Bhi ọne uhọnmhọn-ọta nin, mhan da luẹ ghe, ẹmhọn kpataki ọkpa, ọle ribhọ nọn rẹso ọrebhe: ọne ẹmhọn hi, nan rẹ kpe elin nọnsi Jehova khia. Sẹyẹ, ẹkẹ ọne ẹmhọn kpataki, ọle ẹmhọn ugbẹloghe nọnsi Jehova yẹ ye, bi ẹmhọn asun-rẹkhan nin mhan mhọn da Jehova.

Bezẹle nin mhan ki da yọle ghe ẹmhọn elin nọnsi Jehova, bi ebi a ha rẹ kpe ọle khia yẹ, ọle ẹmhọn kpataki nọn ribhi otọ? Bha ji mhan fẹ emhin ea ghe.

Ọhẹnhẹn, elin nọnsi Jehova, la ọria nin ọle gene khin, ọle Esu sun ọle odan bhi ogba ọsi Idẹn. Inọnta nin Esu nọọn Ivi le da re Jehova diabe Osẹ nọn izẹ emhin bhi obọ, nọn yẹ ne uhi ne bha lẹkhẹ nan rẹ re obọ rẹkhan nin eria nin ọle gbẹloghe. Esu da fi ebi Jehova ta denọ. Inian ọ diabe ọle yọle ghe ọbhahoghe Osẹnobulua khin, bhiriọ ọle da riia Jehova elin an. Ọle ki da dọ ha yi “Ojuu,” nin Ebo tiọle Devil, nọn mundia nin ọnọn bhahoghe rẹ riia ọria elin an. (John 8:44) Ranmhude Ivi rẹọbhi ebi Esu tale, ọle da gbobọrauhi nọnsi Osẹnobulua a, bhiriọ, ọle da sọtẹ da ugbẹloghe nọnsọle. (Gen. 3:1-6) Rẹ dọ sẹbhi ẹlẹnan, Esu yẹ wo ha riia elin nọnsi Osẹnobulua a, yẹ bhahoghe rẹji unan ọria nin Jehova gene khin. Ẹbho ne re ehọ ọbhi ene ohoghe nan kẹ wo mhọn akan-ehọ da Jehova. Bhiriọ, rẹji ẹbho nesi Osẹnobulua, elin nọnsi Jehova nọn khiale nan riia, ọle ẹmhọn kpataki nọn ribhi otọ. Ọnan emhin nọn manman zẹ nin iloya bi emhin ebe da vuọn ọne agbọn nan ẹlẹnan.

Ọzeva, ranmhude Jehova guanọ nin emhin ha mhẹn nin emhin rebhe nin ọle man, ọle muegbe nin ọle kpe elin nọnsọle khia bhi itọn rebhe nan rẹ sin ọlẹn. Ọnan hi emhin nọn manman lu uhọnmhọn-emhin nẹ nọn rẹtẹ Jehova. Ọle da yọle: “Mẹn dẹ kpe elin nọn khua nọnsẹmhẹn khia.” (Ezek. 36:23) Jesu da yẹ tẹmhọn ebi ọkhẹke nin ene ga Osẹnobulua mun kalo bhi erọnmhọn nọnsele bhi ẹghe nin ọle rẹ yọle: “Ji elin nọnsẹ kpe khia.” (Matt. 6:9) Baibo yẹ wo tale igba ne bunbun ebi ọ lu uhọnmhọn emhin sẹ yẹ, nin mhan rẹ ha re ogẹn ji elin nọnsi Jehova. Bha ji mhan fẹ ijiẹmhin eso ghe: “Re ogẹn nọn khẹke elin nọnsi Jehova nanlẹn.” (1 Chron. 16:29; Ps. 96:8) “So illo rẹ gẹn elin nọn khua nọnsọle.” (Ps. 66:2) “Imẹn dẹ re uyi nin elin nọnsẹ rẹ sẹbhi ighegheghe.” (Ps. 86:12) Ọkpa bhi ẹghe nin Jehova rẹ tobọle na bhi okhun talọ da ha yi ọnọn sunu bhi uwa oga bhi Jerusalẹm, bhi eji Jesu da yọle: “Aba, re ogẹn ji elin nọnsẹ.” Jehova ki da wanniẹn ọlẹn yọle: “Mẹn ka gẹn ọlẹn, mẹn dẹ yẹ kie gẹn ọlẹn.”—John 12:28. a

Ọzea, iho nọnsi Jehova diẹn mun elin nọnsọle, la unan ọria nin ọle khin. Bha ji mhan fẹ ọnan ghe: Be ki da sunu sade ikpe ulin nin Jesu ha rẹ gbẹloghe sotọ, sẹyẹ edọnmhẹn nọn kike gbera? Be elin nọnsi Jehova ha dia ẹhi ne ribhi okhun, bi eria bhi ọne otọ nan egbe yẹ? Nin mhan da sabọ re ewanniẹn ọbhi ọne inọnta nan, bha ji mhan fẹ emhin eva  ghe ne rẹtẹ elin nọnsi Jehova. Ọhẹnhẹn, asun-rẹkhan nin eria mhọn, bi ọzeva, ahu nin Jehova mhọn nin ọle rẹ ha gbẹloghe. Ọ dẹ be yẹ ha nọghọ ẹbho ne mọn da ga Jehova rẹ ha sun rẹkhan ọlẹn ẹghenin? Eye. Ranmhude ẹghenin, ọ ki dẹ gba nin ele, sẹyẹ a ki dọnmhẹn ele fo. Iẹnlẹn ọsi ighegheghe ele ki da ha mhọn. Ene ẹhi bi eria dẹ be sẹyẹ ha tẹmhọn ọnọn khẹke nọn ha gbẹloghe? Eye. Ranmhude ọ ki dọ khia bhi ẹlo a ghe, Jehova hi ọnọn khẹke nọn ha gbẹloghe, sẹyẹ ugbẹloghe nọnsọle mhẹn nẹ. Ọkpakinọn, elin nọnsi Jehova kii?

Bhi ẹghenin, a ki kpe elin nọnsi Jehova khia bhi ohoghe rebhe nan rẹ sin ọlẹn. Elin nọnsi Jehova dẹ ha yi emhin nọn sẹyẹ lu uhọnmhọn-emhin nẹ rẹji ẹhi nesọle bhi okhun bi eguọmhandia nesọle bhi ọne otọ nan. Bezẹle? Ranmhude ẹlo ele dẹ sẹbhi ebi Jehova ha rẹ ha lu emhin ọhan-ilo kikẹ yẹ. Fẹ ọnan ghe: Ranmhude Jesu dẹ kie mun ọne ugbẹloghe fikie nin Jehova, Osẹnobulua dẹ ha “yi emhin rebhe rẹji ọrebhe.” (1 Cor. 15:28) Ẹghenin, eria rebhe bhi otọ nan ki ha mhọn “isẹhoa nọn mhẹn an nin imọn nesi Osẹnobulua mhọnlẹn.” (Rom. 8:21) Sẹyẹ, Jehova ki mun iho nọnsọle sẹ sẹsẹsẹ, nin ọle rẹ ku emhin rebhe ne ribhi okhun bi ọne otọ nan kugbe bọsi azagba-uwa ọkpa.—Eph. 1:10.

Ene emhin nan rebhe ha sunu fo, be emhin ha dia azagba-uwa nọnsi Jehova bhi okhun bi bhi ọne otọ nan bhi egbe yẹ? Edandan iribhọ ghe, mhan rebhe ki wo manman ha mhọn ọne ọhubhudu nin mhan rẹ ha gẹn elin nọnsi Jehova khian. Jehova da rẹkpa Devid nin Ojie rẹ gbẹn yọle: “Ji a gẹn Osẹnobulua nin Jehova . . . Ji a gẹn elin nọn khua nọnsọle rẹ sẹbhi ighegheghe.” (Ps. 72:18, 19) Mhan rebhe dẹ miẹn emhin ọgbọn nọn ha re mhan ha lu ọnan rẹ dọ sẹbhi ighegheghe.

Bhi ọsi ẹmhọanta, elin nọnsi Jehova mundia nin emhin rebhe ne rẹtẹ ọle. Elin nọnsi Jehova manman ye mhan ele re oyẹẹ nin ọle mhọn da mhan. (1 John 4:8) Mhan dẹ wo ha yere ghe, oyẹẹ nin ọle mhọn da mhan zẹle nin ọle da man mhan. Ọle zẹle nin ọle da je Jesu re nin ọle dọ yu nin mhan. Uwedẹ oyẹẹ ọle rẹ gbẹloghe, sẹyẹ ọ gbamhin. Rẹ deba ọnin, mhan dẹ wo ha daghe ebi Jehova ha rẹ sẹyẹ ha re oyẹẹ man mhan khian. Ọ dẹ wo ha yẹẹ mhan rẹ ha sikẹ Aba mhan nọn ribhi okhun rẹ dọ sẹbhi ighegheghe, yẹ ha gẹn elin nọnsọle nọn khiale.—Ps. 73:28.