1. Be rẹ mhan rẹọbhọ ghe ẹghe ọkike ọsi ọne agbọn nan mhan ki da nyẹnlẹn?

1914 be gbera fo ọkuẹsẹ a biẹ uwẹ? Ahamiẹn ọ gbera fo, ọnan rẹman ghe ẹghe ọkike ọsi ọne agbọn nan uwẹ sẹ da nyẹnlẹn iẹnlẹn nọnsẹ rebhe. (2 Tim. 3:1) Mhan rebhe lẹn ghe ene emhin nin Jesu tale ghe e dẹ ha sunu bhi ẹghe ọkike, wo gene sunu ẹlẹnan. Eso bhi ene emhin hi, okhọn nọn de, ukhunmhun nọn fi, otọ nọn mun vẹa, emianmhẹn, bi ekpokpo nan da ha kpokpo ẹbho nesi Jehova. (Matt. 24:3, 7-9, 12; Luke 21:10-12) Mhan yẹ wo daghe ẹbho ne lu emhin beji Paul nin odibo tẹmhọn ọlẹn. (Fẹ ọne ẹkpẹti ghe nọn yọle, “ Uwedẹ Nin Ẹbho Rẹ Lu Emhin Ẹlẹnan.”) Mhan ne ga iJehova rẹọbhọ ghe, ọkpẹnlẹn ọsi ọne ẹghe ọkike nan mhan ki da nyẹnlẹn.—Mic. 4:1.

2. Inọnta nela mhan ha re ewanniẹn ọi?

² Mhan rẹọbhọ ghe ọkpẹnlẹn ọsi ẹghe ọkike mhan ki ye, ranmhude ikpe ne bunbun ki wo gbera rẹ na bhi 1914 rẹ dọ sẹbhi ẹlẹnan. Ranmhude ọkpẹnlẹn ki wo manman sire, ọkhẹke nin mhan re ewanniẹn ọbhi inọnta kpataki eso. Ele hi: Emhin nela ha sunu sade ọne ẹghe ọkike nan sẹbhi ọkpẹnlẹn? Be iJehova guanọ nin mhan ha lu ọkuẹsẹ ene emhin munhẹn ha sunu?

3. Beji 1 Thessalonians 5:1-3 rẹman, emhin nela ene gbẹloghe da ha wewe nẹga?

³ Tie 1 Thessalonians 5:1-3. “Ukpẹdẹ ọsi Jehova” nin Paul tẹmhọnlẹn bhi ọne Baibo nan, mundia nin ẹghe nin ene gbẹloghe ha rẹ fuẹn iBayblọn nọn Khua a rẹ dọ sẹbhi ẹghe Armageddon. (Rev. 16:14, 16; 17:5) Ọne ukpẹdẹ nọnsi Jehova  ha ki ha sire, ene gbẹloghe ki ha wewe ẹmhọn “Ọfure bi ugbega!” nẹga. Arẹmiẹn ẹlẹnan nian, ene gbẹloghe noo ọta ne dia inian sade ele tẹmhọn ebi ele ha rẹ mun ọfure gbọ bhi agbaẹbho kẹkẹ yẹ, * “ọfure bi ugbega” nin Baibo yọle ele dẹ ha ta bhi ẹghe odalo dikẹ. Bezẹle nin mhan da ta iriọ? Ranmhude ẹghe nin ele ha rẹ ha ta ọne ọta nan bhi ẹghe odalo, ẹbho ne bunbun dẹ rẹọbhọ ghe ele gene re ọne agbọn nan kiẹn eje fure. Ọkpakinọn, ekpokpo nọn khua ki wo munhẹn, ugbekhuelo ki yẹ wo re ẹjẹje rẹkhan ọlẹn.—Matt. 24:21.

4. (a) Emhin eso nela mhan bha sẹ lẹn rẹji ẹmhọn ọfure bi ugbega nin ene gbẹloghe da ha tẹmhọnlẹn bhi ẹghe odalo? (b) Iria-eria nela ọ bha khẹke nin mhan ji ene gbẹloghe kọ ọbhi ọkhọle nọnsẹmhan?

⁴ Emhin eso ribhọ nin mhan lẹnlẹn rẹji ẹmhọn ọfure bi ugbega nin ene gbẹloghe da ha tẹmhọnlẹn bhi ẹghe odalo. Ọkpakinọn, emhin ebhebhe yẹ ribhọ nin mhan bha lẹn. Emhin bọsi, ebe ha re ele ha tale, bi ebi ele ha rẹ ha tale yẹ. Sẹyẹ, mhan bha lẹn si igba ne bunbun ele ha tale la si osukpa ele ha rẹ wo tale. Ebi ọ hi ki rẹ diayẹ, mhan lẹn sẹbhọ ghe, ọ bha khẹke nin mhan ji ene gbẹloghe hiẹ mhan rẹ ha riale ghe ele dẹ gene sabọ mun ọfure re. Ọnan bhọ ọta nin Baibo tale ghe ọ dẹ ha yi iyaman nọn ha rẹman ghe, ukpẹdẹ nọnsi Jehova ho nọn munhẹn.

5. Be 1 Thessalonians 5:4-6 yọle nin mhan lu, nin mhan da sabọ muegbe khẹ “ukpẹdẹ ọsi Jehova”?

⁵ Tie 1 Thessalonians 5:4-6. Adia nọnsi Paul bhi ọne iBaibo nan rẹkpa mhan lẹn ebi mhan ha rẹ muegbe khẹ “ukpẹdẹ ọsi Jehova” yẹ. Ọ da yọle nin mhan hẹi ji owe re mhan bọsi ẹbho nekẹle. Ọkhẹke nin mhan ha babegbe ẹghe rebhe. Bhi ọsi ijiẹmhin, ọkhẹke nin mhan ha babegbe, nin ọne agbọn nan hẹi si mhan ọbhi ilọnmhọn ọfinẹfi. Ahamiẹn mhan dọ deba bhi ilọnmhọn ọfinẹfi, mhan ki kiẹn eria ne deba ibo ọsi ọne agbọn nan. (John 15:19) Mhan lẹn sẹbhọ ghe, Agbejele nọnsi Osẹnobulua ọkpa ha sabọ mun ọfure re bhi ọne agbọn nan.

6. Be imhan guanọ nin mhan rẹkpa ẹbho lu nian? Bezẹle?

⁶ Ọkhẹke nin mhan ha sasa bhi oga. Sẹyẹ, ọkhẹke nin mhan dọnmhegbe ha rẹkpa ẹbho lẹn ebi Baibo tale rẹji ebe ha sunu bhi ẹghe odalo. Bha ji mhan yere ghe, ekpokpo nọn khua ha ki munhẹn fo, ẹghe iyẹ da ha ribhọ nin ẹbho rẹ fidenọ dọ ha ga iJehova. Ọnan zẹle nin iwẹnna itẹmhọn Osẹnobulua da yi iwẹnna nan ha re ẹjẹje lu. *

7. Be iJehova guanọ nin mhan re ọne obhi ẹghe khere nọn kẹre nan ha lu?

⁷ Jehova guanọ nin mhan noo ọne obhi ẹghe  khere nọn kẹre nan rẹ ha sasa bhi iwẹnna nin ọle mun nin mhan. Mhan dẹ dọnmhegbe nin mhan “wo ha mhọn iwẹnna ne bunbun bhi obọ bhi iwẹnna nọnsi Ebeanlẹn mhan.” (1 Cor. 15:58) Jesu tẹmhọn ọne iwẹnna nin mhan ha lu. Ẹghe nin ọle rẹ ha tẹmhọn emhin ne ha sunu bhi ẹghe ọkike, ọle da yọle: “Sẹyẹ, bhi agbaẹbho rebhe, ọne ọta nọn mhẹn, ọle a ha ka tẹmhọn ọlẹn.” (Mark 13:4, 8, 10; Matt. 24:14) Ọ ti mhan bhọ rẹ lẹn ghe, ẹghe nọn hi ki rẹ khin nin mhan rẹ deba ha tẹmhọn Osẹnobulua, mhan rẹkpa mun ọne akhasẹ nan sẹ.

8. Be imhan rẹ lẹn yẹ ghe iwẹnna itẹmhọn Osẹnobulua nin mhan lu gene wo tuẹn okhun?

⁸ Ẹmhọanta be nọn ghe iwẹnna itẹmhọn Osẹnobulua nin mhan lu tuẹn okhun? Ehe! Ukpe-ukpe ọ rẹ tuẹn okhun. Bha ji mhan zilo nyan ebi Esali Jehova re wo ha bun ọbhọ yẹ bhi ọne ẹghe ọkike nan. Bhi ukpe 1914, itue 5,155, ele ha yi Esali Jehova. Agbaẹbho 43 ọkpa ele ha ye ẹghenin. Ẹlẹnan nian, ele bun gbera ẹbo 8. Agbaẹbho 240 ele ki ye! Ọrẹyiriọ, ọne iwẹnna bha sẹyẹ fo. Mhan dẹ sẹyẹ ha wewe man ọrebhe ghe, Agbejele nọnsi Osẹnobulua ọkpa ha sabọ dọ kpẹn iloya nesẹmhan.—Ps. 145:11-13.

9. Bezẹle nọn bha da khẹke nin mhan zobọ bhi ẹmhọn Agbejele nin mhan wewe nẹga?

⁹ Ẹghe nin Jehova ha rẹ yọle ghe ọne iwẹnna nan fo, ọle mhan ha rẹ zobọ bhọ. Eka ẹghe kẹre nin ẹbho rẹ họn ẹmhọn iJehova bi Jesu? (John 17:3) Mhan bha lẹn. Ọkpakinọn, mhan lẹnmhin ghe, ọkuẹsẹ ekpokpo nọn khua munhẹn, “ọrebhe ne muegbe nin ele rẹ nyẹnlẹn bhi uwedẹ nin ele ha da miẹn aribhọ ọsi ighegheghe,” dẹ sabọ fidenọ dọ ha ga iJehova. (Acts 13:48) Be imhan ha rẹ sabọ rẹkpa ene ẹbho nan yẹ ọkuẹsẹ ẹghe fo?

10. Urẹkpa nela Jehova rẹ nin mhan nin mhan da sabọ ha man ẹbho ẹmhọanta?

¹⁰ Jehova noo agbotu nọnsọle rẹ ne emhin rebhe nin mhan, ne ha rẹkpa mhan ha man ẹbho ẹmhọanta. Bhi ọsi ijiẹmhin, uzana-uzana mhan rẹ luẹ emhin bhi ikolo nin mhan dọ bhi ẹkẹ uzana. Bhi ọne ikolo nan, mhan luẹ ebi mhan ha ta sade mhan miẹn ọria bhi ọsi ọhẹnhẹn bi sade mhan lu afikie yo. Mhan yẹ luẹ ebi a rẹ man ẹbho iBaibo yẹ. Agbotu nọnsi Jehova yẹ ne emhin ebhbehbe nin mhan. Ene emhin hi: Emhin Kpataki Nin Mhan Rẹ Lu Iwẹnna Itẹmhọn Osẹnobulua. Ene emhin nan dẹ sabọ rẹkpa mhan . . .

• lẹn ebi mhan ha rẹ munhẹn ha ne ọria zilo yẹ,

•   ha tẹmhọn Osẹnobulua bhi uwedẹ nọn ha re ọle ha ti ẹbho bhọ,

• ne ẹbho zilo bhi uwedẹ nin ele ha da ha mhọn ọtibhọ rẹ luẹ ẹmhọn Osẹnobulua,

• ha man ẹbho iBaibo, bi

• ha tẹmhọn wẹbsaiti nọnsẹmhan man ẹbho, yẹ tie ele vae bhi Kindọn Họọ.

Gene gene, mhan iguanọ nin mhan gheghe ha mhọn ene emhin nan, mhan guanọ nin mhan ha noo ele. * Bhi ọsi ijiẹmhin, ahamiẹn uwẹ re trati la ebe nin ọria sade uwẹ nanlẹn zilo fo, ọle ki miẹn ebi ọle ha tie ọkuẹsẹ uwẹ kie vae. Ẹsọn nọnsẹmhan nọn nin mhan ha rẹ ha deba tẹmhọn Osẹnobulua uki-uki.

11. Bezẹle nan da mhanmhan Online Bible Study Lessons?

¹¹ Online Bible Study Lessons nọn ribhi jw.org^® yẹ wo rẹman ghe, Jehova rẹkpa ẹbho luẹ ẹmhọanta. (Guanọ ọlẹn bhi BIBLE TEACHINGS > ONLINE LESSONS.) Bezẹle nan da mhanmhan ene iluẹmhin nan? Uki-uki, ẹbho ne manman bunbun bhi ọne otọ agbọn nan rebhe, guanọ intanẹt fẹghe si ele dẹ miẹn uhọnmhọn-ọta nin ele ha rẹ luẹ iBaibo. Ene uhọnmhọn-ọta ne ribhi Online Bible Study Lessons dẹ sabọ rẹkpa ele munhẹn ha luẹ ẹmhọanta ne ribhi Baibo. Sẹyẹ, asabọmiẹn eria nin uwẹ miẹn ne talọ bha ka nin uwẹ fikie bu ele dọ ha man ele iBaibo. Ọnan ha sunu, re Online Bible Study Lessons man ele bhi wẹbsait nọnsẹmhan, la uwẹ taman ele ebi ele ha rẹ miẹn ọlẹn yẹ. *

12. Be uwẹ ha sabọ miẹn luẹ bhi ene uhọnmhọn-ọta ne ribhi ẹkẹ Online Bible Study Lessons?

¹² Uhọnmhọn-ọta nin uwẹ ha miẹn bhi ẹkẹ Online Bible Study Lessons hi: “The Bible and Its Author,” “The Bible’s Main Characters,” bi “The Bible’s Message of Hope.” Ẹmhọanta nin uwẹ ha miẹn luẹ bhi ene uhọnmhọn-ọta nan hi:

• Ebi Baibo ha rẹ sabọ rẹkpa ọria yẹ

• Unan eria nin Jehova, Jesu, bi ene ẹhi khin

• Ebezẹle nin Osẹnobulua da man eria

• Ebezẹle nin iloya bi emhin ebe da gba ije rebhe

Ene uhọnmhọn-ọta yẹ zilo nyan ebi Jehova ha rẹ . . .

• kpẹn iloya bi uu yẹ,

• riọ ene yu kpanọ yẹ, bi

• re ọkpẹnlẹn ọbhi ugbẹloghe ọsi eria, yẹ mun ọsi ọle gbọ.

13. Ọria ha luẹ ene uhọnmhọn-ọta rebhe ne ribhi Online Bible Study Lessons fo, ọ be yẹ khẹke nan bu ọle dọ ha man ọle iBaibo? Gbotọle fanọn an.

¹³ Ọnan bha rẹman ghe mhan ida yẹ bu ele dọ ha man ele iBaibo bhi ẹghe bi eje yẹẹ ele. Jesu rẹ ọne isẹhoa nin mhan rẹ rẹkpa ẹbho kiẹn edibo nesọle. Mhan nan erọnmhọn ghe nin ẹbho nin ẹmhọanta yẹẹ fẹ ene uhọnmhọn-ọta nan ghe, bi nin ebi ele ha luẹ bhọ ti ele bhọ sẹbhọ ghe, ọ ki ha ghọn ele rẹ luẹ ba ẹmhọanta nin ele sẹ luẹ bhi Baibo. Ọnan dẹ sabọ re ele ka nan dọ ha man ele iBaibo. Bhi otọ ene iluẹmhin kẹkẹ ọsi Online Bible Study Lessons, a gbẹn ọbhọ nin ọria tare si ọ dẹ yẹẹ ọle nin ọria bu ọle re dọ ha man ọle iBaibo. Ukpẹdẹ-ukpẹdẹ, ọ gbera itue 230 ne re iwebsait nọnsẹmhan gbẹn re nan dọ ha man ele iBaibo! Emhin kpataki sẹyẹ nọn nan rẹ ha bu ẹbho dọ ha man ele iBaibo!

14. Beji Jesu tale bhi Matthew 28:19, 20, iwẹnna nela mhan dọnmhegbe rẹ lu? Bezẹle nin mhan ha da lu ọle?

¹⁴ Tie Matthew 28:19, 20. Beji mhan rẹ man ẹbho iBaibo, mhan dọnmhegbe rẹ rẹkpa  ele “kiẹn edibo” nesi Jesu. Mhan yẹ man ele uwedẹ nin ele ha rẹ sabọ ha rẹkhan uhi nesi Jesu. Ọkhẹke nin mhan rẹkpa ẹbho lẹn ebezẹle nọn da yi emhin kpataki nin ele rẹ ha ga iJehova, yẹ re obọ ọbhi ugbẹloghe nọnsọle. Ọnan rẹman ghe, mhan ki dọnmhegbe ha rẹkpa ele nin ele da sabọ ha re obọ rẹkhan emhin nin ele luẹ. Sẹyẹ, mhan ki rẹkpa ele nin ele da sabọ re egbe guẹ nin Jehova, yẹ mianmẹn. Ọne uwedẹ nan ọkpa ele ha da sabọ miuhọnmhọn bhi ukpẹdẹ ọsi Jehova.—1 Pet. 3:21.

15. Eria nela ọ bha khẹke nin mhan ria ẹghe a ha man ele iBaibo? Bezẹle?

¹⁵ Beji mhan ka tẹmhọnlẹn, obhi ẹghe khere ki kẹre nin ọne agbọn nan rẹ kpẹn. Bhiriọ, mhan ida ha ria ẹghe a rẹ man ẹbho iBaibo sade ele bha muegbe rẹ fidenọ. (1 Cor. 9:26) Iwẹnna nan ha re ẹjẹje lu khọnan! Ẹbho ne bunbun sẹyẹ ribhọ nin mhan ha tẹmhọn Agbejele man ọkuẹsẹ ẹghe fo.

16. Beji Revelation 18:2, 4, 5, 8 tale, emhin nela ọkhẹke nin mhan rebhe lu? (Sẹyẹ fẹ ebi a gbẹn bhi otọle ghe.)

¹⁶ Tie Revelation 18:2, 4, 5, 8. Ene ulọnlẹn nan tẹmhọn emhin ọbhebhe nin Jehova guanọ bhi obọ ẹbho ne ga ọle. Ọkhẹke nin Kristiẹn rebhe ne abọ sibhi oga ohoghe rebhe re sẹsẹsẹ. Asabọmiẹn ọria nin mhan man ọle iBaibo ka ha yo otuẹ ohoghe ọkuẹsẹ ọle munhẹn ha luẹ ẹmhọanta nọn ribhi Baibo. Sẹyẹ, asabọmiẹn ọle wo ha mhọn obọ bhi emhanmhan rebhe ọsi ọne otuẹ. La ọle wo ha re igho rẹ re iyobọ nin ọne otuẹ. Ọkuẹsẹ a re obọ ọbhọ nin ọria nọn sẹ iriọ ha deba mhan bhi itẹmhọn Osẹnobulua, ọkhẹke nin ọle zobọ bhi ilọnmhọn otuẹ rebhe nin ọle rẹ ha lu. Ọle ki gbẹn ilẹta ji ọne otuẹ ghe, ọle iyẹ yi ọkpa bhi ẹwẹ ele. Ọ yẹ khẹke nin ọle zobọ bhi otu kẹkẹ nin ọle rẹ deba ne diẹn mun oga ohoghe. *

17. Iwẹnna nela ọkhẹke nin Ọsali Jehova rẹban? Bezẹle?

¹⁷ Ọ bha khẹke nin Ọsali Jehova re obọ ọbhi iwẹnna nọn diẹn mun oga ohoghe. (2 Cor. 6:14-17) Bhi ọsi ijiẹmhin, ọle ida bu otuẹ nin ele re iwẹnna nanlẹn. Sẹyẹ, Ọsali Jehova nọn wẹnna nin ọria, ida zegbere rẹ lu udede iwẹnna bhi uwa oga nan da ga oga ohoghe. Ahamiẹn iwẹnna obọ nọnsọle ọle lu, ọle ida khu ọbhọ nan mun iwẹnna nanlẹn nọn diẹn mun oga ohoghe. Bezẹle nin mhan da re inian situa bhi ọne ẹmhọn nan? Ranmhude mhan bha guanọ nin mhan ha mhọn obọ bhi ilọnmhọn bi olukhọ ọsi otuẹ ohoghe soso.—Isa. 52:11. *

18. Be obhio mhan ọkpa rẹ re obọ rẹkhan adia nọn ribhi Baibo yẹ bhi iwẹnna nọnsọle?

 ¹⁸ Bhi ikpe eso ne gbera, ọria da tie obhio mhan ọkpa nin ọwanlẹn bhi agbotu, nọn mhọn iwẹnna obọ nọnsọle, nin ọle dọ lu obhi iwẹnna ikapẹnta khere bhi otuẹ. Ọne ọria lẹnmhin ghe ọne obhio mhan nan ida ka lu iwẹnna bhi otuẹ. Ọkpakinọn, ọne ẹghe nan nian, ọle da wo manman ha guanọ ọria nọn ha lu ọne iwẹnna. Ọrẹyiriọ, ranmhude adia nọn ribhi Baibo, ọne obhio mhan bha ka dọ lu ọne iwẹnna. Uzana nọn rẹkhan ọlẹn, newspaper ọkpa bhi ọne agbaẹbho da re ifoto ọsi okpea nọn khan ikrọs bhi ọne otuẹ man. Sade ọne obhio mhan yomhin nọn, foto nọnsọle ha rẹ dagbare bhi ọne newspaper. Ria ẹmhọn okan nin ọnan ha rẹ si ji ọle! Sẹyẹ riale ebi ọ ha rẹ dia iJehova bhi egbe yẹ.

19-20. (a) Be imhan sẹ luẹ bhi ọne uhọnmhọn-ọta nan? (b) Inọnta nela mhan ha sẹyẹ re ewanniẹn ọi?

¹⁹ Akhasẹ bhi Baibo nọn ki sẹ ọle bhi egbe rẹ munsẹ nian hi, nin ene gbẹloghe rẹ ha wewe ẹmhọn ọfure bi ugbega. Ranmhude ebi mhan luẹ bhi obọ iJehova, mhan lẹnmhin ghe ene gbẹloghe ida sabọ mun ọfure ọsaje re. Bhi ọsi ẹmhọanta, ene gbẹloghe ha munhẹn ha wewe ẹmhọn ọfure bi ugbega, ugbekhuelo ki wo re ẹjẹje ha sunu bhi ọne otọ nan. Bhiriọ, be imhan ha re ọne ẹghe nọn kẹre nan lu ọkuẹsẹ ene emhin nan munhẹn ha sunu? Jehova guanọ nin mhan ha tẹmhọn Agbejele nọnsọle man ẹbho. Ọle yẹ guanọ nin mhan rẹkpa ẹbho kiẹn edibo nesi Jesu. Ọ yẹ khẹke nin mhan ne abọ sibhi ilọnmhọn oga ohoghe rebhe re. Uwedẹ nin mhan ha rẹ lu ọnan hi, mhan ki sibhi oga ohoghe rebhe re sẹsẹsẹ. Sẹyẹ, mhan ida ha lu iwẹnna nin oga ohoghe soso.

²⁰ Emhin eso yẹ ribhọ ne ha sunu bhi ọkpẹnlẹn ọsi ẹghe ọkike ọsi ọne agbọn nan. Emhin ebhebhe yẹ ribhọ nin Jehova guanọ bhi obọ mhan. Be bhọ ene emhin nan? Be imhan ha rẹ muegbe khẹ ẹghe odalo yẹ? Mhan dẹ zilo nyan ene inọnta nan bhi uhọnmhọn-ọta nọn ki sẹ ọle egbe.