UHỌNMHỌN-ỌTA NỌNZI 35
ILLO 123 Ha Re Obọ Rẹkhan Adia Nin Jehova Rẹ Nin Mhan
Ebi Ene Ewanlẹn Ha Rẹ Sabọ Rẹkpa Eria Nan Re Sibhi Agbotu Re Yẹ
“Eghọnghọn nọn da ha ribhi okhun ranmhude ọluemhiebe ọkpa nọn fidenọ, dẹ kpọnọ gbera eghọnghọn nan ha ghọnghọn nin itue ọkpa iribhi iyisẹn ne khiale ne bha miẹn ebi ele lu nọn ha re ele fidenọ.”—LUK 15:7.
EBI A HA LUẸ BHỌ
Mhan dẹ zilo nyan ebezẹle nọn da khẹke nan ne eria ne lu emhin ebe sibhi agbotu re, bi ebi ene ewanlẹn ha rẹ sabọ rẹkpa eria ne sẹriọ rẹ fidenọ nin ele da kie sabọ deba Jehova ha mhọn ikolu nọn ziẹn.
1-2. (a) Ẹlo nela Jehova rẹ ghe eria ne lu emhin ebe ne bha ka fidenọ? (b) Emhin nela Jehova ho nin eria olukhọ lu?
Ọ I YI uwedẹ rebhe nin ọria rẹ nyẹnlẹn yẹẹ Jehova, ọle wo he emhin ebe. (Ps. 5:4-6) Jehova guanọ nin mhan re obọ rẹkhan uhi nesọle ne ribhi Baibo. Ọrẹyiriọ, Jehova lẹn ghe ọ bha gba nin mhan fo, ghe mhan dẹ dobọ ẹgheso. (Ps. 130:3, 4) Ọkpakinọn, ọle bha hoẹmhọn ‘eria olukhọ ne re ifuẹkẹ nọnsọle kiẹn emhin nọn re otọ nin ele rẹ ha lu ilọnmhọn okan.’ (Jud 4) Bhi ọsi ẹmhọanta, Baibo ji mhan lẹn ghe Jehova dẹ fuẹn eria olukhọ a bhi ọkhọn ọsi Amagẹdọn.—2 Pita 3:7; Arẹ.16:16.
2 Jehova i guanọ nin ọria soso miẹn ugbekhuelo. Beji mhan ka zilo ọle bhi uhọnmhọn-ọta ne gbera, Baibo da yọle ghe, “ọle guanọ nin ẹbho rebhe fidenọ.” (2 Pita 3:9) Ene ewanlẹn bhi agbotu re egbe khọkhọ Jehova bhi uwedẹ nin ele rẹ re iziẹngbe rẹkpa ẹbho ne lu emhin ebe nọn kaka rẹ fidenọ, yẹ fikie bu Jehova re. Ẹgheso, ọ i yi ọrebhe ne lu emhin ebe ka fidenọ. (Isa. 6:9) Arẹmiẹn ghe ene ewanlẹn dọnmhegbe nin ele rẹ rẹkpa eria ne sẹriọ rẹ fidenọ, ele sẹ yẹ wo ha lu ọne emhin ebe. Bhi idia nọn sẹnian, be ọkhẹke nin ene ewanlẹn lu?
BHA RE ỌRIA EBE SIBHI ẸWẸ BHA RE
3. (a) Be Baibo yọle nan khian eria ne bha ka fidenọ yẹ? (b) Bezẹle nin mhan ha da sabọ yọle ghe, ọne ọria nọn lu emhin ebe tobọle zẹ nan re ọle sibhi agbotu re?
3 Ahamiẹn ọria nọn lu emhin ebe bha ka fidenọ, ene ewanlẹn ki re obọ rẹkhan adia nọn ribhi 1 Kọrint 5:13 nọn yọle: ‘Bha re ọria ebe sibhi ẹwẹ bha re.’ Bhi ọsi ẹmhọanta, ọle si amẹn nọn gba ọle egbe. Ebi ọle kọ ọle rọ. (Gal. 6:7) Bezẹle nin mhan da ta iriọ? Ranmhude ọle bha ka miẹn urẹkpa nin ene ewanlẹn re nanlẹn ọbhi egbe. (2 Ki. 17:12-15) Uwedẹ nin ọle rẹ ha lu emhin wo rẹman ghe, ọle bha ho nin ọle re obọ rẹkhan uhi nesi Jehova.—Deut. 30:19, 20.
4. Bezẹle nan da ji agbotu lẹn ghe a re ọria nọn bha ka fidenọ sibhi agbotu re?
4 Ahamiẹn a re ọria nọn bha ka fidenọ sibhi agbotu re, a ki ji agbotu lẹn ghe ọne ọria i yẹ yi ọkpa bhi Esali Jehova. a Ọ i yi nan rẹ re ẹkhọle lu ọne ọria zẹle nan da taman agbotu, sokpan, a lu ọnan beji ọrebhe ha da sabọ re obọ rẹkhan adia nọn ribhi Baibo nọn yọle, nin mhan hẹi yẹ deba ọne ọria “ha muobọ,” bi nin mhan bhọ “hẹi deba ọria nọn sẹ iriọ le ebale.” (1 Kọr. 5:9-11) Emhin esili zẹle nin Jehova da gbe ọne uhi nan. Pọl nin odibo da gbẹn yọle: “Obhi yisti khere, ọle re ibrẹd huẹ.” (1 Kọr. 5:6) Ahamiẹn ghe a bha re ọria nọn lu emhin ebe nọn bha ka fidenọ sibhi agbotu re, eria eso bhi agbotu sabọ ha riale ghe ọ bha khẹke nan ha re obọ rẹkhan uhi nọnsi Jehova.—Prov. 13:20; 1 Kọr. 15:33.
5. Be ọkhẹke nin mhan rẹ ha nin ọria nan re sibhi agbotu re lu emhin yẹ? Bezẹle?
5 Ẹlo nela ọkhẹke nin mhan rẹ ha ghe ọria nan re sibhi agbotu re? Ọkhẹke nin mhan lẹn ghe ọsọle bha wo fo sẹsẹsẹ, ghe inian ọle diabe ohuan nọn yulua. Ahamiẹn ohuan sibhi ẹwẹ ihuan re, ọ dẹ yẹ sabọ fikiere. Ọkhẹke nin mhan yere ghe ọne ọria nan nọn yulua, ọle re egbe guẹ nin Jehova. Ọ ba bhi egbe a ghe, bhi ejayenan nian ọle i yẹ nyẹnlẹn bhi uwedẹ nọn ti Jehova bhọ. Okhẹnan khọnan rẹji ọle. (Ezek. 18:31) Ọkpakinọn, beji a miẹn ẹghe sẹ yẹ ribhọ, sẹyẹ Jehova wo muegbe rẹ rẹhunmhan ọlẹn, mhan rẹọbhọ ghe ọle dẹ kie sabọ fikiere. Bhiriọ, be ene ewanlẹn ha rẹ sabọ rẹkpa ọria olukhọ nan re sibhi agbotu re yẹ?
EBI ENE EWANLẸN RẸ RẸKPA ẸBHO NAN NE SIBHI AGBOTU RE YẸ
6. Emhin nela ene ewanlẹn ha lu nin ele rẹ rẹkpa ọria nan re sibhi agbotu re?
6 Ahamiẹn a re ọria sibhi agbotu re, ene ewanlẹn be zobọ bhọ rẹ ha rẹkpa ọne oria rẹ fikie bu Jehova re? Eye! Ahamiẹn ene ewanlẹn dọ taman ọria nọn lu emhin ebe ghe a dẹ re ọle sibhi agbotu re, ele ki yẹ taman ọlẹn ebi ọle ha lu nin ọle rẹ sabọ fikiere. Ene ewanlẹn bhọ sẹyẹ lu gbera ọnin. Bhi idia eso, ele ki taman ọne ọria ghe, ọ dẹ yẹẹ ele rẹ kie dọ miẹn ọlẹn sade uki eso gbera nin ele rẹ lẹn si ọle ki fidenọ. Ahamiẹn ọne ọria ka nin ọle rẹ miẹn ene ewanlẹn sade uki eso ki gbera, ene ewanlẹn ki re ibhude nanlẹn nọn ha rẹkpa ọle rẹ fidenọ. Ahamiẹn ọne ọria bha fidenọ bhi ọne ẹghe nan, ene ewanlẹn ki mhanmhanlẹn rẹ kie dọ miẹn ọlẹn bhi ẹghe ọbhebhe beji ele ha da sabọ rẹkpa ọle rẹ fidenọ.
7. Be ene ewanlẹn rẹ re egbe khọkhọ Jehova bhi uwedẹ nin ọle rẹ re ẹkẹ-ẹjẹjẹ man sade ele ne ọria nan re sibhi agbotu re lu emhin? (Jeremiah 3:12)
7 Ene ewanlẹn dọnmhegbe rẹ re egbe khọkhọ Jehova bhi uwedẹ nin ọle rẹ re ẹkẹ-ẹjẹjẹ man sade ele ne eria nan ne sibhi agbotu re lu emhin. Bhi ọsi ijiẹmhin, Jehova bha ha khẹ ibhokhan Izrẹl bhi ẹghe ẹdẹlẹ nin ele tobele fidenọ ọkuẹsẹ ọle rẹkpa ele. Sokpan, ọle da je akhasẹ nesọle bu ele re rẹ rẹkpa ele ọkuẹsẹ ele munhẹn dọ ha fidenọ. Beji a zilo ọle bhi uhọnmhọn-ọta nọnzi eva bhi ọne ebe ọkhẹughe nan, Jehova da taman Hosia nin akhasẹ nọn rẹhunmhan okhuo ọle yẹ re ọle fikiere, arẹmiẹn ọle sẹyẹ wo lu ọne emhin ebe nin ọle lu. Jehova da re ọnan man ẹbho nesọle ghe, ọle manman mhọn ẹkẹ-ẹjẹjẹ. (Hos. 3:1; Mal. 3:7) Bọsi Jehova, ene ewanlẹn gene wo guanọ nin eria ne lu emhin ebe fikie vae bhi agbotu, sẹyẹ ele i re ọle nọghọ ele rẹ lu iriọ.—Tie Jeremiah 3:12.
8. Be okha ọsi ọmọn nọn fuẹn uku nin Jesu tẹmhọnlẹn rẹ rẹkpa mhan rẹ daghe ebi Jehova rẹ re ẹkẹ-ẹjẹjẹ bi itohan man yẹ? (Luk 15:7)
8 Yere ebi ọne aba rẹ ne ọmọn nọnsọle lu emhin yẹ, bhi okha ọsi ọmọn nọn fuẹn uku nin mhan zilo ọle bhi uhọnmhọn-ọta nọnzi eva bhi ọne ọkhẹughe nan. Beji ọne aba daghe ọle ghe ọne ọmọn nọnsọle fikie vade uwa, “ọle da runẹ bu ọle dọ mun ọlẹn dede, yẹ re unun fiofio ọle.” (Luk 15:20) Gbẹlokotọ bhọ ghe ọne aba bha mundia ha khẹ nin ọmọn nọnsọle dọ bhii ọle ọkuẹsẹ ọle rẹhunmhan ọlẹn. Sokpan, ọle tobọle bu ọle, beji aba nọn hi ki rẹ khin nọn mhọn oyẹẹ ha lu. Iriọ ene ewanlẹn yẹ rẹ ne eria nan ne sibhi agbotu re lu emhin. Ele guanọ nin ene ihuan nan ne rẹ yulua fikie vae. (Luk 15:22-24, 32) Ọrebhe bhi okhun manman wo ghọnghọn sade ọluemhiebe fidenọ, iriọ ọrebhe bhi agbotu yẹ rẹ ghọnghọn!—Tie Luk 15:7.
9. Be Jehova guanọ nin eria ne lu emhin ebe lu?
9 Beji mhan sẹ zilo ọle, mhan dọ kẹre ghe Jehova bha guanọ nan re otọ nin eria ne bha ka fidenọ rẹ sẹ yẹ ha ribhi agbotu. Ọrẹyiriọ, ọle bha fikeke gbe ele. Ọle guanọ nin ele fikiere. Ẹmhọn ne ribhi Hosea 14:4 re ọkhọle nin Jehova mhọn da eria ne fidenọ man, bhi enin Jehova da yọle: “Mhẹn dẹ hinmhin ele bhi olukhọ nọnsele. Mhẹn dẹ tobọmhẹn zẹ nin rẹ hoẹmhọn ele. Ranmhude ẹkẹ ọle iyẹ khọ mhẹn.” Ranmhude ene ewanlẹn lẹn ọnan rẹji Jehova, ele gbẹlokotọ bhi emhin nọn hi ki rẹ khin nin ọria lu nọn rẹman ghe ọle munhẹn ha fidenọ. Sẹyẹ, ene ẹmhọn nan dẹ rẹkpa ọria nọn hi ki rẹ khin nọn zẹ Jehova obọ rẹ lẹn ghe, Jehova yẹ wo hoẹmhọn ọlẹn, ọle yẹ ho nin ele fikie bu ọle re.
10-11. Be ene ewanlẹn ha rẹ rẹkpa eria nọn rele nan re ele sibhi agbotu re yẹ?
10 Eria nan ne sibhi agbotu re bhi ikpe ne bunbun ne gbera kii? Asabọmiẹn eria ne sẹnian bhọ i yẹ lu ọne emhin ebe nọn zẹle nan da ne ele sibhi agbotu re. Sẹyẹ, asabọmiẹn eso bhọ bha yẹ yere emhin ebe nọn zẹle nan da ne ele sibhi agbotu re. Ọnọn hi ki rẹ khin bhi ẹwẹ ele, ọkhẹke nin ene ewanlẹn dọ guanọ eji ene eria nan ye, yẹ rẹnẹ ji ele. Ele ha rẹnẹ ji ele, ene ewanlẹn ki deba ele nan erọnmhọn yẹ taman ele nin ele fikie vae bhi agbotu. Edandan i ribhọ ghe ọ dẹ khẹke nin ọle luẹ ẹmhọn Jehova bi ẹmhọanta ne ribhi Baibo sade ọ rele nin ọle zobọ bhọ rẹ ha vae bhi ikolo oga. Bhiriọ, ahamiẹn ọle yọle ghe ọle guanọ nin ọle fikiere agbotu, ene ewanlẹn sabọ rẹ mhanmhanlẹn nin ọria rẹ dọ ha man ọlẹn Baibo arẹmiẹn a bha sẹ re ọle fikiere. Ene ewanlẹn hi ene ha mhanmhanlẹn nan rẹ ha man eria ne sẹnian Baibo.
11 Ene ewanlẹn dọnmhegbe rẹ ha re egbe khọkhọ Jehova bhi uwedẹ nin ọle rẹ re ẹkẹ-ẹjẹjẹ man. Bhiriọ, ele dọnmhegbe rẹ guanọ ọrebhe ne zẹ Jehova obọ, yẹ rẹkpa ele rẹ sabọ fikie bu ọle. Ahamiẹn ọria nọn lu emhin ebe rẹman ghe ọle fidenọ, a i da riia ẹghe a rẹ re ọle fikiere agbotu.—2 Kọr. 2:6-8.
12. (a) Idia eso nela ọ da khẹke nin ene ewanlẹn da manman gbẹlokotọ? (b) Bezẹle nin ọ bha da khẹke nin mhan ha riale ghe, Jehova i da mhọn itohan da eria eso ranmhude emhin ebe nin ele lu? (Yẹ fẹ ebi a gbẹn ọbhi otọle ghe.)
12 Bhi idia eso, ọ dẹ khẹke nin ene ewanlẹn fẹ ọle ghe nọnsẹn si ọne ọria gene fidenọ ọkuẹsẹ ele re ọle fikiere agbotu. Bhi ọsi ijiẹmhin, ahamiẹn ọne ọria mun obhokhan ho, ha ne obọ ọbhi ilọnmhọn oga ohoghe, la ha ho nin ọle re uwedẹ eku rẹ kpẹn ibọdọ bi ireokhuo nọnsọle, ene ewanlẹn ki gbẹlokotọ nin ele rẹ lẹn si ọne ọria gene fidenọ. (Mal. 2:14; 2 Tim. 3:6) Ọkhẹke nin ene ewanlẹn ha gbega ibhio ele bhi agbotu. Ọrẹyiriọ, ọkhẹke nin mhan yere ghe Jehova dẹ miẹn ọria nọn hi ki rẹ khin ọbhi egbe sade ọ gene fidenọ bhi emhin ebe nin ọle lu. Arẹmiẹn ọkhẹke nin ene ewanlẹn manman gbẹlokotọ nin ele rẹ lẹn si ọria nọn manman lu ẹbho ebhebhe khọlọ gene fidenọ, ọ bha khẹke nin ele ha riale ghe Osẹnobulua i da sabọ mhọn itohan da ọria nọn sẹriọ. b—1 Pita 2:10.
EBI IBHIO MHAN BHI AGBOTU HA LU
13. Ikẹkẹ nela ribhi uwedẹ nin mhan rẹ nin ọria nan da ọle obọ i bhi agbotu lu emhin bi ọria nan re sibhi agbotu re?
13 Beji mhan zilo ọle bhi uhọnmhọn-ọta nọn gbera, ẹgheso, mhan họn a tale bhi agbotu ghe a da obhio mhan obọ i bhi emhin eso. Ọnan ha sunu, mhan dẹ yẹ sabọ ne ọne ọria ha muobọ, ranmhude mhan lẹn ghe ọle fidenọ bhi emhin ebe nin ọle lu. (1 Tim. 5:20) Obhio mhan ọle sẹ yẹ khin, sẹyẹ ọkhẹke nan ha re ikoudure nanlẹn beji ọle ha da sabọ ha lu emhin ne mhẹn. (Hib. 10:24, 25) Ọkpakinọn, ọnan wo dikẹ bhi idia ọsi ọria nan re sibhi agbotu re. Mhan ki zobọ bhọ rẹ deba ọle “ha muobọ,” mhan bhọ i “deba ọria nọn sẹ iriọ le ebale.”—1 Kọr. 5:11.
14. Be ibhio mhan ha rẹ sabọ noo ebi ele luẹ bhi Baibo rẹ zẹ ebi ele ha lu yẹ sade ele ne ọria nan re sibhi agbotu re lu emhin? (Yẹ fẹ ifoto ghe.)
14 Ene emhin nan nin mhan sẹ zilo ọle be rẹman ghe mhan dẹ wo fikeke gbe ọria nan re sibhi agbotu re? Eye. Bhi ọsi ẹmhọanta, mhan i da deba ọle ha muobọ. Ọkpakinọn, Kristiẹn dẹ sabọ noo ebi ọle luẹ bhi Baibo rẹ tobọle zẹ si ọle dẹ tie ọria nan re sibhi agbotu re vae bhi ikolo oga. Asabomiẹn ọria bhi azagba-uwa nọnsele ọne ọria nan re sibhi agbotu re khin, la imọẹ ele ko ka ha khin ọkuẹsẹ a re ọle sibhi agbotu re. Be mhan ha rẹ ne ọne ọria lu emhin yẹ sade ọ gene vae? Bhi ẹghe nin khẹ, mhan i da tuẹ ọria nọn sẹriọ. Ọkpakinọn bhi ejayenan nian, ọdeọde ha tobọle noo ebi ọle luẹ bhi Baibo rẹ zẹ ebi ọle ha lu yẹ bhi ọne ẹmhọn nan. Eso sabọ rẹ zẹ nin ele rẹ tuẹ ọne ọria la gbe obokhian nanlẹn sade ọle vae bhi ikolo oga. Ọrẹyiriọ, ọ bha khẹke nin mhan dọ nanlẹn ha gbido, la nanlẹn ha muobọ.
Kristiẹn dẹ sabọ noo ebi ọle luẹ bhi Baibo rẹ tobọle zẹ si ọle dẹ tie ọria nan re sibhi agbotu re vae bhi ikolo oga, la si ọle dẹ tuẹ ọle sade ọle vae bhi ikolo oga (Fẹ uduọle nọnzi 14 ghe)
15. Unan emhin ebe nela a tẹmhọnlẹn bhi 2 Jọni 9-11? (Yẹ fẹ ọne ẹkpẹti nọn yọle, “ Unan Emhin Ebe Ọkpa Jọni Bi Pọl Be Ha Tẹmhọnlẹn?”)
15 Ẹbho eso sabọ ha riale, ‘Baibo bha be yọle ghe, Kristiẹn nọn tuẹ ọria nọn sẹriọ deba ọle gha bhi olukhọ nọnsọle?’ (Tie 2 Jọni 9-11.) Ebi a ta nẹga ene ulọnlẹn nan bhi Baibo rẹman ghe eria ne de sibhi oga re, bi ẹbho ne re eria lu emhin ebe a ha tẹmhọnlẹn. (Arẹ. 2:20) Bhiriọ, ahamiẹn ọria dọ ha wewe iman-emhin ọsi eria ne de sibhi oga re, la ha sua ẹbho ọbhọ rẹ ha lu emhin ne bha gba, ene ewanlẹn i da rẹnẹ ji ọle. Ọrẹyiriọ, ọria nọn sẹriọ dẹ yẹ sabọ fidenọ. Ahamiẹn ọria nọn sẹnian bha sẹ fidenọ, mhan i da tuẹ ọle, la tie ọle vae bhi ikolo oga.
RE EGBE KHỌKHỌ JEHOVA BHI UWEDẸ NIN ỌLE RẸ RE ẸKẸ-ẸJẸJẸ BI ITOHAN MAN
16-17. (a) Be Jehova guanọ nin eria ne lu emhin ebe lu? (Ezekiel 18:32) (b) Be ene ewanlẹn ha rẹ sabọ wẹnna rẹkhan Jehova yẹ rẹ rẹkpa eria ne lu olukhọ?
16 Be mhan miẹn luẹ bhi ene uhọnmhọn-ọta isẹn ne ribhi ọne okhẹughe nan? Ọle hi, Jehova bha guanọ nin ọria soso fuẹn an! (Tie Ezekiel 18:32.) Ọle guanọ nin eria olukhọ fikie bu ọle re. (2 Kọr. 5:20) Ọnan zẹle rẹ ne otọ ha de rẹ dọ sẹbhi ẹlẹnan, Jehova da ha taman eria nesọle ne fikeke gbe ọle nin ele fidenọ, yẹ fikie bu ọle re. Udede isẹhoa ene ewanlẹn mhọn rẹ deba Jehova ha wẹnna rẹ rẹkpa eria ne lu olukhọ rẹ sabọ fidenọ.—Rom 2:4; 1 Kọr. 3:9.
17 Ria ẹmhọn ebi ọrebhe ne ribhi okhun rẹ ghọnghọn yẹ sade ọluemhiebe fidenọ! Jehova nin Aba mhan manman wo ghọnghọn bhi ẹghe nọn hi ki rẹ khin nin ọkpa bhi eguọmhandia nesọle nọn rẹ yulua rẹ fikie vae bhi agbotu. Oyẹẹ nin mhan mhọn da Jehova dẹ wo kie manman ha tuẹn okhun beji mhan rẹ ha ria eria nyan ẹkẹ-ẹjẹjẹ, itohan bi ifuẹkẹ nin ọle mhọn.—Luk 1:78.
ILLO 111 Emhin Ne Rẹ Mhan Sọnyẹnmhẹn
a Mhan i yẹ da ha yọle ghe a khu ọria bhi agbotu. Ọne ukpọta Grik nan zedu ọle diọbhi nan rẹ “khu ọria bhi agbotu” bhi 1 Kọrint 5:13 mundia nin nan rẹ “re ọria sibhi agbotu re”. Bhiriọ, mhan ki dẹ ha yọle ghe a re ọria sibhi agbotu re. A dẹ yẹ fi ọne ukpọta denọ bhi 1 Kọrint 5:13 bi 5:2 bhi Ebenọnkhiale Ọsi Agbọn Ọsọgbọn.
b Baibo yọle ghe Jehova i da rẹhunmhan eria eso. Eria ne wo tan ẹlo a ha lu emhin ebe da Osẹnobulua, ne bha yẹ ka fidenọ, ele hi eria nan i da rẹhunmhan. Jehova bi Jesu ọkpa ha sabọ tare unan ọria nan i da sabọ rẹhunmhan.—Mak 3:29; Hib. 10:26, 27.
