1. Be ọkhẹke nin Kristiẹn ne mianmẹn fo sẹyẹ ha lu?

UWẸ be sẹ mianmẹn? Ahamiẹn ehe ewanniẹn nọnsẹ, uwẹ wo rẹman ẹbho ukpẹdẹ nin uwẹ mianmẹn ghe, uwẹ mhọn urẹọbhọ da iJehova, ghe uwẹ muegbe rẹ deba agbotu nọnsọle ha ga ọle. * Aharẹmiẹn uwẹ mianmẹn fo, ọ yẹ wo khẹke nin uwẹ ji urẹọbhọ nin uwẹ mhọn da iJehova ha tuẹn okhun. Sẹyẹ, ha ziẹn urẹọbhọ nin uwẹ mhọn ghe, Jehova hi ọnọn dia agbotu nọnsọle ẹlẹnan.

2-3. Uwedẹ nela Jehova rẹ dia agbotu nọnsọle ẹlẹnan?

² Uwedẹ nin Jehova rẹ dia agbotu nọnsọle ẹlẹnan rẹkpa mhan rẹ lẹn unan Ọria nin ọle khin. Ọ yẹ rẹkpa mhan lẹn iho nọnsọle bi adia kẹkẹ nin ọle guanọ nin mhan re obọ rẹkhan. Bha ji mhan zilo nyan ikpẹ ea nesi Jehova nin mhan ha sabọ daghe bhi agbotu nọnsọle.

³ Ọhẹnhẹn, “Osẹnobulua izọn eria.” (Acts 10:34) Oyẹẹ nin Jehova mhọn da mhan zẹle nin ọle da re Ọmọn nọnsọle zọese nin mhan. (1 Tim. 2:6; John 3:16) Jehova noo ẹbho nesọle rẹ wewe ẹmhọn Agbejele nọnsọle man ọrebhe ne guanọ nin ele kaehọ. Bhiriọ, ẹbho ne bunbun ki sabọ miẹn elele bhi izọese nọnsi Jesu. Ọzeva, Osẹnobulua ọsi ọfure, nọn lu emhin rẹkhan emhanmhan, ọle iJehova khin. (1 Cor. 14:​33, 40) Ọle zẹle nin ẹbho nesọle da nyẹnlẹn bhi ọfure yẹ lu emhin rẹkhan emhanmhan bhi oga nin ele ga ọle. Ọzea, Jehova hi Ọman-emhin Nọn Ke Okhun Nẹ. (Isa. 30:​20, 21) Ọnan zẹle nin agbotu nọnsọle da noo iBaibo rẹ man emhin bhi ẹkẹ agbotu bi sade ele tẹmhọn Osẹnobulua. Be iJehova rẹ re ene ikpẹ ea nan man yẹ bhi agbotu ọsi Kristiẹn bhi ore nin ọhẹnhẹn? Be ọle sẹyẹ rẹ re ọle man bhi ẹkẹ agbotu ẹlẹnan nian? Be ẹlinmhin nọn khiale ha rẹ sabọ rẹkpa uwẹ  yẹ, beji uwẹ rẹ ha ga bhi agbotu nọnsi Jehova ẹlẹnan?

4. Beji Acts 1:8 tale, iwẹnna nela Jesu mun nin edibo nesọle? Urẹkpa nela ọle yọle ele dẹ miẹn?

⁴ Bhi ore nin ọhẹnhẹn. Uhọnmhunje nọn re ikhuaẹloghe nin ẹbho, ọle iJesu ha wewe man ẹbho. (Luke 4:43) Ọle da taman edibo nesọle nin ele sẹyẹ ha wewe ọne uhọnmhunje nabhi otọ agbọn rebhe. (Tie Acts 1:8.) Ọkpakinọn, ele ida sabọ tobele lu ọne iwẹnna nan. Bhiriọ, Jesu da ve ive nin ele ghe ẹlinmhin nọn khiale dẹ rẹkpa ele.​—John 14:26; Zech. 4:6.

5-6. Uwedẹ nela ẹlinmhin nọn khiale rẹ rẹkpa edibo nesi Jesu?

⁵ Ẹghe iluemhin ọsi Pentecost bhi ukpe 33 C.E, ọle edibo nesi Jesu rẹ miẹn ẹlinmhin nọn khiale. Ọne ẹlinmhin nọn khiale da rẹkpa ele wo munhẹn ha wewe ẹmhọn Agbejele. Ọ bha sẹ bue gbe nin ele munhẹn, ẹbho ne bunbun da miẹn ọne uhọnmhunje ọbhi egbe. (Acts 2:41; 4:4) Ẹghe nin ẹbho ki rẹ munhẹn ha kpokpo ele, ele da mun udu tẹ Osẹnobulua sẹyẹ ha tẹmhọn ọlẹn. Ele bha ji ofẹn da ha mun ele. Ele da bhii Jehova yọle: “Re ewanniẹn nin ene delilẹn mhan, uwẹ ha yẹ re ahu nin eguọmhandia nesẹ rẹ ha re izebhudu tẹmhọn nọnsẹ.” Bhiriọ, Jehova da re ẹlinmhin nọn khiale nin ele rẹ “ha re izebhudu tẹmhọn [nọnsọle].”​—Acts 4:​18-20, 29, 31.

⁶ Edibo nesi Jesu yẹ ha mhọn ọnọghọ ebhebhe. Bhi ọsi ijiẹmhin, Ebenọnkhiale nin ele ha mhọn ẹghenin bha bun. Ele bha ha mhọn ebe kẹkẹ nan rẹ luẹ iBaibo beji mhan rẹ mhọn ọlẹn ẹlẹnan. Sẹyẹ, ẹbho ne zẹ urolo kẹkẹ ele ha tẹmhọn Osẹnobulua man. Arẹmiẹn ghe ele wo ha miẹn ene ọnọghọ nan, ele da re ebe sẹ ikpe 30 rẹ tẹmhọn Osẹnobulua man ọrebhe ne ha nyẹnlẹn ẹghenin.”​—Col. 1:​6, 23.

7. Be rẹman ghe ibhio mhan ne ha nyẹnlẹn bhi ẹghe ẹdẹlẹ lẹn ebi Jehova guanọ bhi obọ ele? Be ele ki lu yẹ?

⁷ Ẹlẹnan nian. Jehova sẹyẹ wo dia ẹbho nesọle ẹlẹnan nian yẹ re ahu nin ele rẹ ha lu iho nọnsọle. Baibo ọle muegbe rẹ dia ẹbho nesọle. Ẹkẹ iBaibo mhan da lẹn iwẹnna oga nin Jesu lu bhi ọne otọ nan, bi uhi nin ọle gbe nin edibo nesọle ghe nin ele sẹyẹ ha lu iwẹnna nin ọle lu. (Matt. 28:​19, 20) Bhi July 1881, a da gbẹn bhi ebe Ọkhẹughe yọle: “Jehova bha zẹ mhan nin ẹbho ha gẹn mhan la nin mhan da ha khu ọbhi ẹfe. Sokpan, ọle zẹ mhan nin mhan ha noo emhin rebhe nin mhan mhọnlẹn rẹ wewe uhọnmhunje ọsi Agbejele.” Ebe ọkpa nan gbẹn dagbare bhi 1919 natiọle To Whom the Work Is Entrusted da yọle: “Arẹmiẹn ọne iwẹnna wo manman kpọnọ, iwẹnna ọsi Ebeanlẹn mhan nọn, ọle dẹ re ahu nin mhan rẹ lu ọle.” Bii Kristiẹn bhi ore nin ọhẹnhẹn, ene ibhio mhan nan da re egbe rebhe rẹ ha lu ọne iwẹnna nan. Ele da rẹọbhọ ghe, Jehova dẹ re ẹlinmhin nọn khiale nọnsọle rẹ rẹkpa ele rẹ wewe uhọnmhunje ọsi Agbejele man unan ẹbho rebhe. Ẹlẹnan nian yẹ, mhan wo mhọn ọne urẹọbhọ ghe, Jehova dẹ re ẹlinmhin nọn khiale nin mhan rẹ lu iwẹnna nọnsọle.

8-9. Uwedẹ kẹkẹ nela agbotu nọnsi Jehova sẹ rẹ wewe ẹmhọn Osẹnobulua man ẹbho?

⁸ Rẹ sẹbhi ẹlẹnan nian, agbotu nọnsi Jehova sẹ wo noo uwedẹ kẹkẹ rẹ wewe ẹmhọn Agbejele nọnsi Osẹnobulua. Eso bhi ene uwedẹ nan hi, ebe nan printi dagbare, “Photo-Drama of Creation,” fonograf, moto nan muno ispika ọi, radio, intanẹt, bi kọmputa. Ẹlẹnan nian, agbotu nọnsi Jehova yẹ wo zedu ẹmhọn Osẹnobulua diọbhi urolo ne bun gbera ọnikhẹ. Bezẹle nin ele da lu ọnan? Ranmhude, ele guanọ nin ẹbho rebhe sabọ họn ọne uhọnmhunje bhi urolo nọnsele. Ranmhude Jehova izọn ọria soso, ọle da tale ghe a dẹ tẹmhọn ọlẹn “man ọrebhe ne nyẹnlẹn bhi otọ, agbaẹbho rebhe, ulin-uwa rebhe, urolo rebhe, bi ẹbho rebhe.” (Rev. 14:​6, 7) Ọle guanọ nin ẹbho rebhe họn ẹmhọn Agbejele nọnsọle.

 ⁹ Ẹbho eso nyẹnlẹn bhi uwa nan gbe ogbe nẹga. Eria ikẹ sabọ nabhi ene uwa nan dọ miẹn ene nyẹnlẹn bhi enin. Ranmhude ọnan, ọ nọghọ mhan rẹ tẹmhọn Agbejele man ene nyẹnlẹn bhi eje sẹ inian. Ọnan zẹle nin agbotu nọnsi Jehova da zẹ uwedẹ kẹkẹ egbe dagbare, nin mhan rẹ ha tẹmhọn Osẹnobulua man ẹbho bhi ogbakha. Bhiriọ, mhan ki sabọ ha tẹmhọn Osẹnobulua man ene ẹbho nan. Bhi ọsi ijiẹmhin, bhi ukpe 2001, Otu Nọn Sun Oga da re obọ bhọ ghe, nan ha lu itẹmhọn Osẹnobulua nan da re ebe wa bhi agbaẹbho natiọle France. Akizẹbue, ibhio mhan bhi agbaẹbho kẹkẹ da yẹ ha lu iriọ. Ọne uwedẹ nan da wo manman wẹnna. Bhi ukpe 2011, a da dọnmhẹn ọne uwedẹ nan fẹghe bhi eji ẹbho manman ye bhi New York City bhi United States. Bhi ọne ukpe nin, ebe ne bun sẹ bhi 102,129 ọle a ne nin ẹbho. Sẹyẹ, Watchtower bi Awake! ne bun sẹbhi 68,911 ọle a yẹ ne nin ẹbho. Ẹbho ne bun sẹbhi 4,701 ele yọle nan dọ ha man ele iBaibo. Ọnan wo rẹman ghe ẹlinmhin nọn khiale wo ha rẹkpa mhan bhi ọne iwẹnna nan. Ranmhude ọnan, Otu Nọn Sun Oga da re obọ ọbhọ, nan ha noo ọne uwedẹ nan rẹ tẹmhọn Osẹnobulua bhi ọne otọ agbọn nan rebhe.

10. Be imhan ha lu nin mhan da sabọ ha lu re alo bhi iwẹnna itẹmhọn Osẹnobulua?

¹⁰ Ebe khẹke nin uwẹ lu. Bhi ikolo oga, Jehova man mhan ebi mhan ha rẹ ha wewe ẹmhọn nọnsọle yẹ. Dọnmhegbe ha re obọ rẹkhan ebi ọle man uwẹ le. Usun nan yọle nin uwẹ deba ha tẹmhọn Osẹnobulua, ji a miẹn ghe ele uwẹ manman deba tẹmhọn Osẹnobulua. Ene ibhio mhan nin bha ko ribhi usun ọkpa dẹ sabọ man uwẹ ebi a rẹ tẹmhọn Osẹnobulua yẹ, bi ebi a rẹ man ẹbho iBaibo nọnsẹn yẹ. Ijiẹmhin esili nọnsele dẹ sabọ re izebhudu nin uwẹ. Ha ziẹngbe ọnọghọ nin uwẹ hi ki rẹ miẹn bhi itẹmhọn Osẹnobulua. Beji Baibo nin ọne uhọnmhọn-ọta nan diẹn mun tale, ọ iyi ahu nọnsẹmhan mhan rẹ mun iho nọnsi Osẹnobulua sẹ, sokpan, ẹlinmhin nọn khiale nọnsọle, ọle rẹkpa mhan lu ọle. (Zech. 4:6) Mhan mun udu tẹ iJehova ghe ọle dẹ re ahu nin mhan ranmhude iwẹnna nọnsọle nọn.

11. Be otu nọn sun oga bhi ore nin ọhẹnhẹn rẹ wẹnna kaka yẹ nin ọfure da ha ribhi agbotu?

¹¹ Bhi ore nin ọhẹnhẹn. Otu nọn sun oga nọn ha ribhi Jerusalem wo ha wẹnna kaka nin  emhin da ha khian nọnsẹn bhi agbotu, beji a da miẹn ghe ọrebhe ki sabọ ha ga bhi ọfure. (Acts 2:42) Bhi ọsi ijiẹmhin, ẹghe nin ẹmhọn uruẹmhin rẹ si ẹmhọn re bhi ukpe 49 C.E., ẹlinmhin nọn khiale da dia otu nọn sun oga nin ele talọ bhi ọne ẹmhọn. Sade ele bha talọ ọbhi ọne ẹmhọn nan nọn, ọ ha rẹ de idobolo ọbhi iwẹnna itẹmhọn Osẹnobulua nin ele lu. Arẹmiẹn ibhokhan iJew, ọle ẹbho ne ha sun oga ẹghenin khin, ọ iyi ebi a rẹ lu emhin yẹ bhi agbaẹbho nọnsele ele ghe rẹ talọ bhi ọne ẹmhọn nan. Sokpan, ele da re otọ nin ẹlinmhin nọn khiale bi Ọta nọnsi Osẹnobulua da dia ele. (Acts 15:​1, 2, 5-20, 28) Be ki nabhọre? Jehova da wo nan erọnmhọn ọbhi uwedẹ nin ele rẹ talọ bhi ọne ẹmhọn! Bhiriọ, ọfure da ha ribhi agbotu. Ranmhude ọnan, iwẹnna itẹmhọn Osẹnobulua da ha tuẹn okhun.​—Acts 15:​30, 31; 16:​4, 5. 

12. Be rẹman ghe agbotu nọnsi Jehova ẹlẹnan mhọn ọkugbe bhi ẹwẹ ele?

¹² Ẹlẹnan nian. Agbotu nọnsi Jehova wo wẹnna kaka nin emhin da dia nọnsẹn nin ene ga iJehova, bi nin ele da ha nyẹnlẹn bhi ọfure. Ebe natiọle Zion’s Watch Tower and Herald of Christ’s Presence, ọsi November 15, 1895 da ha mhọn uhọnmhọn-ọta nọn yọle, “Decently and in Order.” 1 Corinthians 14:​40, ọle ọne uhọnmhọn-ọta nan diẹn mun. Bhi ọne uhọnmhọn-ọta, a da gbẹn yọle: “Bhi ore nin ọhẹnhẹn, ene etuegbe da wo gbẹn emhin ne bunbun ji agbotu rẹ taman ele uwedẹ nọn diale nin ele ha rẹ ha lu emhin. . . . Emhin ẹwanlẹn nọn nan rẹ ha re obọ rẹkhan emhin rebhe nin Osẹnobulua gbẹn ọbhi otọ nin ọle rẹ dia mhan.” (Rom. 15:4) Bhi ọsi ẹmhọanta, beji Kristiẹn rebhe bhi ore nin ọhẹnhẹn rẹ wo ha lu emhin kugbe, bi uwedẹ nin ele rẹ ha nyẹnlẹn bhi ọfure, iriọ agbotu nọnsi Jehova yẹ dia ẹlẹnan nian. Bhi ọsi ijiẹmhin, aharẹmiẹn uwẹ diọbhi agbaẹbho ọbhebhe, uwẹ lẹnmhin ghe, ebe Ọkhẹughe nan luẹ bhi eji uwẹ na vae, ọle a ha yẹ luẹ bhi enin. Sẹyẹ, uwedẹ ọkpa, ọle a ha yẹ re luẹ ọle. Ranmhude ọnan, ọ ki wo dia uwẹ bhi egbe ghe agbotu nọnsẹ uwẹ sẹyẹ ye. Ẹlinmhin nọn khiale zẹle nin mhan da re inian ribhi ọfure.​—Zeph. 3:9.

13. Ranmhude adia nọn ribhi James 3:​17, inọnta nela ọkhẹke nin mhan nọọn egbe mhan le?

¹³ Ebe khẹke nin uwẹ lu. Jehova guanọ nin ẹbho nesọle rebhe ha ribhi ọfure bi okugbe. (Eph. 4:​1-3) Nọọn egbe ẹ ene inọnta nan:  ‘Uwedẹ nin mẹn rẹ lu emhin be tuẹn ọfure bi okugbe okhun bhi ẹkẹ agbotu? Mẹn be re obọ rẹkhan adia ọsi ene ewanlẹn bhi ẹkẹ agbotu? Ọria nan ha sabọ gba-ẹkẹ ọle mẹn be khin, manman nọn sade mẹn mhọn ihe bhi ẹkẹ agbotu? A be lẹn mẹn ọbhi ọria nọn lu emhin rẹkhan ẹghe, nọn robọkpa ẹbho, nọn yẹ zegbere rẹ rẹkpa bhi agbotu?’ (Tie James 3:17.) Uwẹ ha daghe eji ọ da kẹ uwẹ re, bhii Jehova nin ọle re ẹlinmhin nọn khiale nin uwẹ rẹ lu re alo. Uwẹ ha ji ẹlinmhin nọn khiale ha dia uwẹ bhi uwedẹ nin uwẹ rẹ lu emhin, ibhio ẹ bhi ẹkẹ agbotu ki hoẹmhọn uwẹ yẹ ha re ẹlo nọn ghanlẹn ghe uwẹ.

14. Beji Colossians 1:​9, 10 rẹman, be iJehova rẹ ha man ẹbho nesọle emhin yẹ bhi ore nin ọhẹnhẹn?

¹⁴ Bhi ore nin ọhẹnhẹn. Ọ wo yẹẹ iJehova rẹ ha man ẹbho nesọle emhin. (Ps. 32:8) Ọle guanọ nin ele lẹn ọlẹn, nin ele hoẹmhọn ọlẹn, bi nin ele yẹ ha nyẹnlẹn khian bhi ighegheghe ranmhude ọle hoẹmhọn ele. Mhan ida sabọ lu enan soso sade ọle bha man mhan emhin. (John 17:3) Jehova wo noo agbotu nọnsọle bhi ore nin ọhẹnhẹn rẹ man ẹbho nesọle emhin. (Tie Colossians 1:​9, 10.) Ẹlinmhin nọn khiale yẹ manman rẹkpa ele beji Jesu ta bhi ive nin ọle ve nin edibo nesọle. (John 14:16) Ẹlinmhin nọn khiale rẹkpa edibo nesi Jesu rẹ lẹn otọ ẹmhọn Osẹnobulua dinmhin. Ọ da yẹ rẹkpa ele yere emhin nin Jesu lu bi ebi ọle ta, bhiriọ, ele da sabọ gbẹn ele ọbhi otọ. Ọne emhin nin ele luẹle, da wo mun urẹọbhọ nọnsele zeze. Sẹyẹ, ọ da yẹ ziẹn oyẹẹ nin ele mhọn da Osẹnobulua, Ọmọn nọnsọle, bi ibhio ele nin ele ko ga.

15. Uwedẹ nela uwẹ sẹ rẹ daghe ebi Jehova rẹ mun ọta akhasẹ nọn ribhi Isaiah 2:​2, 3 sẹ ẹlẹnan?

¹⁵ Ẹlẹnan nian. Jehova tale ghe, bhi ẹghe ọkike, ẹbho bhi agbaẹbho rebhe dẹ ha vẹ vae bhi agbotu nọnsọle nin ọle da man ele emhin. (Tie Isaiah 2:​2, 3.) Ọne akhasẹ nin yẹ wo munsẹ ẹlẹnan nian. Oga ẹmhọanta wo dọ khua okhun gbera oga ohoghe. Jehova wo gene re ebale oriọn nin mhan le ẹlẹnan! (Isa. 25:6)  “Ọguọmhandia nọn mhọn ẹwanlẹn nan gba-ẹkẹ ọle,” ọle iJehova noo rẹ ọne ebale oriọn nin mhan ẹlẹnan. Uwedẹ kẹkẹ ele rẹ re ọne ebale nin mhan, bọsi, ebe nan gbẹn dagbare, ọta nan rẹman, bi vidio kẹkẹ. (Matt. 24:45) Beji Elihu nin ọmọẹ iJob tale, mhan dẹ yẹ sabọ tale ẹlẹnan yọle: “Ọman-emhin soso iribhọ nọn diabe [Osẹnobulua].”​—Job 36:22.

16. Be uwẹ ha lu yẹ nin uwẹ da sabọ miẹn elele bhi ebi Jehova man uwẹ le?

¹⁶ Ebe khẹke nin uwẹ lu. Ẹlinmhin nọn khiale dẹ sabọ rẹkpa uwẹ re obọ rẹkhan emhin nin uwẹ tie bhi Baibo. Nan erọnmhọn ji Jehova beji ọkpa bhi ẹbho ne gbẹn ebe iPsalms rẹ bhii Jehova yọle: “Eo Jehova, man mẹn uwedẹ nọnsẹ. Mẹn dẹ khian rẹkhan uwedẹ ẹmhọanta nọnsẹ. Rẹkpa mẹn ha mhọn ọkhọle ọkpa nin mẹn da sabọ ha mun ofẹn elin nọnsẹ.” (Ps. 86:11) Bhiriọ, hẹi zobọ bhọ rẹ ha le ebale oriọn nin Jehova noo iBaibo bi agbotu nọnsọle rẹ re nin mhan. Mhan iwo gheghe guanọ nin mhan lẹn Osẹnobulua, mhan guanọ nin ebi mhan luẹ sẹ mhan otọ ẹkẹ, bi nin mhan yẹ ha re obọ rẹkhan ọlẹn. Ẹlinmhin nọn khiale dẹ rẹkpa mhan lu ọnan. Mhan yẹ guanọ nin mhan re ebi mhan luẹle rẹ ziẹn ibhio mhan udu. (Heb. 10:​24, 25) Bezẹle? Ranmhude, mhan rebhe diabe ibhio ne ko ribhi azagba-uwa ọkpa. Bhii Jehova nin ọle re ẹlinmhin nọn khiale rẹ rẹkpa uwẹ, nin uwẹ da sabọ ha re ewanniẹn nọn gbalẹ ọbhi inọnta bhi ikolo, bi nin uwẹ da sabọ ha rẹ ọta man nọnsẹn bhi ikolo rẹ ziẹn ibhio mhan udu. Bhiriọ, uwẹ ki sabọ rẹman iJehova bi Jesu ghe, uwẹ hoẹmhọn ẹbho nọnsele.​—John 21:​15-17.

17. Be uwẹ ha rẹ deba ha tuẹn ọfure bi okugbe nọn ribhi agbotu nọnsi Jehova okhun yẹ?

¹⁷ Bhi ẹghe nọn bha yẹ ree gbe nian, agbotu nọnsi Jehova ọkpa ha ki ha ribhi ọne otọ nan. Bhiriọ, ha re ọkhọle rebhe lu rẹkhan adia nin agbotu nọnsi Jehova ze ọle egbe dagbare. Ha re egbe khọkhọ Osẹnobulua nọnsẹmhan nọn izọn ọria soso beji uwẹ ha rẹ ha wewe ẹmhọn ọlẹn man ọrebhe nin uwẹ miẹn. Beji Osẹnobulua rẹ lu emhin rẹkhan emhanmhan yẹ hoẹmhọn ọfure, ha re obọ rẹkhan emhanmhan bhi ẹkẹ agbotu, nin uwẹ da ha tuẹn ọfure bi okugbe nọn ribhi ẹkẹ ọle okhun. Ha le ene ebale ọriọn nin Jehova rẹ nin mhan. Bhiriọ, ẹghe nin ọne agbọn Esu nan ha rẹ kpẹn, ofẹn ida ha mun uwẹ. Uwẹ ki sabọ re izebhudu deba ẹbho nesi Jehova mundia.