Ha Mhọn Ẹkẹ Ẹjẹjẹ Da Unan Ẹbho Rebhe
ẸGHE nin Jesu rẹ ha man edibo nesọle ebi ele ha rẹ ha tẹmhọn Osẹnobulua yẹ, ọle da yẹ ji ele lẹn ghe ọiyi ọrebhe da miẹn ọlẹn ọbhi egbe. (Luke 10:3, 5, 6) Asabọ rẹ miẹn ghe sade man tẹmhọn Osẹnobulua, mhan ki miẹn ẹbho ne ida miẹn mhan ọbhi egbe la ẹbho ne khọ ẹkẹ mhan. Gene gene, ọnan sabọ rẹ re ọle ha nọghọ mhan rẹ ha mhọn ẹkẹ ẹjẹjẹ da ẹbho nin mhan tẹmhọn Osẹnobulua man.
Ọria nọn mhọn ẹkẹ ẹjẹjẹ hi ọria nọn mhọn itohan da ẹbho ranmhude oya nin ele ye. Sẹyẹ, ọle ki dọnmhegbe rẹ rẹkpa ele. Ahamiẹn mhan bha yẹ ha mhọn ẹkẹ ẹjẹjẹ da ẹbho nin mhan tẹmhọn Osẹnobulua man, mhan iyẹ da ha manman sasa bhi itẹmhọn Osẹnobulua. Ahamiẹn mhan mhọn ẹkẹ ẹjẹjẹ, mhan ki sabọ manman ha sasa bhi ọne iwẹnna nan bọsi eranlẹn nan kie kuẹ ọ.—1 Thess. 5:19.
Ọsabọ ha nọghọ mhan rẹ re ẹkẹ ẹjẹjẹ man ẹghe eso. Bhiriọ, be ha sabọ rẹkpa mhan? Bha ji mhan fẹ ijiẹmhin ea nin mhan ha sabọ re egbe khọkhọ ghe. Ijiẹmhin ọsi Jehova, Jesu bi Paul nin odibo.
REGBE KHỌKHỌ IJEHOVA BHI UWEDẸ NIN ỌLE RẸ RE ẸKẸ ẸJẸJẸ MAN
Bhi ẹkẹ ikpe uli ne bunbun, Jehova wo ziẹn egbe itọn nan wo rẹ gbo elin nọnsọle. Ọrẹyiriọ, ọle sẹyẹ mhọn ifuẹkẹ da ẹbho ne imhẹn. (Luke 6:35) Ọle rẹ ọne ifuẹkẹ nan man bhi iziẹngbe nin ọle mhọn. Iho nọnsi Jehova nọn ghe nin unan eria kẹkẹ miẹn umiẹnfan. (1 Tim. 2:3, 4) Arẹmiẹn ghe Osẹnobulua he emhin ebe, emhin nọn ghanlẹn iẹnlẹn nọnsi eria khin bhi ẹlo nọnsọle, bhiriọ ọle iguanọ nin ọria soso fuẹan.—2 Pet. 3:9.
Jehova lẹn sẹbhọ ghe, Ojuu wo re ohoghe rẹ gue ẹlo ọsi ene imhọn urẹọbhọ. (2 Cor. 4:3, 4) Ranmhude, egbe ọbhokhan ẹbho eso da munhẹn ha luẹ ohoghe, ọ ki ha nọghọ ele rẹ miẹn ẹmhọanta ọbhi egbe. Jehova gene wo guanọ nin ọle rẹkpa ene eria nan. Be mhan rẹ lẹn yẹ?
Bha ji mhan tẹmhọn uwedẹ nin Jehova rẹ nin ibhokhan Nineveh lu emhin ẹghe ẹdẹlẹ. Arẹmiẹn eria ne wo gbugbe ele khin, Jehova da nọọn iJonah si ọbha be khẹke nin ọle mhọn itohan da ẹbho ne ribhi Nineveh, ne bun gbera 120,000, ne bha lẹn ọkpa lẹn eva? (Jonah 4:11) Jehova da ghe ibhokhan Nineveh bọsi ẹbho ne bha lẹn ọkpa lẹn eva, bhiriọ ọle da ji Jonah nin ọle dọ sẹkhae nin ele.
Ọkhẹke nin mhan re egbe khọkhọ iJehova ha ghe ẹbho bii emhin nọn ghanlẹn. Bha ji mhan dọnmhegbe rẹ ha rẹkpa ẹbho, aharẹmiẹn ọ diabe ele ida miẹn mhan ọbhi egbe.
REGBE KHỌKHỌ IJESU BHI UWEDẸ NIN ỌLE RẸ RE ẸKẸ ẸJẸJẸ MAN
Bọsi Jehova, Jesu wo ha mhọn itohan da ẹbho ranmhude ele da diabe ihuan ne imhọn ọnọn sun ele. (Matt. 9:36) Jesu da lẹn ebezẹle nin ele da dia iriọ. Ene mun ọkalo bhi oga i lu ele nọnsẹn. Sẹyẹ ohoghe, ọle ele man ene ẹbho le. Arẹmiẹn Jesu lẹn sẹbhọ ghe ene bunbun ida miẹn ọta nọnsọle ọbhi egbe, ọle da sẹyẹ ha man ele emhin ne bunbun.—Mark 4:1-9.
Bha hẹi ji egbe lọ bha a ha rẹ miẹn ọria bha miẹn bha ọbhi egbe bhi ọsi ọhẹnhẹn
Beji idia nin ẹbho ye rẹ fidenọ, uwedẹ nin ele rẹ ne mhan lu emhin sade mhan tẹmhọn Osẹnobulua ki yẹ ha fidenọ
Ahamiẹn ẹbho bha miẹn mhan ọbhi egbe, ọkhẹke nin mhan dọnmhegbe rẹ lẹn ebezẹle. Asabọ rẹ miẹn ghe, ranmhude uwedẹ nọn imhẹn ọsi ene ga ọga ohoghe, ele iyẹ guanọ nin ele re ehọ ọbhi ẹmhọn iBaibo. Asabọ yẹ miẹn ghe, a re orẹsin sin mhan sira ẹbho eso. Sẹyẹ, asabọ rẹmiẹn ghe azagba-uwa la agbaẹbho dẹ kpokpo eso sade ele miẹn mhan ọbhi egbe.
Asabọ rẹmiẹn eso bha ho nin ele ka mhan ehọ ranmhude ọkhọ bhi ẹlo nin ele sẹ miẹn bhi egbe. Bhi ọsi ijiẹmhin, missionary ọkpa natiọle Kim da yọle: “Okhọnlẹn sẹ wo sunu ji ẹbho ne nyẹnlẹn bh ije eso nin mhan da tẹmhọn Osẹnobulua. Emhin nin ele mhọnlẹn rebhe da yulua ranmhude ọne okhọnlẹn. Ele bha yẹ ha mhọn emhin soso nin ele khuaẹloghe. Iẹnlẹn wo zighi ọ ele bhi ẹlo. Ele bha yẹ gba ẹkẹ ọria soso. Bhi enan, ẹbho manman wo fi bhi ẹlo mun mhan. Ẹdẹ ọkpa, ohu da re ọria nin ho nin mhẹn tẹmhọn Osẹnobulua man. Ọne ọria da devanhiẹn mẹn.”
Be bhọ Kim rẹ sẹyẹ sabọ ha mhọn ẹkẹ ẹjẹjẹ bhi eje dia iriọ yẹ? Ọle da yọle: “Ẹbho ha lu mẹn khọlọ, mẹn ki dọnmhegbe rẹ ye Proverbs 19:11 re. Enin yọle: ‘I-lẹn-otọ-emhin nin okpea mhọn dẹ sabọ lọ ohu nọnsọle.’ Ahamiẹn mẹn yere emhin nọn sunu ji ẹbho ne nyẹnlẹn bhi eji mhan da tẹmhọn Osẹnobulua, mẹn ki sabọ ha mhọn ẹkẹ ẹjẹjẹ da ele. Bhi enin, mhan yẹ wo mhọn eria nin mhan man ele iBaibo.”
Mhan sabọ rẹ nọọn egbe mhan, ‘Be imẹn ha rẹ lu emhin yẹ sade mẹn ribhi idia ọsi ẹbho ne ribhi eji mẹn da tẹmhọn Oṣnobulua?’ Bhi ọsi ijiẹmhin, ahamiẹn a wo re orẹsin sin Esali Jehova isira mhan ki? Asabọ miẹn ghe, mhan ida ha miẹn ele ọbhi egbe, bhiriọ, ọ ki yẹ khẹke nan mhọn ẹkẹ ẹjẹjẹ da mhan. Ọkhẹke nin mhan yere ọta nin Jesu tale ẹghe nin ọle rẹ yọle nin mhan ha nin ẹbho lu emhin beji mhan rẹ guanọ nin ele ne mhan lu emhin. Bhiriọ, mhan ki sabọ ha mhọn ẹkẹ ẹjẹjẹ da ẹbho aharẹmiẹn ọnọghọ mhan rẹ lu iriọ.—Matt. 7:12.
REGBE KHỌKHỌ IPAUL BHI UWEDẸ NIN ỌLE RẸ RE ẸKẸ ẸJẸJẸ MAN
Paul sẹyẹ wo ha mhọn ẹkẹ ẹjẹjẹ da ẹbho ne ha kpokpo ọle. Bezẹle? Ọle bha yelea uwedẹ nin ọle ka rẹ lu emhin yẹ. Ọle da tale ghe, bhi ẹghe nọn gbera, ọle da ha kpokpo ẹbho, ghe ọle bha lu nọnsẹn hiehie. Ọkpakinọn, a da mhọn itohan da ọle ranmhude ọle bha lẹn-lu, bi ọle bha ha mhọn urẹọbhọ ẹghenin. (1 Tim. 1:13) Ọle lẹn sẹbhọ ghe, ẹkẹ ẹjẹjẹ Jehova bi Jesu mhọn da ọle. Asabọ miẹn ghe ọle lẹn sẹbho ghe uwedẹ nin ọle ka rẹ lu emhin, ọle ẹbho eso nin ọle ha tẹmhọn Osẹnobulua man yẹ rẹ ha lu emhin.
Ẹghe eso, Paul ki miẹn ẹbho ne manman mhọn urẹọbhọ da iman-emhin ohoghe. Bhiriọ, be ọle lu yẹ? Acts 17:16 tale ghe, ẹghe nin Paul rẹ ha ribhi agbaẹbho natiọle Athens, ẹbọ ne vuọn ọlẹn da wo ha sọnọ ọlẹn. Ọrẹyiriọ, Paul da noo ene emhin ne ha sọnọ ọlẹn na rẹ sọsali man ele. (Acts 17:22, 23) Paul da fi uwedẹ nin ọle rẹ man emhin denọ beji ọle rẹ ha miẹn unan ẹbho kẹkẹ nin ọle da sabọ hinmhin eso.—1 Cor. 9:20-23.
Ahamiẹn mhan tẹmhọn Osẹnobulua mhan ẹbho ne iho nin ele miẹn mhan ọbhi egbe, la ne rẹọ bhi iman-emhin ohoghe, ọkhẹke nin mhan lu beji Paul lu. Mhan sabọ rẹ noo emhin nin mhan lẹn rẹji ele rẹ tẹmhọn Osẹnobulua mhan ele. (Isa. 52:7) Obhio mhan natiọle Dorothy da yọle: “Ẹbho ne bunbun bhi eji mhan da tẹmhọn Osẹnobulua rẹọbhọ ghe, Osẹnobulua fi bhi ẹlo, ghe ọle ire ẹlo esili ghe ọria. Mẹn ki khuẹnmhẹn ele ghe ele rẹọ bhi Osẹnobulua. Mẹn ki diriọ re ebi Baibo tayẹ rẹji ikpẹ nesọle bi ive nesọle man ele.”
RE EMHIN ESILI RẸ HA KHỌN EMHIN ỌBE MIẸN OTỌ
Beji ọkpẹnlẹn ọsi ọne agbọnnan ki rẹ wo manman sire, olukhọ nin ẹbho lu dẹ wo ha khọ ọbhọ. (2 Tim. 3:1, 13) Ọkpakinọn, ọbha khẹke nin mhan ji ọnan da kẹ eghọnghọn la ẹkẹ ẹjẹjẹ nọnsẹmhan an. Jehova dẹ sabọ re ahu nin mhan rẹ sabọ “khọn ọbe miotọ.” (Rom. 12:21) Ọkanẹfan natiọle Jessica da yọle: “Mẹn wo miẹn ẹbho ne imhọn idegbere, ne yẹ re ẹlo gbe mhan an. Ọnan sabọ re ẹkẹ khọ ọria. Mẹn ha munhẹn ha ne ọria talọ, mẹn ki ka nan erọnmhọn ji Jehova bhi ẹkẹ ọkhọle bhii ọle nin ọle rẹkpa mẹn ha ghe ọne ọria beji ọle rẹ ghe ọle. Bhiriọ, mẹn iyẹ da ha denọ ẹlo ọbhi ebi emhin dia mẹn yẹ bhi egbe. Ebi mẹn ha rẹ sabọ rẹkpa ọle yẹ mẹn a ki ha ria.”
Ọkhẹke nin mhan yẹ ha guanọ uwedẹ nin mhan ha rẹ ha re izebhudu nin ene mhan ko tẹmhọn Osẹnobulua. Obhio mhan nin Jessica da yọle: “Ọyi ebi ẹbho bha rẹ miẹn ọria nin mhan ko tẹmhọn Osẹnobulua ọbhi egbe yẹ mẹn zilo nyan. Emhin nọn mẹn, ọle mẹn deba ibhio mhan tẹmhọnlẹn. Bhi ọsi ijiẹmhin, elele nanbhọre arẹmiẹn ghe ẹbho imiẹn mhan ọbhi egbe.”
Mhan ida zobọ bhọ rẹ ha guanọ ene ha miẹn aribhọ ọsi ighegheghe
Eso vae dọ ha ga iJehova ranmhude iziẹngbe nin mhan rẹ rẹkpa ele
Jehova lẹn ọnọghọ rebhe nin mhan miẹn bhi ọne iwẹnna nan. Ọ manman wo ti ọle bhọ sade mhan re egbe khọkhọ ọle bhi uwedẹ nin ọle rẹ mhọn itohan! (Luke 6:36) Gene gene, Jehova ida wo re ẹghe nin ene imhẹn rẹsẹbhi ghegheghe. Mhan rẹọbho ghe, ẹghe nọn mhẹn, ọle iJehovah ha rẹ dọ kpẹn ọne agbọn nan. Ọne ẹghẹ kuẹ sẹ, iwẹnna nan ha re ẹjẹje rẹ lu, ọle iwẹnna itẹmhọn Osẹnobulua khin. (2 Tim. 4:2) Bha ji mhan ha mhọn ẹkẹ ẹjẹjẹ da unan ẹbho rebhe beji mhan rẹ re ọyaya rẹ lu ọne iwẹnna nan.
