Bha ji mhan fẹ ewanniẹn nin Baibo re ọbhi ene inọnta nan.

Acts 24:15 ji mhan lẹn ghe, “ariọkpanọ bhi uu dẹ ha ribhọ, ọsi ene khiale bi ene bha khia.” Ẹbho ne khiale hi ene hẹnmhọn nin Osẹnobulua ọkuẹsẹ ele yu. Bhiriọ, a da gbẹn elin nọnsele ọbhi ebe ọsi iẹnlẹn. (Mal. 3:16) Ẹbho ne bha miẹn ọne isẹhoa rẹ luẹ ẹmhọn Jehova ọkuẹsẹ ele yu deba ẹbho ne bha khia nan ha riọkpanọ. Bhiriọ, elin nọnsele iribhi ebe ọsi iẹnlẹn.

Ẹbho ọkpa ẹmhọn nọn ribhi John 5:28, 29 bi ọnọn ribhi Acts 24:15 ha talọ je. Jesu yọle ghe, “Ene lu nọnsẹn” ki ha “mhọn uriọkpanọ ọsi iẹnlẹn, ene lu khọlọ ki miẹn uriọkpanọ ọsi ibhohiẹn.” Ene ẹbho ne khiale lu emhin esili ọkuẹsẹ ele yu. Bhiriọ, ele dẹ miẹn ariọkpanọ ọsi iẹnlẹn ranmhude elin nọnsele sẹyẹ ribhi ebe ọsi iẹnlẹn. Sokpan ene ẹbho ne bha khia da lu emhin ne imhẹn ọkuẹsẹ ele yu. Bhiriọ, ele dẹ miẹn ariọkpanọ ọsi ibhohiẹn. Elin nọnsele isẹ ribhi ọne ebe ọsi iẹnlẹn. Sẹyẹ, a dẹ gbẹlokotọ fẹ uwedẹ nin ele ha rẹ nyẹnlẹn yẹ. Bhi ọne ẹghe nin, a dẹ re ọne isẹhoa nin ele rẹ luẹ ẹmhọn Jehova, beji a ha da sabọ gbẹn elin nọnsele ọbhi ebe ọsi iẹnlẹn.

Revelation 20:12, 13 ji mhan lẹn ghe, ọ dẹ khẹke nin ọrebhe nan ha riọkpanọ re obọ rẹkhan “emhin nan gbẹn bhi ene ebe” nan khili. Ọnan hi uhi ọsọgbọn nin Jehova ha gbe nin mhan bhi agbọn ọsọgbọn. Ọkpakinọn, a dẹ fuẹn ẹbho ne bha re obọ rẹkhan ọne uhi nan an.—Isa. 65:20.

Daniel 12:2 ji mhan lẹn ghe, ẹbho eso ne yu dẹ riọkpanọ miẹn iẹnlẹn ighegheghe. Eso ki miẹn ugbekhuelo ọsi ẹdẹdẹmhẹndẹ. Ọne ulọnlẹn nan ji mhan lẹn emhin nọn ha sunu ji ẹbho nan ha riọkpanọ kike. Ele sabọ rẹ miẹn iẹnlẹn ighegheghe, la miẹn ugbekhuelo ọsi ẹdẹdẹmhẹndẹ. Bhiriọ, ikpe 1,000 nin Jesu ha rẹ gbẹloghe ha sotọ, ẹbho eso ki miẹn iẹnlẹn ighegheghe, sokpan, a ki fuẹn enekẹle a sẹsẹsẹ.—Rev. 20:15; 21:3, 4.

Bha ji mhan fẹ ọne ijiẹmhin nan ghe. Inian ene usun ẹbho eva nan ha riọkpanọ diabe ẹbho ne ho nin ele kpanọ bhi agbaẹbho nọnsele dọ ha nyẹnlẹn bhi agbaẹbho ọbhebhe. Ẹbho ne khiale diabe ẹbho nan re ebe nan nin ele ha rẹ sabọ dọ wẹnna bhi agbaẹbho ọbhebhe (work visa), la nan re ebe nan nin ele rẹ sabọ ha nyẹnlẹn bhi ọne agbaẹbho (resident visa). Ọnan re ọne isẹhoa nin ele rẹ ha nyẹnlẹn bhi ọne agbaẹbho, yẹ lẹn ele bhi enin. Bhi obọ nọnkẹle, ẹbho ne bha khia diabe ẹbho nan re ebe nan nin ele rẹ dọ nyẹnlẹn bhi agbaẹbho ọbhebhe bhi obhi ẹghe khẹre, la nin ele rẹ gheghe dọ rẹnẹ sẹ ọne agbaẹbho. Ene ẹbho nan ne dọ ha nyẹnlẹn bhi agbaẹbho ọbhebhe dẹ re obọ rẹkhan uhi ọsi ọne agbaẹbho beji ele ha da sabọ sẹyẹ ha nyẹnlẹn bhi enin. Iriọ yẹ nọn. Ọ dẹ khẹke nin ẹbho ne bha khia nan ha riọkpanọ re obọ rẹkhan uhi nesi Jehova, yẹ rẹman ghe eria ne khiale ele khin, beji ele ha da sabọ sẹyẹ ha ribhi agbọn ọsọgbọn. Ebe nọn hi ki rẹ khin nin eria miẹn nin ele rẹ debhi agbaẹbho ọbhebhe a, a sabọ rẹ re ebe ọbhebhe nin eso bhi ẹwẹ ele sade a ki zẹ bue nọn ha re ele kiẹn ọmọn-otọ ọsi ọne agbaẹbho. Sokpan, a sabọ yẹ rẹ khu eso sibhi ọne agbaẹbho re. Uwedẹ nin ene ẹbho rẹ nyẹnlẹn ha rẹman si a dẹ ji ele da debhi ọne agbaẹbho a, la si a dẹ khu ele sibhọ re. Iriọ sẹyẹ nọn. Urẹọbhọ nin ẹbho nan ha riọkpanọ da ha mhọnlẹn, bi uwedẹ nin ele ha rẹ nyẹnlẹn bhi agbọn ọsọgbọn, ha rẹman si a dẹ ji ele da ha nyẹnlẹn bhọ, la si a dẹ fuẹn ele a.

Ọ iyi Osẹ nọn re ẹkẹ-ẹjẹjẹ man ọkpa Jehova khin, sokpan Osẹ nọn ibhohiẹn eku ọle yẹ khin. (Deut. 32:4; Ps. 33:5) Ọle dẹ re oyẹẹ nọnsọle man beji ọle ha rẹ riọ ẹbho ne khiale bi ẹbho ne bha khia kpanọ bhi uu. Sokpan, ọle dẹ ha guanọ nin ele rebhe re obọ rẹkhan uhi nesọle. Ẹbho ne dọ hoẹmhọn ọlẹn, yẹ re obọ rẹkhan uhi nesọle ọkpa ha nyẹnlẹn bhi agbọn ọsọgbọn rẹ sẹbhi ighegheghe.