. Nin mhan re emhin nin Jesu ha noo bhi iwẹnna kapẹnta rẹ lu ijiẹmhin. * Ọle wo ha mhọn ene ọle rẹ ha yaman bhi emhin, ene ọle rẹ hian emhin, ene ọle rẹ zẹ uhio ọbhi emhin, ene ọle rẹ kanọ eran, bi emhin ne bunbun ebhebhe. Iriọ yẹ nọn rẹji ene emhin nin mhan rẹ tẹmhọn Osẹnobulua. Ọdeọde bhi ẹwẹ ele mhọn ebi a re ele lu. Bhiriọ, bha ji mhan zilo nyan emhin nin agbotu ne nin mhan ha noo bhi itẹmhọn Osẹnobulua. Mhan ki yẹ zilo nyan ebi a re ele lu kẹkẹ.

6, 7. (a) Be uwẹ sẹ rẹ noo ikadi nan rẹ taman ẹbho ẹmhọn jw.org yẹ? (b) Emhin eva nela ebe nan rẹ tie ẹbho vae bhi ikolo oga ne sẹmhan lu?

⁶ Kadi Nan Rẹ Taman Ẹbho Ẹmhọn Jw.Org. Arẹmiẹn ene Kadi nan dia khere, mhan dẹ sabọ noo ele rẹ ji ẹbho lẹn eria nin mhan khin. Mhan dẹ yẹ sabọ re ọle denọ ẹbho ẹlo diọbhi website nọnsẹmhan, ranmhude ele dẹ sabọ luẹ ẹmhọn mhan bhi enin. Seyẹ, ele dẹ sabọ na bhi enin gbẹn re ghe, nan dọ ha man ele iBaibo. Rẹ dọ sẹbhi ẹlẹnan nian, ẹbho ne gbera 400,000, sẹ re jw.org gbẹn re nan dọ ha man ele iBaibo. Ẹbho ne bunbun sẹyẹ wo gbẹn re! Uwẹ dẹ sabọ ne ene ikadi nan mhọn sade uwẹ lu iwẹnna ukpẹdẹ-ukpẹdẹ, bhiriọ, uwẹ ki sabọ ne ele nin ẹbho.

⁷ Ebe Nan Rẹ Tie Ẹbho. Ebi a gbẹn ọbhi ukpe-ebe nan rẹ tie ẹbho vae bhi ikolo oga yọle: ‘Mhan tie ẹ nin uwẹ dọ deba Esali Jehova Luẹ iBaibo.’ A da yẹ gbẹn ọbhọ ghe ẹbho dẹ sabọ lu ọnan ‘bhi ikolo oga nọnsẹmhan’ la ‘bhi iluẹmhin  nin ọria ha deba ẹ lu.’ Bhiriọ, emhin eva ọne ukpe-ebe nan ha sabọ lu. Ọkpa bhọ hi, ọ dẹ sabọ rẹkpa ẹbho lẹn eria nin mhan khin. Ọzeva, ọ tiẹ ẹbho nin ele dọ deba mhan luẹ iBaibo. (Matt. 5:3) Ẹbho nin mhan man ele iBaibo, la ẹbho nin mhan isẹ man ele iBaibo, dẹ sabọ vae bhi ikolo ne sẹmhan. Ele ha vae, ele ki kere ghe ele dẹ miẹn emhin ne bunbun luẹ bhi iBaibo.

8. Bezẹle nọn da yi emhin kpataki nin ọria rẹ vae bhi ikolo oga nọnsẹmhan, aharẹmiẹn osukpa ọle vae? Sounun bhi ijiẹmhin.

⁸ Emhin kpataki nọn nin mhan ha tiẹ ẹbho nin ele vae bhi ikolo ne sẹmhan aharẹmiẹn osukpa ele vae. Bezẹle? Ranmhude, ele ha vae, ele ki kere ghe Esali Jehova bha diabe otuẹ nekẹle. Ele ki dọ lẹn ghe mhan man ẹbho ẹmhọanta nọn ribhi iBaibo, ghe mhan rẹkpa ẹbho dọ lẹn Osẹnobulua. (Isa. 65:13) Ikpe ne bunbun ne gbera, ọnan ebe sunu ji Ray bi okhuo ọle nin Linda ne ribhi United States. Ele da ha riale ghe ẹghe sẹle nin ele rẹ munhẹn ha yo otuẹ. Ele rẹọbhọ ghe a miẹn Osẹnobulua, bhiriọ ele da guanọ nin ele lẹn ẹmhọn ọlẹn. Ranmhude ọnan, ele da munhẹn ha yo otuẹ rebhe ne ribhi agbaẹbho nọnsele nẹga. Otuẹ wo manman bun bhi ọne agbaẹbho. Ọkuẹsẹ ele munhẹn, ele da mhanmhan emhin eva nin ele ha fẹghe nin ele rẹ lẹn otuẹ nin ele ha deba. Ọhẹnhẹn, ele dẹ miẹn emhin luẹ bhi ọne otuẹ. Ọzeva, ẹbho ne yo ọne otuẹ dẹ ha lu emhin bọsi eria ne gene ga Osẹnobulua. Ikpe ne bunbun ki gbera, ele da yo otuẹ nọn ribhi agbaẹbho nọnsele nega fo. Ọkpakinọn, ele bha miẹn ọne ele ha deba, ranmhude, ele bha miẹn emhin soso luẹ bhi ene otuẹ kẹkẹ. Sẹyẹ, ikpọn nin eria yọ vae bhi ene otuẹ bha khẹke ẹbho ne ga Osẹnobulua. Ẹghe nin ele ki rẹ zobọ bhi otuẹ nin ele yo kike, Linda da ha khian eji ọle da wẹnna, Ray da ha khian uwa. Ray ki ha khian uwa, ọle da gbera Kindọn Họọ a bhi uwedẹ. Ọle da taman egbe ọle yọle: ‘Mẹn dẹ yẹ yo ọne otue nan fẹghe, nin mẹn daghe ebi ele rẹ lu emhin yẹ.’ Ọle ki nabhi ẹkẹ ọne iKindọn Họọ, ọrebhe da wo miẹn ọlẹn ọbhi egbe. Ikpọn ne gbale ọrebhe rẹ yọ. Odalo ọle da wo dotua ẹdẹnin. Emhin nin ọle luẹle ọne ukpẹdẹ da wo manman ti ọle bhọ. Inian ọ wo diabe ebi Paul nin odibo tale, ẹghẹ nin ọle rẹ ha tẹmhọn ọria nọn la vae bhi ikolo ọsi Kristiẹn. Ọne ọria da yọle: ‘Osẹnobulua gene ribhi ẹwẹ bha.’ (1 Cor. 14:23-25) Ẹdẹ iSunday rebhe Ray ki rẹ ha yo ikolo oga. Akizẹbuẹ, ọle da yẹ ha vae bhi ikolo rebhe nan do bhi ẹkẹ uzana. Linda da yẹ ha rẹkhan ọlẹn yo. Arẹmiẹn ele ki wanre gbera ikpe 70, ele da ka nin ọria dọ ha mhan ele iBaibo. Ele da yẹ dọ mianmẹn.

9, 10. (a) Bezẹle nọn da lẹkhẹ nan rẹ noo itrati? (b) Be ọria ha rẹ sabọ noo itrati nọn yọle Bebhọ ha Agbejele nọso Osẹnobulua?

⁹ Trati. Trati ne sẹbhi elẹnlẹn mhan mhọn. Ene trati nan re ọle lẹkhẹ nan rẹ munhẹn ha nin ọria tẹmhọn Osẹnobulua. Ukpe 2013, ọle a munhẹn ha print ene trati nan. Trati ne bun sẹbhi ẹbo isẹn bhi ijian uli (five billion), ele a sẹ wo print dagbare! Uwẹ ha sabọ lẹn ebi a rẹ noo ukpọkpa yẹ bhi ọne itrati nan, enekẹle ida ha nọghọ uwẹ rẹ noo, ranmhude uwedẹ ọkpa a rẹ gbẹn ele rebhe. Be uwẹ ha rẹ noo itrati rẹ munhẹn ha tẹmhọn Osẹnobulua man ọria yẹ?

¹⁰ Asabọ miẹn trati nọn yọle Bebhọ ha Agbejele nọso Osẹnobulua? uwẹ ho nin uwẹ noo. Re ọne uhọnmhọn-ọta man ọne ọria, uwẹ ha nọọn ọlẹn yọle: “Be uwẹ riale Agbejele nọnsi Osẹnobulua khin? Uwẹ dẹ be yọle. . . ?” Uwẹ ha ki re ọle mhan ọlẹn fo, uwẹ ki nọọn ọlẹn ọnela bhi ene ewanniẹn ea nan gbẹn dagbare gene wanniẹn ọne inọnta. Ọle ha ki zẹ fo, hẹi taman ọlẹn si ọne ọle zẹ gbamhin la si ọbha gba. Tujie ọne itrati diọbhi uhọnmhọn-ọta nọn yọle, “Ebi IBaibo Tayẹ,” uwẹ ha tie iBaibo nọn ribhi enin. Ene iBaibo hi, Daniel 2:44 bi Isaiah 9:6. Ahamiẹn ọne ọria mhọn ẹghe, sẹyẹ ha nanlẹn zilo. Bhi ọkike ọle, re inọnta nọn ribhi ikeke ọne itrati man ọlẹn. Ọne inọnta yọle, “Eba Da Ria Ẹmhọn Lẹn”: “Bi iẹnlẹn da diayẹ bhẹ ẹghe ugbẹloghe ọsa gbejele Osẹnobulua?” Uwẹ ha fikie vae ẹdẹ ọbhebhe, ọne inọnta nan bha ha  zilo nyan. Uwẹ sabọ rẹ re brokiọ nọn yọle Ọta Nọn Mhẹn Nọn Nin Obọ Osẹnobulua Vae! nanlẹn zilo, bhi iluẹmhin 7 nọn ribhọ. Ọne ibrokiọ nan, ọkpa nọn bhi ebe nin mhan rẹ nin ọria luẹ iBaibo.

11. Be imhan ha sabọ noo iWatchtower bi Awake! rẹ lu? Be ọkhẹke nin mhan lẹn ọkuẹsẹ mhan sabọ noo ele nọnsẹn?

¹¹ Ebe ne parapara. Ebe ọkhẹughe bi Awake!, ele ki sẹ bunbun nẹ bhi ebe nan gbẹn dagbare, yẹ gha nẹga bhi urolo kẹkẹ. Ranmhude agbaẹbho ne bunbun a gha ele na, a gbẹlokotọ zẹ ene uhọnmhọn-ọta, beji ele ha da ha ti ẹbho rebhe bhọ. Ọkhẹke nin mhan noo ele rẹ rẹkpa ẹbho lẹn emhin nọn kokhun nẹ bhi iẹnlẹn. Ahamiẹn mhan lẹn eria ne zẹle a gbẹn Watchtower bi ene zẹle a gbẹn Awake!, mhan ki sabọ ha noo ele nọnsẹn.

12. (a) Ẹbho nela a manman gbẹn Awake! nan? Be ọne ebe nan rẹ rẹkpa ele yẹ? (b) Be uwẹ sẹ rẹ sabọ noo Awake! yẹ bhi iwẹnna itẹmhọn Osẹnobulua?

¹² Eria nan lu Awake! nan hi eria ne bha lẹn Baibo hiẹhiẹ la eria ne bha manman lẹn ọlẹn. Asabọ miẹn ele bha lẹn iman-emhin iKristiẹn hiehie, la ẹmhọn oga iyẹ ele, la ele bha lẹn ghe Baibo dẹ sabọ rẹkpa ele bhi iẹnlẹn. Emhin nọn manman zẹ nan da gbẹn Awake! hi, nan rẹ ji ene tie ọle lẹn ghe Osẹnobulua ribhọ. (Rom. 1:20; Heb. 11:6) Ọ yẹ rẹkpa ene tie ọle mhọn urẹọbhọ ghe ọta nọnsi Osẹnobulua iBaibo khin. (1 Thess. 2:13) Uhọnmhọn-ọta ọsi Awake! ea nan gbẹn dagbare ọne ukpe nan hi: “The Way of Happiness,” “12 Secrets of Successful Families,” and “Help for Those Who Grieve.”

13. (a) Ẹbho nela zẹle a gbẹn ebe Ọkhẹughe nan noo bhi itẹmhọn Osẹnobulua? (b) Be uwẹ sẹ rẹ sabọ noo ebe Ọkhẹughe yẹ bhi iwẹnna itẹmhọn Osẹnobulua?

¹³ Ẹbho nela zẹ nan da gbẹn ebe Ọkhẹughe nan gha nin ẹbho sade mhan tẹmhọn Osẹnobulua? Ẹbho nin ẹmhọn Osẹnobulua zẹwẹ ti ele bhọ, bi ne yẹ mhọn urẹọbhọ da iBaibo. Ọne ebe Ọkhẹughe nan, ọ gbe otọ iBaibo fanọan man ele, ranmhude arẹmiẹn ele zẹwẹ lẹn iBaibo, ele bha manman lẹn ọlẹn nọnsẹn. (Rom. 10:2; 1 Tim. 2:3, 4) Uhọnmhọn-ọta ọsi ebe Ọkhẹughe nan noo bhi itẹmhọn Osẹnobulua, nan gbẹn dagbare ọne ukpe nan hi: “Is the Bible Still Relevant Today?,” “What Does the Future Hold?,” bi “Does God Care About You?”

14. (a) Be ividio nin mhan rẹ man ẹbho emhin rẹ sabọ rẹkpa ele yẹ? (b) Be uwẹ sẹ rẹ sabọ noo ividio ne sẹmhan yẹ bhi iwẹnna itẹmhọn Osẹnobulua?

¹⁴ Vidio. Machine kẹkẹ nin kapẹnta noo ẹlẹnan, kapẹnta bha ha miẹn ele noo ẹghe nin Jesu rẹ ha lu iwẹnna ikapẹnta. Iriọ yẹ nọn rẹji vidio nin mhan rẹ man ẹbho emhin ẹlẹnan. Jesu bha miẹn ele ha noo ẹghe nin ọle rẹ ha ribhi ọne otọ nan. Ọkpakinọn, rẹ deba ebe nin mhan gha nin ẹbho ẹlẹnan, mhan yẹ mhọn vidio nin mhan rẹ man ele emhin. Enẹn bhi ẹwẹ ele hi: Be Sunu bhi Kindọn Họọ? Be Sunu bhi Iluẹmhin IBaibo? Bezẹle Nọn Da Khẹke Nin Mhan Luẹ IBaibo? Esali Jehova—Hebhọ Mhan Khin? Mhan sabọ rẹ noo ividio ne bha taan gbera ihuẹnlo eva sade mhan miẹn ọria ọsi ọhẹnhẹn. Ahamiẹn mhan fikie bu ọria, la sade ọne ọria manman mhọn ẹghe, ọle mhan ha da noo ene taanlẹn ne ribhọ. Ene ividio nan dẹ sabọ re ọle ha ti ọria bhọ rẹ dọ ha luẹ iBaibo yẹ vae bhi ikolo oga.

15. Sounun bhi ijiẹmhin nọn rẹman ghe, vidio nesẹmhan manman sẹ ọria otọ ẹkẹ sade ọ ghe ọle bhi urolo nọnsọle.

¹⁵ Bhi ọsi ijiẹmhin, ẹghe nin obhio mhan ọkpa rẹ miẹn ọkhuo nọn na bhi Micronesia vae, ọle da man ọne okhuo ividio ọkpa bhi urolo nọnsọle natiọle Yapese. Vidio nọn yọle Bezẹle Nọn Da Khẹke Nin Mhan Luẹ IBaibo?, ọle ọne obhio mhan rẹ man ọlẹn. Ọne vidio ki wo munhẹn ha khue, ọne okhuo da yọle: “Hi! Urolo nọnsẹmhẹn khọnan! Ranmhude ebi ọ rẹ talọ yẹ, agbaẹbho nọnsẹmhẹn ọ nan vae. Urolo nọnsẹmhẹn ọ zẹ!” Ọle ki ghe ọne video fo,  ọle da tale ghe ọle dẹ dọ tie emhin rebhe nan re urolo nọnsọle rẹ gbẹn dagbare bhi jw.org. (Yẹ fẹ Acts 2:8, 11 ghe.) Yẹ fẹ ijiẹmhin ọbhebhe ghe. Obhio mhan nin okhuo bhi United States da re foni rẹ ji vidio ọkpa ji ọmọn nọnsi obhio ọle nọn nyẹnlẹn bhi agbaẹbho ọbhebhe. Vidio nọn yọle Bezẹle Nọn Da Khẹke Nin Mhan Luẹ IBaibo?, ọle one obhio mhan nan je ji ole bhi urolo nọnsọle. Ọ ki ghe ọle fo, ọ da gbẹn ji obhio mhan yọle: “Eji ọne vidio nan da yọle ghe ẹlinmhin ebe gbẹloghe ọne agbọn nan, ọle han mẹn ilo nẹ. Mẹn ki muegbe rẹ ha luẹ iBaibo nian.” Ọnan manman mhẹn bhi ehọ ranmhude, agbaẹbho nin ene gbẹloghe da mun idobolo ọbhi iwẹnna oga nọnsẹmhan, ọle ọne ọria nan da nyẹnlẹn.

16. Be bhọ a noo ene brokiọ nan rẹ lu: (a) Ka Osẹnobulua Ehọ nu Nyẹn Bhi Ighegheghe? (b) Ọta Nọn Mhẹn Nọn Nin Obọ Osẹnobulua Vae? (c) He Bhọ lu Iho Nọnsi Jehova ẹlẹnan?

¹⁶ Brokiọ. Ebho eso ribhọ ne iguẹ manman tie ebe, la ne imhọn ebe soso bhi urolo nọnsele. Be uwẹ ha rẹ sabọ man ene eria nan iBaibo yẹ? Hẹi kpokpo egbe, brokiọ ribhọ nọn ha sabọ rẹkpa ẹ. Ọne brokiọ yọle Ka Osẹnobulua Ehọ nu Nyẹn Bhi Ighegheghe. * Brokiọ nọn yọle Ọta Nọn Mhẹn Nọn Nin Obọ Osẹnobulua Vae! dẹ wo sabọ rẹkpa ẹ rẹ munhẹn ha man ọria iBaibo. Uwẹ sabọ rẹ re ene uhọnmhọn-ọta nan gbẹn dagbare bhi ikeke ọne brokiọ man ọne ọria. Bhiriọ, uwẹ ki taman ọlẹn nin ọle zẹ ọne ti ọle bhọ nẹ. Ọle ha ki zẹ fo, re uhọnmhọn-ọta nin ọle zẹ munhẹn ha man ọle emhin. Uwẹ sẹ ka lu ọle inian khẹ sade uwẹ fikie bu ọria? Brokiọ nọnzi ea nin mhan rẹ man ẹbho emhin yọle He Bhọ lu Iho Nọnsi Jehova ẹlẹnan? Ọne ibrokiọ nan mhan rẹ man ẹbho ẹmhọn agbotu nọnsẹmhan. Ahamiẹn uwẹ ho nin uwẹ luẹ ebi a rẹ noo ọle yẹ sade uwẹ man ọria iBaibo, fẹ Ebe Ọsi Ikolo—Unyẹnmhin bi Iwẹnna Oga Nọn Sẹmhan ghe, ọsi March 2017 nọn ribhọ.

17. (a) Bezẹle nan da gbẹn What Can the Bible Teach Us? bi How to Remain in God’s Love? (b) Be ọkhẹke nin ọria lu aharẹmiẹn ọle mianmẹn fo? Bezẹle?

¹⁷ Ebe. Ahamiẹn uwẹ re ibrokiọ rẹ munhẹn ha man ọria iBaibo fo, uwẹ sabọ rẹ zẹ ọne brokiọ obọ ha noo ebe nọn yọle What Can the Bible Teach Us? aharẹmiẹn ibha bha sẹ ko luẹ ọne brokiọ sotọ. Ọne ebe nan dẹ sabọ re otọ emhin ne bunbun bhi Baibo mun ọne ọria ẹlo kore. Ahamiẹn ọne ọria re obọ rẹkhan emhin nin ọle luẹle, re ebe nọn yọle How to Remain in God’s Love man ọle emhin sade ọle ki luẹ What Can the Bible Teach Us? sotọ. How to Remain in God’s Love dẹ man ọne ọria uwedẹ kẹkẹ nin ọle ha rẹ sabọ ha re obọ rẹkhan adia ne ribhi Baibo bhi iẹnlẹn nọnsọle. Lẹn sẹbhọ ghe, aharẹmiẹn ọne ọria mianmẹn, ọkhẹke nin ọle luẹ ene ebe nan veva sotọ. Bhiriọ, ele ki sabọ deziẹn nọnsẹn bhi oga.—Tie Colossians 2:6, 7.

18. (a) Be 1 Timothy 4:16 yọle nin mhan lu? Elele nela ha nanbhọre sade mhan lu iriọ? (b) Be ọkhẹke in mhan ha mhọn bhi ọkhọle beji mhan rẹ noo ene emhin kẹkẹ nin mhan rẹ tẹmhọn Osẹnobulua?

¹⁸ Ẹsọn nọnsẹmhan nọn nin mhan rẹ man ẹbho ẹmhọanta nọn ha sabọ rẹkpa ele miẹn aribhọ ọsi ighegheghe. (Col. 1:5; tie 1 Timothy 4:16.) Bhiriọ, emhin kẹkẹ nin agbotu ne nin mhan dẹ sabọ rẹkpa mhan miẹn ọne ẹsọn nan. (Fẹ ẹkpẹti ghe nọn yọle, “ Emhin Kpataki Nin Mhan Rẹ Lu Iwẹnna Itẹmhọn Osẹnobulua.”) Bha ji mhan dọnmegbe rẹ ha noo ene emhin nan nọnsẹn. Ọdeọde la tobọle tare ọnela ọle ha noo bhi ene emhin nan sade ọle miẹn ọria. Ọle la yẹ tare ẹghe nin ọle ha rẹ noo ọle. Ọkpakinọn, mhan iwo gheghe gha ebe ne sẹmhan nẹga. Bhiriọ, ọbha khẹke nin mhan re ebe nọnsẹmhan nin ọria nọn ida tie ọle. Mhan guanọ nin mhan rẹkpa ẹbho ne degbere, nin ẹmhọn Osẹnobulua ti ele bhọ, beji ele ha da dọ ga Osẹnobulua.—Acts 13:48; Matt. 28:19, 20.