UHỌNMHỌN-ỌTA NỌNZI 33
ILLO 130 Ha Rẹhunmhan
Ebi Jehova Guanọ Nin Ọrebhe Bhi Agbotu Rẹ Ha Ne Eria Ne Lu Emhin Ebe Nọn Kaka Lu Emhin Yẹ
“Aharẹmiẹn ọria soso bhi ẹwẹ bha lu emhin ebe, mhan mhọn ọnọn ha rẹkpa mhan.”—1 JỌNI 2:1.
EBI A HA LUẸ BHỌ
Bhi ọne uhọnmhọn-ọta nan, mhan dẹ zilo nyan ẹmhọn ọria ọkpa nọn lu emhin ebe nọn manman kaka bhi agbotu ọsi Kọrint, bi ebi a rẹ re ọne ẹmhọn khian yẹ.
1. Be Jehova guanọ nin ẹbho rebhe lu?
JEHOVA re ọne isẹhoa nin eria rẹ tobele ha zẹ ebi ele ha lu. Ukpẹdẹ-ukpẹdẹ mhan rẹ noo ọne isẹhoa nan sade mhan ho nin mhan zẹ ebi mhan ha lu. Emhin nọn kokhun nẹ nin mhan ha sabọ zẹ rẹ lu hi, nin mhan rẹ re egbe guẹ nin Jehova, yẹ dọ deba ẹbho nesọle ha ga ọle. Jehova guanọ nin ọrebhe lu iriọ. Bezẹle? Ranmhude ọle hoẹmhọn eria, sẹyẹ ọle guanọ ebe ha mhẹn ele bhi egbe. Ọle guanọ nin ele deba ọle ha mhọn ikolu, yẹ ha mhọn ọne isẹhoa rẹ nyẹnlẹn bhi ighegheghe.—Deut. 30:19, 20; Gal. 6:7, 8.
2. Be Jehova guanọ nin eria ne lu emhin ebe lu? (1 Jọni 2:1)
2 Ọrẹyiriọ, Jehova i sua ọria soso ọbhọ rẹ dọ ha ga ọle. Ọle re otọ nin ọdeọde rẹ zẹ ebi ọle ha lu. Ọkpakinọn, be ene ewanlẹn ha lu yẹ sade ọria nọn mianmẹn dọ lu emhin ebe nọn manman kaka? Ahamiẹn ọle bha fidenọ, a ki re ọle sibhi agbotu re. (1 Kọr. 5:13) Ọrẹyiriọ, Jehova sẹyẹ wo re ẹlo ọbhọ ghe ọne ọria dẹ fikie bu ọle re. Ọnan bhọ zẹle nin ọle da je Ọmọn nọnsọle re nọn dọ yu nin mhan, beji ọle ha da sabọ ha re emhin ebe ọsi eria ne fidenọ rẹhunmhan ele. (Tie 1 Jọni 2:1.) Jehova nin Osẹ ọsi oyẹẹ wo guanọ nin eria ne lu olukhọ fidenọ.—Zech. 1:3; Rom 2:4; Jem. 4:8.
3. Be mhan ha zilo nyan bhi ọne uhọnmhọn-ọta nan?
3 Jehova guanọ nin mhan ha re ẹlo nin ọle rẹ ghe emhin ebe rẹ ghe ọle, yẹ ghe eria ne lu olukhọ bhi uwedẹ nin ọle rẹ ghe ele. Ọne uhọnmhọn-ọta nan dẹ zilo nyan ebi mhan ha rẹ sabọ lu iriọ yẹ. Beji uwẹ ha rẹ ha luẹ ọne uhọnmhọn-ọta nan, gbẹlokotọ bhi (1) ebi a rẹ re emhin ọbe nọn kaka nin ọria lu bhi agbotu ọsi Kọrint bhi ẹghe ẹdẹlẹ khian yẹ, (2) ebi Pọl nin odibo taman ene ibhio ele nin ele lu yẹ beji ọne ọria fidenọ, bi (3) ebi ọne okha nan man mhan le rẹji ẹlo nin Jehova rẹ ghe eria ne lu emhin ebe nọn manman kaka.
EBI A RẸ RE EMHIN ỌBE NỌN KAKA NIN ỌRIA LU BHI AGBOTU ỌSI KỌRINT KHIAN YẸ
4. Emhin nela sunu bhi agbotu ọsi Kọrint? (1 Kọrint 5:1, 2)
4 Tie 1 Kọrint 5:1, 2. Ẹghe nin Pọl rẹ yo okhian nọnzi ea nin ọle yo, ọle da hẹnmhọn akhailu nọn ha sunu bhi agbotu nan la mun gbọ bhi Kọrint. Okpea ọkpa bhi ọne agbotu da ha ne okhuo aba ọle nowẹ. Akhailu wo khọnan, sẹyẹ, “ẹbho ne i ga Osẹnobulua bhọ i lu emhin ebe nọn khọ sẹ inian”! Ọne agbotu da ha riale ghe ọ bha dọbe nan rẹ re otọ nanlẹn rẹ sẹyẹ ha ribhi agbotu. Asabọmiẹn eso bhi ẹwẹ ele da ha riale ghe, Jehova ele re inian re egbe khọkhọ bhi uwedẹ nin ọle rẹ mhọn itohan da eria nọn bha gba nan. Ọkpakinọn, Jehova i gbesẹa nin ẹbho nesọle rẹ wo ha lu emhin ebe. Ọne okpea nan da re ọne emhin ebe nan ha riia elin ọsi ọne agbotu a. Ahamiẹn a bha re ọle sibhi agbotu re, eria eso sabọ rẹ munhẹn ha re egbe khọkhọ ọle. Bhiriọ, be Pọl ki taman ene ibhio ele nin ele lu yẹ?
5. Be Pọl taman ene ibhio ọle bhi agbotu nin ele lu? Be ọle re ọnan ta? (1 Kọrint 5:13) (Yẹ fẹ ifoto ghe.)
5 Tie 1 Kọrint 5:13. Jehova da noo Pọl rẹ gbẹn ilẹta ji ọne agbotu rẹ taman ele ghe, nin ele re ọne okpea nọn bha ka fidenọ sibhi agbotu re. Be ọkhẹke nin ene ibhio mhan rẹ ha nin ọle lu emhin yẹ? Pọl da taman ele ghe, nin ele hẹi yẹ deba ọle ha muobọ. Be Pọl re ọnan ta? Ọle da ji ele lẹn ghe, ọkpa bhi ebi ọnan mundia nan hi, nin ele ‘hẹi yẹ deba ọria nọn sẹ iriọ le ebale.’ (1 Kọr. 5:11) Uwẹ bi ọria da ko ha le ebale, ọ dẹ re otọ nin ibha rẹ ko ha ne egbe zilo, sẹyẹ, ọnan dẹ sabọ re ibha munhẹn ko manman ha gbe ẹghe kugbe. Bhiriọ, ebi Pọl ha tẹmhọnlẹn hi, nin ọria soso bhi agbotu hẹi yẹ deba ọne ọria nan ha gbẹghe. Ele bha da deba ọle ha gbẹghe, ele i da dọ ha re egbe khọkhọ ọle bhi emhin nọn i mhẹn nin ọle lu. (1 Kọr. 5:5-7) Sẹyẹ, ọnan dẹ rẹkpa ọne okpea rẹ lẹn ebi emhin nin ọle lu ba Jehova bhi egbe sẹ yẹ, ọ dẹ yẹ re ọle kiọya bhi emhin ebe nin ọle lu, yẹ fidenọ.
Jehova da noo Pọl rẹ gbẹn ilẹta ji agbotu nọn ribhi Kọrint rẹ taman ele ghe, nin ele re ọne okpẹa nọn bha ka fidenọ sibhi agbotu re (Fẹ uduọle nọnzi 5 ghe)
6. Be ilẹta nin Pọl gbẹn ji ọne agbotu rẹ rẹso ele bi ọne ọria nọn lu emhin ebe yẹ?
6 Beji Pọl gbẹn ọne ilẹta nan ji Kristiẹn ne ribhi Kọrint fo, ọle da ha ria ẹmhọn ebi ene ibhio mhan ha rẹ lu emhin yẹ sade ele miẹn ọne ilẹta. Akizẹbue, Taitọs da dọ tẹmhọn eso man Pọl nọn re ọle ha ghọnghọn. Ọle da ji Pọl lẹn ghe ene ibhio mhan wo re obọ rẹkhan adia nọn ribhi ọne ilẹta, yẹ re ọne okpea sibhi agbotu re. (2 Kọr. 7:6, 7) Uki eso ki gbera nan re ọne okpea sibhi agbotu re, ọle da fidenọ. Ọle da fi uwedẹ nin ọle rẹ ha lu emhin denọ, yẹ munhẹn ha re obọ rẹkhan adia nesi Jehova. (2 Kọr. 7:8-11) Be Pọl kie taman ene ibhio mhan bhi agbotu nin ele lu?
EBI ỌKHẸKE NIN ỌNE AGBOTU RẸ NE ỌNE OKPEA LU EMHIN YẸ BEJI ỌLE FIDENỌ
7. Emhin esili nela nabhọre nan rẹ re ọne okpea nọn lu emhin ebe sibhi agbotu re? (2 Kọrint 2:5-8)
7 Tie 2 Kọrint 2:5-8. Pọl da yọle ghe “adia nin ene bunbun bhi ẹwẹ bha re nin ọne ọria sẹriọ.” Ebi ọle ha re ọnan ta hi, ọne adia nan re nin ọne okpea wo gene wẹnna bhi egbe ọle. Bezẹle nan da re ọne adia nanlẹn? Ọle hi, nan rẹ rẹkpa ọle rẹ sabọ fidenọ.—Hib. 12:11.
8. Be Pọl kie taman ene ibhio mhan bhi agbotu nin ele lu?
8 Beji a miẹn ọne okpea fidenọ, Pọl da taman ene ewanlẹn nin ele re ọle fikiere bhi agbotu. Ọle da yẹ taman ele ghe, “bha rẹhunmhan ọlẹn, bha yẹ ko ọle udu re,” sẹyẹ, bha “hoẹmhọn ọlẹn.” Pọl da ha guanọ nin ene ibhio mhan re ọta nin ele ta bi emhin nin ele lu rẹ rẹman ọne okpea ghe ele gene rẹhunmhan ọlẹn, sẹyẹ ele hoẹmhọn ọlẹn. Ele ha lu iriọ, ọ ki rẹman ghe, ọ ti ele bhọ nin ọne okpea rẹ fikiere agbotu.
9. Emhin nela ha sabọ re eso ha siegbe re ikeke rẹ rẹhunmhan ọne obhio ele nọn ki fidenọ?
9 Eso bhi ọne agbotu be ha siegbe re ikeke rẹ miẹn ọne obhio ele nọn ki fidenọ ọbhi egbe? Baibo bha taman mhan. Ọkpakinọn, asabọmiẹn emhin nọn sẹnian sunu. Bhi ọsi ẹmhọanta, emhin nin ọne okpea lu wo si ọkakale ji ene ibhio mhan bhi agbotu, sẹyẹ, asabọmiẹn ọ yẹ si ẹkhọle ji eria eso. Ene ibhio mhan bhi agbotu wo ha wẹnna kaka rẹ sabọ ha re obọ rẹkhan uhi nesi Jehova, bhiriọ, eso sabọ rẹ dọ ha riale ghe, emhin nọn bha gba nọn nan rẹ re otọ nin ọria nọn lu emhin ebe nọn sẹnian rẹ fikie vae bhi agbotu. (Yẹ fẹ Luk 15:28-30 ghe.) Ọkpakinọn, bezẹle nọn da khẹke nin ibhio mhan bhi agbotu re oyẹẹ ọsaje man ọne obhio ele nọn fikiere?
10-11. Be ha sabọ sunu sade ene ewanlẹn bha ka rẹhunmhan ọne okpea nọn ki fidenọ?
10 Ria ẹmhọn ebe ha sabọ sunu sade ene ewanlẹn bha ka re ọne okpea nan nọn gene fidenọ fikie vae bhi agbotu, la sade ene ibhio mhan bha ka re oyẹẹ man ọlẹn sade a re ọle fikiere? ‘Akhiẹ ki gbe ọle ahu sotọ.’ Ọle sabọ rẹ dọ ha riale ghe, ọle i da yẹ sabọ kie ga Jehova ghẹdẹ. Ọle bhọ sabọ rẹ zobọ bhọ rẹ ha lu ene emhin ne ha rẹkpa ọle rẹ kie sabọ deba Osẹnobulua ha mhọn ikolu.
11 Ọnọn khọ nẹ hi, ahamiẹn ene ibhio mhan nan bha ka rẹhunmhan ọne okpea, ele ki mun ikolu nin ele bi Jehova ko mhọnlẹn ọbhi okhẹnan. Bezẹle nin mhan da ta iriọ? Ranmhude ọ i yi Jehova nọn rẹhunmhan ẹbho ne fidenọ ele yẹ re iriọ re egbe khọkhọ, sokpan, Esu nọn to, nọn i zẹwẹ mhọn itohan ele ki re egbe khọkhọ. Sẹyẹ, ele ki re isẹhoa nin Esu rẹ noo ele rẹ re egbe lọ ọne okpea rẹ ha ga Jehova.—2 Kọr. 2:10, 11; Ẹfẹ. 4:27.
12. Be ene ibhio mhan bhi ọne agbotu ha rẹ re egbe khọkhọ Jehova yẹ?
12 Be ene ibhio mhan bhi agbotu ọsi Kọrint ha rẹ re egbe khọkhọ Jehova yẹ, ghe ọ i yi Esu? Ọle hi, nin ele rẹ nin eria ne fidenọ lu emhin bhi uwedẹ nin Jehova rẹ ne ele lu emhin. Mhan fẹ ebi eria eso ne gbẹn Baibo tale rẹji Jehova. Devid nin Ojie da yọle: “Uwẹ nin Jehova, uwẹ mhẹnmhin. Uwẹ yẹ muegbe nin uwẹ rẹ rẹhunmhan.” (Ps. 86:5) Maika da gbẹn yọle: “Osẹ nela diabe uwẹ, nọn rẹhunmhan olukhọ yẹ gbe olukhọ kua nin ẹbho?” (Mic. 7:18) Sẹyẹ, Ẹzaya da gbẹn yọle: “Ji ọria ọbe re obọ sibhi emhin ebe re; ọria nọn imhẹn ha yẹ ne iria-eria ne imhẹn sibhi ọkhọle re; ji ọle fikie bu Jehova, Ọle ki mhọn itohan da ọle. Ji ọle fikie bu Osẹnobulua nọnsẹmhan, Ọle ki re ọkhọle rebhe rẹhunmhan ọlẹn.”—Isa. 55:7.
13. Bezẹle nọn da khẹke nan re ọne okpea fikiere bhi agbotu? (Fẹ ọne ẹkpẹti ghe nọn yọle, “ Ẹghela A Rẹ Re Ọne Okpea Nọn Lu Emhin Ebe Bhi Agbotu Ọsi Kọrint Fikiere?”)
13 Nin ene ibhio mhan ne ribhi agbotu ọsi Kọrint rẹ rẹman ghe ele re egbe khọkhọ Jehova, ọ da khẹke nin ele miẹn ọne okpea nọn ki fidenọ ọbhi egbe, yẹ rẹman ọlẹn ghe ele hoẹmhọn ọlẹn. Nin ọne agbotu rẹ miẹn ọne okpea ọbhi egbe beji Pọl taman ele, ele da rẹman ghe ele “gene hẹnmhọn.” (2 Kọr. 2:9) Bhi ọsi ẹmhọanta, ọne okpea kẹ wo fidenọ. Bhiriọ, ọ bha khẹke nin ene ewanlẹn riia ẹghe a rẹ re ọle fikiere bhi agbotu.
EBI MHAN HA RẸ SABỌ RE EGBE KHỌKHỌ JEHOVA YẸ BHI UWEDẸ NIN ỌLE RẸ RE ITOHAN MAN, YẸ BHUOHIẸN BHI UWEDẸ NỌN GBALE
14-15. Be mhan miẹn luẹ bhi uwedẹ nan rẹ ne ọne okpea nọn lu emhin ebe bhi agbotu ọsi Kọrint lu emhin? (2 Pita 3:9) (Yẹ fẹ ifoto ghe.)
14 A gbẹn uwedẹ nan rẹ ne ọne okpea nọn lu ọlukhọ bhi agbotu ọsi Kọrint lu emhin ọbhi Baibo “nan rẹ man mhan emhin.” (Rom 15:4) Bhi ọne okha, mhan da luẹ ghe, Jehova i re otọ nin ẹbho nesọle rẹ ha u emhin ebe. Jehova bha re obọ ọbhọ nan rẹ ranmhude “itohan” re otọ nin ọria nọn bha ka fidenọ rẹ deba ẹbho nesọle ha ga ọle. Arẹmiẹn Jehova mhọn itohan, ọ i yi uwedẹ rebhe nin ẹbho rẹ lu emhin ọle miẹn ọbhi egbe, sẹyẹ ẹlo nin ọle rẹ ghe emhin ne mhẹn bi emhin ne i mhẹn i fidenọ. (Jud 4) Ọ i yi itohan Jehova da ha rẹman sade ọle re otọ nin ọria nọn bha ka fidenọ rẹ sẹyẹ ha ribhi agbotu, ranmhude ọnan dẹ sabọ si okhẹnan ji ọrebhe bhi agbotu.—Prov. 13:20; 1 Kọr. 15:33.
15 Sẹyẹ, mhan luẹ ghe Jehova bha guanọ nin ọria soso fuẹn an. Ọle guanọ nin ọle miẹn eria fan sade ele fidenọ. Ọle mhọn itohan da eria ne fidenọ, ne yẹ ho nin ele kie deba ọle ha mhọn ikolu. (Ezek. 33:11; tie 2 Pita 3:9.) Bhiriọ, ẹghe nin ọne okpea bhi Kọrint rẹ fidenọ, yẹ fikeke-gbe emhin nọn i mhẹn nin ọle lu, Jehova da noo Pọl rẹ ji ọne agbotu lẹn ghe nin ele rẹhunmhan ọlẹn, yẹ miẹn ọlẹn ọbhi egbe.
Ahamiẹn mhan miẹn eria nan ne fikiere bhi agbotu ọbhi egbe, mhan ki ha re egbe khọkhọ Jehova bhi uwedẹ nin ọle rẹ re oyẹẹ bi itohan man (Fẹ uduọle nọnzi 14 bi 15 ghe)
16. Be uwedẹ nan rẹ re ọne ẹmhọn nọn zegbere bhi agbotu ọsi Kọrint khian dia uwẹ bhi egbe yẹ?
16 Uwedẹ nan rẹ re ẹmhọn nọn zegbere bhi agbotu ọsi Kọrint khian nin mhan zilo ọle rẹkpa mhan rẹ lẹn ghe, Jehova manman mhọn oyẹẹ, ọle khiamhin, sẹyẹ, ọle lu emhin bhi uwedẹ nọn gbale. (Ps. 33:5) Ọnan bha be re ọle ha ghọn uwẹ rẹ kie manman ha khuẹnmhẹn Osẹnobulua? Bhi ọsi ẹmhọanta, ọluemhiebe mhan rebhe khin, sẹyẹ, mhan guanọ nin Osẹnobulua rẹhunmhan mhan. Bhiriọ, ọkhẹke nin mhan rebhe ha khuẹnmhẹn Jehova bhi izoẹse nọnsi Jesu, nọn zẹle nin ọle da re emhin ebe nesẹmhan rẹhunmhan mhan. Ọ manman wo ko mhan udu re rẹ lẹn ghe, Jehova gene hoẹmhọn ẹbho nesọle, sẹyẹ, ọle guanọ nin emhin ha mhẹn nin ele.
17. Be mhan ha zilo nyan bhi ene uhọnmhọn-ọta ne rẹkhan ọnan?
17 Ahamiẹn ọria lu emhin ebe nọn kaka ẹlẹnan, be ene ewanlẹn ha rẹ sabọ re egbe khọkhọ Jehova yẹ bhi uwedẹ nin ọle rẹ re oyẹẹ man, bi uwedẹ nin ọle rẹ rẹkpa eria rẹ sabọ fidenọ? Be ọkhẹke nin ibhio mhan bhi agbotu rẹ lu emhin yẹ sade ene ewanlẹn re ọria sibhi agbotu, la re ọria fikiere bhi agbotu? A dẹ zilo nyan ene inọnta nan bhi ene uhọnmhọn-ọta ne rẹkhan ọnan.
ILLO 109 Ha Re Ọkhọle Rebhe Re Oyẹẹ Man
