Bhi 1 Corinthians 15:8, Pọl da yọle: “Ọkpakinọn bhi ọkike ọle, ọle da yẹ zegbere man mẹn bọsi ọmọn nan biẹ bhi ẹghe nọn bha sẹ sẹ nan rẹ biẹ ọle.” Bhi ẹghe nọn gbera, mhan ka rẹ yọle ghe, iriọ a ha da miẹn Pọl ha tẹmhọn ebe sunu ji ọle ẹghe nin ọle rẹ miẹn imianlo rẹ daghe Jesu bhi okhun. Inian ọ daibe a re ọne isẹhoa nanlẹn nan rẹ kie biẹ ọle, la riọ ọle kpanọ bọsi ẹlinmhin, arẹmiẹn ọne ẹghe bha sẹ sẹ. Ikpe ne bunbun gbera fo ọkuẹsẹ unan ariọkpanọ nọn sẹ inian sunu. Ọkpakinọn, a ki manman gua otọ ọne ulọnlẹn nan fẹghe, ọ da khẹke nan fi uwedẹ nan ka rẹ gbotọle fanọn an denọ.

Ẹmhọanta nọn ghe, Pọl ha talọ ji ebe sunu ẹghe nin ọle rẹ kiẹn Kristiẹn. Ọkpakinọn, be bhọ ọle ha tẹmhọnlẹn ẹghe nin ọle rẹ yọle ghe, a biẹ ọle bọsi “ọmọn nan biẹ bhi ẹghe nọn bha sẹ sẹ nan rẹ biẹ ọle”? Emhin ne bunbun sabọ rẹ re ọle ta ọnan.

Osukpa ọle wo rẹ kiẹn Kristiẹn, sẹyẹ ọ bha lẹkhẹ nanlẹn. Ọsi iguaguako a kẹ rẹ wo biẹ ọmọn nọn bha sẹ sẹ uki. Beji Sọl (nan ki dọ lẹn ọbhi Pọl beji a ki zẹbue) rẹ ha khian Damaskọs nin ọle dọ kpokpo Kristiẹn ne ribhi enin, ọle bha rẹ ha mhọnlẹn bhi ọkhọle ghe, ọle dẹ miẹn Jesu bhi imianlo nan riọkpanọ. Uwedẹ nin Pọl wo rẹ kiẹn Kristiẹn da wo han ọlẹn ilo. Sokpan, ọ iyi ọle ọkpa ọ han ọle ilo. Ọ da yẹ han Kristiẹn nin ọle ha khian dọ kpokpo bhi ọne agbaẹbho nin ilo. Rẹ deba ọnan, ọne emhin nan nọn sunu ji ọle bha zẹwẹ lẹkhẹ nanlẹn. Bhiriọ, ọle da ruẹlo bhi obhi ẹghe khere.—Acts 9:1-9, 17-19.

Ẹghe nan bha re ẹlo ọi ọle rẹ kiẹn Kristiẹn. Ukpọta Grik nan zedu ọle diọbhi “ọmọn nan biẹ bhi ẹghe nọn bha sẹ sẹ nan rẹ biẹ ọle,” a dẹ yẹ sabọ zedu ọle diọbhi “ọria nan biẹ bhi ẹghe nọn bha khẹke nan rẹ biẹ ọle.” Jerusalem Bible da re inian tale: “Ọ da diabe a biẹ mẹn bhi ẹghe nin ọria soso bha rẹ mun ọkhọle ọbhọ.” Jesu ribhi okhun fo ọkuẹsẹ Pọl kiẹn Kristiẹn. Pọl bha miẹn Jesu bhi ẹghe nin ọle rẹ riọkpanọ bhi uu ọkuẹsẹ ọle fikie ha khian okhun, beji ẹbho nin ọle sounun ọlẹn bhi ulọnlẹn ne gbera ọ kuẹ sẹbhi ulọnlẹn nin ọle tẹmhọnlẹn rẹ miẹn ọlẹn. (1 Cor. 15:4-8) Uwedẹ iguaguako nin Jesu rẹ re egbe man Pọl da re ọne isẹhoa nanlẹn rẹ miẹn ọlẹn, arẹmiẹn ọ diabe ẹghe nan bha re ẹlo ọi ọnan rẹ sunu.

Idegbere nin ọle ha mhọnlẹn re ọle ta ọnan rẹji egbe ọle. Ẹbho eso ne fẹ otọ ẹmhọn ghe yọle ene ọta nin Pọl noo bhi enan dẹ sabọ diabe ghe, ọle ghe egbe ọle bii ọria nọn bha sẹ emhin soso. Ahamiẹn ọnan Pọl ha mhọn bhi ọkhọle, ọle da re ene ọta nin ọle tale rẹ rẹman ghe, ọle bha sẹ ọria nọn ha kiẹn odibo nọnsi Jesu. Bhi ọsi ẹmhọanta, ọle da yọle: “Imẹn hi ọnọn khere nẹ bhi ẹwẹ etuegbe nesọle, ọ bhọ bha khẹke nan ka mẹn ba etuegbe nesọle ranmhude mẹn ka kpokpo agbotu nọnsi Osẹnobulua. Ọkpakinọn, ifuẹkẹ nọn bha khẹke mẹn nin Osẹnobulua mhọn da mẹn zẹle nin mẹn da sabọ kiẹn ebi mẹn khin nian.”—1 Cor. 15:9, 10.

Bhiriọ, asabọmiẹn ebi Pọl ha tẹmhọnlẹn hi, uwedẹ iguaguako nin Jesu rẹ re egbe man ọlẹn, uwedẹ nin ọle bha rẹ re ẹlo ọi nin ọle rẹ kiẹn Kristiẹn, la ranmhude ọle bha sẹ ọria nọn ha miẹn imianlo nin ọle miẹn. Ebe hi ki rẹ nọn, ọne emhin nan nọn sunu ji Pọl wo manman ghan bhi ẹlo nọnsọle. Ọ da rẹkpa ọle rẹ lẹn sẹbhọ ghe, a gene riọ Jesu kpanọ bhi uu. Ọnan zẹle nin ọle da wo ha tẹmhọn ọne emhin iguaguako nan nọn sunu ji ọle sade ọle tẹmhọn ariọkpanọ nọnsi Jesu man ẹbho.—Acts 22:6-11; 26:13-18.