ẸBHO ne fẹ otọ emhin ghe ha daghe ghe efi fi vade bhi agbaẹbho, ele ki re ẹjẹje sekha nin ẹbho ne nyẹnlẹn bhi enin ranmhude ẹmhọn ene ẹbho rẹtẹ ele.

Iriọ yẹ nọn rẹji Jehova. Ọle wo sekha nin ẹbho ẹlẹnan ranmhude emhin nọn de vade bhi ẹghe odalo. Ọne emhin nọn de vade nan dẹ khọ gbera emhin nin ele sẹ ka miẹn khẹ. Be iJehova rẹ sekha nin ẹbho yẹ? Be rẹ mhan rẹọbhọ ghe, Jehova re ẹghe nin ẹbho rẹ fidenọ sade ọle sekha nin ele? Nin mhan rẹ wanniẹn ene inọnta nan, bha ji mhan zilo nyan uwedẹ nin Jehova rẹ sekha nin ẹbho eso bhi ẹghe nọn gbera.

Bhi ẹghe ẹdẹlẹ, Jehova sekha nin ẹbho ne ha gbobọra uhi nesọle ghe, ọle dẹ vae dọ bhohiẹn nọnsele. (Prov. 10:25; Jer. 30:23) Jehova da sekha nin ele yẹ re ẹghe nọn tanlẹn nin ele rẹ fidenọ. (2 Ki. 17:12-15; Neh. 9:29, 30) Eguọnmhandia nesọle ọle noo rẹ wewe isekha nesọle man ẹbho. Ele ki yẹ ha rẹkpa ẹbho lẹn ghe ẹjẹje ọkhẹke nin ele rẹ fidenọ.—Amos 3:7.

Ọkpa bhi ene eguọnmhandia nan hi Noah. Ẹbho ne imhẹn wo nẹga ọle. Bhi ẹkẹ ikpe ne bunbun, ọle da wo re izebhudu ha sekha man ele ghe okpamẹn dẹ vae dọ fuẹn ele rebhe a. (Gen. 6:9-13, 17) Ọle yẹ ha taman ele ebe khẹke nin ele lu nin ele da miuhọnmhọn. Ọnan zẹle nin Baibo da tiọle ọnọn ha “wewe ẹmhọn ikhiakhiale.”—2 Pet. 2:5.

Arẹmiẹn Noah wo dọnmhegbe bhi ọne ẹsọn nan, ene ẹbho bha re ehọ ọbhi ọne uhọnmhunje. Ele da wo rẹman ghe ele imhọn urẹọbhọ hiehie. Bhiriọ, ele rebhe da yuno ẹghe nin ọne okpamẹn rẹ rọ. (Matt. 24:39; Heb. 11:7) Beji ọne ugbekhuelo rẹ ha sire, ele ida sabọ yọle ghe Osẹnobulua bha re ẹghe nin ele.

Bhi ijiẹmhin ọbhebhe, ọ bha sẹ bue gbe nin Osẹnobulua sekha nin ẹbho, ibhohiẹn nọnsọle da munhẹn ha sẹ ele egbe. Ọrẹyiriọ, ẹghe nin Osẹnobulua re nin ele dẹ sẹ nin ele rẹ fidenọ. Bha ji mhan tẹmhọn oya nin Osẹnobulua re nin ibhokhan Egypt. Osẹnobulua wo ha sekha nin ibhokhan Egypt ẹghe nin ele rẹ ha miẹn oya igbe nin Ọle re nin ele. Bhi ọsi ijiẹmhin, ọkuẹsẹ Osẹnobulua noo esha rẹ re oya nọnzi ihinlọn nin ele, ọle da je iMoses bi Aarọn bu iPharaoh, nin ele dọ sekha nanlẹn bi eguọmhandia nesọle. Mhan dẹ be sabọ yọle ghe, Osẹnobulua bha re ẹghe nọn sẹle nin ele ranmhude ukpẹdẹ nọn rẹkhan ọlẹn ọne esha rẹ de? Baibo taman mhan ghe, eguọmhandia nesi Pharaoh, ne mun ofẹn iJehova da tuabe koko igbọn bi elanmhẹn nọnsele nabhi uwa. Ọkpakinọn, ene bha ghe ọta nọnsi Osẹnobulua bii emhin soso da sẹyẹ zẹ igbọn bi elanmhẹn nọnsele obọ bhi ole. (Ex. 9:18-21) Ọ wo khiakhia bhi ẹlo ghe, ẹghe nọn sẹle, ọle Osẹnobulua re nin ele. Ọnan zẹle nin ene re ẹjẹje lu emhin nọn khẹke bha da le oya sẹ bii ene bha re ehọ ọbhi ọne isekha.

Jehova wo sẹyẹ sekha nin Pharaoh bi eguọmhandia nesi Pharaoh ọkuẹsẹ ọle re iloya nọnzi igbe nin ele. Ọkpakinọn, ele bha re ehọ Ọle bhọ. (Ex. 4:22, 23) Ranmhude ọnan, imọn ọdiọn nesele rebhe da yuno. Ọnan da wo ba bhi egbe a! (Ex. 11:4-10; 12:29) Ẹghe wo ha re ele bhọ rẹ lu rẹkhan uhọnmhunje nọnsi Osẹnobulua. Ọne ẹghe nan Moses yẹ re tuabe sekha nin ibhokhan Izrẹl, yẹ taman ele ebi ele ha lu rẹ gbega azagba-uwa nọnsele. (Ex. 12:21-28) Eka ẹbho re ehọ ọbhi ọne isekha nan? Beji ẹbho eso ne fẹ otọ emhin ghe tale, ibhokhan Izrẹl ne bun sẹbhi ẹbo ea, ele re ehọ ọbhọ. Rẹ deba ọnan, ẹbho ne bunbun ne iyi ibhokhan Izrẹl da yẹ re ehọ ọbhọ. Bhiriọ, ọne oya nan bha sẹ ele egbe.—Ex. 12:38; ftn.

 Beji ene ijiẹmhin nan rẹman, Jehova ha sekha nin ẹbho, ọle ki re ẹghe nọn ha sẹ ele rẹ fidenọ nin ele. (Deut. 32:4) Bezẹle nin Osẹnobulua da lu iriọ? Peter nin odibo da tale ghe, Osẹnobulua “iguanọ nin ọria soso fuẹn an, ọle guanọ nin ọrebhe fidenọ.” (2 Pet. 3:9) Ẹmhọn ẹbho manman rẹtẹ Osẹnobulua. Bhiriọ, ọle guanọ nin ele miẹn adia nọnsọle ọbhi egbe yẹ fidenọ ọkuẹsẹ ibhohiẹn nọnsọle sotọ.—Isa. 48:17, 18; Rom. 2:4.

Ẹlẹnan nian yẹ, ọ yẹ khẹke nin ẹbho re ehọ ọbhi isekha nan wewe nẹga. Ẹghe nin Jesu rẹ ha ribhi ọne otọ nan, Jesu da tale ghe ọne agbọn nan dẹ fuẹn an ẹghe “ekpokpo nọn khua” nọn vade. (Matt. 24:21) Ọle da ta emhin ne bunbun ne ha sabọ sunu ji iKristiẹn sade ẹghe ekpokpo nọn khua sire. Ene emhin nin Jesu tale ghe e dẹ ha sunu bhi ọne otọ agbọn nan wo gene sunu ẹlẹnan.—Matt. 24:3-12; Luke 21:10-13.

Beji ene ọta akhasẹ nọnsi Jesu rẹ ha munsẹ ẹlẹnan, Jehova wo sekha nin ẹbho ghe, nin ele vae dọ ha ga ọle yẹ hẹnmhọn nanlẹn. Ọle guanọ nin ẹbho ne hẹnmhọn nanlẹn sọnyẹnmhẹn bhi iẹnlẹn nian bi bhi agbọn ọsọgbọn nin ọle mun vade. (2 Pet. 3:13) Jehova guanọ nin ọle rẹkpa ẹbho ha mhọn urẹọbhọ da ive nesọle. Uhọnmhunje ọsi Agbejele nọnsọle, ọle rẹ rẹkpa ele. Jesu tale ghe a dẹ wewe ọne uhọnmhunje nan na bhi ọne otọ agbọn nan rebhe. (Matt. 24:14) Ẹlẹnan nian, Osẹnobulua rẹkpa ẹbho nesọle wewe ọne uhọnmhunje nan na bhi agbaẹbho ne bun sẹbhi 240. Jehova guanọ nin ẹbho ne bunbun họn ọne uhọnmhunje nan, nin ele da sabọ miuhọnmhọn bhi ibhohiẹn nin ọle mun vade.—Zeph. 1:14, 15; 2:2, 3. 

Ọ bha khẹke nin mhan ha kpokpo egbe si Jehova dẹ re ẹghe nọn sẹle nin ẹbho rẹ lu rẹkhan uhi nesọle. Beji mhan sẹ dọ luẹ kere, ẹghe nọn sẹle ọle wo re nin ẹbho. Bhiriọ, inọnta nọn ki ribhi otọ hi: Ẹbho dẹ be re ehọ bhi uhọnmhunje nọnsi Osẹnobulua beji ele sẹyẹ mhọn ẹghe? Bha ji mhan dọnmhegbe rẹkpa ẹbho ne bunbun nin ele da sabọ miuhọnmhọn bhi ọkpẹnlẹn ọsi ọne agbọn nan.