1. Bezẹle nin mhan ha da sabọ yọle ghe Jehova nyan emhin rebhe? (Fẹ adudu nọn ribhi eji a da munhẹn ghe)

JEHOVA nyan emhin rebhe! Ọle man otọ bi okhun bi emhin rebhe ne ribhi ẹkẹ ọle. (Deut. 10:14; Rev. 4:11) Bhiriọ, ranmhude ọle re iẹnlẹn nin mhan, ọle nyan mhan rebhe. (Ps. 100:3) Ọrẹyiriọ, rẹ na bhi ẹghe ẹdẹlẹ ha vade, Jehova zẹ ẹbho eso nin ele ha yi ọsi ọle bhi uwedẹ kpataki.

2. Beji Baibo rẹman, ẹbho nela dọ ha yi ọsi Jehova bhi uwedẹ kpataki?

² Bhi ọsi ijiẹmhin, Psalm 135 da tale ghe, ene ha ga iJehova nọnsẹn bhi ẹwẹ ibhokhan Izrẹl, da ha yi emhin ne ghalẹn bhi ẹlo nesi nọnsọle. (Ps. 135:4) Sẹyẹ, ebe nọnsi Hosea bhi Baibo da tale ghe, ẹbho eso ne iyi ibhokhan Izrẹl dẹ dọ ha yi ẹbho nesi Jehova. (Hos. 2:23) Ọta nọnsi Hosea da munsẹ ẹghe nin Jehova rẹ munhẹn ha zẹ ene iyi Jew ba ene ha deba iJesu gbẹloghe bhi okhun. (Acts 10:45; Rom. 9:23-26) Jehova nyan ene ẹbho nan bhi uwedẹ kpataki, ranmhude, ẹlinmhin nọn khiale ọle rẹ zẹ ele nin ele da dọ nyẹnlẹn bhi okhun. (1 Pet. 2:9, 10) Ikristiẹn nekẹle ne mhọn ikhuaẹloghe ghe, ọne otọ nan ele ha da nyẹnlẹn, Jehova yẹ tie ele ẹbho ne sọle bi ẹbho nin ọle zẹle.—Isa. 65:22.

3. (a) Eria nela Jehova miẹn ọbhi egbe ẹlẹnan? (b) Be mhan ha zilo nyan bhi ọne uhọnmhọn-ọta nan?

³ Ẹlẹnan nian, enanzẹle bi ene da nyẹnlẹn bhi ọne otọ nan, ele  kugbe kiẹn usun ihuan nin Jehova miẹn ọbhi egbe bii ẹbho nesọle. (Luke 12:32; John 10:16) Ọ bha be khẹke nin mhan khuẹnmhẹn iJehova nin ọle rẹ re inian si mhan kẹ egbe? Bhi ọne uhọnmhọn-ọta nan, mhan dẹ zilo nyan uwedẹ kẹkẹ nin mhan ha rẹ re ẹkhuẹnmhẹn nin mhan mhọn da iJehova man.

4. Uwedẹ ọkpa nela mhan ha rẹ khuẹnmhẹn Jehova ranmhude ọle si mhan kẹ egbe? Be iJesu rẹ lu emhin nọn seriọ yẹ?

⁴ Uwedẹ ọkpa nin mhan ha rẹ re ekhuẹnmhẹn nin Jehova hi, sade mhan re ọkhọle rebhe rẹ re egbe guẹ nanlẹn. Imianmẹn mhan ha rẹ rẹman ẹbho rebhe ghe Jehova nyan mhan, ghe mhan muegbe rẹ ha de uhọnmhọnre nanlẹn. (Heb. 12:9) Emhin nọn sẹriọ Jesu lu ẹghe nin ọle rẹ mianmẹn. Jesu da re Imianmẹn nọnsọle rẹ rẹman ghe iho nọnsi Osẹnobulua ọle ho nin ọle lu. (Ps. 40:7, 8, ftn.) Arẹmiẹn ẹkẹ agbaẹbho nin Osẹnobulua zẹle a da biẹ iJesu, ọle da yẹ zegbere nin ọle rẹ lu iho nọnsi Jehova.

5, 6. (a) Be iJehova lu yẹ ẹghe nin Jesu rẹ mianmẹn? (b) Ijiẹmhin nela rẹman ghe ọ ti Jehova bhọ sade mhan re egbe guẹ nanlẹn, arẹmiẹn ghe ọle nyan mhan?

⁵ Be iJehova lu yẹ ẹghe nin Jesu rẹ mianmẹn? Baibo da tale ghe Jesu ki ha dagbare bhi ẹkẹ amẹn ẹghe nin ọle rẹ mianmẹn fo, okhun da tujea, ẹlinmhin nọnsi Osẹnobulua da huẹnre bọsi idulu bu ọle. Baibo da yọle: “Ghọle! Ukpuru da yẹ nin okhun yọle: ‘Ọnan hi ọmọn nọnsẹmhẹn, nin mẹn hoẹmhọnlẹn, nin mẹn zẹle.’” (Matt. 3:16, 17) Arẹmiẹn ghe Jehova nyan iJesu, ọ da yẹ wo ha ti ọle bhọ rẹ daghe ọmọn nọnsọle tobọle zegbere nin ọle rẹ lu iho nọnsọle. Iriọ Jehova ha yẹ rẹ re eghọnghọn miẹn mhan ọbhi egbe sade mhan re egbe guẹ nanlẹn. Ọle ki yẹ nan erọnmhọn nin mhan.—Ps. 149:4.

⁶ Bhi ọsi ijiẹmhin, nan yọle ghe aba da kọ ọka bhi ẹkẹ ogba nọnsọle. Ene ọka ki wo, ọmọn nọn khere nọnsọle da dọ biẹn bhọ ji ọle. Ọne aba dẹ be nọọn ọne ọmọn ebezẹle nin ọle da dọ biẹn ọka ji ọle bhi ugbo nin ọle nyanlẹn? Aba nọn mhọn oyẹẹ ida lu iriọ. Ọle ki re ẹghọnghọn miẹn ọle le, ranmhude, oyẹẹ nin ọne ọmọn mhọn da aba ọle ọ fẹkẹ rẹman. Ọne ọka nin ọne ọmọn biẹn ji ọle ki dọ ha ti ọle bhọ gbera ọka nekẹle ne sẹyẹ ribhi ẹkẹ ugbo. Iriọ ọ yẹ rẹ ti Jehova bhọ sade mhan re ọkhọle rebhe rẹ ha lu iho nonsọle.—Ex. 34:14.

7. Be bhọ Malachi rẹ ji mhan lẹn ebe ọ dia iJehova bhi egbe yẹ sade ẹbho tobọ ele re ọkhọle rẹ ha ga iJehova?

⁷ Tie Malachi 3:16. Ahamiẹn ghe uwẹ bha sẹ re egbe guẹ nin Jehova yẹ mianmẹn, re ẹghe ọbhi otọ rẹ ria ẹmhọn ebezẹle ọkhẹke nin uwẹ lu iriọ. Bhi ọsi ẹmhọanta, rẹ na bhi ẹghe nin uwẹ rẹ munhẹn ha nyẹnlẹn rẹ ha vade, Jehova nyan uwẹ. Iriọ yẹ nọn rẹji ẹbho ebhebhe ne ribhi ọne agbọn nan. Re ọkhọ ẹ riale ebi Jehova ha rẹ ha ghọnghọn yẹ sade uwẹ gene mun egbe ẹ rebhe nanlẹn nọn ha gbẹloghe ẹ, bi sade uwẹ re egbe guẹ nanlẹn yẹ lu iho nesọle. (Prov. 23:15) Jehova lẹn eria ne re ọkhọle rebhe rẹ ga ọle. Ọle yẹ gbẹn elin nọnsele bhi ẹkẹ ebe ọsi ayere nọnsọle.

8, 9. Ene ẹbho nin elin nesele ribhi ẹkẹ ebe ọsi ayere, be bhọ iJehova guanọ nin ele ha lu?

⁸ Ahamiẹn mhan guanọ nin elin mhan ha ribhi ẹkẹ ebe ọsi ayere nọnsi Jehova, emhin ribhọ nin mhan ha lu. Malachi yọle, nin mhan ha mun ofẹn iJehova yẹ ria ẹmhọn elin nọnsọle. Mhan ha re oga nọnsẹman ji ọria soso la emhin ọbhebhe, Jehova ki re elin nọnsẹman sibhi ẹkẹ ebe ọsi ayere nọnsọle re.—Ex. 32:33; Ps.69:28.

 ⁹ Be bhọ a rẹ ọle ta nanrẹ re egbe guẹ nin Jehova? Iregbeguẹ nin Jehova iwo gheghe yi a nan erọnmhọn taman ọlẹn ghe iho nọnsọle mhan ha lu, bi mhan yẹ dọ mianmẹn. Osukpa ọria lu ene emhin nan gbera. Sokpan, ọkhẹke nin mhan ha re ẹdagbọn mhan rẹ ga iJehova ẹghe rebhe. Beji mhan sẹyẹ ribhi agbọn, mhan ki ha rẹman ẹghe rebhe ghe, ibo nọnsi Jehova, ọle mhan ye. Be imhan ha rẹ lu ọnan yẹ? Mhan ki ha re obọ rẹkhan uhi nesọle ẹghe rebhe.—1 Pet. 4:1, 2.

10. Emhin nela ọkhẹke nọn dikẹ rẹji ọria nọn ga iJehova bi ọria nọn iga Jehova?

¹⁰ Bhi uhọnmhọn-ọta nin mhan ka zilo nyan, mhan da luẹ ebi Cain, Solomon, bi ibhokhan Izrẹl rẹ ha riale ghe iJehova ele ga, ọkpakinọn, ele bha ha lu ebi Jehova guanọ. Ene ijiẹmhin nan rẹman mhan ghe, ọ bha gheghe sẹ nin mhan rẹ ha riale ghe Jehova mhan ga. Ọkhẹke nin mhan he emhin ebe yẹ manman ha lu emhin ne mhẹn. (Rom. 12:9) Ẹghe nin Malachi rẹ zilo ẹmhọn ebe ọsi ayere, Jehova da tẹmhọn “ikẹkẹ nọn ribhi ẹwẹ ọria nọn khiale bi ọria nọn imhẹn, ọria nọn wo ha ga Osẹnobulua bi oria nọn iga ọle.”—Mal. 3:18.

11. Bezẹle nọn da khẹke nin mhan ji ẹbho rebhe lẹn ghe ọkpa bhi Esali Jehova mhan khin?

¹¹ Emhin ọbhebhe nin mhan ha lu nin mhan rẹ rẹman iJehova ghe mhan manman hoẹmhọn ọlẹn ranmhude ọle zẹ mhan nin mhan dọ kiẹn ẹbho nesọle hi, mhan ki ha ji ẹbho lẹn ghe ibo nọnsọle mhan ye. (1 Tim. 4:15; Matt. 5:16) Nọọn egbe uwẹ ene inọnta nan: ‘Ẹbho lẹn sẹbhọ ghe ibo nọnsi Jehova mẹn ye? Ọ be ti mẹn bhọ rẹ taman ẹbho ghe ọkpa bhi Esali Jehova mẹn khin? Jehova ida ha ghọnghọn sade mhan bha ji ẹbho lẹn ghe ibo nọnsọle mhan ye.—Ps. 119:46; tie Mark 8:38.

12, 13. Be ẹbho eso rẹ re ọle nọghọ yẹ nanrẹ lẹn ele bọsi Esali Jehova?

¹² Ọ ba bhi egbe a ghe, eso bhi Esali Jehova lu emhin nin ẹbho ne ribhi ẹkẹ ọne agbọn nan lu. Ranmude ọnan, ele bha dikẹ bhi ẹbho ne iga iJehova. (1 Cor. 2:12) Emhin ne sunu bhi ọne agbọn nan re ẹbho ria ẹmhọn egbe ele ọkpa. (Eph. 2:3) Bhi  ọsi ijiẹmhin, arẹmiẹn ghe a wo manman gbe uhi ọbhi ẹmhọn ukpọn nan yọ, ẹbho eso sẹyẹ re ukpọn nọn bha khẹke ene ga iJehova yọ, ele sẹyẹ mun egbe nọn bha khẹke Esali Jehova. Ele ki ha re ikpọn ne manman toto mun egbe ne re egbe man yọ vae bhi ikolo oga. Eto nọn imhẹn nin ẹbho bhi ọne agbọn nan gbẹn yẹ lu ọbhi uhọnmhọn, ọle ele ki yẹ gbẹn yẹ lu ọbhi uhọnmhọn. (1 Tim. 2:9, 10) Ranmhude ọnan, ọ ki ha nọghọ nan rẹ lẹn si Esali Jehova ele khin la si ele iyi ọle.—Jas. 4:4.

¹³ Bhi ọsi ẹmhọanta, eso bhi Esali Jehova bha sẹ gene he ọne agbọn nan bi uwedẹ nin ele rẹ lu emhin. Uwedẹ nin ele rẹ gbikhiẹn, bi uwedẹ nin ele rẹ lu emhin nekẹle sade ele yo iregbe re ahoho imhẹn. Bhiriọ, Ọbha khẹke nin Esali Jehova ha regbe khọkhọ ele. Foto nin eso mun ọbhi intanẹt bi emhin nin ele gbẹn ọbhọ rẹman ghe ele bha mun oga mhọn nọnsẹn. Asabọ miẹn a bha lu ele emhin soso bhi eke agbotu. Ọkpakinọn, ẹbho ne dia iriọ dẹ sabọ kiẹn idobolo rẹji ibo ele nekẹle ne fẹkẹ dọnmhegbe bhi ẹkẹ agbotu.—Tie 1 Peter 2:11, 12.

14. Be bhọ mhan ha lu nan da miẹn ghe ikolu nin mhan bi Jehova ko mhọnlẹn ki manman ha deziẹn nọnsẹn?

¹⁴ Ẹlẹnan nian, ọne agbọn nan wo re ọle yẹẹ ẹbho rẹ ha lu “ebi egbe guanọ, ebi elo guanọ, bi a re emhin nan rẹ nyẹnlẹn dẹgbọ.” (1 John 2:16) Jehova nyan mhan, ọnan zẹle nin mhan da dikẹ. Mhan “rẹban emhin ne bha kiẹọnlẹn, bi emhin nin ene ribhi ẹkẹ ọne agbọn nan khu ọ. Jehova rẹkpa mhan rẹ ha khu ọbhi oga nọnsi Osẹnobulua, bi nin mhan rẹ ha re ọkhọle nọn gbale bi ikhiale rẹ nyẹnlẹn bhi ẹkẹ ọne agbọn nan.” (Titus 2:12) Emhin rebhe nin mhan lu bhi ọne agbọn nan, rẹsẹbhi ọta nin mhan ta, ebi mhan rẹ le ebale yẹ, ebi mhan rẹ da anyọn yẹ, ukpọn nin mhan reyọ bi ebi mhan rẹ mun egbe yẹ, bi iwẹnna nin mhan lu, mhan ki ji ele rẹman ẹbho ghe Esali Jehova, ọle mhan khin.—Tie 1 Corinthians 10:31, 32.

15. Bezẹle nin mhan ha da re uwedẹ nọn gbale bi ahoẹmhọn-egbe rẹ nin ibhio mhan lu emhin?

¹⁵ Uwedẹ nin mhan rẹ nin ibhio mhan lu emhin, ọle la rẹman si mhan gene  hoẹmhọn ikolu nin mhan bi Jehova ko mhọnlẹn. Ọkhẹke nin mhan yere ghe Jehova yẹ nyan ele, beji Ọle rẹ nyan mhan. Mhan a ha mhọn ọnan bhi ọkhọle ẹghe rebhe, ọ ki rẹkpa mhan rẹ ha re ahoẹmhọn-egbe nin ibhio mhan lu emhin bhi uwedẹ nọn gbale. (1 Thess. 5:15) Jesu da taman edibo nesọle: “Ọnan ẹbho rebhe ha rẹ lẹn ghe edibo nesẹmhẹn bha khin, sade bha mhọn ahoẹmhọn-egbe da egbe.”—John 13:35.

16. Ijiẹmhin nela rẹkpa mhan rẹ lẹn ebi Jehova rẹ hoẹmhọn ẹbho nesọle sẹ yẹ?

¹⁶ Ijiẹmhin ọkpa bhi uhi nin Jehova nanbhi obọ iMoses gbe, dẹ sabọ rẹkpa mhan lẹn ebi mhan ha rẹ ha nin ibhio mhan bhi agbotu lu emhin yẹ. Emhin eso ne ha ribhi ẹkẹ uwa oga nọnsi Jehova, a re ele guẹ nin Jehova nan da ha noo ele bhi oga nọnsọle ọkpa. Bhi ẹkẹ ọne uhi nin Jehova na bhi obọ iMoses gbe, Ọ da tale ebi ene ẹbho ha rẹ ha gbẹloghe ene emhin yẹ, bi ebi ele ha rẹ ha re ene emhin khian nọnsẹn yẹ. Ọnọn bha re obọ rẹkhan ọne uhi, a ki gbe ọle a. (Num. 1:50, 51) Ahamiẹn ghe Jehova wo re inian gbẹloghe ene emhin nẹ imhọn iẹnlẹn nin ene ẹbho ha noo rẹ ga ọle, ọkhẹke nin mhan ha mhọnlẹn bhi ọkhọle ghe ọle dẹ yẹ gbẹloghe ẹbho nesọle ne re egbe guẹ nanlẹn, ne bha ze ọle obọ! Jehova ji mhan lẹn ghe emhin ne ghanlẹn mhan khin bhi ẹlo nọnsọle. Ọle da yọle ghe, ọria nọn irẹ khin nọn re obọ so mhan, ọne ọria di obọ ọle bhi ẹlo.—Zech. 2:8.

17. Emhin nela iJehova daghe yẹ kaehọ ọle?

¹⁷ Malachi da rẹman ghe Jehova daghe ebi ẹbho nesọle rẹ nin ibhio ele lu emhin ye, ghe ọle yẹ ka ele ẹho. (Mal. 3:16) Jehova wo gene lẹn eria nesọle. (2 Tim. 2:19) Ọle lẹn emhin rebhe nin mhan lu, bi ebi mhan ta, aharẹmiẹn ọne emhin dia khere. (Heb. 4:13) Sade mhan bha hoẹmhọn ibhio mhan yẹ lu ele nọnsẹn, Jehova lẹnmhin, ọle yẹ daghe ọle. Mhan ha hoẹmhọn ibhio mhan, yẹ ha lu ele nọnsẹn, yẹ rẹhunmhan ele, Jehova yẹ lẹn, ọle yẹ daghe ọle.—Heb. 13:16; 1 Pet. 4:8, 9.

18. Be imhan ha rẹ khuẹnmhẹn iJehova yẹ ranmhude ọle zẹ mhan nin mhan deba ẹbho nesọle?

¹⁸ Mhan wo muegbe nin mhan rẹ re ekhuẹmhẹn nin Jehova ranmhude ọle zẹ mhan nin mhan deba ẹbho nesọle. Be imhan ha rẹ rẹman yẹ ghe Jehova nyan mhan? Mhan ki re egbe mhan guẹ nanlẹn. Emhin ẹwanlẹn nọn sade mhan lu iriọ. Arẹmiẹn ghe ẹkẹ agbọn nọn imhẹn mhan da nyẹnlẹn, mhan muegbe rẹ ha lu ilọnmhọn esili, bhiriọ ẹbho ki ha daghe ukpa nọnsẹmhan nọn bhala bhi ẹkẹ ọne agbọn ebuiki nan. (Phil. 2:15) Mhan wo muegbe rẹ ha khọn emhin ne imhẹn. (Jas. 4:7) Ranmhude Jehova yẹ nyan ene imhan ko ga, mhan dẹ hoẹmhọn ele yẹ ha mun ekpẹn nin ele.—Rom. 12:10.

19. Elele nela ẹbho nesi Jehova ha miẹn bhi obọ Ọle?

¹⁹ Jehova taman mhan bhi Baibo ghe ọle ida fi ikeke gbe ẹbho nesọle. (Ps. 94:14) Emhin nọn irẹ khin nọn sunu ji mhan, Jehova dẹ sẹyẹ lu beji ọle tale. Uu bhọ ida sabọ si mhan sibhi oyẹẹ nọnsi Jehova re. (Rom. 8:38, 39) Ahamiẹn mhan sẹyẹ nyẹnlẹn, Jehova mhan nyẹnlẹn nan. Mhan ha yu, obọ nọnsi Jehova mhan sẹyẹ ye. Bhiriọ, ahamiẹn mhan sẹyẹ nyẹnlẹn, la mhan yulu, Jehova nyan mhan. (Rom. 14:8) Mhan wo re eghọnghọn khuaẹloghe ọne ukpẹdẹ nin Jehova ha riọ ẹbho nesọle ne yu kpanọ bhi idin! (Matt. 22:32) Mhan wo miẹn erọnmhọn ne bunbun ejayenan nian, arẹmiẹn ọne ẹghe bha sẹ vae. Baibo yọle: “Eghọnghọn hi ọsi agbaẹbho nin Jehova yi Osẹnobulua nọnsele, ene eria nin ọle zẹle ne ha yi ẹbho nesọle.”—Ps. 33:12.