Pọl nin odibo da taman Kristiẹn ne ribhi Tẹsẹlonaika yọle: “Ahamiẹn ọria soso ribhi ẹwẹ bha nọn bha ka re obọ rẹkhan ebi mhan ta bhi ọne ilẹta nan, bha yi ọle aman.” (2 Tẹsẹ. 3:14) Khẹ-khẹ, mhan rẹ ka yọle ghe, ene ewanlẹn a mun ọne ẹsọn nan nan. Ahamiẹn ọria he nin ọle rẹ re obọ rẹkhan adia ne ribhi Baibo, arẹmiẹn a gbe uhi nanlẹn igba ne bunbun, ene ewanlẹn ki mhanmhanlẹn nin ele rẹ re ọta man bhi agbotu rẹ taman ene ibhio mhan ghe, nin ele mhọn ẹwan bhi egbe ọne ọria. A ha ki re ọne ọta man fo, ibhio mhan ki munhẹn ha re egbe nẹ nanlẹn.

Ọkpakinọn, mhan dọ kere ghe ebi Kristiẹn ha tobọle lu bhi idia eso Pọl ha tẹmhọnlẹn. Bhiriọ, ọ bha yẹ khẹke nin ene ewanlẹn dọ ha re ọta man rẹ sekha nin ibhio mhan. Bezẹle nan ki da fi ọle denọ? Bha ji mhan fẹ ebi Pọl ha tẹmhọnlẹn bhi ẹghe nin ọle rẹ re ọne adia nan nin ibhio ọle.

Pọl da kere ghe, eria eso bhi ọne agbotu “ilu emhin rẹkhan emhanmhan.” Ele da ha re ẹlo gbe adia nọnsi Jehova a. Beji ọle ka rẹnẹ ji ibhio ọle bhi Tẹsẹlonaika, ọle da re ọne adia nan nin ele. Ọle da yọle: “Ahamiẹn ọria bha ho nin ọle wẹnna, bha hẹi ji ọle da le ebale.” Ọrẹyiriọ, eso bhi ẹwẹ ele bha muegbe nin ele rẹ wẹnna beji ele ha da miẹn ebi ele ha rẹ ha gbẹloghe egbe arẹmiẹn ele bha hian-obọ-hian-oẹ. Sẹyẹ, ele da dọ ha lu obhebhezẹ khian bhi ẹmhọn nọn bha rẹtẹ ele. Be ọkhẹke nin ene ibhio mhan bhi agbotu rẹ ha ne ẹbho ne sẹnian lu emhin yẹ?—2 Tẹsẹ. 3:​6, 10-12.

Pọl da yọle: “Bha yi ọle aman.” Ebi ukpọta Grik nan noo bhi enan ha tẹmhọnlẹn hi, nan rẹ mhọn ẹwan bhi egbe ọria nọn sẹnian. Ọrebhe bhi agbotu Pọl gbẹn ọne ẹmhọn nan je, ọ i yi ene ewanlẹn ọkpa. (2 Tẹsẹ. 1:1; 3:6) Bhiriọ, ọdeọde bhi agbotu nọn daghe ọria nọn bha ka re obọ rẹkhan adia nọn ribhi Baibo, dẹ sabọ zẹ nin ọle rẹ “rẹban” ọne ọria.

Ọnan ki be rẹman ghe, uwedẹ nan rẹ ne ọria nan re sibhi agbotu re lu emhin a ha ki be rẹ nanlẹn ha lu emhin? Eye. Pọl bhọ da yẹ yọle: “Bha yẹ wo ha re adia nanlẹn bọsi obhio.” Bhiriọ, ibhio mhan dẹ yẹ sabọ deba ọle ha lu emhin sade ọle vae bhi ikolo oga bi inẹbho. Sokpan, ele ki zẹ nin ele hẹi deba ọle ha re egbe re ahoho. Bezẹle? Pọl da yọle: “Beji ẹkhọle ha da ha lo ọle.” Ọne uwedẹ nan nin ibhio mhan ha rẹ nanlẹn ha lu emhin sabọ rẹ re ọle dọ ria ẹmhọn egbe ọle yẹ fi uwedẹ nin ọle rẹ lu emhin denọ.—2 Tẹsẹ. 3:​14, 15.

Be imhan ha rẹ sabọ re obọ rẹkhan ọne adia nan yẹ ẹlẹnan? Ọhẹnhẹn, ọkuẹsẹ mhan zẹ nin mhan rẹ mhọn ẹwan bhi egbe ọria, ọkhẹke nin mhan ka fẹghe si ọne ọria “ilu emhin rẹkhan emhanmhan” beji Pọl tale. Ọ i yi ẹbho nin uwedẹ nin ele rẹ lu emhin dikẹ bhi ọsẹmhan, la ẹbho nin emhin nin ọkhọle nọnsẹle re otọ nin ele rẹ zẹ rẹ lu dikẹ bhi ọsẹmhan Pọl ha tẹmhọnlẹn. Sẹyẹ, ọ i yi eria nin emhin nin ele lu ba mhan bhi egbe ọle ha mhọn bhi ọkhọle. Ọkpakinọn, eria ne wo tan ẹlo a ha gbobọrauhi nesi Osẹnobulua Pọl ha tẹmhọn ọlẹn.

Ẹlẹnan nan nian, ahamiẹn mhan daghe Kristiẹn nọn wo tan ẹlo a ha gbobọrauhi a nọnsi Jehova, mhan sabọ rẹ zẹ nin mhan hẹi deba ọle ha re egbe re ahoho. Beji a miẹn emhin nin uwẹ tobuwẹ zẹ khọnan, ọ bha khẹke nin uwẹ dọ ha taman ẹbho ebhebhe ebi uwẹ zẹ, gbera ẹbho ne ribhi azagba-uwa nọnsẹ. Mhan dẹ yẹ sabọ deba ọne ọria ha lu emhin bhi ikolo oga bi bhi inẹbho. Ahamiẹn ọle fi uwedẹ nin ọle rẹ lu emhin denọ, mhan sabọ rẹ kie deba ọle ha muobọ bii ọnikhẹ.