Uwẹ dẹ be sabọ noo ebe Ọkhẹughe na ne dagbare bhi 2019 rẹ wanniẹn ene inọnta nan?

Be iJehova re ọne ive nan ta: “Emhin okhọn soso iribhọ nan lu ranmhude uwẹ nọn ha wẹnna hiehie.”? (Isa. 54:17)

Mhan mun udu tẹ Jehova ghe ọle dẹ gbega mhan bhi “ohu nọnsi ene de nyẹnyẹn ọria.” (Isa. 25:4, 5) Ẹghe iribhọ nin eghian mhan ha rẹ sabọ gbe mhan khuelo.—w19.01, pp. 6-7.

Be uwedẹ nin Jehova rẹ ne ibhokhan iCanaan bi ibhokhan Izrẹl ne wo bhi ehọ lu emhin, rẹ rẹman yẹ ghe uwedẹ nọn gbale ọle rẹ lu emhin?

Osẹnobulua re oya nin ẹbho ne ha ne obọ ọbhi ilọnmhọn oghẹ la ene ha lu ikhuo bi ibhokhan khọlọ. Ọkpakinọn, ọle da nan erọnmhọn nin ene họn ẹmhọn nanlẹn bi ene lu ibo ele nọnsẹn.—w19.02, pp. 22-23.

Be ọkhẹke nin mhan rẹ lu emhin yẹ sade ọria nọn iga Osẹnobulua re ẹbho nan erọnmhọn bhi eji mhan ye?

Ọ bha khẹke nin mhan gbe “isẹ” ọbhi ọne erọnmhọn la nin mhan deba ele mun egbe obọ mhọnlẹn. Mhan ki fẹkẹ mun ekpẹn ọbhi egbe yẹ huẹan. Mhan sabọ rẹ nan erọnmhọn bhi ẹkẹ ọkhọle nọnsẹmhan.—w19.03, p. 31.

Be ọ kaka sẹ yẹ nan rẹ mun obhokhan ria a?

Ọria ha mun obhokhan ria a, ọle rahiẹ ọne obhokhan tobọle, ene ribhi agbotu, ene gbẹloghe, bi Osẹnobulua. Bhi agbaẹbho nan da gbẹn ọlẹn ọbhi uhi ghe nan ha taman ene gbẹloghe sade ọne emhin ọbe nan sunu, ene ewanlẹn ki gene lu beji ọne uhi tale.—w19.05, pp. 9-10.

Be imhan ha rẹ sabọ fi ọria nin mhan khin bhi ọkhọle denọ yẹ?

Ebe mhan ha lu hi: Nan erọnmhọn ji Jehova, ria eria nyan ebi emhin nin uwẹ luẹ ha rẹ sabọ rẹkpa uwẹ yẹ bhi iẹnlẹn, uwẹ ha yẹ re ẹwanlẹn zẹ ikolu nọnsẹ.—w19.06, p. 11.

Be imhan ha rẹ muegbe khẹ ekpokpo yẹ nian?

Ọkhẹke nin mhan ziẹn ikolu nin mhan bi Jehova ko mhọnlẹn nian. Ha mhọn ọne iriduba ghe, ọle họemhọn mhan, ghe, ebe ọ ha re ọle fi ikeke gbe mhan iribhọ. Ha tie iBaibo yẹ nan erọnmhọn ukpẹdẹ-ukpẹdẹ. Ha mhọn urẹọbhọ ghe Agbejele nọnsi Osẹnobulua dẹ gene vae. Uwẹ ha yẹ lẹn iBaibo bi illo nesẹmhan ọbhi uhọnmhọn.—w19.07, pp. 2-4.

Be imhan ha rẹ rẹkpa ene ribhi azagba-uwa nọnsẹmhan yẹ nin ele dọ deba mhan ha ga iJehova?

Ọkhẹke nin mhan ha re ẹkẹ ẹjẹjẹ ne ele lu emhin. Mhan ki yẹ ha re ijiẹmhin esili nesẹmhan rẹ sọsali man ele. Sẹyẹ, mhan ki ha re iziẹngbe bi ẹwanlẹn rẹ ne ele lu emhin.—w19.08, pp. 15-17.

Be iJesu rẹ re ọfubhegbe nin mhan yẹ beji ọle tale bhi Matthew 11:28?

Ọle noo ewanlẹn bhi ẹkẹ agbotu, ibhio mhan bhi agbotu, bi iwẹnna nin ọle mun nin mhan rẹ re ọfubhegbe nin mhan.—w19.09, p. 23.

Be Osẹnobulua rẹ re ọkhọle bi ahu ọne nin mhan rẹ lu iho nọnsọle yẹ? (Phil. 2:13)

Mhan ha tie iBaibo yẹ ria eria nyan ebi mhan tiele bhọ, Osẹnobulua ki rẹkpa mhan nin mhan ha mhọn ọlẹn bhi ọkhọle rẹ lu iho nọnsọle, ọle ki yẹ re ọne ahu nin mhan rẹ lu ọle. Sẹyẹ, ẹlinmhin nọn khiale dẹ sabọ rẹkpa mhan rẹ manman guẹ iwẹnna oga nin mhan lu.—w19.10, p. 21.

Emhin eso nela ọkhẹke nin mhan ka lu ọkuẹsẹ mhan mhanmhan ebi mhan ha lu?

Emhin isẹn nọn khẹke nin mhan lu hi: Nan erọnmhọn ji Osẹnobulua nin ọle re ẹwanlẹn nin uwẹ, ria ẹmhọn ebezẹle nin uwẹ da ho nin uwẹ lu ebi uwẹ guanọ nin uwẹ lu, mhanmhan ebi uwẹ ha rẹ mun ọne emhanmhan sẹ yẹ. Sẹyẹ, ha mhọn emhanmhan nin uwẹ ha sabọ munsẹ.—w19.11, pp. 27-29.

Urẹọbhọ nin ẹbho mhọn ẹlẹnan ghe ọria ha rẹ yu emhin re ọle bhi ẹkẹ egbe nọn isabọ yu, ọle Esu be ha tẹmhọnlẹn man Eve?

Ebi Esu taman Eve hi, ọle ida yu hiehie. Ọle bha taman ọlẹn ghe ọle dẹ dọ ha nyẹnlẹn bhi ije ebhebhe sade ọle yu. Oga ohoghe rebhe fuẹn an ẹghe nin Osẹnobulua rẹ re amẹn rẹ fuẹn ẹbho a bhi ẹghe iNoah. Asabọmiẹn ọkuẹsẹ Osẹnobulua re urolo kẹkẹ nin ẹbho bhi Babel, ọle ọne iman-emhin ohoghe nan rẹ munhẹn.—w19.12, p. 15.