1. Beji iẹnlẹn ọsi Pita nin odibo ha bu ọkpẹnlẹn, be Jehova taman ọlẹn nin ọle lu?

 PITA nin odibo wo ga Jehova nọnsẹn bhi ikpe ne bunbun. Ọle deba Jesu beji ọle ha lu iwẹnna itẹmhọn Osẹnobulua bhi ọne otọ nan. Ọle hi ọnọn munhẹn ha tẹmhọn Osẹnobulua man ẹbho ne iyi Ju. Ọle yẹ ga bhi ihe ọsi otu nọn sun oga. Beji iẹnlẹn nọnsọle ha bu ọkpẹnlẹn, Jehova da mun iwẹnna nanlẹn. Bhi egbegbe ukpe 62 rẹ sẹbhi 64 C.E., Osẹnobulua da re ẹlinmhin nọn khiale rẹ rẹkpa Pita rẹ gbẹn ebe eva bhi Baibo. Ene ebe hi, Peter nin ọhẹnhẹn bi Peter nọnzi eva. Pita da ha mhọnlẹn bhi ọkhọle ghe, ene ebe dẹ rẹkpa Kristiẹn aharẹmiẹn ghe ọle yu.—2 Pet. 1:​12-15.

2. Bezẹle nin mhan ha da sabọ yọle ẹghe nọn wo khẹke tee Pita rẹ gbẹn ene ebe nin ọle gbẹn?

² Ẹghe nin ibhio ọle rẹ “miẹn ọkakale kẹkẹ bhi egbe,” ọle Pita rẹ gbẹn ene ebe Baibo nan tie mun elin nọnsọle. (1 Pet. 1:6) Ẹbho eso ne imhẹn da ha dọnmhegbe nin ele rẹ mun iman-emhin ohoghe bi ilọnmhọn oghẹ nabhi ẹkẹ agbotu. (2 Pet. 2:​1, 2, 14) Sẹyẹ, Kristiẹn ne nyẹnlẹn bhi Jerusalẹm dẹ kẹ kuẹlo da “ọkpẹnlẹn ọsi emhin rebhe.” Ọnin hi, ẹghe nin eyokhọnlẹn ọsi Romu ha rẹ dọ dunmhun Jerusalẹm bi uwa oga nọn ribhọ a. (1 Pet. 4:7) Edandan iribhọ ghe ebe nin Pita gbẹn dẹ rẹkpa ene Kristiẹn rẹ lẹn ebi ele ha rẹ sabọ ziẹngbe ọkakale nin ele kuẹlo da, bi ebi ele ha rẹ muegbe ọbhi otọ khẹ emhin ne da sunu bhi ẹghe odalo. b

3. Bezẹle nọn da manman khẹke nin mhan ha luẹ ẹmhọn ene ebe nin Pita gbẹn?

 ³ Arẹmiẹn Kristiẹn bhi ore nin ọhẹnhẹn Pita gbẹn ene ebe nan je, Jehova da lu ọle nan ne ele ọbhi Baibo. Ẹlẹnan nian, mhan dẹ sabọ miẹn emhin luẹ bhi ene ebe. (Rom. 15:4) Agbọn nin ẹbho da nyẹn iẹnlẹn esankan mhan da nyẹnlẹn ẹlẹnan. Mhan yẹ wo kuẹlo da ọkakale kẹkẹ ne re ọle nọghọ mhan rẹ ha ga Jehova. Rẹ deba ọnin, mhan dẹ kẹ kuẹlo da ekpokpo nọn khua nọn kpọnọ gbera ọne ibhokhan Ju miẹn. Adia eso ne ha sabọ rẹkpa mhan wo ribhi ene ebe nin Pita gbẹn. Ele dẹ rẹkpa mhan rẹ wo ha muegbe khẹ ukpẹdẹ nọnsi Jehova, rẹkpa mhan rẹ miẹn ghe mhan bha ha mun ofẹn eria, yẹ rẹ manman ha mhọn oyẹẹ da ẹbho. Ọ dẹ yẹ rẹkpa ene ewanlẹn rẹ lẹn ebi ele ha rẹ sabọ ha gbẹloghe ihuan nesi Jehova yẹ.

4. Beji 2 Peter 3:​3, 4 rẹman, be ha sabọ rẹso urẹọbhọ nọnsẹmhan?

⁴ Ẹwẹ ẹbho ne bha zẹwẹ rẹọbhi ọta akhasẹ ne ribhi Baibo mhan da nyẹnlẹn. Ẹbho ne bha hoẹmhọn mhan sabọ rẹ ha jiẹ mhan ranmhude ọ reele nin mhan mọn da yọle ghe ọkpẹnlẹn dẹ kẹ vae. Ẹbho eso bhọ yọle ghe ọkpẹnlẹn ida vae ghẹdẹ. (Tie 2 Peter 3:​3, 4.) Mhan ha hẹnmhọn ne sẹnian bhi unun eria nin mhan tẹmhọn Osẹnobulua man, ẹbho nin mhan ko wẹnna la ọria bhi azagba-uwa nọnsẹmhan, ọ dẹ sabọ rẹso urẹọbhọ nọnsẹmhan. Pita da tẹmhọn emhin ne ha sabọ rẹkpa mhan.

5. Emhin nela ha rẹkpa mhan rẹ sabọ ziẹngbe khẹ ẹghe nin Jehova ha rẹ re ọkpẹnlẹn ọbhi ọne agbọn Esu nan? (2 Peter 3:​8, 9)

⁵ Ọ sabọ rẹ dia ẹbho eso bhi egbe ghe, Jehova re ẹghe nin ọle rẹ mun ọkpẹnlẹn bu ọne agbọn Esu nan. Ene ẹmhọn nin Pita ta dẹ sabọ rẹkpa mhan, ranmhude ele rẹkpa mhan rẹ yere ghe uwedẹ nin Jehova rẹ ghe ẹghe manman wo dikẹ bhi ọsi eria. (Tie 2 Peter 3:​8, 9.) Inian ikpe uli diabe ukpẹdẹ ọkpa bhi ẹlo nọnsi Jehova. Jehova wo ziẹngbe ranmhude ọle bha ho nin ọle fuẹn ọria soso a. Ọkpakinọn, ukpẹdẹ nin Jehova rẹyi ha sẹ, emhin iribhọ nọn ha mun ọlẹn mhọn nin ọle hẹi re ọkpẹnlẹn ọbhi ọne agbọn Esu nan. Udede isẹhoa mhan wo mhọnlẹn nin mhan rẹ noo ẹghe nọn kere rẹ ha tẹmhọn Osẹnobulua man ọrebhe.

6. Be imhan ha rẹ sabọ “mun ọkhọle ọbhi” ukpẹdẹ nọnsi Jehova yẹ? (2 Peter 3:​11, 12)

⁶ Pita da yọle nin mhan “mun ọkhọle ọbhi” ẹghe nin ukpẹdẹ nọnsi Jehova ha rẹ vae. (Tie 2 Peter 3:​11, 12.) Be imhan ha rẹ sabọ lu iriọ yẹ? Ukpẹdẹ-ukpẹdẹ, mhan ki dọnmhegbe ha ria ẹmhọn ebi iẹnlẹn da diayẹ bhi agbọn ọsọgbọn. Re ọkhọle muno ọlẹn ghe, uwẹ hiẹnhiẹn ahoho nọn sẹẹn an ọbhi egbe, le ebale nin egbe gba nan, gbe obokhian nin ẹbho nesẹ ne yu nan riọ kpanọ, yẹ man ẹbho ne mọn yu nan riọ kpanọ ebi ọta akhasẹ ne ribhi Baibo rẹ munsẹ yẹ. Iria-eria ne sẹnian, dẹ rẹkpa uwẹ rẹ wo ha muegbe ọbhi otọ khẹ ukpẹdẹ nọnsi Jehova, yẹ rẹ rẹọbhọ ghe ọkpẹnlẹn dẹ kẹ vae. Nin mhan ki ka rẹ lẹn ebi ẹghe odalo ha dia yẹ, emhin nin oga ohoghe man ida sabọ hiẹ mhan.—2 Pet. 3:17.

7. Be ọ ha rẹ rẹso mhan yẹ sade mhan mun ofẹn eria?

⁷ Ranmhude mhan lẹn sẹ ghe ukpẹdẹ nọnsi Jehova dẹ kẹ vae, mhan dọnmhegbe rẹ lu eka nin mhan ha sabọ lu rẹ ha tẹmhọn Agbejele man ẹbho. Ọrẹyiriọ, mhan sabọ rẹ ha si egbe re ikeke rẹ tẹmhọn Osẹnobulua bhi idia eso. Bezẹle? Ranmhude ofẹn eria sabọ rẹ ha mun mhan ẹgheso. Ọnan hi ebe sunu ji Pita. Bhi ọne ukpasọn nan mun Jesu, ofẹn da ha mun Pita rẹ rẹman ghe ọkpa bhi edibo nesi Jesu ọle khin. Sẹyẹ, ọle da tale igba ea ghe ọle bha lẹn Jesu. (Matt. 26:​69-75) Beji ẹghe ki gbera, Pita nin ofẹn ka rẹ ha mun da sabọ re izebhudu yọle: “Bha hẹi mun ofẹn emhin nin ele mun ofẹn  ọlẹn, bha hẹi kpokpo egbe.” (1 Pet. 3:14) Ọta nin Pita ta rẹman ghe, mhan dẹ sabọ miẹn ghe mhan bha yẹ ha mun ofẹn eria.

8. Be ha rẹkpa mhan beji a ha da miẹn ghe ofẹn eria bha yẹ ha mun mhan? (1 Peter 3:15)

⁸ Be ha rẹkpa mhan beji a ha da miẹn ghe ofẹn eria bha yẹ ha mun mhan? Pita da tẹmhọn ebe ha sabọ rẹkpa mhan. Ọle da yole: “Bha kpe iKristi khia bọsi Ebeanlẹn bhi ẹke ọkhọle nọnsẹbha.” (Tie 1 Peter 3:15.) Uwedẹ ọkpa nin mhan ha rẹ sabọ lu ọnan hi, nin mhan rẹ ha ria ẹmhọn ihe bi ahu nin Jesu nin Ojie mhan mhọnlẹn. Ahamiẹn ofẹn mun uwẹ bhi ẹghe nọn hi ki rẹ khin nin idia rẹ zegbere nin uwẹ ha rẹ sabọ tẹmhọn Osẹnobulua man ẹbho, ye Jesu nin Ojie nọnsẹmhan re. Re ọkhọle muno ọlẹn ghe Jesu gbẹloghe bhi okhun, sẹyẹ ẹhi ne bunbun nẹga ọle. Yere ghe, ọle mhọn “ahu rebhe . . . bhi otọ bi okhun,” sẹyẹ, ọle dẹ nin uwẹ “dia rẹ na bhi ene ikpẹdẹ rebhe rẹ dọ sẹbhi ọkpẹnlẹn ọsi ọne agbọn nan.” (Matt. 28:​18-20) Pita da yọle ghe nin mhan ha “muegbe ọbhi otọ ẹghe rebhe” nin mhan rẹ wo ha tẹmhọn emhin nin mhan rẹọ ọi man ẹbho. Ọ dẹ yẹẹ uwẹ rẹ tẹmhọn Osẹnobulua man ẹbho bhi eji uwẹ da wẹnna, bhi isiku, la bhi idia ebhebhe? Re ẹghe ọbhi otọ rẹ ria ẹmhọn eji uwẹ ha da sabọ lu iriọ, uwẹ ha yẹ muegbe ebi uwẹ ha sabọ ta ọbhi otọ. Bhii Jehova nin ọle re izebhudu nin uwẹ, uwẹ ha yẹ ha mhọnlẹn bhi ọkhọle ghe ọle dẹ rẹkpa uwẹ beji a ha da miẹn ghe ofẹn eria bha yẹ ha mun uwẹ.—Acts 4:29.

9. Be Pita bha rẹ re oyẹẹ man yẹ bhi ẹghe ọkpa? (Yẹ fẹ ifoto ghe.)

⁹ Pita da luẹ ebi a rẹ re oyẹẹ man yẹ. Eji Jesu ye ọle ha ye ẹghe nin Jesu rẹ yọle: “Uhi ọgbọn ọnan khin nin mẹn gbe nin bha, ghe nin bha ha mhọn ahoẹmhọn-egbe da egbe; beji mẹn rẹ hoẹmhọn bha, bha re iriọ hoẹmhọn egbe bha.” (John 13:34) Ọrẹyiriọ, ẹghe ribhọ nin Pita rẹ ranmhude ofẹn miẹn ghe ọle bha yẹ deba ibhio ọle ne iyi Ju le ebale. Pọl nin odibo da tie emhin nin Pita lu “imanlu.” (Gal. 2:​11-14) Pita da miẹn adia nin Pọl re nanlẹn ọbhi egbe yẹ luẹ emhin bhọ. Bhi ene ebe veva nin ọle gbẹn, ọle da yọle ghe, ọ iyi nin mhan rẹ gheghe yọle ghe mhan hoẹmhọn ibhio mhan ọkpa, sokpan, ọkhẹke nin mhan ha re ọle man.

10. Be ha rẹkpa mhan rẹ sabọ ha re “oyẹẹ ọsaje” man ọrebhe? Gbotọle fanọn an. (1 Peter 1:22)

¹⁰ Pita da yọle ghe nin mhan ha mhọn “oyẹẹ ọsaje” da ibhio mhan nin mhan ko ga. (Tie 1 Peter 1:22.) Mhan sabọ re inian re oyẹẹ man ranmhude mhan re obọ rẹkhan ẹmhọanta nin mhan luẹ. Ọkpa bhi ene ẹmhọanta nin mhan luẹ hi, “Osẹnobulua izọn eria.” (Acts 10:​34, 35) Mhan ida sabọ yọle ghe mhan re obọ rẹkhan uhi nin Jesu gbe bhi ẹmhọn oyẹẹ sade mhan re oyẹẹ man ẹbho eso bhi agbotu, sokpan mhan ire man enekẹle. Bhi ọsi ẹmhọanta, mhan sabọ rẹ sikẹ ẹbho eso gbera ẹbho nekẹle beji Jesu yẹ lu. (John 13:23; 20:2) Ọkpakinọn, Pita yọle nin mhan dọnmhegbe ha re “oyẹẹ ọsaje” man ọrebhe nin mhan ko ribhi agbotu, ranmhude inian mhan diabe azagba-uwa ọkpa.—1 Pet. 2:17.

11. Be a re ọle ta nan rẹ ha mhọn “oyẹẹ nọn dinmhin da egbe”?

¹¹ Pita da yọle nin mhan ha mhọn “oyẹẹ nọn dinmhin da egbe.” Ebi a rẹ ọle ta nin mhan rẹ ha mhọn oyẹẹ nọn “dinmhin” hi, nin mhan rẹ sẹyẹ ha re oyẹẹ man ọria, aharẹmiẹn ọ bha lẹkhẹ nin mhan rẹ lu iriọ. Bhi ọsi ijiẹmhin, ahamiẹn obhio mhan nin mhan ko ga lu mhan emhin nọn ba mhan bhi egbe kii? Ebe ha kẹ vae bhi ọkhọle nọnsẹmhan hi, nin mhan rẹ lu haosa, ọ iyi nin mhan rẹ re oyẹẹ man. Pita da luẹ bhi obọ Jesu ghe, nan rẹ ha lu haosa iti Osẹnobulua bhọ. (John 18:​10, 11) Pita da yẹ yọle: “Bha hẹi re ọbe rẹ haosa ọbe, la ghunmhun eria ne ghunmhun bha. Bha ha re emhin esili rẹ ha ele osa.” (1 Pet. 3:9) Ji oyẹẹ nọn dinmhin re uwẹ ha re ifuẹkẹ bi aria-ji-egbe man ẹbho, rẹ dọ sẹbhi ene lu uwẹ khọ.

12. (a) Emhin ọbhebhe nela oyẹẹ nọn dinmhin ha re mhan lu? (b) Beji a rẹman bhi ọne ividio natiọle Preserve the Precious Gift of Unity, be uwẹ muegbe rẹ lu?

¹² Bhi ilẹta nin ọhẹnhẹn nin Pita gbẹn, ọle da noo ene ọta, “oyẹẹ nọn dinmhin.” Oyẹẹ nọn sẹnian “gue olukhọ ne bunbun,” ọ igheghe yi obhi olukhọ. (1 Pet. 4:8) Asabọmiẹn Pita da yere ebi Jesu man ọle le ikpe ne bunbun ne gbera rẹji nan rẹ ha rẹhunmhan. Bhi ọne ẹghenin, asabọmiẹn Pita da ha riale ọle wo dọnmhegbe nin ọle rẹ yọle ghe, ọle dẹ rẹhunmhan obhio ọle rẹ “sẹbhi igba ihinlọn.” Ọkpakinọn, Jesu da man ọle bi imhan rebhe ghe, nin mhan ha rẹhunmhan rẹ sẹbhi “igba 77.” Ọnin rẹman ghe, mhan dẹ wo ha rẹhunmhan khian. (Matt. 18:​21, 22) Hẹi ji egbe lọ uwẹ ahamiẹn ọ nọghọ uwẹ rẹ ha re obọ rẹkhan ọne adia nan. Ranmhude ọ bha gba nin mhan rebhe, ọ nọghọ mhan rẹ ha rẹhunmhan ẹgheso. Emhin nọn khẹkhe nin uwẹ lu nian hi, nin uwẹ rẹ dọnmhegbe lu eka nin uwẹ ha sabọ lu rẹ ha rẹhunmhan ibhio ẹ, yẹ deba ele ha ribhi ọfure. c

13. Be ha sabọ re ọle ha nọghọ ene ewanlẹn rẹ ha gbẹloghe ihuan nesi Jehova nọnsẹn?

¹³ Pita bha yele ẹmhọn nin Jesu taman ọlẹn an beji ọle riọ kpanọn fo. Ọle da yọle: “Sun ikuẹkuẹ ihuan nesẹmhẹn.” (John 21:16)  Ahamiẹn ọwanlẹn uwẹ khin bhi agbotu, lẹn sẹ ghe uwẹ Jesu sẹyẹ ne talọ. Ọkpakinọn, ọ sabọ rẹ ha nọghọ ọwanlẹn rẹ miẹn ẹghe rẹ ha miẹn ene ẹsọn nan mun nanlẹn. Ọkhẹke nin ọwanlẹn ka ne emhin nin azagba-uwa nọnsọle ha rẹ ha gbẹloghe nin ele, hoẹmhọn ele, yẹ rẹkpa ele rẹ sabọ sikẹ Jehova. Ele sẹyẹ mun ọkalo bhi iwẹnna itẹmhọn Osẹnobulua, muegbe ọta ọbhi otọ yẹ re ele man bhi ikolo oga, bi usikoko nesẹmhan. Ọkpa bhi Otu Ewanlẹn Nin Agbotu Je Bu Idọkitọ eso khin, eso yẹ robọkpa ibhio mhan ne mhọn obọ bhi uwa oga nan bọn. Ọ iyi obhi ẹsọn khere ene ewanlẹn miẹn!

14. Emhin nela ha sabọ rẹkpa ene ewanlẹn rẹ wo ha sun ihuan nesi Osẹnobulua? (1 Peter 5:​1-4)

¹⁴ Pita da taman ewanlẹn bii ọle yọle, “bha ha sun ene ihuan nesi Osẹnobulua.” (Tie 1 Peter 5:​1-4.) Ahamiẹn ọwanlẹn uwẹ khin, mhan lẹnmhin ghe uwẹ hoẹmhọn ibhio mhan nin bha ko ga, sẹyẹ uwe ho nin uwẹ ha gbẹloghe ele. Ọkpakinọn, uwẹ sabọ rẹ ha riale ẹgheso ghe, emhin nin uwẹ lu bhi obọ bun gbe, la egbe lọ uwẹ rẹ sabọ ha miẹn ọne ẹsọn nan. Ọ ha yi riọ, be uwẹ ha sabọ lu? Taman Jehova bhi erọnmhọn ebi emhin dia uwẹ yẹ. Pita da gbẹn yọle: “Ahamiẹn ghe ọria miẹnsọn rẹ rẹkpa ẹbho, ji ọle mun udu tẹ Osẹnobulua nọn re ahu nanlẹn rẹ lu ọle.” (1 Pet. 4:11) Asabọmiẹn ọkakale nin ibhio ẹ kuẹlo da ida si egbe kie bhi ọne agbọn nan nian sẹsẹsẹ. Ọkpakinọn, yere ghe Jesu Kristi nin ‘ọsun-ohuan nọn kokhun nẹ,’ dẹ sabọ rẹkpa ele gbera uwẹ. Ọle dẹ sabọ lu iriọ ẹlẹnan nian, bi bhi agbọn ọsọgbọn. Ebi Osẹnobulua guanọ bhi obọ bha hi, nin bha hoẹmhọn ibhio bha, yẹ ha yi “ijiẹmhin esili rẹji ene ihuan.”

15. Be ọwanlẹn ọkpa rẹ dọnmhegbe ha sun ihuan nesi Jehova yẹ? (Yẹ fẹ ifoto ghe.)

¹⁵ William nọn mọn da ga bhi ihe ọsi ọwanlẹn lẹn ebi ọ lu uhọnmhọn emhin sẹ yẹ nan rẹ ha rẹnẹ ji ibhio mhan, yẹ re Baibo ko ele udu re. Beji emianmhẹn KOVID-19 munhẹn, ọle bi ewanlẹn nekẹle da wo dọnmhegbe ha tie ibhio ele nin ele ko ribhi usun nin ele rẹ dagbare bhi inẹbho uzana-uzana. Ọle da tẹmhọn ebezẹle nin ele da ha lu ọnan. Ọle da yọle: “Ene ibhio mhan bha yẹ sabọ ha dagbare ranmhude ọne emianmhẹn, bhiriọ, ọnan dẹ sabọ re ele ha ria eria nọn gbe ahu.” Ahamiẹn obhio ọle nin ele ko ga kuẹlo da ọnọghọ, ọle ki dọnmhegbe ka ọle ehọ nọnsẹn beji ọle ha da sabọ lẹn ebi kpokpo ọle bhi ọkhọle, bi ebi ọle guanọ. Ẹghenin, ọle ki dọ guanọ ebe la ividio bhi wẹbsaiti nọnsẹmhan nọn ha sabọ re ikoudure nin ọne obhio mhan. Ọle da yọle: “Ọkhẹke nin mhan ha rẹnẹ  ji ibhio mhan yẹ re Baibo ko ele udu re gbera ọnikhẹ. Beji mhan rẹ wo dọnmhegbe rẹ rẹkpa ẹbho rẹ dọ lẹn Jehova; iriọ ọ yẹ rẹ wo manman khẹke nin mhan rẹ dọnmhegbe ha sun ene ihuan nesi Osẹnobulua, yẹ rẹkpa ele rẹ wo ha ga Jehova khian.”

16. Uwedẹ eso nela mhan ha rẹ sabọ re obọ rẹkhan ene emhin nin mhan luẹ bhi ene ebe nin Pita gbẹn?

¹⁶ Mhan wo zilo nyan emhin eso nin mhan miẹn luẹ bhi ene ebe nin Pita gbẹn. Asabọmiẹn uwẹ daghe ijeso nọn da khẹke nin uwẹ lu re alo. Bhi ọsi ijiẹmhin, ọ dẹ be yẹẹ uwẹ rẹ manman ha ria eria nyan erọnmhọn kẹkẹ nin mhan ha miẹn bhi agbọn ọsọgbọn gbera ọnikhẹ? Uwẹ be sẹ mhanmhanlẹn nin uwẹ rẹ ha tẹmhọn Osẹnobulua bhi isiku, bhi isi iwẹnna, la bhi ije ebhebhe? Uwẹ daghe ijeso nọn da khẹke nin uwẹ manman ha re oyẹẹ man ibhio mhan nin bha ko ga gbera ọnikhẹ? Ene ewanlẹn, bha be muegbe nin bha rẹ manman re ọkhọle rebhe rẹ ha sun ihuan nesi Jehova? Ahamiẹn mhan fẹ egbe mhan ghe nọnsẹn, asabọmiẹn mhan dẹ kere ghe ijeso ribhọ nin mhan ida lu nọnsẹn. Ọ ha yi riọ, hẹi ji egbe lọ uwẹ. “Ebeanlẹn imhan manman mhọn ifuẹkẹ,” bhiriọ, ọle dẹ rẹkpa uwẹ rẹ sabọ ha lu re alo. (1 Pet. 2:3) Pita da yọle: “Osẹnobulua . . . dẹ tobọle man bha emhin sotọ. Ọle dẹ mun bha deziẹn, ọle dẹ yẹ mun bha zeze, ọle dẹ mun bha mundia nọnsẹn.”—1 Pet. 5:10.

17. Elele nela da nabhọre sade mhan dọnmhegbe rẹ rẹtẹ, yẹ ji Jehova da man mhan emhin?

¹⁷ Bhi ọsi ọhẹnhẹn, Pita da ha riale ghe ọle bha sẹ ọria nọn ha deba Jesu ha khian. (Luke 5:8) Ọkpakinọn, ranmhude urẹkpa nin Jehova bi Jesu re nanlẹn, ọle da sabọ sun rẹkhan Jesu nọnsẹn. Ranmhude ọnan, a da re ọne isẹhoa nin Pita rẹ “nabhi Agbejele ọsi ighegheghe ọsi Jesu Kristi nin Ebeanlẹn bi Ọmiẹnmhanfan nọnsẹmhan.” (2 Pet. 1:11) Udede elele wo khọnan! Bọsi Pita, ahamiẹn uwẹ dọnmhegbe rẹ rẹtẹ, yẹ re otọ nin Jehova rẹ man uwẹ emhin, ọle ki re iẹnlẹn ọsi ighegheghe rẹ re ihaosa nin uwẹ. ‘Urẹọbhọ nin uwẹ mhọnlẹn ki re uwẹ miẹn umiẹnfan.’—1 Pet. 1:9.