1, 2. (a) Bezẹle nọn da yi emhin ẹwanlẹn nin mhan rẹ ha ribhi ibo nọnsi Jehova? (b) Be imhan ha zilo nyan bhi ọne uhọnmhọn-ọta nan?

EMHIN ẹwanlẹn nọn nan re mun iJehova mhọnlẹn. Ọria soso iribhọ nọn mhọn ahu sẹbi Jehova. Ọria soso iribhọ nọn mhọn ẹwanlẹn sẹbi Osẹnobulua, la nọn hoẹmhọn mhan sẹbi ọle! Ọi be yi emhin nọn gbale nin mhan re ha ribhi ibo nọnsi Jehova? (Ps. 96:​4-6) Ọreyiriọ, ẹbho eso ne rẹ ha ga Osẹnobulua da ji emhin si ele sibhi ibo nọnsi Jehova re.

² Bhi ọne uhọnmhọn-ọta nan, mhan dẹ zilo nyan ijiẹmhin ọsi ẹbho eso ne ha riale ghe Jehova ele ga, sokpan, emhin nin Jehova he, ọle ele ha lu. Mhan dẹ miẹn emhin kpataki luẹ bhi ijiẹmhin nọnsele. Ebi mhan luẹ dẹ sabọ rẹkpa mhan rẹ mundia bhi oga nọnsi Jehova nọnsẹn.

3. Bezẹle nin Jehova da ha guanọ nin ọle rẹkpa iCain? Be Ọle taman iCain yẹ?

³ Ghe ijiẹmhin ọsi Cain. Ọle bha ga ẹbọ. Jehova ọle ha ga. Ọkpakinọn, Jehova bha miẹn oga nọnsọle ọbhi egbe. Jehova daghe ghe emhin ebe ri ọle bhi ọkhọle. (1 John 3:12) Jehova da ha guanọ nin ọle rẹkpa iCain. Ọle da taman iCain yọle: “Uwẹ ha fidenọ dọ ha lu  emhin esili, mẹn ida be ha re ẹlo esili ghe ẹ? Ọkpakinọn, ahamiẹn uwẹ bha fidenọ ha lu emhin esili, ọbe bu uwẹ vade, ọle ho nọn kiẹn ebealẹn ẹn; uwẹ ida be khọn ọlẹn miẹn otọ?” (Gen. 4:6, 7) Ebi Jehova ha taman iCain hi, “Cain ha fidenọ yẹ tobọle zẹ nin ọle ha ribhi ibo nọnsọle, Ọle nin Jehova ki yẹ ha ribhi ibo nọnsi Cain.”

4. Be Cain lu nin re ọle sibhi ibo nọnsi Jehova re?

⁴ Cain ha fi ọkhọle nọnsọle denọ, Osẹnobulua ki miẹn oga nọnsọle ọbhi egbe. Sokpan, Cain bha ka Osẹnobulua ehọ. Ranmhude emhin ebe nin ọle ha ria bhi ọkhọle nọnsọle, bi ranmhude, ọle ho nin ọle lu ebe egbe nọnsọle guanọ, ọle da dọ lu emhin ne imẹn. (Jas. 1:14, 15) Ẹghe nin Cain rẹ ha ribhi usẹn-ọbhokhan, asabọ miẹn ghe ọle bha ha riale ọle dẹ sabọ sọtẹ da iJehova. Akizẹbue, ọle da dọ lu emhin nin ọle rẹ ha ria ghe ọle ida sabọ lu. Ọle da sọtẹ da iJehova, yẹ gbe obhio ọle a!

5. Be la sabọ si ọle nan da miẹn ghe Jehova bha yẹ re ẹlo esili ghe mhan?

⁵ Bọsi Cain, ọria sabọ ha riale ghe Jehova ọle ga, ọkpakinọn, emhin nọn imhẹn ọle lu. (Jude 11) Bhi ọse ijiẹmhin, ọria sabọ ha ria ẹmhọn igboghẹlẹ, ọ sabọ ha mhọn ẹlobhọ, la ihegbe. Asabọ miẹn ene emhin nan ọkpa ri ọle bhi ọkhọle ẹghe rebhe. (1 John 2:15-17; 3:15) Iria-eria ne dia nian dẹ sabọ ri ọria lu emhin ne imhẹn. Ọne ọria sabọ ha dagbare bhi itẹmhọn Osẹnobulua, yẹ yo ikolo oga ẹghe rebhe. Ọria ọbhebhe ida sabọ lẹn ebi ọle ria bhi ọkhọle, la ebi ọle lu. Sokpan, Jehova daghe emhin rebhe nin mhan lu. Ọle yẹ lẹn ene re ọkhọle rebhe ribhi ibo nọnsọle.—Tie Jeremiah 17:9, 10.

6. Be bhọ Osẹnobulua rẹ rẹkpa mhan rẹ sabọ khọnlẹn miẹn otọ yẹ sade mhan bha sibhi ibo nọnsọle re?

⁶ Aharẹmiẹn ghe mhan dobọ ẹghe so, Jehova i wo kẹ diriọ zẹ mhan obọ. Ọria ha re obọ sibhi uwedẹ nọnsi Osẹnobulua re, Jehova ki ha taman ọne ọria: “Fikie bu mhẹn re, imhẹn ki yẹ fikie bu (uwẹ) re.” (Mal. 3:⁠7) Jehova lẹnmhin ghe okhọnlẹn mhan ye nin imhan hẹi dobọ. Ọkpakinọn, Ọle guanọ nan miẹn ghe mhan re obọ sibhi emhin ọbe re. (Isa. 55:⁠7) Jehova taman mhan ghe, mhan ha lu ebi Ọle guanọ, ọle ki ha ribhi ibo nọnsẹman. Ọle ki rẹkpa mhan rẹ sabọ deziẹn nọnsẹn bhi oga. Ọle ki yẹ re ahu nin mhan rẹ sabọ khọn miẹn otọ, nan da miẹn ghe mhan bha yẹ ha ria eria ne imhẹn.—Gen. 4:7.

7. Be Solomon lu nan da miẹn ọle bha yẹ ha yi ọmọẹ iJehova?

⁷ Mhan dẹ sabọ luẹ emhin ne bunbun bhi ijiẹmhin ọsi Solomon nin Ojie. Ẹghe nin Solomon rẹ ha yi ọbhokhan, Jehova ọle ha khua ẹlo ghe nin ọle re adia nanlẹn. Osẹnobulua da re ẹwanlẹn nin Solomon. Ọle da mun iwẹnna nin Solomon nin ọle bọn udede uwa oga bhi Jerusalem. Akizẹbue, Solomon bha yẹ ha yi ọmọẹ iJehova. (1 Ki. 3:12; 11:1, 2) Osẹnobulua gbe uhi ọbhi otọ ghe, nin ojie nọn yi Hebrew hẹi ne “ikhuo ne bunbun nin egbe ọle, nin ọkhọle nọnsọle hẹi denọ sibhi uwedẹ re.” (Deut. 17:17) Solomon bha re obọ rẹkhan ọne uhi nan. Ọle da dọ ne ikhuo ne sẹbhi 700. Ọle da sẹyẹ ha deba ikhuo nesẹbhi 300 zẹ ọshọ. (1 Ki. 11:3) Ene ikhuo nin ọle ne, eso bhi ẹwẹ ele iyi ibhokhan Izrẹl. Ẹbọ ele ga. Bhiriọ, Solomon bha lu rẹkhan uhi nin Osẹnobulua gbe ọbhi otọ, ghe nin ọria soso hẹi re okhuo nọn iyi obhokhan Izrẹl.—Deut. 7:3, 4.

8. Emhin ne imhẹn nela Solomon lu nọn bha yẹẹ iJehova?

⁸ Khere khere, Solomon bha yẹ ha hoẹmhọn uhi nọnsi Jehova. Ọle bha yẹ ha lu rẹkhan uhi nọnsọle. Solomon da bọn uwa oga nin ẹbọ natiọle Ashtoreth. Ọle da yẹ bọn ojukhuo nin ẹbọ natiọle Chemosh. Ọle da deba ikhuo nesọle ha ga ene ẹbọ nan. Uki oke nọn wo ha ribhi odalo iJerusalem bhi eji ọle da ka bọn uwa oga nin Jehova, ọle iSolomon da dọ bọn ene ojukhuo nan nin ene ẹbọ. (1 Ki. 11:5-8; 2 Ki. 23:13) Asabọ miẹn Solomon da ha riale ghe, ọle ha zoẹse ji Jehova  bhi uwa oga nọnsọle, Jehova ki re ẹlo gbera olukhọ nọnsọle. A ha miẹn ọnin iSolomon ha ria, egbe ọle ọle ha hie.

9. Be sunu ranmhude iSolomon bha lu rẹkhan uhi nesi Osẹnobulua?

⁹ Lẹn sẹbhọ ghe Jehova I wo gheghe re ẹlo gbera olukhọ nin ọria lu. Baibo yọle: “Jehova da wo manman ha khọ ẹkẹ iSolomon, ranmhude ọkhọle nọnsọle denọ si Jehova bhi egbe re. . . , nọn zegbe man ọlẹn igba eva. Nọn yẹ dọ gbe uhi nanlẹn rẹji ene emhin nan, ghe nin ọle hẹi rẹkhan osẹ ebhebhe. Ọkpakinọn, ọle bha lu rẹkhan ebi Jehova tale.” Ranmhude ọnin, Osẹnobulua bha yẹ ha re ẹlo esili ghe ọle. Ọle bha yẹ ha rẹkpa ọle. Jehova bha yẹ ji ọmọn nọnsi Solomon da gbẹloghe otọ Izrẹl rebhe. Ele da yẹ le oya ọbhi ebe iSolomon lu rẹ dọ sẹbhi ikpe ne bunbun.—1 Ki. 11:9-13.

10. Emhin nela la sabọ ria ikolu nin mhan bi Jehova ko mhọnlẹn a?

¹⁰ Bọsi Solomon, mhan a ha rẹkhan imọẹ ne iga Osẹnbulua, ele sabọ rẹ si mhan sibhi ibo nọnsi Osẹnobulua re. Asabọ miẹn ghe agbotu ọkpa mhan bi eso koko ye, ọkpakinọn ikolu nin ele bi Jehova ko mhọnlẹn bha deziẹn nọnsẹn. Sẹyẹ, eso sabọ ha yi ene mhan ko ribhi azagba uwa ọkpa, ene nyẹnlẹn sike mhan, ene imhan ko wẹnna, la ene imhan ko yi isiku. Ọnọn iki rẹkhin, ahamiẹn ene iribhi ibo nọnsi Jehova mhan ko deba lu emhin, ele sabọ rẹ ria ikolu nin mhan bi Jehova ko mhọnlẹn a. Ele sabọ yẹ dọ si mhan sibhi ibo nọnsi Osẹnobulua re.

11. Be bhọ la sabọ rẹkpa mhan rẹ lẹn eria nin mhan bi ele ha ko ha mhọn ikolu?

¹¹ Tie 1 Corinthians 15:33. Ẹbho ne bunbun ribhọ ne mhọn ikpẹ esili ne mhẹn. Ẹbho eso yẹ ribhọ nan miẹn ghe arẹmiẹn ele iyi Esali Jehova, ele iwo taan ẹlo a lu akhailu. Asabọ miẹn uwẹ lẹn ẹbho ne dia inian. Aharẹmiẹn ghe uwẹ lẹn ẹbho eso ne dia nian, ọne be rẹman ghe, imọẹ ne mhẹn, ne ha sabọ rẹkpa uwẹ ele khin? Ọkhẹke nin uwẹ nọn egbe ẹ ene inọnta nan, ele dẹ sabọ rẹkpa mhẹn nan da miẹn ghe ikolu nin mhẹn bi Jehova ko mhọnlẹn deziẹn? Ele dẹ sabọ rẹkpa mhẹn rẹ manman sikẹ iJehova? Be re ele bhi ọkhọle? Be bhọ ele kẹ tẹmhọn ọlẹn, ẹmhọn ikpọn, igho, ire egbe re ahoho, la emhin ebhebhe ne dia inian ele kẹ tẹmhọn ọlẹn? Nan rẹ ha ta ọta ọbe da ọria, la nan rẹ ha re ọria ọbhebhe zọ akọn be yẹẹ ele? Jesu tale ghe, ebi ọria ria ẹmhọnlẹn bhi ọkhọle, ọle si ọle bhi unun re. (Matt. 12:34) Uwẹ ha daghe ọle ghe ẹbho ebhebhe guanọ ne di idobolo ọbhi ikolu nin uwẹ bi Jehova ko mhọnlẹn, ọkhẹke nin uwẹ tuabe luemhin! Lẹn eke ẹghe nin uwẹ deba ele gbe. Ọrẹyiriọ, uwẹ ha kere ghe ọbha lẹkhẹ nin uwẹ, uwẹ sabọ sibhi ikolu nọnsele re.—Prov. 13:20.

12. (a) Be iJehova ji ibhokhan Izrẹl lẹn ẹghe nin ele rẹ la sibhi Egypt re? (b) Be ibhokhan Izrẹl lu yẹ, ẹghe nin Jehova rẹ taman ele ghe Osẹnobulua nan ha re ọkhọle rebhe rẹ ga ọle khin?

¹² Mhan dẹ sẹyẹ wo miẹn emhin ne bunbun luẹ bhi ebe sunu ji ibhokhan Izrẹl,  ẹghe nọn bha sẹ rẹ bue gbe nan rẹ fan ele fia bhi Egypt. Ele da si koko bhi alo oke nọnsi Sinai. Jehova da zegbere mhan ele bhi uwedẹ ọhan-ilo. Bhi ọsi ọhan-ilo, okhun da wo manman ho re. Jehova da lu ọle nin anyan bi avan ha de, nin ighogho wo ha zẹ, bi nin ebe diabi akala nan khue da wo manman ha de. (Ex. 19:16-19) Bhi ẹkẹ enan rebhe, Jehova da zegbere man ibhokhan Izrẹl taman ele ghe, Osẹnobulua nan ha re ọkhọle rebhe ha ga ọle khin. Osẹnobulua da ji ele lẹn ghe, ọle dẹ sun rẹkhan ọrebhe ne hoẹmhọn ọlẹn, bi ene yẹ re obọ rẹkhan uhi ne sọle. (Tie Exodus 20:1-6.) Ebi Jehova ha taman ele hi, “ahamiẹn bha ribhi ibo nọnsẹmhẹn, mẹn ki yẹ ha ribhi ibo nọnsẹbha.” Ahamiẹn Jehova ta ọnan man uwẹ, be uwẹ ha lu yẹ? Asabọ miẹn uwẹ ki lu beji ibhokhan Izrẹl lu tee. Ele da re uru ọkpa rẹ wanniẹn Jehova yọle: ‘Ene ẹmhọn rebhe nin Jehova tale, mhan muegbe nin mhan rẹ rẹkhan ele.’ (Ex. 24:3) Ọbha sẹ bue gbe, emhin nin ele bha mun ọkhọle ọ da dọnmhẹn ele.

13. Be sunu nọn kiẹn edọnmhẹn ji ibhokhan Izrẹl?

¹³ Ọne okhun nọn wo manman ho re, ọne anyan , bi emhin nekẹle nin Osẹnobulua lu da re ofẹn ha mun ene ibhokhan Izrẹl. Ene ibhokhan Izrẹl da ha guanọ nin Moses kiẹn ọria nọn ha taman ele ebi Jehova ho nin Ọle taman ele bhi uki oke nọn ribhi Sinai. Moses da gene ka nin ọle re ha taman ele ebi Jehova ho nin Ọle taman ele. (Ex. 20:18-21) Moses da hẹn okhun ọne oke nọn ribhi Sinai. Ọle bha kẹ huẹnre bhi ọne oke. Ranmhude ọnan, ene ibhokhan izrẹl da ha riale ghe ele yulua bhi ẹkẹ ọne ẹgbo. Be bhọ ene ibhokhan Izrẹl ha ki lu yẹ? Asabọ rẹ miẹn ghe ene ibhokhan izrẹl mun urẹọbhọ nọnsele nyan iMoses gbe. Bhiriọ, ele da bu Aaron re taman ọlẹn: ‘Kpanọ, man osẹ mhan nọn ha ke odalo nin mhan, ranmhude mhan bha lẹn ebe ki sunu ji ọne Moses nan, okpea nọn sun mhan sibhi Egypt re.’—Ex. 32:1, 2.

14. Be bhọ ibhokhan Izrẹl ha ria nọn hiẹ ele? Be iJehova ki lu yẹ?

¹⁴ Ene ẹbho lẹnmhin ghe nin ọria re ga ẹbọ, emhin nọn sọnọ iJehova nọn. (Ex. 20:3-5) Ọrẹyiriọ, ọbha sẹ bue gbe, ele da ha ga obhi ẹmena! Ele rẹ lu ọne akhailu nan, ele da sẹyẹ ha riale ghe ibo nọnsi Jehova ele sẹyẹ ye. Ele bha lẹn egbe ele, ọle ele ha hie. Aaron bhọ da tale ghe, ọne iluemhin nin ele rẹ ha ga ọne ẹmena, iluemhin rẹji Jehova nọn. Be iJehova ki lu yẹ? Ọnan da wo manman ba Ọle bhi egbe a. Jehova da taman iMoses ghe ene ẹbho ‘ria egbe ele a’, ghe ‘ele je wo ban sibhi uwedẹ nin Ọle rẹ gbe uhi nin ele re.’ Ohu da re Jehova sẹbhọ ghe, ọle da ha guanọ nin ọle fuẹn agbaẹbho nọnsi Izrẹl a.—Ex. 32:5-10.

15, 16. Be Moses bi Aaron rẹ rẹman yẹ ghe ibo nọnsi Jehova ele ye? (Fẹ adudu nọn ribhi eji a da munhẹn ghe.)

¹⁵ Osẹnobulua nọn mhọn ifuẹkẹ, ọle iJehova khin. Ọle bha fuẹn ene ibhokhan Izrẹl rebhe a. Ọle da re ẹghe nin eria ne ga ọle, nin ele rẹ rẹman ghe ibo nọnsọle ele ye. (Ex. 32:14) Ẹghe nin Moses ki rẹ daghe ghe ene ẹbho so illo, gbe ikhiẹn, yẹ zẹbibi bhi odalo ọne ẹbọ nin ele man, ọle da mun ọne obhi ẹmena nele man, ọle da dumọn ọlẹn an, yẹ nọle kiẹn ẹbubu. Moses da yọle: ‘Họla ribhi ibọ nọnsi Jehova? Bu mhẹn re!’ Ene Lẹviti rebhe da bu ọle re.—Ex. 32:17-20, 26.

¹⁶ Arẹmiẹn ghe Aaron re obọ nọnsọle rẹ mọn ọne obhi ẹmena, ọle da fidenọ yẹ deba ene iLevite bu iMoses re, ranmhude, ibo nọnsi Jehova ọle guanọ nin ọle ha ye. Ene ẹbho ne bu iMoses re, rẹman ghe, ele bha gheghe vae dọ deba ibo nọnsi Jehova. Ele guanọ nin ele rẹman ghe ele imhọn obọ bhi emhin ebe. Ẹwanlẹn ele wo noo bhi enin. Bhi ọne ukpẹdẹ nin, ikpea nesẹbhi uli ea, ọle a gbono a, ranmhude ẹbọ nin ele ha ga. Bhi obọ nọnkẹle, ene ha ribhi ibo nọnsi Jehova bha yu. Jehova da nan erọnmhọn nin ele.—Ex. 32:27-29.

17. Be bhọ mhan miẹn luẹ bhi emhin nin Paul gbẹn rẹji ebe sunu ji ibhokhan Izrẹl ne ha ga emena?

 ¹⁷ Be bhọ mhan miẹn luẹ bhi ọne emhin nan nọn sunu ji ibhokhan Izrẹl? Paul nin odibo da gbẹn yọle: “Ene emhin nan da ha yi ijiẹmhin rẹji mhan, nan da miẹn ghe mhan bha . . . kiẹn eria ne ga ẹbọ, beji eso bhi ẹwẹ ele ka lu. [A gbẹn one ijiẹmhin nan] ọbhi otọ nan rẹ gbe uhi nin mhan, ranmhude ọkike ọsi ọne agbọn nan vae. Bhiriọ, ji ọne ọria nọn riale ghe ọle mundia gbẹlokotọ nin ọle hẹi dere.” (1 Cor. 10:6, 7, 11, 12) Ebi Paul re ọnan ta hi, aharẹmiẹn ọria manman ga Osẹnobulua, ọle sabọ rẹ re obọ nọnsele rẹ lu emhin nọn imhẹn, sade ọle bha gbẹlokotọ nọnsẹn. Ọle bhọ sabọ ha riale ghe Jehova sẹyẹ wo re ẹlo esili rẹ ghe ọle. Ọria sabọ ha riale ghe ọmọẹ iJehova ọle khin la ọle wo manman sikẹ iJehova, ọnin bha gheghe rẹman ghe Jehova re ẹlo esili ghe ọne ọria.—1 Cor. 10:1-5.

18. Be la sabọ rẹ mhan sibhi ibo nọnsi Jehova re? Be la nabhọre sade mhan sibhi ibo nọnsi Jehova re?

¹⁸ Ranmhude Moses bha kẹ huẹnre bhi ukokhun oke ọsi Sinai, ibhokhan Izrẹl bha yẹ sabọ ziẹngbe khẹ ọle. Iriọ yẹ nọn ẹlẹnan. Ukpẹdẹ ọsi Jehova vade, agbejele nọnsọle yẹ vade. Ahamiẹn ene ukpẹdẹ nin bha sẹ vae, mhan dẹ be ziẹngbe mundia khẹ ọle? Mhan sabọ ha riale, ọne agbọn ọsọgbọn nin Jehova mun vade bhọ dẹ gene vae? Ahamiẹn mhan bha mhọn iziẹngbe, mhan sabọ rẹ ha riale ghe ene ukpẹdẹ bhọ ki siọ gbe bhi otọ. Mhan a ha ria ene ẹmhọn nan, ọ sabọ rẹ mhan ha khu ọbhi iho nọsẹmhan. Mhan iyẹ da ha yere rẹ ha lu iho nọnsi Jehova. Ọ dẹ sabọ rẹ mhan sibhi ibo nọnsi Jehova re. Ọ dẹ yẹ sabọ rẹ mhan ha lu emhin ne imhẹn nin mhan bha ka riale khẹ ghe mhan dẹ lu.

19. Be bhọ ọkhẹke nin mhan ha mhọn bhi ọkhọle ẹghe rebhe? Bezẹle nọn da khẹke nin mhan ha mhọn ọnan bhi ọkhọle?

¹⁹ Ọbha khẹke nin mhan yele a ghe, Jehova guanọ nin mhan ha re ọkhọle rebhe rẹ ha ga ọle ọkpa. (Ex. 20:5) Sade mhan bha lu iho nọnsi Jehova, ọnin ki rẹman ghe iho nọnsi Esu mhan lu. Ọnin ida zẹwẹ ha mhẹn mhan bhi egbe hiehie. Paul taman mhan yọle: “Ibha ida sabọ ha da bhi ukpu nọnsi Jehova yẹ da bhi ukpu nọnsi ẹlinmhin ebe. Ibha ida sabọ ha le bhi uki table nọnsi Jehova yẹ le bhi uki table nọnsi ẹlinmhin ebe.”—1 Cor. 10:21.

20. Mhan ha khian okhian nọn bha gba, be Jehova rẹ rẹkpa mhan yẹ?

²⁰ Uwẹ sẹyẹ yere okha ọsi Cain, Solomon, bi ibhokhan Izrẹl? Ọ mhọn emhin ọkpa nọn diẹn ene okha nan kugbe. Ele hẹ sabọ fidenọ bu iJehova re. (Acts 3:19) Jehova i wo kẹ ze ọria obọ ranmhude ọle khian okhian nọn bha gba. Ria ẹmhọn ebi Jehova rẹ rẹhunmhan Aaron yẹ. Jehova sẹyẹ wo gbe uhi nin ẹlẹnan nọn ha gbega mhan. Ọle noo IBaibo, ebe nesẹmhan, bi ibhio mhan nin mhan ko ribhi agbotu re gbe uhi nin mhan. Mhan ha re obọ rẹkhan ene uhi rebhe, man ki ha mhọn ọlẹn bhi ọkhọle ghe, Jehova dẹ tohan mhan.

21. Arẹmiẹn ghe mhan miẹn edọnmhẹn ne ha sabọ si mhan sibhi ibo nọnsi Jehova re, be bhọ mhan mun egbe rẹ ha lu?

²¹ Ọ mhọn ebezẹle nin Jehova da mhọn ifuẹkẹ da mhan. (2 Cor. 6:1) “Ọ rẹkpa mhan rẹ rẹban emhin ne bha kiẹọnlẹn, bi emhin nin ene ribhi ẹkẹ ọne agbọn nan khu ọ.” (Tie Titus 2:11-14.) Beji mhan sẹyẹ “nyẹnlẹn bhi ẹkẹ ọne agbọn nan,” ọkhẹke nin mhan ha mhọnlẹn bhi ọkhọle ghe, emhin ne bunbun dẹ dọnmhẹn mhan nan da miẹn ghe, mhan sibhi ibo nọnsi Jehova re. Bha ji mhan muegbe nọnsẹn nin mhan rẹ deba ha ribhi ibo nọnsi Jehova, ranmhude, ‘IJehova ọkpa hi Osẹnobulua nin mhan ha mun ofẹn ọlẹn, ọle mhan ha ga, ọle mhan ha yẹ gba mun mhọnlẹn’!—Deut. 10:20.