Ọ bha khẹke nin mhan ha riale ghe, ranmhude ene edibo 70 bha lu nọnsẹn, la fikekegbe Jesu zẹle nin ele bha da ha ribhi eji Jesu da mun iluemhin ọsi ọne Ebale Emuan Ọsi Ebealẹn gbọ. Ene etuegbe ọkpa Jesu ha guanọ bhi ọne iluemhin.

Edibo nesi Jesu, ele ene itue 12 bi ene itue 70 khin. Mhan lẹnmhin ghe, bhi ẹwẹ edibo nesọle, ele ọle da zẹ ene itue 12 nin ọle ha tie ele etuegbe. (Luk 6:​12-16) Galili ọle ha ye beji ọle “datie etuegbe igbeva nesọle,” yẹ “je ele dagbare nin ele dọ tẹmhọn Agbejele nọnsi Osẹnobulua, yẹ ha re egbe daan ẹbho.” (Luk 9:​1-6) Akizẹbue, beji ọle ha ribhi Judia, ọle da “zẹ itue igbe nyan egbọ ea, yẹ je ele dagbare eva-eva.” (Luk 9:51; 10:1) Beji ẹghe rẹ ha gbera, Jesu da ha mhọn edibo bhi ije kẹkẹ ne ha tẹmhọn ọlẹn man ẹbho.

Ene ibhokhan Ju ne dọ kiẹn edibo nesi Jesu beji akizẹbue yẹ wo ha lu ọne iluemhin ọsi Anagbera ukpe-ukpe. Asabọmiẹn ele bi azagba-uwa nọnsele ko ha lu ọle. (Ex. 12:​6-11, 17-20) Beji ẹghe nin Jesu ha rẹ yu ki ha sire, ọle bi etuegbe nesọle da diọbhi Jerusalẹm. Ọkpakinọn, ọle bha tie edibo nesọle rebhe ne ribhi Judia, Galili bi Pẹria nin ele dọ deba ọle bhi ọne iluemhin ọsi Anagbera. Ọnan rẹman ghe, etuegbe nesọle ọkpa Jesu ha guanọ nin ọle deba gbe ẹghe bhi ọne ọsi emuan nin. Ọle da taman ele yọle: “Imẹn wo manman ha guanọ nin imẹn deba bha le ọne ebale ọsi Anagbera nan ọkuẹsẹ ẹghe nin imẹn ha rẹ le oya.”—Luk 22:15.

Emhin ribhọ nọn zẹle nin Jesu da ri iriọ lu ọle. Jesu dẹ kẹ yu bọsi “Ohuan nọnsi Osẹnobulua nọn ha re olukhọ sibhi ọne agbọn nan re!” (Jọni 1:29) Jerusalẹm ọnan ha da sunu, ranmhude enin a da mọn da zọese ji Jehova. Rẹji ibhokhan Izrẹl, ọne Ohuan nin ele ha le bhi ọne iluemhin rẹkpa ele rẹ yere ebi Jehova rẹ hinmhin ele yẹ bhi otọ Ijipt. Ọkpakinọn, uyumhin nọnsi Jesu dẹ lu gbera ọnin, ọ dẹ miẹn ọrebhe fan bhi obọ olukhọ bi uu. (1 Kọr. 5:​7, 8) Ranmhude uyumhin nọnsi Jesu, ene etuegbe igbe eva dẹ sabọ dọ ha yi ayotọ ne mun agbotu mhọn. (Ẹfẹ. 2:​20-22) Ọne Jerusalẹm nọn yi agbaẹbho nọn khiale mhọn “udo igbeva nan rẹ gbe ọne ayotọ” nan gbẹn elin ọsi ene etuegbe igbeva ọsi ọne Ohuan ọ i. (Arẹm. 21:​10-14) Bhi ọsi ẹmhọanta, ene etuegbe mhọn ẹsọn kpataki nin ele ha miẹn rẹ sabọ mun iho nọnsi Jehova sẹ. Ọnan rẹkpa mhan rẹ lẹn ebezẹle nin Jesu da ha guanọ nin ọle bi ene etuegbe ko gbe ẹghe kugbe bhi ọne iluemhin ọsi Anagbera nin ọle lu kike, bi bhi ọne Ebale Emuan Ọsi Ebealẹn nin ọle mun gbọ.

Ẹmhọanta nọn ghe, ene edibo 70 bi ene edibo nekẹle bha ha ribhi eji Jesu ye bhi ọne iluemhin ọsi Anagbera. Ọkpakinọn, ene edibo nesi Jesu rebhe ne sun rẹkhan ọlẹn dẹ miẹn elele bhi ọne Ebale Emuan Ọsi Ebealẹn nin ọle mun gbọ. Ọrebhe nan rẹ ẹlinmhin nọn khiale zẹ beji a ki dọ zẹbue dẹ sabọ deba bhi ọne akovẹn nin Jesu tẹmhọnlẹn man ene etuegbe bhi ọne ukpasọn nin.—Luk 22:​29, 30.