Ẹsọn ọsi enebiọmọn nọn nin ele rẹ ha man imọn nesele ẹmhọn Jehova. (Eph. 6:4) Agbotu nọnsi Jehova wo ze emhin kẹkẹ egbe dagbare ne ha rẹkpa enebiọmọn rẹ sabọ lu ọnan. Be uwẹ ha rẹ sabọ noo ele rẹ man imọn nesẹ emhin yẹ?

• Diọbhi jw.org dọ guanọ ele. Uwẹ dẹ miẹn ebe, vidio kẹkẹ nan lu nin elasẹre, bi ẹho nan lu, nin ele ha sabọ gbẹn emhin ọi, la drọ emhin ọi. a Nin uwẹ rẹ miẹn ele, gbẹn “Ibhokhan” la “Elasẹre” ọbhi eji a da guanọ emhin bhọ.

• Zẹ emhin nin uwẹ lẹn sẹ ghe ọ dẹ rẹkpa ọmọn nọnsẹ. Uwẹ dẹ miẹn emhin ne ha sabọ rẹkpa ọmọn nọnsẹ bhi ene emhin kẹkẹ nan mhanmhan bhi odotọ uhọnmhọn-ọta natiọle “Ibhokhan.” Nin uwẹ rẹ miẹn ele, gbẹn “Family Worship Projects” ọbhi eji a da guanọ emhin bhọ.

• Deba ọmọn nọnsẹ zilo ọle. Hẹi ha ne ebe, la vidio nesẹmhan nin imọn nesẹ ha tie, la ha ghe, nin ele rẹ gheghe miẹn emhin ha lu bhi obọ, nin ele hẹi ha khiẹn. Ọkpakinọn, deba ele zilo ọle, yẹ rẹkpa ele rẹ deba Jehova ha mhọn ikolu.