Uwẹ be gbẹlokotọ tie ene ebe Ọkhẹughe nọn bha sẹ buẹ gbe nan ne dagbare? Fẹghe si uwẹ dẹ sabọ re ewanniẹn ọbhi ene inọnta nan:

Emhin enẹn nela mhan ha lu nin mhan da sabọ ha so illo nọnsẹn?

Ọkhẹke nin mhan mun ebe illo nọnsẹmhan okhun beji mhan ha da sabọ tuẹn uhọnmhọn okhun sade mhan so illo. Sẹyẹ, ọkhẹke nin mhan ha hiẹnhiẹn nọnsẹn. Emhin ọbhebhe hi, mhan ki yẹ taan unun an nọnsẹn. Bhiriọ, urulu nọnsẹmhan ki sabọ ha de.—w17.11, p. 5.

Ene agbaẹbho nan da miẹn ogbaga bhi otọ Izrẹl, ijan ọkpa ele be ha ye? Be uwedẹ nan rẹkhan diọ bhi ele dia yẹ?

Bhi otọ Izrẹl, agbaẹbho ehan a zẹ bhi ije kẹkẹ nin ọria ha da sabọ miẹn ogbaga. A da yẹ wo ha hẹnhẹn uwedẹ nan rẹkhan diọ bhi ene agbaẹbho nan. Bhiriọ, ọ da ha lẹkhẹ nin ọria rẹ rẹkhan ọlẹn diọ bhi agbaẹbho nin ọle ha da miẹn ogbaga.—w17.11, p. 14.

Bezẹle nin izọese nin Jesu lu nin mhan da yi ẹsele nọn kpọnọ nẹ?

Ọ dẹ rẹkpa mhan miẹn iẹnlẹn ọsi ighegheghe, yẹ kpe olukhọ si mhan bhi egbe re. Ranmhude ẹkẹ ẹjẹjẹ nin Osẹnobulua mhọn da imhọn nesi Adam, ọle da re iJesu rẹ zọese nin ele, arẹmiẹn ele sẹyẹ lu emhin ebe.—wp17.6, pp. 6-7.

Bezẹle nin mhan da tale ghe Psalm 118:22 rẹman ghe Jesu dẹ riọ kpanọ?

Ibhokhan Izrẹl da he iJesu nin Mezaya yẹ gbe ọle a. Nin ọle da sabọ kiẹn ọne ekhin-uwa, ọkhẹke nan riọ ọle kpanọ bhi idin.—w17.12, pp. 9-10.

Ọmọn ọdiọn aba odede nesi Jesu rebhe be ha khin?

Ẹmhọanta nọn ghe, eso bhi aba odede nesi Jesu, ọmọn ọdiọn ele ha khin, ọkpakinọn, eso bha ha yi ọmọn ọdiọn. Bhi ọsi ijiẹmhin, David bha ha yi ọmọn odiọn bhi uwa nọnsi Jesse. Ọrẹyiriọ, ulin nọnsi David Mezaya nan vae.—w17.12, pp. 14-15.

Adia nela ribhi Baibo ne ha sabọ gbega mhan bhi emianmhẹn?

Beji ọne uhi tale ẹghenin, ọbha khẹke nin ẹbho ne khọnmhọn emianmhẹn eso nyẹnlẹn bhi ẹwẹ ẹbho nekẹle a. Ọne uhi yẹ tale ghe, ẹbho ne re obọ so olinmhin, ọkhẹke nin ele khọa yẹ họ ikpọn nesi ele. Ọ da yọle ghe nin ọria hẹi wo ha gban egbe a bhi eji ọle ikirẹ miẹn. Ọmọn a ha ribhi ikpẹdẹ elẹnlẹn, ọle a ha da ruẹ ọle, ranmhude bhi ọne ẹghe nan, aranlẹn ida na kua gbe.—wp18.1, p. 7.

Bezẹle nọn ida yi emhin ọbe nin Kristiẹn rẹ hoẹmhọn egbe ọle?

Ọkhẹke nin mhan hoẹmhọn ibo mhan beji imhan rẹ hoẹmhọn egbe mhan. (Mark 12:31) “Ọkhẹke nin ene ọdọ hoẹmhọn amhẹn ele beji ele rẹ hoẹmhọn egbe nọnsele.” (Eph. 5:28) Ọrẹyiriọ, ọbha khẹke nan miẹn egbe mhan ọkpa mhan hoẹmhọn ọlen.—w18.01, p. 23.

Emhin eso nela ọkhẹke nin mhan lu nin mhan da sabọ ha wanre bhi oga?

Ọkhẹke nin mhan ha luẹ Baibo yẹ ria eria nyan emhin nin mhan luẹ. Sẹyẹ, mhan ki ha re obọ rẹkhan emhin nin mhan luẹ. Ọ yẹ khẹke nin mhan taan ọkhọle nọnsẹ mhan an nin ẹlinmhin nọn khiale da sabọ rẹkpa mhan. Ọ yẹ khẹke nin mhan yẹ ha miẹn urẹkpa nọnsi ẹbho ọbhi egbe.—w18.02, p. 26.

Bezẹle nin ọbha da khẹke nin mhan ha bu ẹbho nin ele fẹ odalo ghe nin mhan?

Emhin ne bunbun zẹle. Ọnọn ke okhun nẹ bhọ hi, Osẹnobulua bha re obọ bhi ene ilọnmhọn nan soso.—wp18.2, pp. 4-5.

Be imhan ha rẹ mun ekpẹn nin ọria nọn tie mhan vae bhi uwa nọnsọle yẹ?

Ọria ha tie mhan vae bhi uwa nọnsọle, nọn da kẹ mhan rẹ taman ọne ọria mhan dẹ vae, ọkhẹke nin mhan lu beji mhan tale. (Ps. 15:4) Ọbha khẹkẹ nin mhan wo gheghe re obọ gbera ebi mhan tale. Asabọ miẹn ghe ọne ọria wo wẹnna kaka rẹ muegbe khẹ mhan.—w18.03, p. 18.

Be ibhio mhan ne ribhi ihe ha miẹn luẹ bhi ijiẹmhin ọsi Timothy?

Timothy wo mun ẹmhọn oga kalo bhi iẹnlẹn. Ọle yẹ ji ẹmhọn ẹbho rẹtẹ ọle. Ọle wo manman zegbere ha lu iwẹnna oga yẹ nyẹnlẹn rẹkhan ẹmhin nin ọle luẹ. Ọle da mun udu nyan ẹlinmhin nọn khiale nọnsi Jehova yẹ ha man egbe ọle emhin nọnsẹn. Ẹbho rebhe ne ribhi agbotu rẹ sẹbhi ene ewanlẹn dẹ miẹn emhin luẹ bhi ijiẹmhin nọnsọle.—w18.04, pp. 13-14.