1. Uwedẹ eso nela mhan ha rẹ sabọ deba iJehova bhi iwẹnna nin ọle lu?

JEHOVA ki man eria fo, ọle da ha guanọ nin ele deba ọle wẹnna mun iho nọnsọle sẹ. Arẹmiẹn ọbha gba nin mhan fo ẹlẹnan, ene ga iJehova dẹ sabọ ha deba ọle wẹnna ukpẹdẹ-ukpẹdẹ. Bhi ọsi ijiẹmhin, ahamiẹn mhan tẹmhọn Agbejele man ẹbho yẹ man ele iBaibo, mhan ki ha yi ene deba Osẹnobulua wẹnna. (1 Cor. 3:5-9) Udede isẹhoa wo nọn nin mhan rẹ deba Osẹnobulua bhi iwẹnna nọn yi emhin kpataki bhi ẹlo ọle. Ọiyi itẹmhọn Osẹnobulua ọkpa mhan ha rẹ sabọ deba Osẹnobulua wẹnna. Bhi ọne uhọnmhọn-ọta nan, mhan dẹ zilo nyan uwedẹ ebhebhe nin mhan ha rẹ sabọ deba Osẹnobulua wẹnna. Ele hi, sade mhan rẹkpa ene imhan ko ribhi azagba-uwa bi ene imhan ko ga, sade mhan miẹn ẹbho ọbhi egbe, sade mhan zegbere rẹkpa lu ilọnmhọn nan lu bhi agbotu, bi sade mhan dọnmhegbe rẹ lu ba eka nin mhan ka lu khẹ bhi iwẹnna oga.—Col. 3:23.

2. Bezẹle nọn bha da khẹke nin mhan ha re ebi mhan sabọ lu nin Jehova khọkhọ ọne ẹbho ebhebhe sabọ lu?

² Mhan da ha zilo nyan ọne uhọnmhọn-ọta nan, hẹi ha re emhin nin uwẹ sabọ lu nin Jehova khọkhọ ọne ẹbho nekẹle lu. Yere ghe abọ rebhe iyi ọkpa. Paul nin odibo da gbẹn yọle: “Ji ọdeọde gbẹlokotọ bhi ilọnmhọn nesọle, bhiriọ, ọle ki miẹn ebe ha re ọle ha  ghọnghọn, ọiyi nin ọle rẹ dọ ha re egbe ọle khọkhọ ọria ọbhebhe.”—Gal. 6:4.

3. Bezẹle nin mhan ha da sabọ tale ghe, ọria nọn gbẹloghe azagba-uwa nọnsọle deba iJehova wẹnna?

³ Jehova guanọ nin ene ga ọle ha gbẹloghe azagba-uwa nọnsele. Bhi ọsi ijiẹmhin, asabọ miẹn uwẹ wẹnna kaka nin uwẹ da sabọ re ebale nin azagba-uwa nọnsẹ le. Ikhuo ne bunbun mhọn ọmọn-obọ nin ele gbẹloghe, bhiriọ, ele ikẹ sabọ sibhi uwa re. Imọn eso ne ki wanre yẹ wo dọnmhegbe nin ele rẹ gbẹloghe ene biẹ ele ne ki dọmhanlẹn la nin egbe bha daan. Emhin nọn khẹke enan rebhe khin. Baibo taman mhan yọle: “Ọria nọn bha gbẹloghe ẹbho nesọle, manman nọn ene ribhi azagba-uwa nọnsọle, ọle re ẹlo gbe urẹọbhọ nọnsọle a, bhiriọ, ọle khọ gbera ọria nọn imhọn urẹọbhọ.” (1 Tim. 5:8) Ahamiẹn uwẹ mhọn emhin ne dia inian bhi obọ nin uwẹ lu, asabọ miẹn uwẹ ida ha sabọ lu eka nin uwẹ ho nin uwẹ lu bhi iwẹnna oga. Ọrẹyirọ, lẹn sẹbhọ ghe emhin nọn ti Jehova bhọ nọn sade uwẹ gbẹloghe azagba-uwa nọnsẹ.—1 Cor. 10:31.

4. Be ene biẹ ọmọn ha rẹ mun ẹmhọn oga kalo bhi iẹnlẹn yẹ? Be ha nanbhorẹ sade ele lu iriọ?

⁴ Ene biẹ ọmọn ha rẹkpa imọn nesele ha mhọn emhanmhan nin ele khu bhi oga, ọnan ki rẹman ghe ele deba iJehova ha wẹnna. Imọn eso nan re inian rẹkpa wanre dọ ha lu iwẹnna misiọnari, eso dọ ha ga bhi Bẹtẹl, eso yẹ dọ ha tẹmhọn Osẹnobulua bhi eji a da guanọ urẹkpa. Ranmhude eje manman ree, ọle eso bhi ene imọn nan da dọ ha lu iwẹnna oga, ele bi ene biẹ ele iyẹ sabọ kẹ miẹn egbe. Ọrẹyiriọ, ahamiẹn ene biẹ ene imọn nan deziẹn nọnsẹn bhi oga, ele ki ziẹn ene imọn udu ghe, nin ele sẹyẹ situa bhi iwẹnna oga nin ele lu. Bezẹle? Ranmhude emhin nọn ti ele bhọ nọn ghe, imọn nesele mun ẹmhọn Agbejele kalo. (3 John 4) Asabọ miẹn ghe, ebi Hannah tale bhi Baibo, ọle ele yẹ mhọn bhi ọkhọle. Hannah da tale ghe ọle re ọmọn nọnsọle natiọle Samuel nin Jehova mọnmọn. Ene biẹ ọmọn ne lu inian, ọ ti ele bhọ rẹ re inian deba iJehova ha wẹnna. Ebi ele guanọ nọn gbera ọnan iribhọ.—1 Sam. 1:28.

5. Be uwẹ ha rẹ sabọ rẹkpa ibhio ẹ yẹ bhi ẹkẹ agbotu? (Fẹ adudu nọn ribhi eji a da munhẹn ghe.)

⁵ Ahamiẹn ẹsọn nin uwẹ mhọn bhi azagba-uwa bha manman kaka, uwẹ dẹ be sabọ rẹkpa ene imhan ko ga ne mhọn ene khọnmhọn, la ene dọmhanlẹn bhi azagba-uwa nọnsele? Uwẹ dẹ be sabọ rẹkpa ọnọn ki rẹ khin nọn guanọ urẹkpa? Dọnmhegbe fẹ ẹkẹ agbotu nọnsẹ ghe nọnsẹn nin uwẹ da sabọ daghe ene uwẹ ha sabọ rẹkpa. Bhi ọsi ijiẹmhin, ahamiẹn obhio mhan mhọn odede la ediọnmhan nin ọle gbẹloghe, uwẹ sabọ rẹ dọ rẹkpa ọle ẹghe eso beji ọle ha da sabọ dọ lu emhin ebhebhe. Uwẹ sabọ rẹ rẹkpa ene guanọ ọria nọn ha mun ele yo ikolo oga, la ọria nọn ha rẹkpa ele yo ẹki dọ dẹ emhin. Uwẹ sabọ yẹ yo uhọnmhọn nin ọnọn guanọ ọria nin ọle ha je ọle uhọnmhọn. La uwẹ sabọ dọ tuẹ ọria nọn khọnmhọn nọn ribhi họspita. Asabọ miẹn uwẹ a ha lu iriọ, uwẹ ki ha deba iJehova wẹnna rẹ họn erọnmhọn nin ọria nanlẹn.—Tie 1 Corinthians 10:24.

6. Be a re ọle ta nan rẹ ha miẹn ẹbho ọbhi egbe?

⁶ Ẹbho ne ga iJehova, a wo lẹn ele ọbhi eria ne miẹn ẹbho ọbhi egbe. Bhi urolo iGreek, ebi a re ọle ta nan rẹ ha miẹn ọria ọbhi egbe hi, nan rẹ ha mhọn ifuẹkẹ da eriọbhe. (Heb. 13:2; ftn.) Ijiẹmhin ribhi Baibo ne rẹman ebi a rẹ miẹn ọria ọbhi egbe yẹ. (Gen. 18:1-5) Mhan dẹ sabọ ha rẹkpa ẹbho. Bhiriọ, ọkhẹke nin mhan guanọ uwedẹ rẹ ha rẹkpa ẹbho ẹghe rebhe, aharẹmiẹn ghe ene imhan ko ga nọn la ele iyi ene mhan ko ga.—Gal. 6:10.

7. Ele nela mhan ha miẹn bhọ sade mhan miẹn ẹbho ne lu iwẹnna oga ọbhi egbe ahamiẹn ele re ẹnẹ ji mhan?

 ⁷ Ibhio mhan eso ribhọ ne re iẹnlẹn rebhe nọnsele rẹ lu iwẹnna oga, mhan ha miẹn ele ọbhi egbe, ọnan ki rẹman ghe mhan deba Osẹnobulua wẹnna. (Tie 3 John 5, 8.) Sẹyẹ, mhan ki ha “re urẹọbhọ nọnsẹmhan rẹ re izebhudu nin egbe.” (Rom. 1:11, 12) Bha ji mhan fẹ ijiẹmhin ọsi obhio mhan natiọle Olaf ghe. Ẹghe nin ọle rẹ ha ribhi obhokhan, ọfẹotughe ọkpa nọn imhọn okhuo da re ẹnẹ ji agbotu nọnsele. Ọria soso bhi ọne agbotu bha ka ji ọne ọfẹotughe da debhi uwa nọnsele a. Arẹmiẹn ghe ene biẹ Olaf iyi ọkpa bhi Esali Jehova, ọle da dọ nọọn ele si ele dẹ ji ọne ọfẹotughe da debhi isele a. Ele da ka nin ọne ọfẹotughe da vae bhi isele. Sokpan, ele da tale ghe ọne ọfẹotughe ha vae, Olaf ki ha nowẹ bhi uki agala. Iriọ Olaf gene lu, ọle da wo miẹn elele bhọ. Olaf da yọle: “Ọne uzanan nin wo mhẹn an! Mhan ha riọ bhi owe ọsewewiẹ, mẹn bi ọne ọfẹotughe ki wo ko zilo emhin ne bunbun ọkuesẹ mhan le ebale. Ọta nọnsọle da wo re izebhudu nin mẹn rẹ dọ ha lu iwẹnna ọkanẹfan.” Ikpe 40 ki nọn nian, nin Olaf ki sẹ wo lu iwẹnna misiọnari bhi ije kẹkẹ.

8. Bezẹle nọn da khẹke nin mhan ha mhọn ifuẹkẹ da ẹbho aharẹmiẹn ele bha khuẹmhẹn uwẹ bhi ọsi ọhẹnhẹn? Re ijiẹmhin man.

⁸ Uwedẹ nin uwẹ ha rẹ re oyẹẹ man eriọbhe wo bun, aharẹmiẹn ghe, ele bha khuẹnmhẹn uwẹ bhi ọsi ọhẹnhẹn. Fẹ ọne ijiẹmhin nan ghe. Obhio mhan ọkpa nọn ribhi Spain mhọn ọria nin ọle man ọle iBabo, Yesica a tie ọne ọria. Agbaẹbho natiọle Ecuador, ọle iYesica na vae. Ẹdẹ ọkpa nin ọne obhio mhan nan ha nin Yesica luẹ iBaibo, Yesica da ha viẹ. Ọne obhio mhan da nọọn ọlẹn ebezẹle nin ọle da viẹ. Yesica da taman ọne obhio mhan ghe, ọkuẹsẹ ọle sibhi agbaẹbho nọnsọle re, ọle bha ha mhọn igho. Ghe, ẹdẹ ọkpa, ọle bha ha mhọn ebale nin ọle ha le hiehie, amẹn ọkpa ọle bhọ miẹn rẹ nin ọmọn nọnsọle muọn. Ọle da ha dọnmhegbe nin ọle lẹlẹ ọne ọmọn bhi owe, ọle da yẹ ha nan erọmhọn nin Osẹnobulua rẹkpa ele. Ọbha sẹ bue gbe, Esali Jehova eva da bu ọle re. Ọkpakinọn Yesica bha miẹn ele ọbhi egbe. Ọle da vinọn ebe nin ele ne nanlẹn an. Ọle da yọle: “Ọnan be hi ebale nin bha guanọ nin mẹn rẹ nin ọmọn nọnsẹmhẹn le?” Ene ibhio mhan eva da ha dọnmhegbe nin ele rẹ ko ọle udu re. Ọkpakinọn, ọle bha fi ehọ ele bhọ. Akizẹbue, ele da dọ mun okhuae nin ebale vuọn fi ọle bhi ukhuẹdẹ. Ọnan da wo re obọ so iYesica. Ọ da wo ba ọle bhi egbe a ghe, ọle bha gbẹlokotọ nin ọle lẹn ghe Osẹnobulua ha wanniẹn erọnmhọn nọnsọle. Ejayenan nian, Yesica muegbe nin ọle rẹ ga iJehova. Uwedẹ nin ene ibhio mhan nan rẹ mhọn ifuẹkẹ da ọne okhuo nan da wo rẹkpa ọle dọ ga iJehova!—Eccl. 11:1, 6.

9, 10. (a) Sounu bhi ẹghe ọkpa nan rẹ tie ẹbho nin ele zegbere dọ wẹnna bhi Baibo? (b) Uwedẹ kẹkẹ nela ikpea ne ribhi agbotu ẹlẹnan ha da sabọ zegbere dọ wẹnna?

⁹ Ẹghe eso bhi agbaẹbho nọnsi Izrẹl, a ki ha tie ẹbho nin ele zegbere dọ wẹnna. (Ex. 36:2; 1 Chron. 29:5; Neh. 11:2) Ẹlẹnan nian, isẹhoa ne bunbun yẹ wo ribhọ nin uwẹ ha da noo ẹghe, ahu bi emhin nin uwẹ mhọnlẹn rẹ rẹkpa ibhio ẹ. Uwẹ ha zegbere ha rẹkpa ibhio ẹ, uwẹ ki miẹn erọnmhọn bi eghọnghọn bhi iẹnlẹn.

¹⁰ Baibo taman ene ikpea ne ribhi agbotu ghe, nin ele ha dọnmhegbe beji ele ha da sẹ eria nan ha ne ọbhi ihe bhi ẹkẹ agbotu. Ele ha lu iriọ, ele ki ha deba iJehova wẹnna. (1 Tim. 3:1, 8, 9; 1 Pet. 5:2, 3) Eria ne gene lu irio rẹman ghe, ele ho nin ele rẹkpa ibhio ele bhi uwedẹ efun bi uwedẹ oriọn. (Acts 6:1-4) Ene ewanlẹn bhi agbotu sẹ be dọ nọọn uwẹ si uwẹ dẹ sabọ deba ene gbẹloghe ebe nesẹmhan, ene man eria eji ele ha da dotua, la ele sẹ taman uwẹ nin uwẹ dọ lu iwẹnna soso? Ene lu ene iwẹnna nan kẹkẹ dẹ sabọ taman uwẹ ghe, eghọnghọn nabhọre sade a re obọ kpa.

11. Elele nela obhio mhan ọkpa natiọle Margie miẹn bhi obọ ene ọle deba lu imọẹ?

 ¹¹ Ene zegbere dọ ha deba lu iwẹnna oga ẹlẹnan wo miẹn imọẹ ọsọgbọn. Ghe ijiẹmhin ọkpa ọsi obhio mhan nin okhuo natiọle Margie. Ikpe 18 ki nọn nian nin ọle deba ha bọn iKindọn Họọ bhi ijie kẹkẹ. Bhi ikpe ne bunbun nian, ọle yẹ wo zegbere ha mhan ikhuo nin elasẹre emhin. Ọle da dọ kere ghe, uwedẹ kpataki yẹ khọnan nan rẹ re izebhudu nin egbe bhi uwedẹ oriọn. (Rom. 1:12) Ẹghe nin Margie ki rẹ miẹn ọnọghọ bhi iẹnlẹn, ene eria nin ọle nan lu imọẹ ẹghe nin ọle rẹ ha deba bọn iKindọn Họọ da re ikoudure nanlẹn. Uwẹ be sẹ zegbere deba wẹnna bhi uwa oga nan bọn khẹ? Aharẹmiẹn ghe uwẹ bha guẹ ọne iwẹnna, uwẹ sabọ yẹ zegbere dọ deba bhọ.

12. Urẹkpa nela uwẹ ha sabọ re nin ẹbho nin emhin idumhuri sunu je?

¹² Uwedẹ ọbhebhe nin ene ga iJehova rẹ deba ọle wẹnna hi, sade ele rẹkpa ibhio ele ahamiẹn emhin idumhuri sunu ji ele. Bhi ọsi ijiẹmhin, ele ki re igho rẹ rẹkpa ele. (John 13:34, 35; Acts 11:27-30) Uwedẹ ọbhebhe nan ha rẹ sabọ rẹkpa sade emhin idumhuri sunu hi, nan rẹ deba kiẹ bọn uwa ne dumhun an ọsi ibhio mhan, la nan rẹ deba mhọn ele ọ. Obhio mhan ọkpa natiọle Gabriela, agbaẹbho natiọle Poland ọle da nyẹnlẹn. Ranmhude amẹn nọn manman rọ, ologho da ria ọle uwa a. Ibhio mhan ne ribhi agbotu ne sikẹ isọle ki vae dọ rẹkpa ọle, ẹghọnghọn da gbe ọle udu a. Ọle da yọle: “Ọiyi emhin nesẹmhẹn ne yulua mẹn ha tẹmhọn ọlẹn nian. Emhin nin mẹn miẹn bhi obọ, ele mẹn ha tẹmhọn ọlẹn. Ebi ẹlo mẹn daghe nian ji mẹn lẹn ghe emhin esili wo nọn nan rẹ deba agbotu. Ọ re eghọnghọn bi ọnyẹnmhẹn nin ọria.” Iriọ ẹbho ne bunbun nan re urẹkpa nan ranmhude emhin idumhuri nọn sunu ji ele yẹ ta. Ene deba Jehova wẹnna rẹkpa ene ẹbho nan tale ghe ọkhọnlẹn bi eghọnghọn ele miẹn bhi ọne iwẹnna nan.—Tie Acts 20:35; 2 Corinthians 9:6, 7.

13. Ahamiẹn mhan zegbere deba iJehova ha wẹnna, be ọnan ha rẹ ziẹn ikolu nin mhan bi ọle ko mhọn yẹ? Re ijiẹmhin man.

¹³ Obhio mhan nin Stephanie bi ibhio mhan eso ebhebhe bhi United States da ha rẹkpa Esali Jehova ne nẹ vae bhi enin. Okhọn khu ele bhi agbaẹbho nọnsele. Stephanie bi enekẹle ki ha rẹkpa ene ẹbho nan guanọ uwa. Ele ki yẹ dẹ emhin ọbhi ẹkẹ ọne uwa. Ọne uwedẹ nan ele rẹ ha deba iJehova wẹnna. Stephanie da yọle: “Eghọnghọn bi  ekhuẹnmhẹn nin ele ha mhọn ranmhude urẹkpa nin ele miẹn bhi obọ ibhio mhan da wo ziẹn mhan udu. Ene Ẹbho ki ha riale ghe mhan rẹkpa ele, bhi ọsi ẹmhọanta, urẹkpa nin mhan miẹn bhi obọ ele kpọnọ nẹ. Ahoẹmhọn-egbe, okugbe, urẹọbhọ bi uwedẹ nin ele rẹ mun udu tẹ Jehova wo ziẹn oyẹẹ nin mhan mhọn da iJehova. Sẹyẹ, ọnan wo dọ re mhan kie ha mhọn ekhuẹnmhẹn da emhin nin agbotu nọnsi Jehova re nin mhan.”

14, 15. (a) Be Isaiah lu yẹ ẹghe nin Jehova rẹ ha guanọ ọria nin ọle ha je ọle uhọnmhọn? (b) Be ene ga iJehova ẹlẹnan ha rẹ sabọ re egbe khọkhọ Isaiah yẹ?

¹⁴ Ọ dẹ yẹẹ uwẹ rẹ tuẹn okhun bhi uwedẹ nin uwẹ rẹ wẹnna nin Jehova? Ahamiẹn ọ dẹ yẹẹ uwẹ rẹ lu iriọ, uwẹ sabọ rẹ ha khian eji a da guanọ urẹkpa bhi iwẹnna itẹmhọn Osẹnobulua. Ẹmhọanta nọn ghe, ọiyi oko ghe uwẹ dẹ ha khian eje manman ree ọkuẹsẹ uwẹ sabọ re obọ kpa. Ọkpakinọn, idia nin ibhio mhan eso yẹ dẹ ji ele da ha khian eje manman ree dọ ha ga bhi enin. Inian ele diabe Isaiah. Ẹghe nin Jehova rẹ ha guanọ ọria nin ọle ha je ọle uhọnmhọn, Isaiah da yọle: “Ghe mẹn bhi enan, je mẹn!” (Isa. 6:8) Uwẹ dẹ be yẹ zegbere beji Isaiah luọle sade a guanọ urẹkpa bhi ilọnmhọn oga? Uwedẹ eso nela mhan ha rẹ sabọ re obọ kpa?

¹⁵ Ẹghe nin Jesu rẹ ha tẹmhọn iwẹnna itẹmhọn Osẹnobulua, ọle da yọle: “Ene emhin nan ha kọnọn wo bun, ọkpakinọn ene kọnọn ọlẹn bha bun. Bhiriọ, bha bhii Ọnọn nyan ọne ugbo nọn je ẹbho ne dọ ha kọnọn ọlẹn.” (Matt. 9:37, 38) Uwẹ dẹ be sabọ dọ lu iwẹnna ọkanẹfan bhi eji a da guanọ urẹkpa? La uwẹ dẹ be sabọ rẹkpa ọria ọbhebhe nin ọle dọ lu iriọ? Ibhio mhan eso dọ kere ghe, uwedẹ nọn kokhun nẹ nin mhan ha rẹ re oyẹẹ nin mhan mhọn da iJehova bi ẹbho man hi, nin mhan dọ ha lu iwẹnna ọkanẹfan bhi eji a bha sẹ da manman tẹmhọn Osẹnobulua. Uwẹ dẹ be sabọ ria uwedẹ ebhebhe nin uwẹ ha rẹ sabọ ha lu ba iwẹnna oga nọnsẹ? Uwẹ ha lu iriọ, uwẹ ki miẹn eghọnghọn bhọ.

16, 17. Uwedẹ nela uwẹ ha rẹ sabọ tuẹn okhun bhi iwẹnna nin uwẹ lu nin Jehova?

¹⁶ Ọ dẹ be yẹẹ uwẹ rẹ zegbere dọ ha ga bhi Bẹtẹl, la rẹ dọ deba ha bọn uwa oga? Uwẹ sabọ vae dọ gbe uki eso rẹ re obọ kpa bhi iwẹnna nan lu bhi Bẹtẹl, la uwẹ sabọ ha na bhi uwa vae ikpẹdẹ eso bhi uzana dọ ha wẹnna. Ẹbho ne ha re ọkhọle rebhe rẹ ha wẹnna, ele agbotu nọnsi Osẹnobulua guanọ. Ene ẹbho ki muegbe nin ele rẹ wẹnna bhi eji ọ iki rẹ khin nan taman ele da wẹnna, la ele ki muegbe rẹ lu iwẹnna nọn ki rẹ khin nan mun nin ele, aharẹmiẹn ghe, ọiyi iwẹnna nọn yẹẹ ele. Jehova manman hoẹmhọn ọria nọn tobọle zegbere vae dọ ha ga bhi eji ọ ki rẹ khin nan da guanọ ẹbho.—Ps. 110:3.

¹⁷ Uwẹ be guanọ nan kie man uwẹ emhin eso beji a da miẹn ghe, uwẹ ki manman guẹ iwẹnna nin Jehova mun nin uwẹ ha lu? Sade ọnan uwẹ guanọ, uwẹ sabọ yo Isiku Ọsi Ene Tẹmhọn Agbejele (SKE). Ibhio mhan ne lu iwẹnna ọkanẹfan, ele hi ene yo ọne isiku nan. Agbotu nọnsi Jehova dẹ sabọ noo ibhio mhan ne yo ọne isiku nan rẹ lu iwẹnna oga ebhebhe. Ẹbho ne yo ọne isiku nan, ele muegbe nin ele rẹ lu iwẹnna nọn iki rẹ khin nan mun nin ele sade ele ki yo ọne isiku fo. Uwẹ kii, uwẹ be muegbe nin uwẹ rẹ re inian ha wẹnna nin Jehova?—1 Cor. 9:23.

18. Elele nela uwẹ ha miẹn bhọ sade uwẹ deba iJehova ha wẹnna ukpẹdẹ-ukpẹdẹ?

¹⁸ Ẹbho nesi Jehova mhan khin. Ọkhọle rebhe mhan rẹ mhọn ifuẹkẹ bi oyẹẹ da ẹbho. Mhan lu emhin esili nin ẹbho, ifuẹkẹ mhan rẹ nin ele lu emhin, mhan hoẹmhọn ele. Sẹyẹ, mhan rẹkpa ele ẹdẹdẹ. Ranmhude ọnan, mhan miẹn eghọnghọn bi ọfure bhi iẹnlẹn. (Gal. 5:22, 23) Idia nin uwẹ iki rẹ ha ye bhi iẹnlẹn, uwẹ dẹ sabọ re egbe khọkhọ iJehova ha ze emhin bhi obọ yẹ deba iJehova wẹnna. Bhiriọ, uwẹ ki sabọ ha sọnyẹnmhẹn bhi iẹnlẹn.—Prov. 3:9, 10.