UHỌNMHỌN-ỌTA NỌNZI 42
ILLO 103 Ewanlẹn Nin Jehova Ne Nin Mhan
Rẹman Ghe Ẹmhọn Ene Ikpea Nin Jehova Bi Jesu Noo Rẹ Dia Agbotu Ti Uwẹ Bhọ
“Ẹghe nin ọle rẹ diọbhi eje yoyo . . . , ọle da re ikpea rẹ lu ẹsele.”—ẸFẸ. 4:8.
EBI A HA LUẸ BHỌ
Mhan dẹ zilo nyan ebi ene zẹ sikẹ ene ewanlẹn, ene ewanlẹn bi ene ọfẹotughe rẹ rẹkpa mhan yẹ, bi ebi mhan ha rẹ rẹman yẹ ghe emhin nin ele lu ti mhan bhọ.
1. Emhin eso nela Jesu sẹ lu nin mhan?
ỌRIA i ribhọ nọn sẹ lu ẹsele sẹbii Jesu. Beji ọle ribhi ọne otọ nan, ọle da wo ha lu emhin ọhan-ilo rẹ rẹkpa ẹbho. (Luk 9:12-17) Ẹsele nọn ke okhun nẹ nin ọle lu nin mhan hi, nin ọle rẹ re iẹnlẹn nọnsọle rẹ zọese nin mhan. (Jọni 15:13) Beji Jesu riọkpanọ fo, ọle da sẹyẹ ha lu ẹsele nin mhan. Ọle da ve ghe ọle dẹ ne mhan bhii Jehova nọn re ẹlinmhin nọn khiale nọnsọle nin mhan rẹ sabọ lẹn otọ ebi mhan luẹ, yẹ rẹ ko mhan udu re. Ọle gene wo ha mun ọne ive nan sẹ. (Jọni 14:16, 17, 16:13) Rẹ deba ọnin, Jesu yẹ wo ha noo ikolo oga nesẹmhan rẹ man mhan emhin, beji mhan ha da sabọ ha re ẹbho kiẹn edibo bhi ọne otọ agbọn nan rebhe.—Mat. 28:18-20.
2. Hela deba bhi ene “ikpea” nan tẹmhọnlẹn bhi Ẹfẹsọs 4:7, 8?
2 Bha ji mhan zilo nyan emhin esilli ọbhebhe nin Jesu lu nin mhan. Pọl nin odibo da gbẹn yọle ghe, beji Jesu diọbhi okhun fo, “ọle da re ikpea rẹ lu ẹsele.” (Tie Ẹfẹsọs 4:7, 8.) Beji Pọl re otọle man, Jesu ne ene ikpea nan nin mhan beji ele ha da ha miẹnsọn kẹkẹ bhi agbotu. (Ẹfẹ. 1:22, 23; 4:11-13) Ẹlẹnan nian, ene zẹ sikẹ ene ewanlẹn, ene ewanlẹn bi ene ọfẹotughe deba bhi ene ikpea nin Jesu rẹ lu ẹsele nin mhan. a Bhi ọsi ẹmhọanta, ọ bha gba nin ene ikpea nan, bhiriọ ele dobọ ẹgheso. (Jem. 3:2) Ọrẹyiriọ, Jesu Kristi nin Ebeanlẹn mhan sẹyẹ wo noo ele rẹ rẹkpa mhan. Ẹsele ele khin rẹji mhan.
3. Noo ijiẹmhin rẹ rẹman ebi mhan ha rẹ sabọ rẹkpa ene ikpea nan rẹ lu ẹsele nin mhan yẹ bhi ẹsọn nin ele miẹn.
3 Ẹsọn nin Jesu mun nin ene ikpea nan hi, nin ele rẹ ha ziẹn agbotu. (Ẹfẹ. 4:12) Ọkpakinọn, mhan rebhe dẹ sabọ rẹkpa ele bhi ọne ẹsọn kpataki nan mun nin ele. Mhan dẹ sabọ re ọnan khọkhọ ebe sunu sade a bọn Kindọn Họọ. Eso wo gene bọn ọne Kindọn Họọ tee, eso re obọkpa bhi ọne ẹsọn bhi uwedẹ ebhebhe, bọsi, nan rẹ nyẹn ebale, yo uhọnmhunje, bi ẹsọn kikẹ ebhebhe. Iriọ yẹ nọn, mhan dẹ sabọ noo ọta nin mhan ta, bi emhin nin mhan lu rẹ rẹkpa ene zẹ sikẹ ene ewanlẹn, ene ewanlẹn bi ene ọfẹotughe bhi ẹsọn nin ele miẹn. Bha ji mhan fẹ ebi mhan rẹ miẹn elele yẹ bhi ẹsọn nin ele miẹn, bi ebi mhan ha rẹ sabọ rẹman ele bi Jesu nọn ne ele nin mhan ghe, ẹmhọn ele ti mhan bhọ.
ENE ZẸ SIKẸ ENE EWANLẸN WO “RE IYOBỌ NIN ẸBHO”
4. Ẹsọn kpataki nela ene zẹ sikẹ ene ewanlẹn ha miẹn bhi ore nin ọhẹnhẹn?
4 Bhi ore nin ọhẹnhẹn, a da zẹ eria eso ne ha ga bhi ihe ọsi ene zẹ sikẹ ene ewanlẹn. (1 Tim. 3:8) Ọ diabe ghe, ele hi ene ha wẹnna rẹ “re iyobọ nin ẹbho” nin Pọl tẹmhọn ọlẹn. (1 Kọr. 12:28) Bhiriọ, ọ diabe ghe, ene zẹ sikẹ ene ewanlẹn nan wo ha miẹnsọn kpataki kẹkẹ beji ene ewanlẹn ha da miotọ rẹ wo ha man emhin, yẹ ha re izebhudu nin ibhio ele. Bhi ọsi ijiẹmhin, asabọmiẹn ene zẹ sikẹ ene ewanlẹn nan wo ha rẹkpa gbẹn Ebenọnkhiale dagbare, la rẹkpa dẹ emhin nan ha rẹ ha gbẹn ọlẹn diọbhi ebe ọbhebhe.
5. Ẹsọn kpataki eso nela ene zẹ sikẹ ene ewanlẹn miẹn ẹlẹnan?
5 Ria ẹmhọn iwẹnna kpataki eso nin ene zẹ sikẹ ene ewanlẹn miẹn bhi agbotu nin uwẹ ye. (1 Pita 4:10) Ele rẹkpa koko igho nan re ọbhi ẹkpẹti bhi ikolo oga, ele rẹkpa agbotu je ebe, yẹ gha ọle nin ibhio mhan. Ele rẹkpa khue illo bi ividio bhi ikolo oga, man ẹbho eji ele ha da dotua, rẹkpa re Kindọn Họọ i nọnsẹn, bi ẹsọn ebhebhe ne dia inian. Ene iwẹnna nan nin ele lu rẹkpa mhan rẹ ha sọnyẹnmhẹn bhi ikolo oga, bi iwẹnna itẹmhọn Osẹnobulua. (1 Kọr. 14:40) Rẹ deba ọnin, eso bhi ene zẹ sikẹ ene ewanlẹn re ọta man bhi ikolo oga nan do bhi ẹkẹ uzana, yẹ re ọta ogbakha man. Ele yẹ rẹkpa ibhio mhan ne sun usun nan rẹ dagbare bhi inẹbho. Ẹgheso, ene zẹ sikẹ ene ewanlẹn ne manman fuẹlo rẹkhan ene ewanlẹn sade ele khian dọ re Baibo rẹ re ikoudure nin ibhio mhan.
6. Be re ẹmhọn ibhio mhan ne zẹ sikẹ ene ewanlẹn ti mhan bhọ?
6 Be ibhio mhan rẹ miẹn elele yẹ bhi iwẹnna nin ene zẹ sikẹ ene ewanlẹn miẹn bhi agbotu? Obhio mhan nin okhuo natiọle Beberly b nọn nyẹnlẹn bhi Bolivia da yọle, “Mẹn manman wo khuẹnmhẹn ene ibhio mhan ne zẹ sikẹ ene ewanlẹn. Ranmhude ẹsọn nin ele miẹn, mẹn sabọ wo sọnyẹnmhẹn bhi ikolo oga, sabọ so illo, re ewanniẹn ọbhi inọnta, kaehọ ọta, yẹ luẹ emhin bhi ividio bi ifoto nan rẹman. Ele wo gbẹlokotọ bhi ije rebhe sade a do ikolo oga beji ele ha da gbega ọrebhe. Ele rẹkpa eria ne bha sabọ vae bhi ikolo rẹ sabọ re ifoni deba. A ha zobọ bhi ikolo, ele rẹkpa re Kindọn Họọ i nọnsẹn, koko igho nan miẹn, yẹ rẹkpa ọrebhe rẹ ha mhọn ebe nesẹmhan nin ele guanọ. Ẹsọn nin ele miẹn wo manman ti mẹn bhọ!” Leslie nọn nyẹnlẹn bhi Colombia nin ọdọ ọle yẹ yi ọwanlẹn da yọle: “Ene zẹ sikẹ ene ewanlẹn rẹkpa ọdọ mẹn rẹ sabọ ha miẹnsọn kẹkẹ nin ọle miẹn bhi agbotu. Sade ọ i yi ele nọn, ẹsọn ha rẹ bun ọlẹn gbe. Bhiriọ, mẹn manman khuẹnmhẹn ele bhi ọyaya nin ele rẹman, bi uwedẹ nin ele rẹ zegbere.” Edandan i ribhọ ghe ẹsọn nin ene zẹ sikẹ ene ewanlẹn miẹn bhi agbotu wo ti mhan bhọ.—1 Tim. 3:13.
7. Be imhan ha rẹ rẹman yẹ ghe iwẹnna nin ene zẹ sikẹ ene ewanlẹn lu ti mhan bhọ? (Yẹ fẹ ifoto ghe.)
7 Ẹmhọanta nọn ghe ẹsọn nin ene zẹ sikẹ ene ewanlẹn miẹn ti mhan bhọ, ọrẹyiriọ, ọkhẹke nin mhan ji ele lẹn ghe ọ ti mhan bhọ. (Kol. 3:15) Bha ji mhan fẹ ebi obhio mhan natiọle Krzysztof, nọn yi ọwanlẹn bhi agbotu ọkpa bhi Finland rẹ rẹman yẹ ghe ẹsọn nin ene zẹ sikẹ ene ewanlẹn miẹn ti ọle bhọ. Ọle da yọle, “Mẹn ki gbẹn emhin ọbhi kadi, la bhi foni ji obhio mhan nọn zẹ sikẹ ene ewanlẹn. Bhi ẹkẹ ọle, mẹn ki tẹmhọn emhin nin ọle sẹ lu nọn re izebhudu nin mẹn, la gbẹn ulọnlẹn ọkpa bhi Baibo ọbhọ. Sẹyẹ, mẹn ki tẹmhọn ebezẹle nin ẹsọn nin ọle miẹn da manman ti mẹn bhọ.” Ẹghe rebhe Pascal bi okhuo ọle nin Jael ne nyẹnlẹn bhi New Caledonia rẹ nan erọnmhọn ji ibhio mhan ne zẹ sikẹ ene ewanlẹn. Pascal da yọle: “Bhi ẹghe nọn bha sẹ ree gbe nian, ibhio mhan ne zẹ sikẹ ene ewanlẹn mhan manman wo ha nan erọnmhọn je. Mhan ki khuẹnmhẹn Jehova nin ọle rẹ ne ele nin mhan, yẹ bhii ọle nin ọle ne ele dia yẹ ha rẹkpa ele.” Jehova họn erọnmhọn ne sẹnian, sẹyẹ ibhio mhan rebhe bhi agbotu miẹn elele bhọ.—2 Kọr. 1:11.
ENE EWANLẸN “WO HA WẸNNA KAKA BHI ẸWẸ BHA”
8. Bezẹle nin Pọl da yọle ghe, ewanlẹn bhi ore nin ọhẹnhẹn wo “wẹnna kaka”? (1 Tẹsẹlonaika 5:12, 13)
8 Ewanlẹn bhi ore nin ọhẹnhẹn wo ha wẹnna kaka bhi agbotu. (Tie 1 Tẹsẹlonaika 5:12, 13; 1 Tim. 5:17) Ele hi ene ha “sun” agbotu. Ikolo oga nin ele rẹkpa ha do, bi ebi ha rẹ ha re emhin khian yẹ nin ele kugbe ha mhanmhan ele rẹ ha lu ọnan. Ele yẹ ha “re adia” nin ibhio ele beji ele ha da sabọ ha sun rẹkhan Jehova khian. (1 Tẹsẹ. 2:11, 12; 2 Tim. 4:2) Bhi ọsi ẹmhọanta, ene ibhio mhan nan wo ha wẹnna kaka nin ele rẹ sabọ ha gbẹloghe azagba-uwa nọnsele, yẹ rẹ sabọ ha ziẹn urẹọbhọ bi ikolu nin ele bi Jehova ko mhọn.—1 Tim. 3:2, 4; Taitọs 1:6-9.
9. Ẹsọn eso nela ene ewanlẹn miẹn ẹlẹnan?
9 Ene ewanlẹn yẹ wo mhọn ẹsọn ne bunbun nin ele miẹn ẹlẹnan. Ele wo tẹmhọn Osẹnobulua. (2 Tim. 4:5) Ele mun ọkalo bhi iwẹnna itẹmhọn Osẹnobulua, mhanmhan ebi a ha rẹ ha tẹmhọn Osẹnobulua yẹ bhi idunmhun nin ele da lu ọle, man ibhio mhan ebi a rẹ lu ọne iwẹnna yẹ, bi ebi a rẹ man emhin nọnsẹn yẹ. Ele yẹ lu iwẹnna ọsi ọbhuohiẹn. Ele re itohan man yẹ bhuohiẹn bhi uwedẹ nọn gbale. Ahamiẹn ọria bhi agbotu lu emhin ebe nọn manman kaka, ene ewanlẹn dọnmhegbe rẹ rẹkpa ọle rẹ kie sabọ deba Jehova ha mhọn ikolu nọn mhẹn. Beji ele rẹ lu iriọ, ele yẹ wo dọnmhegbe rẹ kpe agbotu khia. (1 Kọr. 5:12, 13; Gal. 6:1) Iwẹnna ọsi ọsun-ohuan, ọle iwẹnna nan manman lẹn ene ewanlẹn ọ i. (1 Pita 5:1-3) Ele wo re ẹghe ọbhi otọ rẹ muegbe ọta ọbhi otọ yẹ re ọle man nọnsẹn. Ele dọnmhegbe rẹ lẹn ọrebhe bhi agbotu, yẹ re Baibo rẹ ko ibhio mhan udu re. Ewanlẹn eso yẹ robọkpa bhi Kindọn Họọ nan bọn, yẹ re ele i nọnsẹn. Ele wo miẹnsọn kaka bhi usikoko ne nẹ nesẹmhan. Ele deba Otu Ewanlẹn Nin Agbotu Je Bu IDọkitọ, Otu Ewanlẹn Ne Rẹnẹ Ji Ibhio Mhan Ne Khọnmhọn, yẹ lu iwẹnna ebhebhe ne dia iriọ. Ene ewanlẹn manman miẹnsọn kaka rẹ rẹkpa mhan.
10. Emhin eso nela re ẹmhọn ene ewanlẹn ne wo ha wẹnna kaka bhi agbotu ti mhan bhọ?
10 Jehova ka tale ọbhi otọ ghe, ene ewanlẹn nan rẹ khọkhọ ọsun-ohuan dẹ ha gbẹloghe mhan, sẹyẹ, ranmhude ele, ‘ofẹn iyẹ da ha mun mhan, la nin oriri ha gbe ku mhan.’ (Jer. 23:4) Obhio mhan nin okhuo natiọle Johanna nọn nyẹnlẹn bhi Finland da kere ghe ẹmhọanta ene ẹmhọn nan khin bhi ẹghe nin inẹn ọlẹn rẹ ha khọnmhọn emianmhẹn nọn manman kaka. Ọle da yọle: “Arẹmiẹn ọ wo ha nọghọ mhẹn rẹ tẹmhọn ebi emhin dia mẹn bhi egbe yẹ man ẹbho, ọwanlẹn ọkpa nin mẹn bha manman re iriọ lẹn da wo re iziẹngbe ka mẹn ehọ bhi ẹghe nin mẹn rẹ ha tẹmhọn emhin ne kpokpo mẹn man ọlẹn. Ọle da deba mẹn nan erọnmhọn yẹ ji mẹn lẹn ghe Jehova hoẹmhọn mẹn. Arẹmiẹn mẹn bha yẹ ye ebi ọle tale re, mẹn yẹ yere ebi egbe rẹ fu mẹn re yẹ bhi ọne ẹghe nin. Mẹn rẹọbhọ ghe, Jehova hi ọnọn je ọle nin ọle dọ rẹkpa mẹn bhi ọne ẹghe nin tee.” Be ewanlẹn bhi agbotu nin uwẹ ye sẹ rẹ rẹkpa uwẹ yẹ?
11. Be imhan ha rẹ sabọ rẹman ene ewanlẹn yẹ ghe ẹmhọn ele ti mhan bhọ? (Yẹ fẹ ifoto ghe.)
11 Jehova guanọ nin mhan ha khuẹnmhẹn ene ewanlẹn “ranmhude iwẹnna nin ele lu.” (1 Tẹsẹ. 5:12, 13) Henrietta nọn yẹ nyẹnlẹn bhi Finland da yọle: “Ene ewanlẹn wo re ọkhọle rebhe rẹ rẹkpa ẹbho. Sokpan, ọnan bha rẹman ghe ele mhọn ẹghe bi ahu nẹ ẹbho nekẹle, la ele i mhọn ọkakale soso bhi iẹnlẹn. Ẹgheso, mẹn ki wo taman ele yọle, ‘Mẹn ho nin mẹn ji uwẹ lẹn ghe, ọwanlẹn esilli uwẹ wo khin.’” Obhio mhan natiọle Sera nọn nyẹnlẹn bhi Türkiye c da yọle: “Ene ewanlẹn guanọ ikoudure nin ele rẹ sabọ ha miẹnsọn nọnsele. Bhiriọ, mhan dẹ sabọ gbẹn emhin ọbhi kadi ji ele, tie ele nin ele dọ deba mhan le ebale, la deba ele dagbare bhi inẹbho.” Ọwanlẹn be ribhọ nin ẹsọn nin ọlẹ miẹn manman wo ti uwẹ bhọ? Ọ ha yi iriọ, guanọ uwedẹ rẹ rẹman ọlẹn ghe emhin nin ọle lu ti uwẹ bhọ.—1 Kọr. 16:18.
Uwẹ dẹ sabọ ta ọta ikoudure man ibhio mhan nin ikpea ne miẹnsọn bhi agbotu nọn ha rẹkpa ele rẹ sabọ ha miẹn ọne esọn khian (Fẹ uduọle nọnzi 7, 11 bi 15 ghe)
ENE ỌFẸOTUGHE ZIẸN AGBOTU
12. Usun ẹbho ebhebhe nela ha ziẹn agbotu bhi ore nin ọhẹnhẹn? (1 Tẹsẹlonaika 2:7, 8)
12 Jesu yẹ zẹ ikpea eso ne ha rẹkpa agbotu bhi uwedẹ ọbhebhe. Ọle da noo ene ewanlẹn ne ha ribhi Jerusalẹm rẹ re Pọl, Banabas, bi ikpea eso ebhebhe rẹ kiẹn ọfẹotughe. (Iwẹn. 11:22) Bezẹle nan da lu ọnan? Ọle hi, nin ele rẹ dọ ha ziẹn ene agbotu, nọn yi ẹsọn nin ene ewanlẹn bi ene zẹ sikẹ ene ewanlẹn yẹ miẹn. (Iwẹn. 15:40, 41) Ene ikpea nan wo fikekegbe emhin ne bunbun beji ele ha da sabọ ha lu ọne iwẹnna nan. Ẹgheso, ele bhọ mun iẹnlẹn nọnsele fiọbhi okhẹnan beji ele ha da sabọ ha man ibhio ele emhin, yẹ re izebhudu nin ele.—Tie 1 Tẹsẹlonaika 2:7, 8.
13. Ẹsọn kẹkẹ nela ene ọfẹotughe miẹn?
13 Okhian ene ọfẹotughe wo ye. Eso wo khian okhian nọn manman ree rẹ na bhi agbotu ọkpa rẹ sẹbhi ọbhebhe. Uzana-uzana ọfẹotughe re ọta kẹkẹ man, re Baibo re ikoudure nin ibhio mhan, deba ene ekanẹfan do ikolo, re ene ewanlẹn do ikolo, yẹ sun ikolo nan do ọkuẹsẹ a dagbare bhi inẹbho. Ọle sun usikoko nesẹmhan yẹ re ọta man bhọ. Ọle man emhin bhi isiku ọsi ọkanẹfan, yẹ sun ikolo kpataki nin ene ekanẹfan deba ọfẹotughe do. Rẹ deba ene ẹsọn nan rebhe, ọle yẹ wo miẹnsọn kpataki eso nin Bẹtẹ mun nanlẹn, la ẹsọn ebhebhe ne dia iriọ nin ọle ha jẹje lu.
14. Emhin eso nela re ẹmhọn ene ọfẹotughe ti mhan bhọ?
14 Be agbotu rẹ miẹn elele yẹ bhi ẹsọn kẹkẹ nin ene ọfẹotughe miẹn? Rẹji ẹsọn nin ene ọfẹotughe miẹn, obhio mhan nin okpea nọn nyẹnlẹn bhi Türkiye da yọle: “Ẹghe-ẹghe nin ene ọfẹotughe rẹ rẹnẹ vae bhi agbotu nọnsẹmhan, ọ kie manman re ọne ọhubhudu nin mẹn rẹ ha rẹkpa ibhio mhan. Bhi ẹwẹ ọfẹotughe ne bunbun nin mẹn sẹ miẹn, ọsoso i ribhọ nọn ha lu bọsi ghe ẹsọn bu ọle gbe bhi obọ, la ọle i mhọn ẹghe ọria.” Johanna nin mhan ka tẹmhọnlẹn da deba ọfẹotughe ọkpa dagbare bhi inẹbho, ọkpakinọn, ele bha miẹn ọria soso bhi uwa. Ọrẹyiriọ, ọle da yọle: “Mẹn i da ye ọne ukpẹdẹ nin an. Bhi ọne ẹghe nan, ibhio mẹn eva nin ikhuo wo la kpanọ sibhi uwa re, sẹyẹ ẹlo ele da wo manman ha nyan mẹn. Ọne ọfẹotughe da wo re ikoudure nin mẹn, yẹ rẹkpa mẹn rẹ lẹn ghe, asabọmiẹn bhi ejayenan nian, mhan i da wo miẹn isẹhoa rẹ deba azagba-uwa nọnsẹmhan bi ibhio mhan ha nyẹnlẹn kugbe. Sokpan bhi agbọn ọsọgbọn, mhan dẹ miẹn ọne isẹhoa rẹ ko gbe ẹghe kugbe rẹ dọ sẹbhi ighegheghe.” Iriọ ẹmhọn ene ọfẹotughe yẹ rẹ ti ene ibhio mhan bhọ, ranmhude uwedẹ nin ele sẹ rẹ rẹkpa ele.—Iwẹn. 20:37–21:1.
15. (a) Beji 3 Jọni 5-8 rẹman, be imhan ha rẹ rẹman yẹ ghe, ẹsọn nin ene ọfẹotughe miẹn ti mhan bhọ? (Yẹ fẹ ifoto ghe.) (b) Bezẹle nọn da khẹke nin mhan ha khuẹnmhẹn ikhuo ibhio mhan ne ribhi ihe bhi agbotu, sẹyẹ be imhan ha rẹ lu ọle yẹ? (Fẹ ọne ẹkpẹti ghe nọn yọle, “ Ye Ikhuo Ele Re.”)
15 Jọni nin odibo da taman Geyọs ghe, nin ọle ha miẹn ene ibhio mhan ọbhi egbe nọnsẹn sade ele rẹnẹ ji ele. Sẹyẹ, ahamiẹn ele ho nin ele kpanọ, nin ọle “re iyobọ nin ele bhi uwedẹ nọn ha rẹ ti Osẹnobulua bhọ.” (Tie 3 Jọni 5-8.) Uwedẹ ọkpa nin mhan ha rẹ sabọ lu ọnan hi, nin mhan rẹ ha rẹ ha tie ene ọfẹotughe nin ele dọ deba mhan le ebale. Uwedẹ ọbhebhe hi, nin mhan rẹ dagbare bhi inẹbho sade ele rẹnẹ vae bhi agbotu nọnsẹmhan. Uwedẹ ọbhebhe Leslie nin mhan ka tẹmhọnlẹn rẹ khuẹnmhẹn ene ọfẹotughe. Ọle da yọle: “Mẹn bhii Jehova nin ọle re ebe ele guanọ nin ele. Mẹn bi ọdọ mẹn sẹ wo gbẹn ilẹta ji ele rẹ ji ele lẹn ebi ẹnẹ nin ele re ji agbotu nọnsẹmhan sẹ rẹ rẹkpa mhan yẹ.” Yere ghe, eria ọkhọnkhan bii mhan ene ọfẹotughe khin. Ẹgheso, ele khọnmhọnmhin, ele kpokpo egbe, sẹyẹ egbe lọ ele. Asabọmiẹn ọta ikoudure nin uwẹ ha taman ọfẹotughe nọnsẹ, la obhi emhin khere nin uwẹ ha rẹ lu ẹsele nanlẹn, da ha yi ewanniẹn rẹji erọnmhọn nọnsọle.—Prov. 12:25.
A WO GUANỌ IKPEA BHI AGBOTU NỌNSI JEHOVA
16. Beji Proverbs 3:27 rẹman, inọnta eso nela ibhio mhan nin ikpea ha sabọ nọọn egbe ele le?
16 Bhi ọne otọ agbọn nan rebhe, a wo guanọ ikpea ne ha manman ha wẹnna bhi agbotu nọnsi Jehova. Ahamiẹn obhio mhan nin okpea nọn mianmẹn uwẹ khin, ọ dẹ be yẹẹ uwẹ rẹ zegbere? (Tie Proverbs 3:27.) Uwẹ be muegbe nin uwẹ rẹ lu re alo dọ kiẹn ọkpa bhi ene zẹ sikẹ ene ewanlẹn? Ahamiẹn ọkpa bhi ene zẹ sikẹ ene ewanlẹn uwẹ khin, uwẹ be muegbe nin uwẹ rẹ lu re alo dọ ha ga bhi ihe ọsi ewanlẹn? d Uwẹ be muegbe nin uwẹ rẹ fi emhin denọ bhi iẹnlẹn nọnsẹ beji uwẹ ha da sabọ yo Isiku ọsi Ene Tẹmhọn Agbejele? A dẹ man uwẹ emhin bhi ọne isiku nọn ha re Jesu manman noo uwẹ. Ahamiẹn uwẹ riale ghe uwẹ i da sabọ zegbere bhi ene ihe kẹkẹ nan, bhii Jehova nọn rẹkpa ẹ, taman ọlẹn nọn re ẹlinmhin nọnsọle rẹ rẹkpa uwẹ, beji uwẹ ha da sabọ miẹnsọn nọn hi ki rẹ khin nan ha mun nin uwẹ.—Luk 11:13; Iwẹn. 20:28.
17. Be ibhio mhan ne re agbotu khian ẹlẹnan rẹman rẹji Jesu Kristi nin Ojie mhan?
17 Ene ikpea nin Jesu zẹ ne ha re agbotu khian rẹman ghe, ọle wo gene ha dia mhan bhi ọne ẹghe ọkike nan. (Mat. 28:20) Ọ wo manman ti mhan bhọ ghe, mhan mhọn Ojie nọn mhọn oyẹẹ, nọn zẹ emhin bhi obọ, nọn lẹn emhin nin mhan guanọ, nọn yẹ ne ibhio nin mhan ne ha rẹkpa mhan. Bhiriọ, bha ji mhan guanọ uwedẹ kẹkẹ rẹ ha rẹman ene ibhio mhan nan ghe, ẹsọn nin ele miẹn ti mhan bhọ. Sẹyẹ, bha ji mhan wo ha khuẹnmhẹn Jehova nin “emhin esili rebhe bi ẹsele ne mhẹn rebhe,” na obọ ọle vae.—Jem. 1:17.
ILLO 99 Usun Nọn Bun Nin Osẹ Tiele
a Ewanlẹn ne ga bhi ihe ọsi Otu Nọn Sun Oga, ene rẹkpa Otu Nọn Sun Oga, ene Sun IBẹtẹ, bi ibhio mhan ne lu ilọnmhọn oga kẹkẹ ne dia iriọ deba bhi ene ewanlẹn nan.
b Elin ọbhebhe a mun hẹ ele.
c Turkey a ka ha tie ọne agbaẹbho.
d Nin uwẹ rẹ manman luẹ emhin ne ha rẹkpa uwẹ rẹ sabọ ha ga bhi ihe ọsi ene zẹ sikẹ ene ewanlẹn, la ene ewanlẹn, fẹ ene uhọnmhọn-ọta nan ghe nọn yọle “Ibhio Mhan Nin Ikpea—Bha Be Lu Re Alo Rẹ Sabọ Dọ Kiẹn Ene Zẹ Sikẹ Ene Ewanlẹn?” bi “Ibhio Mhan Nin Ikpea—Bha Be Lu Re Alo Rẹ Sabọ Dọ Kiẹn Ọkpa Bhi Ene Ewanlẹn?” bhi Ọkhẹughe ọsi Novẹmba 2024.
