Beji mhan rẹ muegbe rẹ luẹ Baibo, mhan sabọ rẹ nọọn egbe mhan yọle, ‘Emhin ọgbọn nela mẹn ha sabọ luẹ bhọ?’ Ọrẹyiriọ, ọkhẹke nin mhan mhọn ẹwan nan hẹi dọ miẹn ghe, emhin ọgbọn nin mhan ho nin mhan luẹ bha yẹ re otọ nin mhan rẹ miẹn elele bhi emhin ebhebhe nin Jehova ha man mhan le. Bhiriọ, be imhan ha rẹ sabọ re otọ nin Jehova rẹ man mhan emhin yẹ?

Bhii ọle nọn re ẹwanlẹn nin uwẹ. Bhii Jehova nọn rẹkpa uwẹ rẹ lẹn otọ ebi ọle guanọ nin uwẹ luẹ nian. (Jem. 1:5) Hẹi ji emhin nin uwẹ ka lẹn khọn uwẹ, sẹyẹ wo ha luẹ ba ele.—Prov. 3:​5, 6.

Re otọ nin Ọta nọnsi Osẹnobulua rẹ rẹso uwẹ bhi iẹnlẹn. “Ọta nọnsi Osẹnobulua nyẹnlẹnmhin.” (Hib. 4:12) Ọta nọnsi Osẹnobulua dẹ sabọ ha rẹso mhan bhi ẹghe nọn hi ki rẹ khin nin mhan rẹ luẹ ọle, sade mhan tan ọkhọle a ji Osẹnobulua da ha man mhan emhin.

Ha khuẹnmhẹn Jehova bhi emhin kẹkẹ nin ọle noo rẹ man mhan emhin. Inian ebale oriọn kẹkẹ nin mhan miẹn bhi obọ Jehova diabe ebale esili nan muegbe nyẹn nọnsẹn. (Isa. 25:6) Hẹi zobọ bhọ rẹ ha luẹ uhọnmhọn-ọta nin uwẹ riale ghe ọ i da yẹẹ uwẹ rẹ luẹ. Uwẹ ha dọnmhegbe rẹ luẹ ele, uwẹ dẹ miẹn elele bhọ, sẹyẹ, ebi uwẹ luẹ ki ha ti uwẹ bhọ!