UHỌNMHỌN-ỌTA NỌNZI 43
ILLO 90 Bha Ha Re Izebhudu Nin Egbe
Ebe Ha Rẹkpa Mhan Rẹ Sabọ Khọn Edandan
“Bha ha fẹ otọ emhin rebhe ghe.”—1 TẸSẸ. 5:21.
EBI A HA LUẸ BHỌ
Ebi mhan ha rẹ khọn edandan ne ha sabọ rẹso oga nin mhan re ji Jehova.
1-2. (a) Be bhọ edandan eso nin eguọmhandia nesi Jehova ha sabọ ha mhọn? (b) Be imhan ha zilo nyan bhi ọne uhọnmhọn-ọta nan?
IMHAN rebhe mhọn edandan a ẹgheso. Bhi ọsi ijiẹmhin, ria ẹmhọn usẹn nọn riale si ẹmhọn ọlẹn gene rẹtẹ Jehova. Asabọmiẹn ọne iria-eria nan dẹ re ọle ha siegbe re ikeke rẹ mianmẹn. La, ria ẹmhọn obhio mhan nin okpea nọn na bhi ẹghe usẹn zẹ nin ọle rẹ mun ẹmhọn Agbejele kalo bhi iẹnlẹn nọnsọle gbera ẹmhọn ẹfe. Bhi ejayenan nian, ikpe ne bunbun gbera, sẹyẹ ọle wanre. Ọkpakinọn, ọle bha manman miẹn emhin rẹ ha gbẹloghe azagba-uwa nọnsọle. Bhiriọ ọle sabọ rẹ dọ ha riale si emhin nọn gbale ọle zẹ beji ọle ribhi usẹn. Sẹyẹ, ria ẹmhọn obhio mhan nin okhuo nọn ki wanre nin ahu i yẹ manman ri ọle bhọ. Egbe sabọ rẹ lọ ọle ranmhude ọle i yẹ sabọ lu eka nin ọle ka lu khẹ. Idia nin uwẹ ye sẹ ka re uwẹ nọọn egbe ẹ ene inọnta nan khẹ: ‘Jehova be gene daghe mẹn? Ene emhin nin mẹn fikekegbe beji mẹn ha da sabọ ha ga Jehova be gene khẹke? Jehova bhọ yẹ mhọn ebi ọle rẹ mẹn lu?’
2 Ahamiẹn mhan bha dọ guanọ ewanniẹn rẹji ene inọnta nan, ọ dẹ sabọ rẹso oga nin mhan re ji Jehova. Bhi ọne uhọnmhọn-ọta nan, mhan dẹ zilo nyan ebi adia ne ribhi Baibo ha rẹ sabọ rẹkpa mhan yẹ sade mhan riale (1) si ẹmhọn mhan gene rẹtẹ Jehova, (2) si emhin nin mhan zẹ rẹ lu bhi ẹghe nọn gbera gene khẹke, la (3) si Jehova yẹ gene mhọn ebi ọle rẹ mhan lu.
EBE HA RẸKPA MHAN RẸ SABỌ KHỌN EDANDAN
3. Uwedẹ ọkpa nela mhan ha rẹ sabọ khọn edandan?
3 Uwedẹ ọkpa nin mhan ha rẹ sabọ khọn edandan hi, nin mhan rẹ dọ gua otọ ebi Baibo tale rẹji ọne emhin nọn re mhan mhọn edandan. Mhan ha lu iriọ, mhan ki wo deziẹn, sẹyẹ, ikolu nin mhan bi Jehova ko mhọn ki ha tuẹn okhun. Rẹ deba ọnin, mhan ki sabọ “mun urẹọbhọ [nọnsẹmhan] mhọn nọnsẹn.”—1 Kọr. 16:13.
4. Be imhan ha rẹ sabọ “ha fẹ otọ emhin rebhe ghe” yẹ? (1 Tẹsẹlonaika 5:21)
4 Tie 1 Tẹsẹlonaika 5:21. Ọne Baibo nan yọle ghe, nin mhan “ha fẹ otọ emhin rebhe ghe.” Be imhan ha rẹ sabọ lu ọnan yẹ? Ahamiẹn emhin ribhọ nọn bha mun mhan ẹlo kore, ọkhẹke nin mhan dọ fẹ ebi Baibo tale rẹji ọle ghe. Bhi ọsi ijiẹmhin, bha ji mhan kie fẹ idia ọsi ọne usẹn okpea nọn ha riale si ẹmhọn ọlẹn gene rẹtẹ Osẹnobulua. Ọ be khẹke nin ọle rẹọbhọ ghe ẹmhọn ọlẹn bha rẹtẹ Osẹnobulua? Eye. Ebe khẹke nin ọle lu hi, nin ọle rẹ dọ “fẹ otọ emhin rebhe ghe.” Ọnin hi, nin ọle rẹ dọ fẹ ẹlo nin Jehova rẹ gene ghe ọle.
5. Be imhan ha rẹ sabọ lẹn ẹlo nin Jehova rẹ ghe ene emhin ne re mhan mhọn edandan?
5 Mhan da ha tie Baibo, inian ọ diabe mhan ka Jehova ehọ. Ọkpakinọn, ahamiẹn mhan ho nin mhan lẹn ẹlo nin Jehova rẹ ghe emhin nọn re mhan mhọn edandan, ọkhẹke nin mhan lu gbera nin mhan rẹ gheghe ha tie Baibo. Ọkhẹke nin mhan dọ gua otọ ọne emhin bhi iluẹmhin Baibo nọnsẹmhan. Mhan sabọ rẹ noo ene emhin nan rẹ luẹ Baibo dinmhin nin agbotu nọnsi Jehova zẹ ele egbe dagbare rẹ gua otọ ọne ẹmhọn. (Prov. 2:3-6) Beji mhan rẹ luẹ emhin dinmhin, mhan sabọ yẹ rẹ bhii Jehova nọn rẹkpa mhan rẹ daghe ẹlo nin ọle ghe ọne emhin nin mhan da mhọn edandan. Sẹyẹ, mhan sabọ rẹ dọ guanọ adia, bi emhin kẹkẹ ne rẹso idia nin mhan ye. Rẹ deba ọnin, ọ dẹ ha mhẹn nin mhan rẹ dọ tie okha ọsi ẹbho bhi Baibo nin idia nin ele ha ye diabe ọsẹmhan.
6. Be ikolo oga ha rẹ sabọ rẹkpa mhan yẹ rẹ khọn edandan?
6 Mhan yẹ wo ka Jehova ehọ sade mhan vae bhi ikolo oga. Ahamiẹn mhan vae bhi ikolo oga ẹghe rebhe, asabọmiẹn mhan dẹ wo miẹn emhin nọn ha rẹkpa mhan rẹ khọn edandan nin mhan mhọn bhi ọta nin obhio mhan ha rẹman, la bhi ewanniẹn nin obhio mhan ha re ọbhi inọnta. (Prov. 27:17) Bhi ejayenan nian, bha ji mhan zilo nyan emhin ne ha sabọ rẹkpa mhan rẹ khọn edandan eso nin mhan ha sabọ ha mhọn.
SADE UWẸ RIALE SI ẸMHỌN ẸN GENE RẸTẸ JEHOVA
7. Inọnta nela ẹbho eso ha sabọ ha mhọn?
7 Uwẹ sẹ ka nọọn egbe ẹ ọne inọnta nan khẹ, ‘Jehova gene lẹn si mẹn ribhọ?’ Ahamiẹn uwẹ riale ghe uwẹ bha si emhin soso, ọ sabọ rẹ dọ dia uwẹ bhi egbe ghe, uwẹ i da sabọ ha yi ọmọẹ Osẹnobulua nin Aman nọn man emhin rebhe. Asabọmiẹn Devid nin Ojie yẹ ka re inian ha ria eria. Ọ da han ọle ilo ghe, Jehova bhọ gbẹlokotọ bhi egbe eria. Ọle da yọle: “Eo Jehova, họla hi okpea nin uwẹ ha da ha daghe ọle? La họla ọmọn nọnsi okpea nọn sabọ yu nin uwẹ ha da ha gbẹlokotọ bhi egbe ọle?” (Ps. 144:3) Ijela mhan ha da sabọ miẹn ebe ha rẹkpa mhan sade mhan riale si ẹmhọn mhan gene rẹtẹ Jehova?
8. Beji 1 Samuel 16:6, 7, 10-12 rẹman, be Jehova daghe bhi egbe ẹbho?
8 Baibo yọle ghe, Jehova gbẹlokotọ bhi egbe eria nin ẹbho bhọ re ẹlo gbe a. Bhi ọsi ijiẹmhin, bhi ẹghe nin Jehova rẹ je Samuẹl diọbhi uwa ọsi Jesi nin ọle dọ re ọkpa bhi imọn nesọle kiẹn ojie, Jesi da tie ihinlọn bhi ẹwẹ imọn-ikpea elẹnlẹn nesọle dagbare, ọkpakinọn, ọle bha tie Devid nọn khere nẹ bhi ẹwẹ ele. b Ọrẹyiriọ, Devid hi ọnin Jehova zẹle. (Tie 1 Samuel 16:6, 7, 10-12.) Jehova daghe unan ọria nin Devid gene khin bhi ẹkẹ ọkhọle. Ọle lẹnmhin ghe Devid wo gene hoẹmhọn ọlẹn.
9. Bezẹle nin uwẹ ha da sabọ ha mhọnlẹn bhi ọkhọle ghe ẹmhọn ẹ rẹtẹ Jehova? (Yẹ fẹ ifoto ghe.)
9 Ria eria nyan uwedẹ kẹkẹ nin Jehova sẹ rẹ rẹman ghe, ẹmhọn ẹn rẹtẹ ọle. Ọle sẹ wo re adia nọn khẹke idia nin uwẹ ye nin uwẹ. (Ps. 32:8) Ọle i rẹ sabọ lu ọnan sade ọle bha gene lẹn uwẹ nọnsẹn. (Ps. 139:1) Ahamiẹn uwẹ re obọ rẹkhan adia nọnsi Jehova, yẹ daghe ebi ọne adia rẹ rẹkpa uwẹ yẹ, uwẹ ki wo dọ rẹọbhọ ghe, ẹmhọn uwẹ gene rẹtẹ ọle. (1 Chron. 28:9; Iwẹn. 17:26, 27) Jehova daghe uwedẹ nin uwẹ rẹ dọnmhegbe rẹ ha ga ọle. Ọle daghe ikpẹ esili kẹkẹ nin uwẹ mhọn, sẹyẹ, ọle ho nin ọle ha yi ọmọẹ ẹ. (Jer. 17:10) Ọ dẹ wo manman re ọle ha ghọnghọn sade uwẹ zegbere nin uwẹ rẹ kiẹn ọmọẹ ọle.—1 Jọni 4:19.
“Uwẹ ha guanọ [Jehova], ọle ki zegbere nin uwẹ miẹn.”—1 Chron. 28:9 (Fẹ uduọle nọnzi 9 ghe) c
SADE UWẸ RIALE SI EMHIN NỌN GBALE UWẸ ZẸ RẸ LU BHI ẸGHE NỌN GBERA
10. Ahamiẹn mhan ria eria nyan emhin nin mhan zẹ rẹ lu bhi ẹghe nọn gbera, inọnta eso nela ha sabọ zegbere?
10 Beji ẹghe rẹ khian, eria eso sabọ rẹ dọ ha riale si emhin nọn gbale ele gene zẹ rẹ lu bhi ẹghe nọn gbera. Asabọmiẹn ele zobọ bhi iwẹnna nọn manman ha re igho nin ele, la zobọ bhi ẹki nin ele rẹ ha do beji ele ha da sabọ manman ha lu iwẹnna oga. Bhi eyayenan nian, ikpe ne bunbun gbera, sẹyẹ, ele dọ miẹn ọria nin ele lẹn nọn zẹ rẹ ha khu ẹfe nin emhin wo dọ kiọnlẹn nan, nin egbe yẹ wo fure. Ranmhude ọnan, ele sabọ rẹ dọ ha riale: ‘Ene emhin nin mẹn fikekegbe ẹghenin beji mẹn ha da sabọ manman ha ga Jehova be gene khẹke? La, ọ be rẹ mẹn mun isẹhoa fia nin mẹn ha rẹ manman fe?’
11. Emhin nela ha kpokpo ọria nọn gbẹn ebe ọsi Psalm 73 bhi ọkhọle?
11 Ahamiẹn uwẹ sẹ ka nọọn egbe ẹ inọnta ne sẹnian khẹ, ọ dẹ ha mhẹn nin uwẹ rẹ ria eria nyan ebi egbe dia ọria nọn gbẹn Psalm 73 yẹ. Ọle da daghe ọle ghe emhin wo ha kiọnlẹn nin eria ne i ga Jehova, ele wo sọnyẹnmhẹn, sẹyẹ emhin i zẹwẹ kpokpo ele. (Ps. 73:3-5, 12) Beji ọle ki daghe ọnan, ọ da dia ọle bhi egbe ghe ihoho emhin rebhe nin ọle lu khin nin ọle rẹ sabọ ha ga Jehova. Ọne iria-eria nan da wo ha kpokpo ọle bhi ọkhọle ẹghe rebhe. (Ps. 73:13, 14) Be ọle ki rẹ re ọne ẹmhọn nan khian yẹ?
12. Beji Psalm 73:16-18 rẹman, be rẹkpa ọria nọn gbẹn ọne ebe ọsi psalm nan rẹ sabọ khọn emhin nọn re ọle ha kpokpo egbe?
12 Tie Psalm 73:16-18. Ọne ọria nọn gbẹn ọne ebe ọsi psalm nan da diọbhi uwa oga nọnsi Jehova. Bhi enin, ọle da sabọ ria eria nọnsẹn. Ọle da dọ kere ghe, arẹmiẹn eria eso mhọn iẹnlẹn nọn mhẹn nian, ele i mhọn ikhuaẹloghe rẹji ẹghe odalo. Ọnan da rẹkpa ọle rẹ sabọ ha mhọn ọkhọle nọn lọre. Sẹyẹ, ọle da dọ kere ghe, nan rẹ mun ilọnmhọn oga kalo bhi iẹnlẹn, ọle emhin nọn mhẹn nẹ nin ọria ha sabọ zẹ rẹ lu. Ọnan da re ọle muegbe rẹ wo ha ga Jehova khian.—Ps. 73:23-28.
13. Be ha rẹkpa mhan rẹ sabọ ha mhọn ọkhọle nọn lọre sade mhan kpokpo egbe ba ẹmhọn emhin nin mhan zẹ rẹ lu bhi ẹghe nọn gbera? (Yẹ fẹ ifoto ghe.)
13 Baibo dẹ sabọ rẹkpa uwẹ rẹ inian ha mhọn ọkhọle nọn lọre. Be ọ rẹ yi iriọ yẹ? Ria ẹmhọn ene erọnmhọn kẹkẹ nin uwẹ miẹn bhi obọ Jehova nian, bi ene uwẹ ha miẹn bhi ẹghe odalo. Sẹyẹ, re ele khọkhọ ẹghe odalo ọsi eria nan miẹn ghe, emhin nin ọne agbọn nan ha re nin ele ọkpa hi emhin nọn ha sẹ ele obọ. Rẹji ẹbho ne i ga Jehova, ẹmhọn ẹfe bi nan rẹ kiẹn okpọria bhi ọne agbọn nan, ọle hi emhin nọn manman lu uhọnmhọn emhin rẹji ele, ranmhude ele i mhọn ikhuaẹloghe. Ọkpakinọn, rẹji uwẹ, ẹmhọn ive nesi Jehova manman lu uhọnmhọn emhin gbera emhin nọn hi ki rẹ khin nin uwẹ ha sabọ ha mhọn nian. (Ps. 145:16) Rẹ deba ọnin, ria ẹmhọn nan ghe: Mhan dẹ be gene lẹn ebi iẹnlẹn nọnsẹmhan ha rẹ dia yẹ sade emhin ọbhebhe mhan zẹ rẹ lu nọn? Emhin ọkpa nin mhan lẹn khọnan: Ẹghe i ribhọ nin emhin esili ha rẹ yulu eria ne ji oyẹẹ nin ele mhọn da Jehova bi idiake nesele da rẹso emhin nin ele zẹ rẹ lu bhi iẹnlẹn.
Ha khuaẹloghe ene ive nin Jehova ve nin uwẹ (Fẹ uduọle nọnzi 13 ghe) d
SADE UWẸ RIALE SI JEHOVA YẸ MHỌN EBI ỌLE RE UWẸ LU
14. Idia nela eguọmhandia nesi Jehova eso ye? Inọnta nela ọnan ha sabọ re ele ha mhọn?
14 Eso bhi eguọmhadia nesi Jehova i yẹ sabọ lu eka nin ele ka lu khẹ ranmhude idọmanlẹn bi emianmhẹn. Ọnan sabọ rẹ re ele ha riale ghe ele bha yẹ sẹ emhin soso bhi ẹlo nọnsi Jehova. Ele bhọ sabọ rẹ ha nọọn yọle: ‘Jehova bhọ yẹ mhọn ebi ọle re mẹn lu?’
15. Izebhudu nela ọria nọn gbẹn Psalm 71 ha mhọnlẹn?
15 Ọria nọn gbẹn Psalm 71 yẹ ha mhọn iria-eria nọn sẹnian. Ọle da bhii ji Jehova yọle: “Hẹi mun mẹn fia sade mẹn ki dọmanlẹn.” (Ps. 71:9, 18) Ọrẹyiriọ, ọle wo ha mhọn ọne izebhudu ghe, ahamiẹn ọle wo ha ga Osẹnobulua khian, Osẹnobulua dẹ wo ha dia ọle yẹ rẹkpa ọle. Ọne ọria nọn gbẹn ọne ebe ọsi psalm nan da dọ kere ghe, ẹmhọn eria ne sẹyẹ dọnmhegbe rẹ ha ga Jehova aharẹmiẹn ele ki dọmanlẹn la ne emianmhẹn dan wo ti ọle bhọ.—Ps. 37:23-25.
16. Emhin eso nela ibhio mhan ne wanre yẹ sabọ lu nin Jehova? (Psalm 92:12-15)
16 Ibhio mhan ne ki wanre, ibha ha ghe idia nin bha ye bhi uwedẹ nin Jehova rẹ ghe ọle. Be ha rẹkpa ibha rẹ wo ha ga Jehova khian aharẹmiẹn egbe nọnsẹbha bha yẹ diabe ọnikhẹ? (Tie Psalm 92:12-15.) Nin uwẹ rẹ dọ ha ria ẹmhọn emhin nin uwẹ i yẹ sabọ lu, ọ dẹ ha mhẹn nin uwẹ rẹ denọ ẹlo ọbhi ọne uwẹ sabọ lu nian. Bhi ọsi ijiẹmhin, uwẹ dẹ sabọ re ijiẹmhin esili nọnsẹ, bi uwedẹ nin uwẹ rẹ ji ẹmhọn ẹbho da rẹtẹ ẹ rẹ re izebhudu nin ibhio mhan. Uwẹ sabọ rẹ ha taman ibhio mhan ebi Jehova sẹ rẹ rẹkpa uwẹ yẹ bhi ene ikpe ne gbera, bi ive bhi Baibo nin uwẹ guanọ ne munsẹ bhi ẹghe odalo. Rẹ deba ọnin, hẹi yelea ghe ene erọnmhọn nin uwẹ nan nin ene ibhio mhan manman wo rẹkpa ele. (1 Pita 3:12) Idia nọn hi ki rẹ khin nin mhan ye, mhan rebhe mhọn emhin nin mhan ha sabọ re nin Jehova bi ẹbho ebhebhe.
17. Bezẹle nọn bha da khẹke nin mhan ha re ebi mhan sabọ lu rẹ khọkhọ ọsi ẹbho ebhebhe?
17 Ahamiẹn ọ re egbe lọ uwẹ ranmhude uwẹ i yẹ sabọ lu eka nin uwẹ ka lu khẹ bhi oga nọnsi Jehova, ha mhọnlẹn bhi ọkhọle ghe eka nin uwẹ sabọ lu nian wo ti ọle bhọ. Ọ sabọ rẹ ha ghọn uwẹ rẹ ha re ebi uwẹ sabọ lu khọkhọ ọsi ẹbho nekẹle. Ọkpakinọn, rẹban ọkhọle nọn sẹ iriọ. Bezẹle? Ranmhude Jehova i re ebi uwẹ sabọ lu rẹ khọkhọ ọsi ẹbho nekẹle. (Gal. 6:4) Bhi ọsi ijiẹmhin, Meri da re abhili nọn ghanlẹn rẹ lu ẹsele nin Jesu. (Jọni 12:3-5) Bhi obọ nọnkẹle, ọne okhuo nọn i yẹ mhọn ọdọ, nọn yẹ yi obhioguele da ne ikpe igho eva nọn bha sẹ emhin soso ọbhi ẹkẹ ẹkpẹti bhi uwa oga. (Luk 21:1-4) Ọrẹyiriọ, Jesu bha re ebi ene ikhuo nan lu rẹ ha khọkhọ egbe. Sokpan, ọle daghe ọle ghe, urẹọbhọ nin ele mhọn re ele lu emhin nin ele lu. Ebi emhin nin uwẹ re nin Jehova hi ki rẹ khere sẹ yẹ bhi ẹlo nọnsẹ, ha mhọnlẹn bhi ọkhọle ghe, ọ ti Jehova bhọ sade oyẹẹ bi ọtibhọ nin uwẹ mhọn da ọle re uwẹ lu ọle.
18. Be ha rẹkpa mhan rẹ khọn edandan nin mhan mhọn? (Yẹ fẹ ọne ẹkpẹti ghe nọn yọle, “ Baibo Dẹ Sabọ Rẹkpa Uwẹ Rẹ Khọn Edandan.”)
18 Mhan rebhe mhọn edandan ẹgheso, ọkpakinọn beji mhan zilo ọle, Ọta nọnsi Osẹnobulua dẹ rẹkpa mhan rẹ sabọ khọn ele. Bhiriọ, dọnmhegbe rẹ khọn emhin ne re uwẹ mhọn edandan. Uwẹ ha lu iriọ, uwẹ ki manman deziẹn, sẹyẹ uwẹ i da yẹ manman ha kpokpo egbe. Ene emhin kẹkẹ nin uwẹ lu beji uwẹ ha da sabọ mun ẹmhọn iho nọnsi Jehova kalo bhi iẹnlẹn nọnsẹ manman wo ti ọle bhọ, sẹyẹ, ọle dẹ ranmhude ele re ihaosa nin uwẹ. Ha mhọnlẹn bhi ọkhọle ghe, Jehova hoẹmhọn ọdeọde bhi ẹwẹ eguọmhandia nesọle, sẹyẹ ẹmhọn ele rẹtẹ ọle.
ILLO 111 Emhin Ne Rẹ Mhan Sọnyẹnmhẹn
a ỌTA NAN RE OTỌLE MAN NỌNSẸN: Edandan ne ha sabọ re mhan ha riale si ẹmhọn mhan gene rẹtẹ Jehova, la si ẹwanlẹn gene ribhi emhin nin mhan zẹ rẹ lu bhi ẹghe nọn gbera mhan da zilo ọle bhi ọne uhọnmhọn-ọta nan. Enan dikẹ bhi edandan nan tẹmhọnlẹn bhi Baibo ne ha sabọ rẹman ghe ọria i yẹ mhọn urẹọbhọ da Jehova bi ive nesọle.
b Arẹmiẹn Baibo bha wo taman mhan eka ikpe nin Devid ha ye beji Jehova zẹ ọle, asabọmiẹn usẹn ọle ha khin bhi ọne ẹghe. Fẹ Watchtower ọsi Sẹtẹmba 1, 2011 ghe, apapale nọnzi 29, uduọle nọnzi 2.
c EMHIN NAN RẸMAN BHI IFOTO : Obhio mhan nin usẹn guanọ adia bhi Baibo, nin ọle rẹ sabọ lẹn ebi Jehova ghe idia nin ọle ye yẹ.
d EMHIN NAN RẸMAN BHI IFOTO : Beji obhio mhan nin okpea rẹ nin ẹbho gbo iwindo beji ọle ha da sabọ miẹn ebi ọle ha rẹ ha gbẹloghe azagba-uwa nọnsọle, ọle wo re ọkhọle muno ebi iẹnlẹn ha diayẹ bhi agbọn ọsọgbọn.
