1. Be Osẹnobulua rẹ re ahu nin eguọmhandia nesọle yẹ bhi ẹghe nọn gbera?

 BAIBO kẹ wo tẹmhọn ikpea ne ga Jehova nọnsẹn bii ẹbho ne manman ziẹn. Ọkpakinọn ọ iyi ẹghe rebhe ele rẹ ha riale ghe ele ziẹnmhin. Bhi ọsi ijiẹmhin, bhi idia eso, Devid nin Ojie da ha ghe egbe ọle bii ọria nọn manman ziẹn beji oke rẹ ziẹn, bhi idia ebhebhe ofẹn da ha mun ọlẹn. (Ps. 30:7) Arẹmiẹn ẹlinmhin nọn khiale nọnsi Osẹnobulua rẹkpa Samsin rẹ manman ha mhọn ahu, ọle lẹnmhin ghe, ahu dẹ fo ọle bhọ, sẹyẹ ọle ki wẹghẹa yẹ diabe ikpea nekẹle rebhe sade Osẹnobulua bha rẹkpa ọle. (Judg. 14:5, 6; 16:17) Jehova hi ọnọn re ahu nin ene eguọmhandia nesọle nan.

2. Bezẹle nin Pọl nin odibo da yọle ghe ọle wẹghẹmhin, sẹyẹ ọle manman mhọn ahu? (2 Corinthians 12:9, 10)

² Pọl nin odibo yẹ lẹn sẹ ghe ọkhẹke nin ọle guanọ urẹkpa bhi obọ Jehova. (Tie 2 Corinthians 12:9, 10.) Pọl wo ne emianmẹn dan beji ọ rẹ sunu ji ene bunbun bhi ẹwẹ mhan. (Gal. 4:13, 14) Ẹgheso, ọ nọghọ ọle rẹ lu emhin nọn gbale. (Rom. 7:18, 19) Sẹyẹ, ẹgheso ribhọ nin ọle rẹ ha kpokpo egbe ba ẹmhọn emhin ne ha sunu ji ọle. (2 Cor. 1:8, 9) Ọrẹyiriọ, ẹghe nin egbe rẹ lọ Pọl, ẹghenin ọle rẹ manman mhọn ahu. Be ọ rẹ sunu yẹ? Jehova hi ọnọn re ahu nọn khẹke nin Pọl rẹ sabọ ziẹngbe ọkakale nin ọle kuẹlo da.

3. Inọnta nela mhan da re ewanniẹn ọi bhi ọne uhọnmhọn-ọta nan?

³ Jehova yẹ ve ghe ọle dẹ re ahu nin mhan rẹ sabọ ziẹngbe ọkakale. (1 Pet. 5:10) Ọkpakinọn mhan ida sabọ miẹn ọne ahu nan sade mhan bha dọnmhegbe rẹ lu emhin soso. Bha ji mhan fẹ ọne ijiẹmhin nan ghe. Ẹngini re ahu nin moto rẹ sabọ ha khian, ọkpakinọn, ọne ẹngini ida sabọ tobọle ha re ọne moto khian sade ọria bha re oẹ niẹn ebe re ọne moto khian. Iriọ sẹyẹ nọn, Jehova muegbe nin ọle rẹ re ahu nọn khẹke nin mhan. Ọkpakinọn ọkhẹke nin mhan lu emhin eso nin mhan rẹ sabọ miẹn ọne urẹkpa. Be Jehova  ne nin mhan ne ha rẹkpa mhan rẹ sabọ deziẹn? Be ọkhẹke nin mhan lu beji mhan ha da sabọ miẹn urẹkpa nọn na obọ Jehova vae? Mhan dẹ miẹn ewanniẹn rẹji ene inọnta nan sade mhan zilo nyan ebi Jehova rẹ rẹkpa Jona nin akhasẹ, Meri nin inẹn Jesu, bi Pọl nin odibo yẹ. Mhan ki yẹ zilo nyan ebi Jehova rẹ rẹkpa eguọmhandia nesọle yẹ ẹlẹnan.

4. Be imhan ha rẹ sabọ miẹn ahu nọn na obọ Jehova vae yẹ?

⁴ Uwedẹ ọkpa nin mhan ha rẹ sabọ miẹn ahu bhi obọ Jehova hi, nin mhan rẹ ha nan erọnmhọn ji ọle. Ẹghenin, ọle ki re “ahu nọn gbera eji ahu ọsi ọria sẹle” nin mhan. (2 Cor. 4:7) Mhan dẹ yẹ miẹn ahu sade mhan tie Ọta nọnsọle yẹ ria eria nyan ọlẹn. (Ps. 86:11) Ọta nesi Jehova ne ribhi Baibo manman wo mhọn ahu. (Heb. 4:12) Uwẹ da ha nan erọnmhọn ji Jehova yẹ tie Ọta nọnsọle, uwẹ ki miẹn ahu rẹ sabọ ziẹngbe, rẹ sabọ ha ghọnghọn, la rẹ sabọ miẹn ẹsọn nọn kaka nan mun uwẹ bhi agbotu. Bha ji mhan fẹ ebi Jehova rẹ re ahu nin Jona nin akhasẹ yẹ.

5. Bezẹle nin Jona nin akhasẹ da ha guanọ izebhudu?

⁵ Jona nin akhasẹ wo ha guanọ izebhudu. Ranmhude ofẹn nọn ha mun ọlẹn rẹ diọbhi eji Jehova je ọle le, ọle da nabhi okọ nọn khian ije ebhebhe. Ranmhude ọnan, ọle bi ẹbho ne ribhi ọne okọ da rẹ yu ranmhude udede efi nọn ha fi. Ẹghe nin ene gua ọne okọ ki rẹ mun ọlẹn fi ọbhi ẹkẹ ẹdẹ, Jona da ke egbe ọle re bhi eji ọle bha sẹ ka sẹ khẹ—ẹkẹ ọsi udede ehẹn. Be uwẹ riale emhin dẹ dia Jona yẹ bhi egbe bhi ọne ẹghe nan? Ọle be ha riale ghe enin ọle ki da yu niẹn? La, ọle be ha riale ghe Jehova fikeke gbe ọle? Edandan iribhọ ghe ofẹn dẹ wo manman ha mun ọlẹn.

6. Beji a rẹman bhi Jonah 2:1, 2, 7, be re ahu nin Jona bhi ẹghe nin ọle rẹ ha ribhi ẹkẹ ọsi ọne ehẹn?

⁶ Be Jona lu nin ọle rẹ sabọ miẹn ahu beji ọle ribhi ẹkẹ ọsi ọne udede ehẹn? Ọkpa bhi emhin nin ọle lu hi, ọle da nan erọnmhọn ji Jehova. (Tie Jonah 2:1, 2, 7.) Arẹmiẹn Jona ka mhọn akan-ehọ da Jehova, ọle da fidenọ, yẹ ha mhọn ọne urẹọbhọ ghe Jehova dẹ ka ọle ehọ. Jona yẹ wo ria eria nyan ebe ribhi Ebenọnkhiale. Bezẹle nin mhan ha da sabọ ta iriọ? Ikpọta nin Jona noo bhi erọnmhọn nọnsọle nan gbẹn ọbhi Jonah uhọnmhọnlẹn 2, ele yẹ ẹmhọn ne ribhi ijeso bhi ebe ọsi Psalms. (Bhi ọsi ijiẹmhin, re ebe ribhi Jonah 2:2, 5 rẹ fẹ ebe ribhi Psalm 69:1 bi 86:7 ghe.) Ọ wo khia bhi ẹlo ghe, Jona wo manman lẹn ebe ribhi ene ulọnlẹn nan. Nin ọle rẹ ria eria nyan ebe ribhi ene ulọnlẹn nin bhi ẹghe nin ọle rẹ ha ribhi ọkakale, ọle da sabọ ha mhọn ọne izebhudu ghe, Jehova dẹ rẹkpa ọle. Akizẹbue Jehova da hinmhin ọlẹn bhi ẹkẹ ọsi ọne ehẹn. Bhi ọne ẹghe nan, Jona da wo muegbe nin ọle rẹ miẹnsọn nin Jehova mun nanlẹn.—Jonah 2:10–3:4.

7-8. Be obhio mhan nin okpea nọn nyẹnlẹn bhi Taiwan rẹ sabọ miẹn ahu yẹ bhi ẹghe ọkakale?

⁷ Ijiẹmhin ọsi Jona dẹ sabọ rẹkpa mhan sade mhan kuẹlo da ọkakale kẹkẹ. Bhi ọsi ijiẹmhin, obhio mhan nin okpea natiọle Zhiming b nọn na bhi Taiwan vae, da ha khọnmhọn emianmhẹn kẹkẹ ne manman kaka. Rẹ deba ọnan, ẹbho bhi azagba-uwa nọnsọle da wo manman ha kpokpo ọle ranmhude nin ọle rẹ ha ga Jehova. Erọnmhọn bi emhin nin ọle tobọle luẹ hi emhin nọn rẹkpa ọle rẹ sabọ miẹn ahu bhi obọ Jehova. Ọle da yọle: “Ẹgheso ahamiẹn ọkakale zegbere, mẹn ki wo manman ha kpokpo egbe rẹ sẹbhọ ghe, ọ ki ha nọghọ mẹn rẹ de ọkhọle re rẹ sabọ lu iluẹmhin Baibo nọnsẹmhẹn.” Ọkpakinọn, ọle bha ji egbe lọ ọle. Ọle da yọle: “Mẹn ki nan erọnmhọn ji Jehova. Mẹn ha ki lu ọnin fo, mẹn ki ne emhin nan rẹ khue illo ọbhi ehọ rẹ ha kaehọ illo nesẹmhan. Ẹgheso, mẹn ki fẹkẹ si uru kotọ rẹ ha so ọle, rẹ dọ sẹbhi ẹghe nin ọkhọle nọnsẹmhẹn ha rẹ de re. Ẹghenin, mẹn ki munhẹn ha luẹ emhin.

 ⁸ Ene emhin kẹkẹ nin Zhiming luẹle bhi emhin nin ọle tobọle luẹ re ahu nanlẹn rẹ sabọ ziẹngbe ọkakale. Bhi ọsi ijiẹmhin, beji egbe fẹkẹ ha dan ọlẹn bhi ọpresiọn nin ọle lu, dọkitọ da taman ọlẹn ghe, ọ dẹ khẹke nin ọle si aranlẹn ọbhi egbe ranmhude aranlẹn nọn ri ọle bhi egbe bha yẹ bun. Ọne ukpasọn ọkuẹsẹ a lu ọle ọne ọpresiọn, Zhiming ka tie okha ọsi obhio mhan nin okhuo nọn lu egbe ọpresiọn nin ọle lu. Aranlẹn nọn re ọne obhio mhan bhi egbe bhọ bha bun sẹ bii ọsi Zhiming. Ọrẹyiriọ, ọle bha ka si aranlẹn ọbhi egbe, egbe da yẹ wo dan ọlẹn. Ọne okha nan da wo rẹkpa Zhiming rẹ sabọ ze emhin nọn mhẹn rẹ lu.

9. Be uwẹ ha sabọ lu sade ọkakale nin uwẹ ye re egbe lọ uwẹ? (Yẹ fẹ ene ifoto ghe.)

⁹ Ọkakale sẹ be re uwẹ kpokpo egbe sẹbhọ ghe uwẹ bha yẹ sabọ taman Jehova ebi emhin dia uwẹ yẹ bhi egbe? La re egbe lọ uwẹ sẹbhọ ghe uwẹ bhọ bha yẹ sabọ luẹ emhin? Yere ghe Jehova wo manman lẹn idia nin uwẹ ye. Bhiriọ, aharẹmiẹn obhi erọnmhọn khere uwẹ sabọ nan, uwẹ dẹ sabọ ha mhọn ọne izebhudu ghe, ọle dẹ re ebi uwẹ guanọ tee nin uwẹ. (Eph. 3:20) Ahamiẹn ọkakale nin uwẹ ye re ọle nọghọ uwẹ rẹ sabọ tie Baibo, la luẹ emhin, uwẹ sabọ rẹ dọ ha kaehọ Baibo bi ebe nesẹmhan nan rẹkọdi. Sẹyẹ, ọ dẹ rẹkpa uwẹ sade uwẹ dọ kaehọ illo nesẹmhan, la ghe vidio bhi jw.org. Jehova muegbe nin ọle rẹ re ahu nin uwẹ. Ọle dẹ lu ọnan nin uwẹ sade uwẹ nan erọnmhọn ji ọle, bi sade uwẹ gbẹlokotọ bhi uwedẹ nin ọle rẹ noo Baibo, bi emhin kẹkẹ nin ọle ze ele egbe dagbare rẹ re ewanniẹn ọbhi erọnmhọn nọnsẹ.

10. Be ibhio mhan nin mhan ko ga rẹ re izebhudu nin mhan yẹ?

¹⁰ Jehova dẹ sabọ noo ibhio mhan nin mhan ko ga rẹ re izebhudu nin mhan. Ele dẹ sabọ rẹkpa mhan sade mhan kuẹlo da ọkakale, la sade ọ nọghọ mhan rẹ miẹnsọn nan mun nin mhan. (Col. 4:10, 11) Mhan manman wo guanọ imọẹ “bhi ẹghe ọnọghọ.” (Prov. 17:17) Ahamiẹn egbe lọ mhan, ibhio mhan nin mhan ko ga dẹ sabọ ne ebi mhan guanọ nin mhan, ko mhan udu re, yẹ re izebhudu nin mhan rẹ sabọ ha ga Jehova. Mhan fẹ ebi Meri nin inẹn Jesu rẹ miẹn izebhudu bhi obọ ẹbho yẹ.

11. Bezẹle nọn da khẹke nin Meri ha mhọn izebhudu?

 ¹¹ Bezẹle nọn da khẹke nin Meri ha mhọn izebhudu? Ria ẹmhọn ebi Meri ha rẹ ha kpokpo egbe yẹ beji ẹhi natiọle Gebriẹl taman ọlẹn ghe, ọle dẹ ha hanmhan arẹmiẹn ọle bha sẹ bọdọ. Ọle bha sẹ ka gbẹloghe ọmọn khẹ, ọkpakinọn ọle dẹ gbẹloghe ọmọn nian nọn da kiẹn ọne Mezaya. Rẹ deba ọnan, ọle bha sẹ ne okpea nowẹ khẹ. Ria ẹmhọn ebi ọ ha rẹ nọghọ ọle yẹ rẹ taman Josẹf nin ọle da bọ ghe ọle hanmhan.—Luke 1:26-33.

12. Beji Luke 1:39-45 rẹman, be Meri rẹ miẹn ahu rẹ sabọ miẹnsọn nan mun nanlẹn yẹ?

¹² Be Meri rẹ sabọ miẹn ahu rẹ miẹnson nọn bha lẹkhẹ nan mun nanlẹn yẹ? Ọle da guanọ urẹkpa bhi obọ ẹbho. Bhi ọsi ijiẹmhin, ọle da taman Gebriẹl nin ọle ta emhin eso man ọlẹn rẹji ọne iwẹnna nan mun nanlẹn. (Luke 1:34) Obhi ẹgheso ki gbera, ọle da ha khian “agbaẹbho ọkpa bhi uke oke” bhi otọ ọsi ibhokhan Juda dọ tuẹ obhio ọle nin Ẹlizabẹt. Ọle wo manman miẹn elele bhi ọne okhian nin ọle yo. Ẹlizabẹt da wo khuẹnmhẹn Meri, sẹyẹ Jehova da rẹ ẹlinmhin nọn khiale nọnsọle rẹ rẹkpa ọle rẹ kha akhasẹ rẹji ọne ọmọn nin Meri hanmhan. (Tie Luke 1:39-45.) Meri da yọle ghe, Jehova “re obọ nọnsọle lu okpemhin.” (Luke 1:46-51) Jehova da noo ẹhi natiọle Gebriẹl bi Ẹlizabẹt rẹ re izebhudu nin Meri.

13. Emhin nela obhio mhan nin okhuo nọn na bhi Bolivia vae miẹn nin ọle rẹ dọ guanọ urẹkpa bhi obọ ibhio ọle nin ele ko ga?

¹³ Bọsi Meri, uwẹ dẹ yẹ sabọ miẹn ikoudure bhi obọ ibhio ẹ nin bha ko ga. Obhio mhan nin okhuo natiọle Dasuri nọn nyẹnlẹn bhi Bolivia da ha guanọ ikoudure nọn sẹ inian. Bhi ẹghe nan rẹ mun aba ọle ha khian họspita ranmhude emianmhẹn nọn kaka nan imiẹn ikhunmhun ọlẹn nin ọle ha khọnmhọn, Dasuri da muegbe nin ọle rẹ lu eka nin ọle ha sabọ lu rẹ ha gbẹloghe ọle. (1 Tim. 5:4) Ọnan bha zẹwẹ lẹkhẹ hiehie. Ọle da yọle: “Bhi igba ne bunbun, mẹn da ha riale ghe ọnan ida yẹ fo mẹn.” Ọle be dọ guanọ urẹkpa? Eye. Ọle da yọle: “Mẹn bha ho nin mẹn kpokpo ene ibhio mhan. Mẹn da ha riale ghe ‘Jehova hi ọnọn ha re ahu nin mẹn guanọ nin mẹn.’ Ọkpakinọn mẹn da dọ kere ghe, nin mẹn rẹ ha siegbe kie bhi eji ene ibhio mhan ye, ọ da diabe ghe imẹn ọkpa tobọmẹn mun ọne ihẹ.” (Prov. 18:1) Dasuri da mhanmhanlẹn nin ọle rẹ gbẹn ebe ji imọẹ ọle eso, yẹ tẹmhọn idia nin ọle ye man ele. Ọle da yọle: “Mẹn ida sabọ tẹmhọn ebi mẹn rẹ miẹn izebhudu yẹ bhi obọ ene ibhio mhan nin man ko ga. Ele da muno ebale ji mẹn bhi họspita, yẹ re ulọnlẹn eso bhi Baibo rẹ re ikoudure nin mẹn. Emhin eghọnghọn nọn ghe ọ iyi mhan ọkpa khian. Azagba-uwa nọn manman kpọnọ ọsi Jehova mhan yẹ—azagba-uwa ne muegbe nin ele rẹ re ebi uwẹ guanọ nin uwẹ, deba uwẹ viẹ sade uwẹ lu akhiẹ, yẹ re izebhudu nin uwẹ rẹ deba ele wo ha ga Jehova khian.”

14. Bezẹle nọn da khẹke nin mhan miẹn urẹkpa ọsi ene ewanlẹn ọbhi egbe?

¹⁴ Jehova yẹ wo noo ewanlẹn bhi agbotu rẹ rẹkpa mhan ẹlẹnan. Ọle noo ele rẹ re izebhudu bi ikoudure nin mhan. (Isa. 32:1, 2) Bhiriọ, ahamiẹn emhin kpokpo uwẹ bhi ọkhọle, taman ene ewanlẹn. Hẹi siegbe re ikeke rẹ miẹn urẹkpa nọnsele ọbhi egbe. Jehova dẹ sabọ noo ele rẹ mun uwẹ ziẹn.

15. Ikhuaẹloghe nela Kristiẹn mhọn nọn manman ti ele bhọ?

¹⁵ Ikhuaẹloghe nin mhan mhọn rẹji ẹghe odalo re ahu nin mhan rẹ sabọ ha ga Jehova khian. (Rom. 4:3, 18-20) Kristiẹn eso mhọn ọne ikhuaẹloghe nin ele rẹ nyẹn bhi okhun, enekẹle mhọn ikhuaẹloghe nin ele rẹ nyẹn bhi ọne otọ nan bhi ọfubhegbe. Ikhuaẹloghe nin mhan mhọn re ahu nin mhan rẹ sabọ ziẹngbe ọkakale, rẹ ha tẹmhọn Agbejele, yẹ rẹ ha miẹnsọn kẹkẹ nan mun  nin mhan bhi agbotu. (1 Thess. 1:3) Ọne ikhuaẹloghe nan yẹ re ahu nin Pọl nin odibo.

16. Bezẹle nọn da khẹke nin Pọl ha mhọn izebhudu?

¹⁶ Ọ da wo khẹke nin Pọl ha mhọn izebhudu. Bhi ilẹta nin ọle gbẹn ji ibhokhan Kọrint, ọle da rẹ egbe ọle khọkhọ uwawa na re ekẹn man nọn bha ziẹn. Iẹnlẹn wo kaka mun ọlẹn, emhin wo re ilo han ọlẹn, a kpokpo ọlẹ, sẹyẹ a gbe ọle fi ọbhi otọ. Rẹ deba ọnan, iẹnlẹn nọnsọle bhọ da ha ribhi okhẹnan ẹgheso. (2 Cor. 4:8-10) Ẹghe nin Pọl rẹ rẹnẹ ji agbotu nọn ribhi Kọrint bhi ọsi ugba-zea ọle rẹ gbẹn ọne ilẹta nan. Beji ọle gbẹn ene ẹmhọn fo, ọle da kuẹlo da ọnọghọ ebhebhe ne manman kaka. Usun ẹbho da mun okhọn bu ọle. A da mun ọlẹn khue, okọ nin ọle na ọi da gberuẹ, sẹyẹ a da mun ọlẹn ọbhi ighan.

17. Beji 2 Corinthians 4:16-18 rẹman, be rẹ ahu nin Pọl rẹ sabọ ziẹngbe ọkakale?

¹⁷ Pọl da miẹn ahu rẹ sabọ ziẹngbe ọkakale ranmhude nin ọle rẹ ha ria eria nyan ikhuaẹloghe nin ọle mhọn. (Tie 2 Corinthians 4:16-18.) Ọle da taman ibhokhan Kọrint ghe aharẹmiẹn efun-egbe nọnsọle “lekua,” ọle ida ji ọnin rẹ egbe lọ ọle. Ẹghe odalo Pọl wo denọ ẹlo ọi. Ikhuaẹloghe nin Pọl mhọn nin ọle rẹ nyẹn bhi okhun bhi ighegheghe wo manman lu uhọnmhọn emhin rẹji ọle, rẹ sẹbhọ ghe ọle da muegbe nin ọle rẹ ziẹngbe ọkakale nọn hi ki rẹ khin, beji elele nin ọle khẹ ha da sẹ ọle obọ. Pọl wo ha ria eria nyan ọne ikhuaẹloghe nan, ranmhude ọnan, ọle da wo “ha de ọgbọn bhọ ukpẹdẹ-ukpẹdẹ.”

18. Be ikhuaẹloghe nin Tihomir bi azagba-uwa nọnsọle ha mhọnlẹn rẹ re ahu nin ele rẹ sabọ ziẹngbe yẹ?

¹⁸ Ikhuaẹloghe nin obhio mhan natiọle Tihomir nọn na bhi Bulgaria vae ha mhọnlẹn wo rẹ ahu nanlẹn rẹ sabọ ziẹngbe. Bhi ikpe eso ne gbera nian, asidẹnt da gbe obhio ọle nin okpea nin khere natiọle Zdravko. Ọnan da wo re Tihomir manman ha lu akhiẹ. Nin ọle bi azagba-uwa nọnsọle rẹ sabọ ziẹngbe, ele da ha rẹ ọkhọle muno ebi emhin ha diayẹ bhi ẹghe nan ha rẹ riọ ẹbho kpanọ. Ọle da yọle: “Bhi ọsi ijiẹmhin, mhan da zilo nyan eji mhan ha da miẹn Zdravko, ebale nin mhan ha nyẹn nanlẹn, ẹbho nin mhan ha tie bhi iluẹmhin nin mhan ha lu sade a riọ ọle kpanọ, bi emhin ne sunu bhi ẹghe ọkike nin mhan ha taman ọlẹn.” Tihomir da yọle ghe,  ikhuaẹloghe ọsi ẹghe odalo nin ele ha ria eria nyan da rẹkpa azagba-uwa nọnsọle rẹ sabọ ziẹngbe, yẹ rẹ ha khẹ ẹghe nin Jehova ha rẹ riọ obhio ọle kpanọ.

19. Be uwẹ ha sabọ lu rẹ ha ziẹn ikhuaẹloghe nin uwẹ mhọn? (Yẹ fẹ ifoto ghe.)

¹⁹ Be uwẹ ha rẹ sabọ ha ziẹn ikhuaẹloghe nin uwẹ mhọnlẹn yẹ? Bhi ọsi ijiẹmhin, ahamiẹn nin uwẹ rẹ nyẹn bhi ọne otọ nan bhi ighegheghe hi ikhuaẹloghe nin uwẹ mhọn, ha tie Baibo ne tẹmhọn ebi agbọn ọfubhegbe da diayẹ, uwẹ ha yẹ ha ria eria nyan ọlẹn. (Isa. 25:8; 32:16-18) Ha ria eria nyan ebi iẹnlẹn da diayẹ bhi agbọn ọsọgbọn. Ha re ọkhọle munọ ọlẹn ghe uwẹ ribhi enin, ria ẹmhọn eria nin uwẹ da miẹn bhi enin, emhin nin uwẹ da hẹnmhọn ọlẹn, bi ebi egbe da dia uwẹ yẹ. Nin uwẹ rẹ sabọ manman ha rẹ ọkhọle muno ebi agbọn ọsọgbọn da diayẹ, ha ghe ifoto ọsi agbọn ọsọgbọn nan drọ ọbhi ebe nesẹmhan, la uwẹ ha dọ ghe ividio ọsi illo ikẹ. Ividio bii The New World to Come, Ọ Dẹ Kẹ Lu Ọle Nin Mhan, la Ha Khuaẹloghe Ẹghe Odalo. Ahamiẹn mhan dọnmhegbe ha ria eria nyan ebi agbọn ọsọgbọn da diayẹ ẹghe rẹbhe, ọkakale nin mhan kuẹlo da ki diabe “ọsi obhi ẹghe khere . . . [nọn] bha yẹ kaka gbe.” (2 Cor. 4:17) Ikhuaẹloghe nin Jehova re nin uwẹ dẹ rẹkpa uwẹ rẹ sabọ ziẹngbe ọkakale kẹkẹ.

20. Be imhan ha rẹ sabọ miẹn ahu yẹ aharẹmiẹn ghe egbe lọ mhan?

²⁰ Aharẹmiẹn egbe lọ uwẹ, Osẹnobulua dẹ sabọ re ahu nin uwẹ. (Ps. 108:13) Jehova wo ne emhin kẹkẹ nin mhan ne ha rẹkpa mhan rẹ sabọ miẹn ahu bhi obọ ọle. Bhiriọ, ahamiẹn uwẹ guanọ urẹkpa rẹ sabọ miẹnsọn nan mun nin uwẹ bhi agbotu, rẹ sabọ ziẹngbe ọkakale, la rẹ sabọ wo ha ghọnghọn, bu Jehova bhi erọnmhọn, uwẹ ha yẹ guanọ adia bhi iluẹmhin Baibo nọnsẹ. Miẹn urẹkpa ọsi ibhio ẹ nin bha ko ga ọbhi egbe. Re ẹghe ọbhi otọ rẹ ha ria eria nyan ikhuaẹloghe ọsi agbọn ọsọgbọn. Ẹghenin, Osẹnobulua ‘nọn manman mhọn ahu bi uyi ki mun uwẹ ziẹn, beji uwẹ ha da sabọ ziẹngbe emhin rebhe, yẹ re eghọnghọn ha khẹ ọle.’—Col. 1:11.