UHỌNMHỌN-ỌTA NỌNZI 41
Ebi A Rẹ Man Ọria IBaibo Yẹ, Nin Ọle Da Sabọ Lu Re Alo Yẹ Mianmẹn—Obọ Ọle Nin Ọhẹnhẹn
“A re ọle man ghe, ilẹta ọsi Kristi, nin mhan ne tẹmhọn Osẹnobulua gbẹn, ọle ibha khin.”—2 COR. 3:3.
ILLO 78 Man Ẹbho Ẹmhọn Nọnsi Osẹnobulua
EBI MHAN DA LUẸ *
Ọ wo re ibhio mhan ne ribhi agbotu ghọnghọn sade ele daghe obhio ele nin ele hoẹmhọnlẹn bhi ẹkẹ agbotu mianmẹn. (Fẹ uduọle nọnzi 1 ghe)
1. Be 2 Corinthians 3:1-3 rẹ rẹman yẹ ghe, isẹhoa kpataki nọn nan rẹ man ọria iBaibo nin ọle da sabọ mianmẹn? (Fẹ adudu nọn ribhi odalo ọne ebe nan ghe.)
BE Ọ dia uwẹ yẹ bhi egbe sade ọria bhi agbotu nọnsẹ mianmẹn? Edandan iribhọ ghe ọ re uwẹ ghọnghọn. (Matt. 28:19) Ahamiẹn uwẹ hi ọnọn man ọne ọria iBaibo, uwẹ dẹ wo manman ha ghọnghọn rẹ daghe ghe ọle mianmẹn. (1 Thess. 2:19, 20) Inian ene wo la mianmẹn fo diabe “ilẹta” nan gbẹn rẹ tẹmhọn iwẹnna ọsi eria ne man ele emhin, bi ọsi agbotu nin ele ye.—Tie 2 Corinthians 3:1-3.
2. (a) Inọnta nela ọkhẹke nin mhan ria eria nyan? Bezẹle? (b) Be a re ọle ta nan rẹ ha deba ọria lu iluẹmhin Baibo? (Fẹ ebi a gbẹn ọbhi otọle ghe.)
2 Ọ wo manman ti mhan bhọ ghe, bhi ikpe enẹn ne gbera nian, ẹbho ne sẹbhi 10,000,000, ele mhan ha deba lu iluẹmhin Baibo * uki-uki. Bhi ẹkẹ ene ikpe enẹn nin, ebe gbera itue 280,000, ele mianmẹn ukpe-ukpe nin ele da kiẹn Esali Jehova. Be imhan ha rẹ rẹkpa ẹbho ne bunbun nin mhan man ele iBaibo yẹ nin ele da sabọ mianmẹn? Mhan guanọ nin mhan re ẹjẹje lu eka nin mhan ha sabọ lu rẹ rẹkpa ẹbho dọ kiẹn edibo nesi Jesu, beji a miẹn ghe, Jehova sẹyẹ mhọn iziẹngbe nin ene guanọ nin ele lẹn ọlẹn da sabọ lu iriọ. Mhan dẹ tuabe bhi ọne iwẹnna nan ranmhude ẹghe iyẹ ribhọ.—1 Cor. 7:29a; 1 Pet. 4:7.
3. Be imhan ha luẹ bhi ọne uhọnmhọn-ọta nan?
3 Ranmhude emhin kpataki nọn nan rẹ rẹkpa ẹbho kiẹn edibo nesi Jesu, agbotu da nọọn iBẹtẹ eso ebi mhan ha sabọ lu, nin mhan da sabọ rẹkpa ẹbho nin mhan man ele iBaibo rẹ ha lu re alo yẹ mianmẹn. Bhi ọne uhọnmhọn-ọta nan bi ọnọn rẹkhan ọlen, mhan dẹ zilo nyan ebi mhan ha sabọ miẹn luẹ bhi ijiẹmhin ọsi ibhio mhan ne lu iwẹnna ọkanẹfan, misiọnari, bi ene ọfẹotughe. * (Prov. 11:14; 15:22) Ele dẹ rẹkpa mhan lẹn ebi ene man ọria iBaibo bi ebi ene luẹ iBaibo ha sabọ lu nin iluẹmhin Baibo nin ele lu da sabọ kiọnlẹn. Bhi ọne uhọnmhọn-ọta nan, mhan dẹ zilo nyan emhin isẹn nin ọria nọn luẹ iBaibo ha sabọ lu nin ọle da sabọ lu re alo yẹ mianmẹn.
HẸI JI UZANA GBERA GHE UWẸ BHA DỌ MAN ELE EMHIN
Nọọn ọria nin uwẹ man ọle iBaibo si ibha dẹ sabọ ko dotua kugbe nin bha da luẹ Baibo (Fẹ uduọle 4 rẹ sẹbhi 6 ghe)
4. Be ọkhẹke nin mhan lẹn rẹji iluẹmhin Baibo nin mhan deba ọria lu bhi ununro nọnsọle?
4 Ununro ibhio mhan ne bunbun da man ẹbho iBaibo. Arẹmiẹn uwedẹ esili khọnan nan rẹ munhẹn ha man ọria iBaibo, a isabọ bue bhi iluẹmhin ne dia inian. Sẹyẹ, asabọmiẹn ọ iyi uzana-uzana a rẹ sabọ ne ene ẹbho luẹ emhin. Ibhio mhan eso ki yẹ miẹn ẹbho nin ele re inian man ele iBaibo nọmba nọnsele. Bhiriọ ele ki sabọ ha tie ele la gbẹn ebe ji ele bhi foni rẹ tẹmhọn iBaibo man ele ọkuẹsẹ ele re ẹnẹ ji ele. Ele sabọ rẹ re inian ha ne ele zilo bhi uki eso. Ọkpakinọn, asabọmiẹn ọne iluẹmhin Baibo ida deziẹn nọnsẹn. Bhiriọ, ọne ọria ida sabọ lu re alo nin ọle da re egbe guẹ nin Jehova yẹ mianmẹn, sade obhi ẹghe nọn sẹ inian ọkpa ọle noo rẹ luẹ iBaibo.
5. Be iJesu tale bhi Luke 14:27-33 nọn ha sabọ rẹkpa mhan bhi iluẹmhin Baibo nin mhan deba ọria lu?
5 Jesu da noo ijiẹmhin rẹ rẹman ebi ọria ha lu nin ọle da sabọ kiẹn odibo nọnsọle. Ọle da tẹmhọn ọria nọn ho nọn bọn uwa igedege bi ojie nọn ho nọn khọn okhọn. Jesu da yọle ghe, ọne ọria nọn bọn uwa dẹ ka dotua, lolo eka nin ọne uwa igedege ha gbe ọle le. Sẹyẹ, ọne ojie dẹ ka dotua yẹ fi ọle ghe si ọle bi eyokhọnlẹn nesọle dẹ sabọ khọn ọne okhọn miotọ. (Tie Luke 14:27-33.) Iriọ ọ yẹ rẹ khẹke nin ọria ka guanọ otọ ọle fẹghe ebe khẹke nin ọle lu, nin ọle da sabọ kiẹn odibo nọnsi Jesu. Ranmhude ọnan, ọkhẹke nin mhan ji ọne ọria lẹn ghe ọkhẹke nin ọle ha deba mhan luẹ iBaibo uzana-uzana. Be imhan ha rẹ sabọ lu ọnan yẹ?
6. Be ọkhẹke nin mhan lu nin iluẹmhin Baibo nin mhan deba ọria lu da sabọ ha lu re alo?
6 Ọkhẹke nin mhan ji ẹghe nin mhan noo rẹ man ọria iBaibo bhi ununro tan gbera beji ọ ka ha khin. Mhan dẹ sabọ ha tie ijeso bhi Baibo man ọlẹn gbera ọne imhan ka tie khẹ. Ahamiẹn ọ yẹẹ ọne ọria rẹ re inian ha ne imhan zilo, mhan dẹ sabọ taman ọlẹn si ọ dẹ yẹẹ ọle nin mhan rẹ deba ọle ko dotua ha zilo. Ebi ọne ọria tale ha rẹman si ọle gene muegbe nin ọle rẹ deba mhan ha luẹ iBaibo. Nin ọne ọria rẹ manman ha lu re alo, mhan dẹ sabọ nọọn ọne ọria si ọ dẹ yẹẹ ọle rẹ ha luẹ iBaibo igba eva bhi uzana. Rẹ deba nin mhan rẹ ne ọria ha luẹ iBaibo igba eva bhi uzana, emhin eso yẹ ribhọ nọn khẹke nin mhan lu.
HA MUEGBE ỌBHI OTỌ UWẸ KUẸ DỌ MAN ELE EMHIN
Ha muegbe iluẹmhin ọbhi otọ, uwẹ ha yẹ ha man ọne uwẹ man ọle iBaibo ebi a rẹ muegbe ọbhi otọ yẹ (Fẹ uduọle 7 rẹ sẹbhi 9 ghe)
7. Be ọria nọn man ọria iBaibo ha rẹ sabọ ha muegbe ọbhi otọ nọnsẹn yẹ?
7 Ọkhẹke nin ọria nọn man ọria iBaibo ha muegbe ọne iluẹmhin ọbhi otọ. Ebi uwẹ ha ka lu hi, ka tie ọne uhọnmhọn-ọta nin bha ha zilo nyan, uwẹ ha yẹ tie iBaibo ne ribhọ. Dọnmhegbe lẹn otọ ebi ọne uhọnmhọn-ọta tẹmhọnlẹn. Ria eria nyan ene uhọnmhọn-ọta kẹkẹ ne ribhọ, ene inọnta, ene iBaibo nan yọle nan tie, ene ifoto, bi ene vidio kẹkẹ ne ha rẹkpa uwẹ gbotọ ọne uhọnmhọn-ọta fanọn an nọnsẹn. Uwẹ ha ki lu ọnan fo, ria ẹmhọn uwedẹ nọn lẹkhẹ nin uwẹ ha rẹ sabọ man ọne ọria ebi ọne uhọnmhọn-ọta tẹmhọnlẹn bhi uwedẹ nọn ha da mun ọle ẹlo kore, yẹ lẹkhẹ nanlẹn rẹ ha re obọ rẹkhan.—Neh. 8:8; Prov. 15:28a.
8. Beji Paul tale bhi Colossians 1:9, 10, be erọnmhọn nin mhan nan nin ọria nin mhan man ọle iBaibo ha rẹ sabọ rẹkpa ọle yẹ?
8 Emhin ọbhebhe nin uwẹ ha lu sade uwẹ muegbe ọbhi otọ hi, uwẹ ki tẹmhọn ọne ọria man iJehova bhi erọnmhọn. Bhii ọle nọn rẹkpa uwẹ man ọne ọria emhin bhi uwedẹ nin ebi uwẹ man ọle le ha rẹ sẹ ọle otọ ẹkẹ. (Tie Colossians 1:9, 10.) Ria ẹmhọn ebe ha sabọ nọghọ ọne ọria rẹ lẹn otọ ọle la ebe ha nọghọ ọle rẹ miẹn ọbhi egbe. Ha mhọn ọlẹn bhi ọkhọle ghe, uwẹ guanọ nin uwẹ rẹkpa ọne ọria, nin ọle da sabọ mianmẹn.
9. Be uwẹ ha rẹ sabọ rẹkpa ọria nin uwẹ man ọle iBaibo ha muegbe ọbhi otọ yẹ?
9 Mhan mun ọkhọle ọbhọ ghe, ọria nin uwẹ man ọle iBaibo dẹ ha kuẹnmhẹn iJehova bi Jesu sade uwẹ man ọle iBaibo ẹghe rẹ sẹ ẹghe. (Matt. 5:3, 6) Ọkhẹke nin ọria nọn luẹ iBaibo manman denọ ẹlo ọbhi ebi ọle luẹ, nin ọle da manman miẹn elele bhi ọne iluẹmhin. Ranmhude ọnan, rẹkpa ọle lẹn ghe, ọkhẹke nin ọle ha tie eji bha ha luẹ ọbhi otọ. Sẹyẹ, nin ọle ha ria eria nyan ebi emhin nin ọle tiele rẹ rẹso ọle yẹ. Be uwẹ ha rẹ rẹkpa ọle rẹ lu ọnan yẹ? Uwẹ sabọ rẹ re uhọnmhọn-ọta ọkpa rẹ man ọlẹn ebi ọle ha rẹ ha muegbe ọbhi otọ yẹ. * Rẹkpa ọle lẹn ebi ọle ha rẹ ha daghe ewanniẹn rẹji inọnta yẹ. Rẹkpa ọle lẹn ghe ọle ha re iyaman ọbhi ikpọta eso, ọ ki lẹkhẹ nanlẹn rẹ ha ye ene ewanniẹn re. Uwẹ ha ki rẹkpa ọle lẹn enan fo, taman ọlẹn nin ọle hẹi wo ha tie ọne ewanniẹn dagbare, sokpan, nin ọle re ọkhọle tale beji ọ rẹ mun ọle ẹlo kore. Ọle ha lu inian uwẹ ha da lẹn si ọne uhọnmhọn-ọta gene mun ọle ẹlo kore. Bha ji mhan zilo nyan emhin ọbhebhe nin mhan ha sabọ lu rẹ rẹkpa ọria nin mhan man ọle iBaibo.
TAMAN ỌLẸN NIN ỌLE HA KA IJEHOVA EHỌ YẸ NANLẸN TALỌ ẸDẸ-ẸDẸ
Man ọria nin uwẹ man ọle iBaibo ebi a rẹ nan erọnmhọn ji Jehova yẹ (Fẹ uduọle 10 bi 11 ghe)
10. Bezẹle nọn da khẹke nan ha tie iBaibo ẹdẹ-ẹdẹ? Be ọria nin mhan man ọle iBaibo ha lu nin ọle da sabọ miẹn elele bhi Baibo nin ọle tie?
10 Rẹ deba iluẹmhin Baibo nin ọria nọn luẹ iBaibo lu uzana-uzana, emhin eso yẹ ribhọ nọn khẹke nin ọle tobọle ha lu ẹdẹ-ẹdẹ. Ọkhẹke nin ọle ha ne iJehova talọ yẹ ka ọle ehọ. Ọle dẹ sabọ ka iJehova ehọ sade ọle tie iBaibo ẹdẹ-ẹdẹ. (Josh. 1:8; Ps. 1:1-3) Rẹkpa ọle lẹn ebi ọle ha rẹ sabọ ha noo emhanmhan nan rẹ sabọ tie iBaibo ẹdẹ-ẹdẹ yẹ nọn ribhi jw.org® nọn yọle, “Emhanmhan Nan Rẹ Tie IBaibo.” * Nin uwẹ rẹ sabọ rẹkpa ọne ọria miẹn elele bhi Baibo nin ọle tie, taman ọlẹn nin ọle ha re ẹghe ọbhi otọ rẹ ria eria nyan ebi ọle luẹle rẹji Jehova bhi eji ọle tiele bhi Baibo, bi ebi ọle ha rẹ ha re obọ rẹkhan ebi ọle tie.—Acts 17:11; Jas. 1:25.
11. Be ọria nin mhan man ọle iBaibo ha rẹ sabọ luẹ ebi a rẹ nan erọnmhọn yẹ? Bezẹle nọn da yi emhin kpataki nin ọle rẹ ha nan erọnmhọn ji Jehova ẹdẹ-ẹdẹ?
11 Taman ọria nin uwẹ man ọle iBaibo nin ọle ha nan erọnmhọn ji Jehova ẹdẹ-ẹdẹ. Deba ọria nin uwẹ man ọle iBaibo ha nan erọnmhọn sade bha guanọ nin bha munhẹn ha luẹ emhin bi sade bha zobọ. Ha tẹmhọn ọlẹn man iJehova bhi ene erọnmhọn. Beji ọria nin uwẹ man ọle iBaibo rẹ kaehọ ebi uwẹ rẹ nan erọnmhọn yẹ, ọle ki yẹ sabọ tobọle re ọkhọle ha nan erọnmhọn ji Jehova bhi elin nọnsi Jesu Kristi. (Matt. 6:9; John 15:16) Ọria nin uwẹ man ọle iBaibo dẹ sabọ sikẹ Osẹnobulua sade ọle tie iBaibo ẹdẹ-ẹdẹ yẹ nan erọnmhọn ji ọle. (Jas. 4:8) Ahamiẹn ọle lu inian ẹdẹ-ẹdẹ, ọle ki sabọ lu re alo nin ọle da sabọ re egbe guẹ nin Jehova yẹ mianmẹn. Emhin ebhebhe nela ha sabọ rẹkpa ọle?
RẸKPA ỌLE NIN ỌLE DA SABỌ HA YI ỌMỌẸ IJEHOVA
12. Be imhan ha rẹ sabọ rẹkpa ọria nin mhan man ọle iBaibo yẹ, nin ọle da sabọ ha yi ọmọẹ iJehova?
12 Mhan iguanọ nin ọria nin mhan man ọle iBaibo gheghe lẹn ebi mhan man ọle le, sokpan, mhan guanọ nin ebi mhan man ọle sẹ ọle otọ ẹkẹ. Bezẹle? Ranmhude, emhin ha sẹ ọria otọ ẹkẹ, ọle ọne ọria ha da sabọ re obọ rẹkhan ọlẹn. Ẹbho ne bunbun wo ha ka iJesu ehọ ranmhude ọle wo ha man ele emhin ne bunbun. Jesu yẹ wo ha man ẹbho emhin bhi uwedẹ nọn ha rẹ sẹ ele otọ ẹkẹ. Bhiriọ, ẹbho da vae dọ ha rẹkhan ọlẹn. (Luke 24:15, 27, 32) Ọkhẹke nin ọria nin mhan man ọle iBaibo ha ghe iJehova bii ọria nin ọle ha sabọ sikẹ. Ọ yẹ khẹke nin ọle ha ghe iJehova bii Aba ọle, Osẹnobulua nọnsọle, bi Ọmọẹ ọle. (Ps. 25:4, 5) Rẹkpa ọria nin uwẹ man ọle iBaibo lẹn ikpẹ esili nesi Jehova sade uwẹ man ọle iBaibo. (Ex. 34:5, 6; 1 Pet. 5:6, 7) Ha lu inian bhi uhọnmhọn-ọta nọn hi ki rẹ khin nin uwẹ man ọle le. Rẹkpa ọle lẹn ghe Jehova mhọn oyẹẹ, ifuẹkẹ, bi ẹkẹ ẹjẹjẹ. Jesu yọle ghe, “uhi nin ọhẹnhẹn bi uhi nọn kpọnọ ne” hi, nin mhan hoẹmhọn iJehova nin Osẹnobulua nọnsẹmhan. (Matt. 22:37, 38) Bhiriọ, rẹkpa ọria nin uwẹ man ọle iBaibo rẹ re ọkhọle rebhe rẹ hoẹmhọn Osẹnobulua.
13. Be imhan ha rẹ sabọ rẹkpa ọria nin mhan man ọle iBaibo yẹ nin ọle da sabọ lẹn ikpẹ nesi Jehova?
13 Beji uwẹ ha rẹ ha ne ọria nin uwẹ man ọle iBaibo zilo, ji ọne ọria lẹn ebezẹle nin uwẹ da hoẹmhọn iJehova. Asabọmiẹn ọnan dẹ rẹkpa ọle rẹ daghe ghe, ọkhẹke nin ọle ha yi ọmọẹ iJehova. (Ps. 73:28) Bhi ọsi ijiẹmhin, ahamiẹn emhin ribhi uhọnmhọn-ọta nin bha zilo ọle nọn tẹmhọn ikpẹ nọnsi Jehova, la uwẹ miẹn emhin bhi Baibo nọn tẹmhọn oyẹẹ, ẹwanlẹn, ahu, bi uwedẹ nọn gbale nin Jehova rẹ lu emhin, tẹmhọn ọlẹn man ọne ọria. Uwẹ ha yẹ rẹkpa ọle lẹn ghe, ọnan deba ebezẹle nin uwẹ da hoẹmhọn iJehova nin Aba mhan. Emhin ọbhebhe yẹ ribhọ nọn khẹke nin eria nin mhan man ọle iBaibo lu nin ele da sabọ lu re alo yẹ mianmẹn.
TIE ỌLE VAE BHI IKOLO OGA
Hẹi ria ẹghe a rẹ tie ọne uwẹ man ọle iBaibo vae bhi ikolo oga (Fẹ uduọle 14 bi 15 ghe)
14. Be Hebrews 10:24, 25 ha rẹ rẹkpa ọria nin mhan man ọle iBaibo yẹ, nin ọle da sabọ daghe ebezẹle nọn da khẹke nin ọle ha yo ikolo oga?
14 Mhan rebhe guanọ nin eria nin mhan man ele iBaibo lu re alo yẹ mianmẹn. Uwedẹ ọkpa nin mhan ha rẹ lu ọnan hi, mhan ki ha tie ele vae bhi ikolo oga. Ibhio mhan ne manman guẹ ebi a rẹ man ẹbho iBaibo yẹ tale ghe, ẹbho ne kẹ munhẹn ha vae bhi ikolo oga, ele hi ene jẹje lu re alo. (Ps. 111:1) Ibhio mhan eso ki taman eria nin ele man ele iBaibo ghe, ele dẹ miẹn emhin ne bunbun luẹ bhi ikolo oga nin ele ida sabọ miẹn luẹ bhi iluẹmhin Baibo nin ele ko lu. Tie Hebrews 10:24, 25 man ọria nin uwẹ man ọle iBaibo, uwẹ ha yẹ taman ọlẹn elele nin ọle ha miẹn sade ọle vae bhi ikolo oga ẹghe rebhe. Khue ọne ividio natiọle Be Sunu bhi Kindọn Họọ? * man ọne ọria. Rẹkpa ọle daghe ebezẹle nọn da khẹke nin ọle ha yo ikolo oga uzana-uzana.
15. Be imhan ha rẹ sabọ rẹkpa ene imhan man ele iBaibo yẹ nin ele da sabọ ha yo ikolo oga ẹghe rebhe?
15 Be uwẹ ha lu yẹ sade ọria nin uwẹ man ọle iBaibo bha sẹ munhẹn ha yo ikolo oga la sade ọle iyo ikolo oga ẹghe rebhe? Ha re ọyaya taman ọlẹn emhin nin uwẹ luẹle bhi ikolo oga. Ọle ha daghe ebi ikolo oga rẹ ti uwẹ bhọ yẹ, asabọmiẹn ọ ki ha ghọn ọlẹn rẹ deba uwẹ yo. Re Ọne Ọkhẹughe la Ebe Ọsi Ikolo—Unyẹnmhin bi Iwẹnna Oga Nọn Sẹmhan nin mhan ha luẹ bhi ọne uzana nanlẹn. Man ọlẹn eji mhan ha luẹ bhi uzana nọn vade, uwẹ ha nọọn ọlẹn ejela bhọ manman ti ọle bhọ. (1 Cor. 14:24, 25) Bhi ikolo oga, ọle dẹ miẹn ẹbho ne mhọn ikpẹ esili nin ọle ha sabọ re egbe khọkhọ, ne ha yẹ rẹkpa ọle lu re alo nin ọle da sabọ mianmẹn.
16. Be imhan ha rẹ rẹkpa ọria nin mhan man ọle iBaibo yẹ nin ọle da sabọ lu re alo yẹ mianmẹn? Be imhan ha zilo nyan bhi uhọnmhọn-ọta nọn ki sẹ ọle bhi egbe?
16 Be imhan ha rẹ rẹkpa ọria nin mhan man ọle iBaibo yẹ, nin ọle da sabọ lu re alo yẹ mianmẹn? Mhan dẹ sabọ rẹkpa ọle rẹ daghe ebezẹle nin iluẹmhin Baibo nin ọle lu uzana-uzana da yi emhin kpataki, bi ebezẹle nọn da khẹke nin ọle ha muegbe khẹ ọne iluemhin. Ọkhẹke nin mhan yẹ ji ọne ọria lẹn ghe, emhin esili nọn sade ọle nan erọnmhọn ji Jehova ẹdẹ-ẹdẹ, yẹ deba ọle ha mhọn ikolu nọn ziẹnlẹn. Ọ yẹ khẹke nin mhan rẹkpa ọne ọria ha mhọn ọtibhọ rẹ ha yo ikolo oga ẹghe rebhe. (Fẹ ẹkpẹti ghe nọn yọle “ Ebe Khẹke Nin Ọria Nọn Luẹ IBaibo Lu Nin Ọle Da Sabọ Lu Re Alo Yẹ Mianmẹn.” Apapale 12 ọ ye bhi ọne ebe nan) Bhi uhọnmhọn-ọta nọn ki sẹ ọle bhi egbe, mhan dẹ zilo nyan emhin isẹn nekẹle nin mhan ha lu, nin mhan da sabọ rẹkpa ọria nin mhan man ọle iBaibo rẹ sabọ lu re alo yẹ mianmẹn.
ILLO 76 Be Ọ Dia Uwẹ Yẹ Bhi Egbe?
^ udu ọle 5 Ebi a re ọle ta nan rẹ ha man ọria emhin hi, nan rẹ rẹkpa ọria ha ria eria, la lu emhin bhi uwedẹ nọn dikẹ bhi ebi ọle ka rẹ lu ọle khẹ. Matthew 28:19 nọn yi eji uhọnmhọn-ọta ọsi ọne ukpe nan na dagbare, da ji mhan lẹn ghe, emhin nọn khẹke nọn nin mhan rẹ ha man ẹbho iBaibo, yẹ rẹkpa ele mianmẹn beji ele ha da sabọ kiẹn edibo nesi Jesu. Bhi ọne uhọnmhọn-ọta nan bi ọnọn rẹkhan ọlẹn, mhan dẹ luẹ ebi mhan ha rẹ sabọ ha lu re alo yẹ bhi iwẹnna itẹmhọn Osẹnobulua nin mhan lu.
^ udu ọle 2 ỌTA NAN RE OTỌLE MAN NỌNSẸN: Ahamiẹn uwẹ bu ọria ẹghe-ẹghe dọ ha deba ọle zilo ẹmhọn iBaibo, ọnan rẹman ghe uwẹ deba ọne ọria lu iluẹmhin iBaibo. Uwẹ sabọ rẹ ka ọle ba ẹbho nin uwẹ man ele iBaibo ahamiẹn uwẹ sẹ man ọle emhin igba eva, bi sade uwẹ rẹọbhọ ghe ọne ọria muegbe rẹ ha luẹ iBaibo khian.
^ udu ọle 3 Ọne uhọnmhọn-ọta nan yẹ tẹmhọn adia eso ne dagbare bhi uhọnmhọn-ọta nọn yọle “Conducting Progressive Bible Studies,” nan gbẹn dagbare bhi Our Kingdom Ministry ọsi July 2004 rẹ sẹbhi May 2005.
^ udu ọle 9 Ghe ọne ividio nọn yọle, Man Ọria Nin Uwẹ Man Ọlẹn Ibaibo Ebi Arẹ Muegbe Yẹ. Ihuẹnlo enẹn ọne ividio tan sẹ. Guanọ ọlẹn bhi JW Library®, > MEDIA > OUR MEETINGS AND MINISTRY > IMPROVING OUR SKILLS.
^ udu ọle 10 Guanọ ọlẹn bhi EBE NAN GBEN > Ebe bi Brokiọ.
^ udu ọle 14 Bhi JW Library®, ha khian MEDIA > OUR MEETINGS AND MINISTRY > TOOLS FOR THE MINISTRY.
