Ọ iyi si ọne okpea gene lu la si ọle bha lu Deuteronomy 22:25-27 ha tẹmhọnlẹn, ranmhude ọta nan ha ta vade bhi ọne okha rẹman ghe, ọne okpea gene lu ọne emhin ọbe nan. Sọkpan, nan hẹi ka ọne olukhọ ọne ọmanmhẹn bhi obọ, ọle ọne uhi ha tẹmhọnlẹn bhi ene ulọnlẹn nan. Bha ji mhan fẹ ọne okha ghe nọnsẹn.

Bhi ulọnlẹn nọnzi 23 bi 24, Baibo da tẹmhọn okpea nọn ne ọmanmhẹn nọn mhọn ọria nin ọle ha bọ nowẹ bhi ẹkẹ agbaẹbho. Bhiriọ, a dẹ sabọ yọle ghe ọle ne okhuo ọria ọbhebhe gboghẹ, ranmhude ẹlo nan rẹ ghe okhuo nọn bọ ọdọ fo, ọle a yẹ rẹ ghe ọmanmhẹn nọn mhọn ọria nin ọle ha bọ. Ọne ọmanmhẹn kii? Ranmhude ọle bha reso, a ki yẹ yọle ghe ọle gboghẹ. Sade ọle reso nọn, ẹbho ha rẹ dagbare dọ miẹn ọlẹn fan ranmhude ẹwẹ agbaẹbho ele ha ye. Ọkpakinọn, ọle bha reso.—Deut. 22:23, 24.

Baibo da gbo tẹmhọn idia ikẹ. Ọ da yọle: “Ọkpakinọn, ahamiẹn ugbo ọne okpea da miẹn ọne ọmanmhẹn nọn mhọn ọria nin ọle ha bọ, nin ọle da re idu-idu nanlẹn nowẹ, ọne okpea tobọle dẹ yu ba emhin nin ọle lu. Bha hẹi lu ọne ọmanmhẹn emhin soso, ranmhude ọle bha lu emhin ọbe soso nan ha gbe ọle a ba. Inian ọne ẹmhọn nan yẹ diabe ọsi okpea nọn dọ gbe okpea ibo ọle yẹ gbe ọle a. Ranmhude ugbo ọle da ke ọne ọmanmhẹn re, ọne ọmanmhẹn rẹ reso, ọria soso bha ha ribhi enin nọn ha dọn hinmhin ọlẹn.”—Deut. 22:25-27.

Bhi ọne idia nan, ene bhohiẹn rẹọbhi ebi ọne ọmanmhẹn tale. Bezẹle? Ranmhude ele rẹọbhọ ghe ọne ọmanmhẹn gene reso, sọkpan, ọria soso bha ha ribhi enin nọn ha dọ miẹn ọlẹn fan. Ranmhude ọnan, a dẹ yọle ghe ọne ọmanmhẹn bha gboghẹ. Ọkpakinọn, a dẹ yọle ghe ọne okpea gboghẹ ranmhude idu-idu ọle rẹ ne ọne ọmanmhẹn nowẹ.

Bhiriọ, ọne iBaibo nan rẹman ghe ọne ọmanmhẹn nọn sẹ inian bha lu ọkpa lu eva, sokpan ọne okpea, ọle hi ọnọn gboghẹ. Mhan rẹọbhọ ghe, ene bhohiẹn dẹ fẹ otọ ọne ẹmhọn ghe nọnsẹn nin ele da bhohiẹn nọn ha diẹn mun adia nin Osẹnobulua wo ha zẹ ọle egbe dagbare ẹghe-ẹghe.—Deut. 13:14; 17:4; Ex. 20:14.