Imianmẹn—Emhin Nọn khẹke Nin Kristiẹn Lu
“Imianmẹn . . . sẹyẹ wo miẹn bha fan nian.”—1 PET. 3:21.
ILLO: 52, 41
1, 2. (a) Be bhọ ene biẹ ọmọn eso lu yẹ sade ọmọn nọnsele dọ taman ele ghe ọle guanọ nin ọle mianmẹn? (b) Bezẹle nan da nọọn ene guanọ nin ele mianmẹn si ele sẹ re egbe guẹ nin Jehova? (Fẹ adudu nọn ribhi eji a da munhẹn ghe.)
BEJI obhokhan okhuo ọkpa nin mhan ha tie ọle Maria rẹ deba usun ne ho nin ele mianmẹn mundia, ene biẹ ọle da wo ha re ọtibhọ rẹ ghe ọle. Ọle da tan unun an nọnsẹn rẹ wanniẹn inọnta eva nin ọnọn ta ọta nọọnlẹn. Bhiriọ, ọle da dọ mianmẹn.
2 Ọ da wo ha ti ene biẹ Maria bhọ ghe, ọmọn nọnsele re egbe guẹ nin Jehova yẹ dọ mianmẹn. Ọrẹyiriọ, ọkuẹsẹ ọle dọ mianmẹn, emhin eso da ha kpokpo inẹn ọlẹn bhi ọkhọle. Inẹn ọlẹn da ha riale: ‘Maria sẹ gene wanre sẹbhi ebe ha mianmẹn? Ọle bhọ be lẹn ebi imianmẹn gene khin, la nin mhan taman ọlẹn nin ọle mundia fo khere?’ Inọnta eso nin ene biẹ ọmọn nọọn khenan, sade ọmọn nọnsele taman ele ghe, ele guanọ nin ele mianmẹn. (Eccl. 5:5) Iregbe guẹ nin Jehova bi imianmẹn, ele hi emhin ne ke okhun nẹ bhi iẹnlẹn nọnsi Kristiẹn.—Fẹ ọne ẹkpẹti ghe nọn yọle:“ Uwẹ Sẹ Be Re Egbe Guẹ Nin Jehova?”
3, 4. (a) Be iPeter rẹ rẹman yẹ ghe emhin kpataki imianmẹn khin? (b) Bezẹle nin mhan ha da sabọ re imianmẹn rẹ khọkhọ okọ nin Noah bọn?
3 Ẹghe nin Peter nin odibo rẹ ha tẹmhọn imianmẹn, ọle da sounun bhi okọ nin Noah bọnlẹn. Peter da yọle: “Inian imianmẹn yẹ diabe ọnan. Ọne imianmẹn nan sẹyẹ wo miẹn bha fan nian.” (Tie 1 Peter 3:20, 21.) Ọne okọ da ha yi emhin nin ọrebhe sabọ daghe nọn rẹman ghe, Noah wo muegbe nin ọle rẹ re iẹnlẹn nọnsọle rẹ lu iho nọnsi Jehova. Noah da wo miẹn ẹsọn nin Jehova mun nanlẹn tee. Ọne okọ nin Noah bọnlẹn, da re urẹọbhọ nọnsi Noah man, ọ da yẹ miẹn Noah bi azagba-uwa nọnsọle fan. Be bhọ Peter guanọ nin mhan luẹ bhi ebi ọle tẹmhọnlẹn?
4 Beji okọ nin Noah bọnlẹn rẹ rẹman ghe, ọle mhọn urẹọbhọ, iriọ imianmẹn yẹ rẹ rẹman ghe, ọria nọn mianmẹn re egbe guẹ nin Jehova ranmhude urẹọbhọ nin ọle mhọn da iJesu Kristi. Beji Noah lu, ọkhẹke nin ẹbho ne re egbe guẹ nin Jehova lu iwẹnna nin ọle mun nin ele. Beji Noah rẹ miẹn uhọnmhọn ẹghe nan rẹ re amẹn rẹ fuẹn agbọn an, ene re egbe guẹ nin Jehova dẹ yẹ miẹn uhọnmhọn ẹghe nin ọne agbọn nan ha rẹ kpẹn. (Mark 13:10; Rev. 7:9, 10) Ọnan zẹle nọn da yi emhin kpataki nin mhan rẹ re egbe guẹ nin Jehova yẹ mianmẹn. Ọria nọn si egbe re ikeke nin ọle rẹ mianmẹn mun iẹnlẹn ọsi ighegheghe nọnsọle ọbhi okhẹnan.
5. Be imhan ha zilo nyan bhi ọne uhọnmhọn-ọta nan?
5 Ranmhude emhin kpataki imianmẹn khin, mhan dẹ zilo nyan inọnta ea. Ele hi: Be bhọ iBaibo tayẹ rẹji imianmẹn? Oẹ nela ọkhẹke nin ọria zẹ ọle kuẹ sabọ mianmẹn? Ahamiẹn iKristiẹn man ọmọn nọnsọle la ọria ọbhebhe iBaibo, bezẹle nọn da khẹke nin ọle ha mhọnlẹn bhi ọkhọle ghe emhin nọn khẹke imianmẹn khin?
IMIANMẸN NIN BAIBO TẸMHỌNLẸN
6, 7. (a) Bezẹle nin John da ha gbe ẹbho ruẹ bhi amẹn? (b) Be re imianmẹn nọnsi Jesu dikẹ bhi enekẹle nin John lu?
6 Imianmẹn nin John ha lu, ọle Baibo ka tẹmhọnlẹn. (Matt. 3:1-6) Ẹbho ne gbobọ ra uhi nin Osẹnobulua nanbhi obọ iMoses gbe, ne ki fidenọ, ele ha bu iJohn re nin ele dọ miẹn amẹn. Ọkpakinọn, ọkhẹke nin mhan lẹn ghe, ẹghe nin John rẹ gbe iJesu nin ukpọmọn ọkpa nọnsi Osẹnobulua ruẹ bhi amẹn, ọiyi ranmhude ghe, Jesu lu khọlọ zẹle. (Matt. 3:13-17) Jesus bha lu olukhọ soso, bhiriọ, be ọle ha ki ha fidenọ nan? (1 Pet. 2:22) Igbegberuẹ nọnsọle rẹman ghe ọle ze egbe nọnsọle re nin ọle rẹ lu iho nọnsi Osẹnobulua.—Heb. 10:7.
7 Edibo nesi Jesu da yẹ ha gbe ẹbho ruẹ bhi amẹn ẹghe nin Jesu sẹyẹ rẹ ha ribhi ọne otọ nan. (John 3:22; 4:1, 2) Ọne imianmẹn nan nin ele ha lu diabe ọsi John, ranmhude ọne imianmẹn nan mundia nin ufidenọ ọsi ẹbho ne gbobọ ra uhi nin Osẹnobulua nanbhi obọ iMoses gbe. Ọkpakinọn, Jesus ki yu fo, yẹ riọ kpanọ bhi idin, igbegberuẹ bhi amẹn ọsi ene rẹkhan ọlẹn da mundia nin emhin ọbhebhe.
8. (a) Be iJesu taman edibo nesọle yẹ ẹghe nin ọle rẹ riọ kpanọ bhi idin fo? (b) Bezẹle nọn da khẹke nin Kristiẹn mianmẹn?
8 Bhi ukpe 33 C.E., ẹghe nin Jesu ki rẹ riọ kpanọn bhi idin fo, ọle da zegbere man ikpea, ikhuo bi ibhokhan ne sikoko ne gbera itue 500. Asabọ miẹn ọne ẹghe nan ọle rẹ yọle: “Bha ha khian dọ tẹmhọn Agbejele man ọrebhe rẹ nanbhi agbaẹbho rebhe. Gbe ele ruẹ bhi amẹn bhi elin ọsi Aba bi ọsi Ọmọn bi ọsi ẹlinmhin nọn khiale, bha ha man ele emhin nin ele re obọ rẹkhan ene emhin rebhe nin mẹn rẹ gbuhi nin bha.” (Matt. 28:19, 20; 1 Cor. 15:6) Asabọ miẹn ẹghe nin Jesu rẹ ta ọne ọta nan ghe nin ele dọ tẹmhọn Agbejele man ẹbho rebhe, odibo nesọle ne bun ha ribhi enin. Bhiriọ, Jesu da rẹman ghe ẹbho rebhe ne muegbe nin ele rẹ ha yi Kristiẹn, ọkhẹke nin ele mianmẹn. (Matt. 11:29, 30) Ọria nọn guanọ nin oga nọnsọle ha ti Osẹnobulua bhọ, ọkhẹke nin ọle rẹọbhọ ghe Jesu mhọn ihe nin Osẹnobulua da ha noo ọle rẹ mun emhanmhan nọnsọle sẹ. Bhiriọ, ọne ọria ki sabọ mianmẹn. Imianmẹn nọn dia inian, ọle ọkpa ti Osẹnobulua bhọ. Baibo wo rẹman ghe, bhi ore nin ọhẹnhẹn, ene dọ ha kiẹn Kristiẹn wo lẹn ebi imianmẹn mundia nan. Bhiriọ, ele bha ha si egbe nin ele rẹ mianmẹn.—Acts 2:41; 9:18; 16:14, 15, 32, 33.
HẸI RIA ẸGHE A
9, 10. Be bhọ man miẹn luẹ bhi ijiẹmhin ọsi Paul nin odibo bi obhokhan Ethiopia nin Baibo tẹmhọnlẹn?
9 Tie Acts 8:35, 36. Bha ji mhan zilo nyan ijiẹmhin ọsi okpea ọkpa nọn nanbhi Ethiopia vae, nọn ha deba ibhokhan iJew ga Osẹnobulua. Ẹghe nin ọle ki rẹ ha khian uwa beji ọle dọ ga Osẹnobulua fo bhi Jerusalem, ẹhi nọnsi Jehova da ji Philip bu ọle bhi uwedẹ, nin philip dọ tẹmhọn iJesu man ọlẹn. Be ọne okpea nan ki lu yẹ? Ebi ọle lu da wo rẹman ghe ọle miẹn ene ẹmhọanta nin ọle luẹle ọbhi egbe. Ọle da wo muegbe nin ọle rẹ lu rẹkhan uwedẹ nọnsi Jehova, bhiriọ, ọle bha zẹwẹ ria ẹghe a nin ọle rẹ mianmẹn.
10 Okpea ọkpa nin obhokhan iJew nọn ha kpokpo iKristiẹn, ọle ijiẹmhin ọzeva nin mhan ha zilo nyan. Bhi ọne ẹghe nan nian, ibhokhan iJew bha yẹ ha yi ikolu nọnsi iJehova. Ọrẹyiriọ, ọne okpea nan da sẹyẹ wo ha re egbe rebhe ga oga ọsi ibhokhan iJew natiọle Judaism. Ọkpakinọn, ọne okpea nan da dọ luẹ ẹmhọn uwedẹ nọn khẹke nan rẹ ga Osẹnobulua. Jesu tobọle nanbhi okun bhi ẹlinmhin sọsali man ọlẹn. Be bhọ ọne okpea ki lu yẹ? Ọle da ji iKristiẹn ọkpa natiọle Ananias da rẹkpa ọle. Baibo da taman mhan ghe, ọne okpea nan da zegbere dọ mianmẹn. (Acts 9:17, 18; Gal. 1:14) Iriọ a da miẹn uwẹ lẹn sẹbhọ ghe Paul nin odibo, ọle mhan tẹmhọn ọlẹn. Uwẹ be daghe ọle ghe, ẹghe nin Paul ki rẹ dọ lẹn ghe Osẹnobulua noo iJesu rẹ mun iho nọnsọle sẹ, ọle bha zẹwẹ ria ẹghe a nin ọle rẹ dọ mianmẹn?—Tie Acts 22:12-16.
11. (a) Be bhọ zẹle nin ene kiẹn iKristiẹn ẹlẹnan da mianmẹn? (b) Be bhọ ọ dia mhan yẹ bhi egbe sade man daghe eria ne re gbe guẹ nin Jehova dọ mianmẹn?
11 Iriọ yẹ nọn rẹji ene imhan man ele iBaibo ẹlẹnan, ele a rẹ ha yi ibhokhan la ewanlẹn. Eria ne hoẹmhọn ẹmhọanta nin ele luẹ bhi Baibo, ne yẹ mhọn urẹọbhọ da emhin nin ele luẹ, ọ wo ti ele bhọ rẹ re egbe guẹ nin Jehova yẹ mianmẹn. Bhi usikoko nesẹmhan, ọta kpataki, ọle ọta imianmẹn khin. Emhin nọn ti ene biẹ ọmọn bhọ nọn, nin ele rẹ daghe ọmọn nọnsẹle deba ene da gbegberuẹ bhi amẹn. Bhi ukpe 2017, itue 284,000, ele mianmẹn rẹ rẹman ghe ele re egbe guẹ nin Jehova. (Acts 13:48) Ọ wo khiakhia bhi ẹlo ghe, ele lẹn sẹbhọ ghe ọkhẹke nin Kristiẹn mianmẹn. Ọkpakinọn, be bhọ ele lu ọkuẹsẹ ele sabọ mianmẹn?
12. Emhin nela ẹbho nin mhan man ele iBaibo ha lu ọkuẹsẹ ele gbegberuẹ bhi amẹn?
12 Ọkuẹsẹ ọria nin mhan luẹ ọle Baibo dọ mianmẹn, ọkhẹke nin ọle dọ ha mhọn urẹọbhọ dai ilẹnmhin nọn gbale nọn ribhi ẹkẹ Baibo, iho nọnsi Osẹnobulua, bi emhanmhan nọnsi Osẹnobulua nin ọle ha rẹ miẹn mhan fan. (1 Tim. 2:3-6) Ọne urẹọbhọ nan ki rẹkpa ọne ọria rẹ he uwedẹ iẹnlẹn nọn iyẹẹ Osẹnobulua, ọle ki yẹ dọ ha lu rẹkhan iho nọnsi Jehova. (Acts 3:19) Emhin kpataki ọnan khin ranmhude, ọria nọn lu emhin nin Jehova hele, iregbe guẹ nọnsọle ida ti Jehova bhọ. (1 Cor. 6:9, 10) Sẹyẹ, Ọria nọn ho nin ọle regbe guẹ nin Jehova ki ha yo ikolo oga, ọle ki yẹ ha deba lu iwẹnna itẹmhọn Osẹnobulua. Jesu da yọle ghe, ene ho nin ele rẹkhan ọlẹn dẹ ha lu ọne iwẹnna nan. (Acts 1:8) Ọne ọria nin mhan man ọle Baibo ha ki ha lu ene emhin nan rebhe, ọle ki nan erọnmhọn rẹ re egbe guẹ nin Jehova, yẹ dọ mianmẹn sira ẹbho.
RẸKPA ENE UWẸ MAN ELE BAIBO RẸ MUEGBE IMIANMẸN
Uwẹ be rẹkpa ẹbho nin uwẹ man ele iBaibo rẹ lẹn ghe emhin kpataki nọn nan rẹ mianmẹn? (Fẹ udu ọle 13 ghe)
13. Bezẹle nin mhan a da ha mhọn ọlẹn bhi ọkhọle ghe, emhin nọn khẹke nọn nin kristiẹn rẹ mianmẹn sade mhan man ẹbho iBaibo?
13 Ọkhẹke nin mhan ha mhọn ọlẹn bhi ọkhọle ghe emhin nọn khẹke nọn nin Kristiẹn rẹ mianmẹn, sade mhan man imọn nesẹmhan, bi ẹbho nekẹle emhin. Bhiriọ, mhan ki ji ele lẹn ghe, emhin kpataki nọn nan rẹ re egbe guẹ nin Jehova yẹ mianmẹn. Bhi ọsi ẹmhọanta, mhan guanọ nin imọn nesẹmhan, bi ene mhan man ele Baibo ha lu re alo beji ele a da sabọ mianmẹn!
14. Bezẹle nin mhan ida sua ọria soso nin ọle dọ mianmẹn?
14 Beji Jehova irẹ sua ọria soso rẹ dọ ha ga ọle, ọbha khẹke nin mhan sua ọmọn la ọria nin mhan man ọle iBaibo nin ọle dọ mianmẹn. (1 John 4:8) Emhin nọn khẹke nin mhan lu hi, nin mhan ha rẹkpa ele lẹn ghe emhin kpataki nọn nin mhan re deba iJehova ha mhọn ikolu. Ahamiẹn ẹmhọanta nin ele luẹ gene ti ele bhọ, ghe ele gene muegbe rẹ nyẹnlẹn beji ọ khẹke nin Kristiẹn rẹ ha nyẹnlẹn, ele ki tobọle zegbere dọ mianmẹn.—2 Cor. 5:14, 15.
15, 16. (a) A be miẹn eji ọria ha wanrẹ sẹ fo ọle kuẹ mianmẹn? Gbotọle fanọan. (b) A ha rẹ miẹn ọria ka mianmẹn bhi oga nin ọle ka ha ye, bezẹle nọn da khẹke nin ọle sẹyẹ mianmẹn sade ọle ho nin ọle kiẹn ọkpa bhi Esali Jehova?
15 Ukpe soso iribhọ nin ọria ha wanre sẹ fo ọle kuẹ mianmẹn. Okhian wo kẹ eso rẹ wanrẹ bhi oriọn gbera enekẹle. Arẹmiẹn ẹghe nin ele rẹ ha yi ibhokhan eso rẹ mianmẹn, ele ki sẹyẹ wo ga sotọ nọnsẹn. Eso yẹ ribhọ ne manman wanre fo ọkuẹsẹ ele luẹ ẹmhọanta yẹ mianmẹn. Eso bhọ wanre gbera ikpe 100!
16 Ọkhuo ọkpa nọn ki dọmanlẹn da nọọn ọria nọn man ọle iBaibo ghe, si ọkhẹke nin ọle kie mianmẹn ranmhude ọle ka mianmẹn bhi otuẹ kikẹ nin ọle ka yo. Ọne man ọle iBaibo da tie ije eso man ọlẹn bhi Baibo nọn wanniẹn ọne inọnta. Ọne okhuo da dọ lẹn otọ ebi Baibo tale, bhiriọ, ọle da dọ mianmẹn. Arẹmiẹn ọle ki gbera ikpe 70, ọle bha dọ ha riale ghe imianmẹn bha khẹke ọle. Bhi ọsi ẹmhọanta, mhan a ha mhọn ilẹnmhin nọn gbale nọnsi Jehova, ọle iJehova a da re obọ bhi imianmẹn nọnsẹmhan. Bhiriọ, a ha rẹ miẹn ghe ọria ka mianmẹn bhi oga nin ọle ka ha yẹ, ọle a dọ deba Esali Jehova, ọ sẹyẹ khẹke nin ọle mianmẹn.—Tie Acts 19:3-5.
17. Be bhọ ọkhẹkẹ nin ọria ria eria nyan ukpẹdẹ nin ọle ha mianmẹn?
17 Ukpẹdẹ nin ọria mianmẹn, ukpẹdẹ eghọnghọn nọn. Ukpẹdẹ nan ha yẹ rẹ ria eria nyan ebi ọne imianmẹn mundia nan yẹ nọn. Mhan ha wẹnna kaka, ọle mhan ha da sabọ nyẹnlẹn rẹkhan uwedẹ nọn khẹke nin kristiẹn rẹ nyẹnlẹn. Ọle zẹle nin Jesu da re iẹnlẹn ọsi Kristiẹn re khọkhọ oran nanrẹ mun ihẹ. Ọiyi egbe ele odibo nesi Jesu nyẹnlẹn nan, “ọkpakinọn, ọnọn yu nin ele nan riọ kpanọ bhi idin ele a ki ha nyẹnlẹn nan.”—2 Cor. 5:15; Matt. 16:24.
18. Inọnta nela man ha zilo nyan bhi uhọnmhọn-ọta nọn ki sẹ ọle bhi egbe?
18 Ranmhude ọkhẹke nin ọria wẹnna kaka ọle kuẹ sabọ nyẹnlẹn bhi uwedẹ nọn khẹke nin Kristiẹn rẹ nyẹnlẹn, ọle zẹle nin inẹn maria da ha ria ene ẹmhọn nin mhan ka tẹmhọnlẹn bhi eji mhan da munhẹn. Ahamiẹn uwẹ mhọn ọmọn, asabọ miẹn uwẹ nọọn egbe ẹ: ‘Ọmọn nọnsẹmhẹn bhọ gene muegbe nin ọle rẹ gbegberuẹ bhi amẹn? Ọle sẹ luẹ emhin sẹbhọ nin ọle da sabọ re egbe guẹ nin Jehova? Ọ be khẹke nin ọmọn nọnsẹmhẹn yo isikulu fo, yẹ ha mhọn iwẹnna fo ọle kuẹ mianmẹn? Aha ki miẹn ọmọn nọnsẹmhẹn gbobọ ra uhi nọnsi Jehova sade ọle mianmẹn fo kii?’ Mhan dẹ zilo nyan ene inọnta nan bhi uhọnmhọn-ọta nọn ki sẹ ọle bhi egbe. Mhan dẹ yẹ zilo nyan uwedẹ nọn khẹke nin ene biẹ ọmọn ha rẹ ha ghe imianmẹn.
