BHI ukpe 1910, Charles T. Russell bi ikpeta ẹbho eso ki ha gua okọ gbera bhi ẹdẹ nọn ribhi agbaẹbho natiọle Belfast, ele da ha daghe ene ukoke ne mhọn ose kẹkẹ ne ribhi enin bi okọ eva ne manman kpọnọ nan ha lu. Ọkpa bhọ da ha yi Titanic, ọne ọzeva da ha yi Olympic *. Ọzi isẹn ọnan ki khin nian nin Charles T. Russell ki sẹ khian ọne okhian nan diọ bhi Ireland. Bible Student eso da ha mundia khẹ ọle bhi eji okọ da mun ekhẹn.

Ikpe 20 ọkuẹsẹ ukpe 1910, Obhio mhan nin Russell da ha guanọ uwedẹ nin ọle ha rẹ tẹmhọn Osẹnobulua nanbhi agbaẹbho rebhe bhi ọne agbọn nan. Bhiriọ, ọle da ha nanbhi America re ẹnẹ diọbhi agbaẹbho kẹkẹ. Agbaẹbho natiọle Ireland, ọle Russell ka re ẹnẹ diọ bhi ukpe 1891. Ẹghe nin ọle rẹ ha gua okọ natiọle City of Chicago, ọle da daghe ebi oẹnlẹn rẹ ha defia yẹ bhi agbaẹbho natiọle Queenstown, ọnan da wo rẹkpa ọle yere emhin nin ene biẹ ọle tale rẹji isele. Ẹghe nin Russell bi ene rẹkhan ọlẹn ki ha gbera agbaẹbho ne bunbun, ele da dọ kere ghe agbaẹbho nin ele ha sabọ re ẹmhọn Osẹnobulua sẹ ene agbaẹbho khin.

Igba ihinlọn Russell re ẹnẹ diọ bhi Ireland. Ranmhude ọne uhọnmhuje nan wo ti ẹbho bhọ ẹghe nin ọle rẹ vae ọsọhẹnhẹn, ẹbho ne bunbun da dagbare dọ ka ọle ehọ ẹghe nin ọle rẹ kikie vae. Ọta ogbakha nin ọle da ta bhi Belfast bi Dublin ẹghe nin ọle ha rẹ re ẹnẹ re ugbazi eva bhi 1903, da dagbare bhi newspaper. Russell da yọle ghe ene ẹbho da wo ka ehọ ọne ọta ogbakha nọnsẹn. Uhọnmhọn-ọta ọsi ọne ọta ogbakhan hi, “The Oath-Bound Promise,” nọn tẹmhọn urẹọbhọ ọsi Abhraham bi emhin esili ne khẹ mhan nin eria bhi ẹghe odalo.

Ranmhude ẹbho ne bunbun manman wo ka ehọ bhi Ireland, Russell da re ẹnẹ yi enin ugbazi ea. Ibhio mhan isẹn, ele dọ gbobokhian nanlẹn ẹghe nin ọle rẹ vae bhi Belfast bhi uki ọsi April 1908. Ọne emuan nin ọle rẹ ta ọta ogbakha nan manman wewe nẹga nọn yọle, “The Overthrow of Satan’s Empire,” ẹbho ne sẹbhi 300 da sikoko nin ele dọ ka ehọ. A da re Baibo rẹ wanniẹn ọria ọkpa nọn rẹ mun ugan re. Bhi Dublin, ọkpea ọbhebhe nọn manman gbe ugan natiọle Mr. O’Connor—nọn yi akowe ọsi YMCA—da ha situa nin ọle rẹ fi ọkhọle ọsi ẹbho ne gbera 1,000 ne sikoko denọ. Be ki sunun?

Bha ji mhan re ọkhọle ria ẹmhọn ebe imhan ha sabọ yọle ọ sunun ọne ukpẹdẹ nin. Okpea nọn guanọ ẹmhọanta nọn ribhi Baibo da muegbe nin ọle rẹ dọ ka ehọ ọta ogbakha nin newspaper natiọle The Irish Times wewe. Ọle ki sẹbhi enin, ọle bha kẹ miẹn agala rẹ dotua, ranmhude ẹbho manman bunbun ne vae dọ ka ehọ. Ọne okpea da manman gbehọkotọ ka ehọ nọnsẹn beji obhio mhan rẹ ha re ọne ọta man. Uwedẹ nin ọne obhio mhan rẹ ha rẹ ọne ọta man, bi uwedẹ nin ọle rẹ ha tie Baibo kẹkẹ yẹ gbotọ ele fanọan da wo mun ọne okpea ẹlo kore. Arẹmiẹn a bha noo micro phone, ọrebhe da wo manman ha họn urulu ọsi ọne ta ọne ọta. Ọki sẹbhi ẹghe nanrẹ ha nọọn inọnta, O’Connor bi imọe ọle da dọ ha nọọn ọlẹn ọta nin ele  ha rẹ nanlẹn gbe ugan. Ọkpakinọn, ọle da re Baibo rẹ wanniẹn inọnta rebhe nin ele nọọn ọlẹn. Bhiriọ, ene ka ehọ rebhe da manman gbobọ nanlẹn nọnsẹn. A ki zobọ, ọne okpea da dọ taman ibhio mhan nin ele dọ ha man ọle iBaibo. Ẹbho nin ẹlo ele sẹbhọ tale ghe ọne uwedẹ nan, ọle eria ne bunbun rẹ dọ luẹ ẹmhọanta.

Bhi uki ọsi May 1909, Russell da nanbhi New York gua okọ nantiọle Mauretania ha khian Ireland ugbazi enẹn. Ọle da re Obhio mhan nin Huntsinger rẹkhan egbe ranmhude ọne obhio mhan nan sabọ gbẹn ebe nọnsẹn. Bhiriọ, ele da sabọ re ọne ẹghe nin ele gbe bhi ẹkẹ okọ rẹ gbẹn uhọnmhọn-ọta eso bhi ebe Ọkhẹughe. Ẹbho ne sẹbhi 450, ele vae dọ ka ehọ ọta ogbakha nin Russell ta bhi Belfast. Itue 100 bhi ẹwẹ ele da mundian ranmhude ele bha miẹn agala rẹ dotua.

Ọle ki ta ọta ogbakhan fo bhi agbaẹbho natiọle Dublin ẹghe nin ọle rẹ vae bhi Ireland ugbazi isẹn, okpea nọn yo iskikulu iBaibo nọn rẹkhan O’Connor vae da ha nọn inọnta. A da wo re Baibo rẹ wanniẹn ene inọnta rebhe. Ọnan da wo ha ti ene ka ehọ bhọ. Ẹdẹ ki we, Russell bi ene rẹkhan ọlẹn da rẹkhan okọ diọbhi Liverpool. Bhi enin, ele da nanbhi okọ natiọle Lusitania ha khian New York. *

A yẹ wo manman wewe ọta nin Obhio mhan nin Russell ta ẹghe nin ọle rẹ re ẹnẹ re bhi Ireland ugbazi ehan bi ugbazi ihinlọn bhi 1911. Ẹghe nin a rẹ la nanbhi ọne ukpe, Bible Student ne sẹbhi 20 ne ribhi Belfast da tie ẹbho nin ele dọ ka ehọ ọta ogbakha nọn yọle “Hereafter”. Itue 2,000, ele vae. O’Connor da gbo re ọria ọbhebhe rẹkhan egbe vae nin ele dọ ha nọọn ọta. Ene ka ehọ da wo manman gbe obọ ranmhude uwedẹ nan rẹ re Baibo rẹ wanniẹn ele. Akizẹbue bhi ẹkẹ ọne ukpe nin sẹyẹ, Russell da re ẹnẹ diọbhi agbaẹbho ne bunbun ebhebhe. Ẹbho ne bunbun da yẹ wo sikoko bhi ene agbaẹbho kẹkẹ ka ehọ. O’Connor bi itue 100 da yẹ vae nin ele dọ gbe ugan, ọkpakinọn, obhio mhan nọn ta ọne ọta, ọle ene ka ehọ gbobọ nan nẹ.

Arẹmiẹn obhio mhan nin Russell, ọle ha mun ọkalo bhi ọta ogbakha nan ha ta ẹghe ẹdẹlẹ, ọle bha ha riale ghe ọle kokhun nẹ, ranmhude ọne iwẹnna nan iyi iwẹnna ọsi eria; iwẹnna ọsi Osẹnobulua nọn. Ene ọta ogbakha nin a ha ta ẹghe ẹdẹle wo re isẹhoa re nan rẹ man ẹbho ẹmhọanta. Ọta ogbakha ọsi ẹghe ẹdẹle, ọle a dia ọta ogbakha nesẹmhan ẹlẹnan rẹkhan. Ene ọta ogbakha nan wo rẹkpa ibhio mhan wewe ẹmhọn Agbejele, bhiriọ, agbotu da wo ha zegbere bhi agbaẹbho kẹkẹ bhi Ireland.—Okha nọnsẹmhan nan miẹn re dagbare bhi Britain.