AHAMIẸN uwẹ ho nin uwẹ lẹn eka ẹgogo nan ye, be uwẹ ha lu yẹ? Asabọ miẹn uwẹ ki dọ fẹ ẹgogo ghe. A ha ki miẹn ọria nọọn uwẹ eka ẹgogo a ye, be uwẹ ha rẹ wanniẹn ọlẹn yẹ? Uwedẹ kẹkẹ ribhọ nin uwẹ ha rẹ sabọ taman ọlẹn eka ẹgogo nan ye.

Ji a man yọle ghe ẹgogo ọkpa bi ukhiọnmhẹn a ye. Bhiriọ, uwẹ sabọ taman ọmọẹ ghe ẹgogo ọkpa re ukhiọnmhẹn tu gbera (1:30). Bhi agbaẹbho eso, ele ki yọle ẹgogo igbea re ukhiọnmhẹn tu gbera (13:30). Agbaẹbho eso bhọ yẹ ribhọ ne ha yọle ghe ukhiọmhẹn ẹgogo kẹre nin ẹgogo eva rẹ tu.

Ranmhude ọnọn tie iBaibo uwẹ khin, uwẹ sabọ rẹ ha nọọn egbe ẹ yọle: “Ẹbho ne ha nyẹnlẹn ẹghe nan rẹ ha gbẹn iBaibo, be ele rẹ ha lẹn eka ẹgogo nan ye yẹ? Uwedẹ kẹkẹ ele ha noo. Obọ iBaibo nan re urolo Hebrew rẹ gbẹn sounu bhi “ọsewewiẹ,” “ọsodanmhẹn,” bi “ọsemuan.” (Gen. 8:11; 19:27; 43:16; Deut. 28:29; 1 Ki. 18:26) Sẹyẹ, ele yẹ wo ha mhọn uwedẹ nin ele rẹ ha ta ẹghe nan ye tee.

Ikpe ne bunbun ọkuẹsẹ a biẹ iJesu, ibhokhan Izrẹl da wa asọn ọbhi ijian ea. (Ps. 63:6) Judges 7:19 sounu bhi obọ adesẹ nọn ribhọ. Ọ ki sẹ ẹghe nan rẹ biẹ iJesu, ibhokhan Izrẹl da wa asọn ọbhi ijian enẹn beji ibhokhan iGreek bi Rome luọle.

Edibo nesi Jesu ne gbẹn Matthew, Mark, Luke bi John wo sounu bhi obọle kẹkẹ. Bhi ọsi ijiẹmhin, Matthew da gbẹn yọle ghe, obọle nọnzi enẹn bhi asọn, ọle Jesu rẹ khian na bhi uke amẹn bu edibo nesọle bhi okọ nin ele ha gua. (Matt. 14:25) Bhi ijiẹmhin ọkpa nin ọle tẹmhọnlẹn, Jesu da yọle: “Sade ọnọn nyan uwa lẹn ẹghe nọn khin bhi asọn nin oyi da rẹ vae, ọle ida wẹ. Ọle ida re otọ nin ọne oyi rẹ gbe odẹ a nan ọle bhi uwa.”—Matt. 24:43.

Ene obọle enẹn nan wa asọn ọi, ọle Jesu ha tẹmhọnlẹn ẹghe nin ọle rẹ taman edibo nesọle yọle: “Bha hẹi ji owe re bha, ranmhude, ibha bha lẹn ẹghe nin ọnọn nyan uwa ha rẹ vae, si ọsemuan nọn la si ọsasọn ogiziẹn nọn la si ẹdẹ khian dọ we nọn la si ewewiẹ bhibhibhi nọn.” (Mark 13:35; ftn.) Ẹghe nin oẹnlẹn rẹ defia rẹ dọ sẹbhi ẹgogo isilin ọsemuan, ọle hi obọ ọhẹnhẹn bhi ene obọle enẹn nan wa asọn ọi. Ọzeva nọn ribhọ ki munhẹn bhi ẹgogo isilin rẹ dọ sẹbhi ẹgogo igbeva ọsasọn ogiziẹn. Ẹgogo igbeva rẹ dọ sẹbhi ẹgogo ea ọkuẹsẹ ẹdẹ we, ọle obọle nọnzi ea. Ọne ẹghe nan, ọle ọkpa rẹ viẹ. Asabọ miẹn ọne obọle nan ọkpa rẹ viẹ ọne ọsasọn nan mun iJesu. (Mark 14:72) Ẹgogo ea rẹ dọ sẹbhi ẹghe nin oẹnlẹn ha rẹ hẹn re, ọle obọle nọnzi ẹnẹn.

Bhiriọ, arẹmiẹn ẹbho bha ha mhọn ẹgogo ẹghe nan rẹ ha gbẹn iBaibo, ele yẹ wo ha mhọn uwedẹ nin ele rẹ ha lẹn ẹghe nan ye.