ỌRIA ekhuẹnmhẹn uwẹ be khin? Ọkhẹke nin mhan rebhe nọọn egbe mhan ọne inọnta nin. Baibo taman mhan ghe, bhi ọne ẹghe nin mhan da nyẹnlẹn nan, “eria ki ha gbe ibo ele bhi ẹse.” (2 Tim. 3:2) Asabọmiẹn uwẹ sẹ ka miẹn eria ne riale ghe, ele ọkhẹke nan ha ne emhin rebhe nan la lu emhin rebhe nan. Bhiriọ, a ha ki lu ọne emhin nin ele fo, ele ida gbe ekhuẹnmhẹn nin ọne ọria nọn lu ọle nin ele. Ọ dẹ be yẹẹ uwẹ rẹ sikẹ ọria nọn dia iriọ?

Ọkpakinọn, Baibo taman ẹbho nesi Jehova yọle: “Ha re ekhuẹnmhẹn nin uwẹ mhọnlẹn man.” Bhi emhin rebhe, ọle iBaibo da yọle nin mhan ha re ekhuẹnmhẹn man. (Col. 3:15; 1 Thess. 5:18) Bhi ọsi ẹmhọanta, emhin esili nọn nin mhan rebhe rẹ ha re ekhuẹnmhẹn man. Bha ji mhan zilo nyan ebezẹle nọn da khẹke nin mhan ha lu iriọ.

Emhin kpataki ọkpa nọn zẹle nin mhan ha da ha re ekhuẹnmhẹn man hi, ọ dẹ sabọ re imhan ha ghọnghọn. Ọria nọn re ekhuẹnmhẹn man bhi emhin nan lu nanlẹn dẹ ha ghọnghọn. Sẹyẹ, ọne ọria nan khuẹnmhẹn ki yẹ ha ghọnghọn. Bezẹle nin ekhuẹnmhẹn da sabọ re inian re imhan ghọnghọn? Ranmhude, ọria ha muegbe nin ọle rẹ lu emhin nin mhan, ọle lẹnmhin ghe mhan sẹ ọria nan ha lu ọne emhin nan. Bhiriọ, mhan ha lẹn ghe ẹmhọn mhan ti ọle bhọ, ọ ki rẹ mhan ha ghọnghọn. Ọnan hi ebe sunu ji Ruth bhi Baibo. Boaz da wo lu ẹsele nin Ruth. Ọ da wo re iRuth ha ghọnghọn rẹ lẹn ghe ọria hoẹmhọn ọlẹn.—Ruth 2:10-13.

Ọ manman khẹke nin mhan ha re ekhuẹnmhẹn ji Osẹnobulua. Edandan iribhọ ghe, uwẹ wo ria ẹmhọn uwedẹ kẹkẹ nin Jehova rẹ wo ha lu ẹsele nin uwẹ. (Deut. 8:17, 18; Acts 14:17) Emhin rebhe nin Jehova sẹ lu nin mhan bi ẹbho nin mhan hoẹmhọnlẹn, ọ bha khẹke nin mhan ha ye ele a. Sokpan, ọkhẹke nin mhan ha re ẹghe ọbhi otọ rẹ ria eria nyan ele. Mhan a ha lu iriọ, ekhuẹnmhẹn nin mhan mhọn da Osẹnobulua ki manman dinmhin. Mhan ki yẹ dọ daghe uwedẹ kẹkẹ nin ọle rẹ hoẹmhọn mhan.—1 John 4:9.

Hẹi wo gheghe ha ria eria nyan ene ẹsele nin Jehova lu nin uwẹ. Sokpan, ha khuẹnmhẹn ọlẹn ba ene ẹsele. (Ps. 100:4, 5) Ẹbho tale ghe, ọria nọn gbe ekhuẹnmhẹn, manman miẹn eghọnghọn.

Emhin ọbhebhe nọn zẹle nin mhan ha da ha gbe ekhuẹnmhẹn hi, ọ rẹkpa mhan rẹ ha mhọn ikolu nọn ziẹnlẹn. Mhan rebhe guanọ nin ẹbho ha khuẹnmhẹn mhan. Ahamhiẹn uwẹ re ẹkẹata khuẹnmhẹn ọria, ikolu nin uwẹ bi ọle ko mhọnlẹn ki manman ha ziẹn ọbhọ. (Rom. 16:3, 4) Sẹyẹ, eria ne mhọn unun ekhuẹnmhẹn, ele kẹ sabọ rẹkpa ẹbho. Bezẹle? Ranmhude ele daghe emhin esili nan lu nin ele, bhiriọ, ele ki yẹ ha guanọ nin ele lu emhin esili nin ọria. Bhi ọsi ẹmhọanta, eghọnghọn nabhọre sade mhan rẹkpa ọria. Iriọ Jesu tale ẹghe nin ọle rẹ yọle: “A ha re emhin sibhi obọ re, ọle eghọnghọn ye gbera a ha miẹn emhin bhi obọ.”—Acts 20:35.

Okpea ọkpa natiọle Robert Emmons nọn wẹnna bhi Isiku nọn ke okhun nẹ ọsi California, da deba guanọ otọ ekhuẹnmhẹn fẹghe. Ọle da yọle: “Mhan dẹ sabọ ha mhọn unun ekhuẹnmhẹn sade mhan lẹn ghe, bhi iẹnlẹn, mhan dẹ guanọ urẹkpa bhi obọ ẹbho nekẹle beji ele ha yẹ rẹ ha guanọ urẹkpa bhi obọ mhan.” Bhi ọsi ẹmhọanta, nin mhan rẹ sabọ ha nyẹnlẹn yẹ ghọnghọn bhi iẹnlẹn, ọkhẹke nin mhan ha rẹkpa egbe. Bhi ọsi ijiẹmhin, asabọmiẹn ẹbho dẹ ha rẹkpa mhan miẹn ebale nin mhan ha le, la ele dẹ ha gbẹloghe mhan sade mhan khọnmhọn. (1 Cor. 12:21) Ọria nọn mhọn unun ekhuẹnmhẹn ji emhin nin ẹbho lu nanlẹn ha ti ọle bhọ. Ranmhude ọnan, uwẹ be gbe ekhuẹnmhẹn nin ọria sade ọle lu emhin nin uwẹ?

Emhin ọbhebhe nọn yẹ zẹ nin mhan ha da ha mhọn unun ekhuẹnmhẹn hi, ahamiẹn mhan mhọn unun ekhuẹnmhẹn, ọ ki rẹkpa mhan rẹ ha ghe emhin esili ne sunu bhi iẹnlẹn nọnsẹmhan, mhan ida wo ha mun ọkhọle ọbhi emhin ebe ne sunu. Ahamiẹn mhan mhọn ọkhọle nan rẹ ha gbe ekhuẹnmhẹn ẹghe rebhe, mhan ki sabọ ha daghe emhin esili bhi iẹnlẹn nọnsẹmhan, bhiriọ, ọ ki kie manmhan ha ti mhan bhọ rẹ ha gbe ekhuẹnmhẹn. Ahamiẹn emhin ne sẹ ebi a gbe ekhuẹnmhẹn nan mhan mun ọkhọle ọi bhi iẹnlẹn, mhan ki sabọ lu beji Paul nin odibo tale. Ọle da yọle: “Ha ghọnghọn ranmhude Ebeanlẹn mhan.”—Phil. 4:4.

Ahamiẹn mhan mhọn ọkhọle nan rẹ gbe ekhuẹnmhẹn, mhan ida ha miẹn ẹghe rẹ ha ria emhin ebe. Ọ nọghọ ọria nọn mhọn unun ekhuẹnmhẹn rẹ ha mhọn ikhu da ọria, la nin ẹkẹ ọria rẹ ha khọ ọle. Eria ne sẹ inian, emhin nin ele mhọnlẹn khọn ele, ele ikhu ọbhi ẹfe bi ua.—Phil. 4:12.

Ranmhude ọria nọn ga iJehova uwẹ khin, Esu ki wo ha ghọnghọn rẹ daghe ghe, ọnọghọ nin uwẹ miẹn re egbe lọ uwẹ rẹ sẹbhọ ghe, uwẹ iyẹ ghọnghọn bhi iẹnlẹn. Ọ dẹ wo ha ti ọle bhọ rẹ daghe ghe uwẹ wo zaka zunyọn bhi iẹnlẹn. Ahamiẹn ọria nọn zaka zunyọn uwẹ khin, ọ ki ha nọghọ ẹbho rẹ ka uwẹ ehọ sade uwẹ tẹmhọn Osẹnobulua. Bhi ọsi ẹmhọanta, ekhuẹnmhẹn, bi ikpẹ ọsi ẹlinmhin nọn khiale mhọn eji ele da diẹn kugbe. Bhi ọsi ijiẹmhin, ọ rẹ mhan ghọnghọn rẹ daghe emhin nin Osẹnobulua sẹ lu nin mhan. Mhan yẹ mhọn urẹọbhọ da ive nesọle.—Gal. 5:22, 23.

Ranmhude ọnọn ga iJehova uwẹ khin, ọ ida nọghọ uwẹ rẹ rẹọbhi ẹmhọn ekhuẹnmhẹn nin mhan zilo nyan bhi ọne uhọnmhọn-ọta nan. Ọrẹyiriọ, uwẹ dẹ kere ghe ọ iyi emhin nọn lẹkhẹ nan rẹ ha re ekhuẹnmhẹn man, bi nan rẹ wo ha denọ ẹlo ọbhi emhin esili nin mhan miẹn bhi iẹnlẹn. Hẹi ji ọnan re egbe lọ uwẹ. Uwẹ dẹ sabọ ha yi ọria nọn mhọn unun ekhuẹnmhẹn. Be uwẹ ha rẹ sabọ ha yi ọria nọn sẹ iriọ yẹ? Ha re ẹghe ọbhi otọ ukpẹdẹ-ukpẹdẹ rẹ ria eria nyan emhin kẹkẹ ne sẹ sunu ji uwẹ bhi iẹnlẹn ne khẹke nin uwẹ mhọn ekhuẹnmhẹn ba. Ahamiẹn uwẹ lu ọnan ẹghe rebhe, uwẹ ki sabọ ha mhọn ọkhọle nan rẹ re ekhuẹnmhẹn man. Bhiriọ, uwẹ ki sabọ ha ghọnghọn gbera ẹbho ne wo denọ ẹlo ọbhi ọnọghọ ọsi iẹnlẹn. Dọnmhegbe ha denọ ẹlo ọbhi emhin esili nin Jehova bi ẹbho ebhebhe lu nin uwẹ. Uwẹ sabọ rẹ ha gbẹn ọbhi otọ ukpẹdẹ-ukpẹdẹ emhin ne sunu ji uwẹ ne sẹ ebi uwẹ ha gbe ekhuẹnmhẹn ba.

Ene fẹ otọ emhin ghe tale ghe, ahamiẹn mhan gbe ekhuẹnmhẹn ẹghe rebhe, ẹrere nọnsẹmhan ki ha wẹnna bhi uwedẹ nan ha da miẹn ghe, ọ ki ha lẹkhẹ nin mhan rẹ ha ghọnghọn bhi iẹnlẹn. Ọnan zẹle nan da miẹn ghe, ọria nọn gbe ekhuẹnmhẹn wo manman miẹn eghọnghọn bhi iẹnlẹn. Bhiriọ, ha ria eria nyan ene emhin esili nin uwẹ sẹ miẹn bhi iẹnlẹn, ha re ele sọnyẹnmhẹn, uwẹ a ha gbe ekhuẹnmhẹn ba ele. Hẹi ha re ẹlo rẹ gbe emhin esili nin uwẹ mhọnlẹn an. Ha re ekhuẹnmhẹn ji Jehova ranmhude emhin rebhe nin uwẹ mhọnlẹn bhi iẹnlẹn.—1 Chron. 16:34; 1 Thess. 5:18.