1-2. Beji mhan miẹn tie bhi 1 Timothy 6:20, emhin nọn ghanlẹn nela a mun nin Timothy?

ẸGHESO, mhan ne emhin ne ghanlẹn nesẹmhan nin ẹbho nin ele ne mhan ne ya. Bhi ọsi ijiẹmhin, mhan ne igho nesẹmhan diọ bhi aza nin ene wẹnna bhi enin ne mhan ne ya. Mhan mun ọkhọle ọbhọ ghe ene ẹbho nan dẹ gbẹloghe igho nọnsẹmhan nọnsẹn nọn hẹi yulu a. Ranmhude ọnan, mhan lẹn ebi a re ọle ta nan rẹ re emhin nọn ghanlẹn nin ọria re ya.

² Tie 1 Timothy 6:20. Paul da taman iTimothy ghe a mun emhin nọn ghanlẹn ọle bhi obọ. Ọne emhin nọn ghanlẹn hi ilẹnmhin nọnsi Osẹnobulua, bọsi, iho nọnsọle rẹji mhan nin eria. Isẹhoa nin Timothy ha mhọnlẹn rẹ ha tẹmhọn Osẹnobulua man ẹbho, da yẹ wo ha yi emhin nọn ghanlẹn nan mun ọle bhi obọ. (2 Tim. 4:2, 5) Paul da taman iTimothy nin ọle gbega emhin nan mun ọle bhi obọ. Ẹlẹnan nian, a yẹ wo mun emhin nọn ghanlẹn mhan bhi obọ beji a rẹ mun nin Timothy. Be bhọ ene emhin nan? Bezẹle nọn da khẹke nin mhan gbega emhin ne ghanlẹn nin Jehova mun mhan bhi obo?

3-4. Bezẹle nin ẹmhọanta ne ribhi Baibo da yi emhin ne ghanlẹn?

³ Jehova wo rẹkpa mhan lẹn otọ ẹmhọanta ne ribhi Baibo. Emhin ne ghanlẹn ene ẹmhọanta nan khin ranmhude ele dẹ rẹkpa mhan rẹ deba iJehova ha mhọn ikolu nọn ziẹnlẹn. Ele dẹ yẹ rẹkpa mhan lẹn ebi mhan ha rẹ miẹn eghọnghọn ọsaje yẹ bhi iẹnlẹn. Mhan ha miẹn ene ẹmhọanta nan ọbhi egbe yẹ ha re obọ rẹkhan ele bhi iẹnlẹn, mhan ida yẹ ha yi igbọn rẹji iman-emhin ohoghe bi iẹnlẹn esankan.—1 Cor. 6:9-11.

⁴ Emhin ọbhebhe nọn zẹle nin ẹmhọanta ne ribhi Baibo  da yi emhin ne ghanlẹn hi, ẹbho ne mhọn idegbere, ele ọkpa iJehova man ene ẹmhọanta nan. (Acts 13:48) Ene ẹbho nan ne mhọn idegbere, hẹnmhọn nin Otu Nọn Sun Oga nin Jehova noo rẹ re ebale oriọn nin ẹbho nesọle ẹlẹnan. (Matt. 11:25; 24:45) Mhan ida sabọ tobọmhan luẹ ene ẹmhọanta nan. Sẹyẹ, emhin soso iribhọ nọn ghan sẹ bii ele.—Prov. 3:13, 15.

5. Iwẹnna nela Jehova mun nin mhan?

⁵ Jehova yẹ re ọne isẹhoa nin mhan rẹ dọ ha man ẹbho ẹmhọanta rẹji ọle bi iho nesọle. (Matt. 24:14) Emhin soso iribhọ nin mhan ha sabọ rẹ khọkhọ uhọnmhunje nin mhan wewe man ẹbho, ranmhude, ọ dẹ sabọ rẹkpa ele rẹ dọ deba azagba-uwa nọnsi Jehova yẹ miẹn iẹnlẹn ọsi ighegheghe. (1 Tim. 4:16) Iwẹnna nọn lu uhọnmhọn emhin nẹ ẹlẹnan nian, ọle mhan deba lu aharẹmiẹn ẹghe nọn tanlẹn la ẹghe nọn khere mhan miẹn rẹ deba tẹmhọn Osẹnobulua man ẹbho. (1 Tim. 2:3, 4) Ekpẹn nọn khua ọ khin rẹji mhan rẹ ha deba Osẹnobulua wẹnna!—1 Cor. 3:9.

6. Be sunu ji ẹbho eso ne bha gbega ọkhọle nọnsele?

⁶ Ibo iTimothy eso ne ha yi Kristiẹn bha ha re ẹlo nọn ghanlẹn rẹ ghe isẹhoa nin ele mhọnlẹn nin ele rẹ deba Osẹnobulua ha wẹnna. Ranmhude iDemas hoẹmhọn otiti ne ribhi ọne agbọn nan, ọle da zobọ bhọ rẹ ha deba iPaul lu iwẹnna oga. (2 Tim. 4:10) Phygelus bi Hermogenes da zobọ bhi iwẹnna oga, ranmhude, ofẹn da ha mun ele ghe ele dẹ le oya beji Paul rẹ le oya bhi obọ eghian ọlẹn. (2 Tim. 1:15) Hymenaeus, Alexander, bi Philetus da ha re ehọ ọbhi ọta ọsi ẹbho ne de sibhi oga re. Bhiriọ, ele da yẹ de bhi oga. (1 Tim. 1:19, 20; 2 Tim. 2:16-18) Ene ẹbho nan rebhe ka hoẹmhọn iJehova. Sokpan, ranmhude ele bha yẹ ha re ẹlo nọn ghanlẹn rẹ ghe isẹhoa nin Osẹnobulua rẹ nin ele, ele bha yẹ deziẹn bhi oga nọnsẹn.

7. Emhin nela Esu noo nin ọle rẹ si mhan sibhi oga nọnsi Jehova re?

⁷ Ẹlẹnan nian, Esu wo noo emhin kẹkẹ nin ọle rẹ denọ mhan ọkhọle sibhi isẹhoa nin Jehova mun nin mhan re. Bhi ọsi ijiẹmhin, ọle dọnmhegbe rẹ noo emhin nan rẹman bhi intanẹt, TV, bi radio rẹ si mhan ọbhọ nin mhan hẹi yẹ hoẹmhọn iJehova. Ọle yẹ dọnmhegbe rẹ noo ezuọzuọ bi ekpokpo rẹ gbe ofẹn mhan bhi ẹkẹ nin mhan hẹi yẹ tẹmhọn Osẹnobulua. Sẹyẹ, ọle guanọ nin mhan ha re ehọ ọbhi ọta ọsi ẹbho ne de bhi oga, nin mhan da yẹ de bhi oga.—1 Tim. 6:20, 21.

8. Be uwẹ miẹn luẹ bhi ijiẹmhin ọsi obhio mhan nin Daniel?

⁸ Ahamiẹn mhan bha gbẹlokotọ, mhan ida lẹn ẹghe nin mhan ha rẹ ha wẹghẹ bhi oga. Bha ji mhan re ebe sunu ji obhio mhan natiọle  iDaniel * rẹ lu ijiẹmhin. Ọ wo manman yẹẹ ọle rẹ ha gbe ividio gemu. Ọle da yọle: “Ikpe igbe mẹn ha ye ẹghe nin mẹn rẹ munhẹn ha gbe ividio gemu. Bhi ọsi ọhẹnhẹn, gemu nin okhẹnan iye mẹn wo ha gbe. Sokpan, khere khere, mẹn da munhẹn ha gbe igemu nan da gbugbe bi ọne a da lu ilọnmhọn iduna.” Akizẹbue, ọle da ha noo uri-agogo 15 bhi uri-ẹdẹ rẹ gbe ividio gamu. Ọle da yẹ yọle: “Bhi ọkhọle nọnsẹmhẹn, mẹn lẹn sẹbhọ ghe, unan igemu nin mẹn gbe bi ẹghe nin mẹn re bhi otọ rẹ gbe ọle, si mẹn sibhi ibo nọnsi Jehova re. Ọkpakinọn, mẹn da ha taman egbe mẹn ghe adia ne ribhi Baibo bha rẹtẹ mẹn.” Ọne ijiẹmhin nan man mhan le ghe, emhin nin mhan rẹ re egbe re ahoho dẹ sabọ si mhan sibhi oga re. Ahamiẹn emhin nọn sẹ inian sunu ji mhan, emhin ne ghanlẹn nin Jehova mun nin mhan sabọ rẹ yulu mhan.

9. Be iPaul re iTimothy khọkhọ bhi 1 Timothy 1:18, 19?

⁹ Tie 1 Timothy 1:18, 19. Paul da re iTimothy khọkhọ ọyokhọnlẹn. Ọle da taman ọlẹn ghe nin ọle ha khọn okhọnlẹn nọnsẹn. Ọne okhọn nin Paul tẹmhọnlẹn iyi okhọnlẹn ọsi ọkhọnkhan, sokpan, ọsi oriọn nọn. Be iKristiẹn rẹ diabe eyokhọnlẹn yẹ? Ikpẹ nela ọkhẹke nin mhan ha mhọnlẹn bọsi eyọkhọnlẹn nesi Jesu? Bha ji mhan zilo nyan emhin isẹn nin mhan ha sabọ miẹn luẹ bhi ijiẹmhin nin Paul tẹmhọnlẹn. Ele dẹ rẹkpa mhan rẹ mun oga ẹmhọanta mhọn nọnsẹn.

10. Bezẹle nọn da khẹke nin mhan ha sun rẹkhan Osẹnobulua?

¹⁰ Ha sun rẹkhan Osẹnobulua. Ọyokhọnlẹn sun rẹkhan ebeanlẹn ọlẹn. Ọle muegbe rẹ re egbe rebhe rẹ khọn nin ọria nin ọle hoẹmhọnlẹn, la gbega emhin ne ghanlẹn nesọle. Paul da taman iTimothy nin ọle dọnmhegbe rẹ ha sun rẹkhan Osẹnobulua. (1 Tim. 4:7) Ahamiẹn mhan mhọn oyẹẹ nọn dinmhin da Osẹnobulua, yẹ sun rẹkhan ọlẹn, mhan ki manman muegbe rẹ mun oga nọnsọle mhọn nọnsẹn.—1 Tim. 4:8-10; 6:6.

11. Bezẹle nọn da khẹke nin mhan ha mun egbe mhan ọbhi ibẹẹ?

¹¹ Ha mun egbe ọbhi ibẹẹ. Ọkhẹke nin ọyokhọnlẹn ha sasa egbe ẹghe rebhe rẹ muegbe okhọnlẹn. Ranmhude iTimothy re obọ rẹkhan adia nin Paul nin odibo re nanlẹn, ọle da sabọ khọn iria-eria ne imhẹn miotọ. Sẹyẹ, ọle da sabọ ha mhọn ikpẹ ne mhẹn, yẹ deba ẹbho ne ga Osẹnobulua lu ọmọẹ. (2 Tim. 2:22) Ranmhude iTimothy mun egbe ọle ọbhi ibẹẹ, ọle zẹle nin ọle da sabọ lu iriọ. Ọ yẹ khẹke nin mhan ha mun egbe mhan ọbhi ibẹẹ nin mhan da sabọ rẹban ilọnmhọn ne imhẹn. (Rom. 7:21-25) Sẹyẹ, ọkhẹke nin mhan ha mun egbe mhan ọbhi ibẹẹ nin mhan da sabọ fi iẹnlẹn nọnsẹmhan denọ yẹ ha mhọn ikpẹ esili. (Eph. 4:22, 24) Ẹgheso, egbe sabọ rẹ lọ mhan ranmhude iwẹnna nin mhan lu bhi ukpẹdẹ. Ahamiẹn ọnan sunu bhi ukpẹdẹ nan rẹ yo ikolo oga, ọkhẹke nin mhan sẹyẹ dọnmhegbe rẹ yo ọne ikolo oga.—Heb. 10:24, 25.

12. Be imhan ha lu yẹ nin mhan da sabọ ha man ẹbho iBaibo nọnsẹn?

¹² Beji ọyokhọnlẹn rẹ noo emhin okhọnlẹn rẹ sasa egbe ẹghe rebhe rẹ muegbe khẹ okhọnlẹn, iriọ ọ yẹ rẹ khẹke nin mhan ha luẹ uwedẹ kẹkẹ nan rẹ man ẹbho iBaibo. (2 Tim. 2:15) Mhan dẹ sabọ luẹ ene uwedẹ nan bhi ikolo oga. Ahamiẹn ghe mhan guanọ nin mhan sabọ ha noo iBaibo nọnsẹn, ọkhẹke nin mhan ha mhọn emhanmhan nin mhan rẹ tobọmhan luẹ iBaibo ẹghe-ẹghe. Ọta nọnsi Osẹnobulua dẹ sabọ ziẹn urẹọbhọ nọnsẹmhan. Nin ọnan rẹ sabọ sunu, mhan  ida wo gheghe ha tie iBaibo. Ọ yẹ khẹke nin mhan ha ria eria nyan ebi mhan tiele yẹ guanọ otọ ọle bhi ebe kẹkẹ nin agbotu gbẹn. Bhiriọ, mhan ki sabọ lẹn otọ ẹmhọanta ne ribhi Baibo yẹ ha re obọ rẹkhan adia ne ribhọ. (1 Tim. 4:13-15) Mhan ha lu enan ọkpa mhan ha da sabọ ha noo iBaibo nọnsẹn rẹ man ẹbho emhin. Ahamiẹn mhan man ẹbho iBaibo, mhan ida wo gheghe ha tie ọle man ele. Ọkhẹke nin mhan rẹkpa ele lẹn otọ iBaibo nin mhan tie man ele yẹ rẹkpa ele lẹn ebi ele ha rẹ re obọ rẹkhan ọlẹn yẹ bhi iẹnlẹn. Ahamiẹn mhan tobọmhan luẹ iBaibo ẹghe-ẹghe, mhan ki sabọ ha man ẹbho iBaibo nọnsẹn.—2 Tim. 3:16, 17.

13. Beji Hebrews 5:14 rẹman, bezẹle nọn da khẹke nin mhan ha noo ẹwanlẹn?

¹³ Ha noo ẹwanlẹn. Ọkhẹke nin ọyokhọnlẹn ha ria ẹmhọn ikuan-egbe nin ọle ha sabọ miẹn bhi uwedẹ yẹ mhanmhan ebi ọle ha rẹ khọn ọlẹn miotọ yẹ. Iriọ ọ yẹ khẹke nin mhan ha lu. (Prov. 22:3; tie Hebrews 5:14.) Bhi ọsi ijiẹmhin, ọkhẹke nin mhan ha noo ẹwanlẹn rẹ zẹ ebi mhan rẹ re egbe re ahoho. Ẹlẹnan nian, emhin esankan, ọle a kẹ rẹman bhi TV bi vidio. Mhan lẹnmhin ghe, iregbe re ahoho ne dia iriọ iyẹẹ iJehova. Bhiriọ, ọkhẹke nin mhan rẹban ele, ranmhude, ele dẹ sabọ si ikuan-egbe ji mhan yẹ riia ikolu nin mhan bi Jehova ko mhọnlẹn an.—Eph. 5:5, 6.

14. Be rẹkpa obhio mhan nin Daniel?

¹⁴ Daniel nin mhan ka tẹmhọnlẹn ki daghe ghe ividio gemu nan da rẹman emhin ugbele bi iduna nin ọle ghe si ikuan-egbe ji ọle, ọle da guanọ otọ ọne ẹmhọn fẹghe bhi Watchtower Library. Ebi ọle tiele bhọ da wo rẹkpa ọle. Ọle da zobọ bhọ rẹ ha gbe ene igemu. Ọle da yẹ rẹban ibo ọle bhi ẹkẹ intanẹt nin ele rẹ ko ha gbe ene igemu. Daniel da yọle: “Mẹn iyẹ gbe ividio gemu. Imọẹ mẹn bhi ẹkẹ agbotu mẹn ki deba khiẹnlẹn.” Ọwanlẹn bhi agbotu bi ọkanẹfan ọsi ẹghe rebhe Daniel ki khin nian.

15. Bezẹle nọn bha da khẹke nin mhan rẹọbhi ọta ohoghe nin ẹbho ne de sibhi oga re gha nẹga?

¹⁵ Bii Timothy, ọkhẹke nin mhan mhọn ẹwanlẹn bhi ọta ohoghe nin ẹbho ne de sibhi oga re gha nẹga. (1 Tim. 4:1, 7; 2 Tim. 2:16) Ene ẹbho nan noo ene ọta ohoghe rẹ riia mhan ọkhọle a beji a da miẹn ghe, mhan ida yẹ ha gba ẹkẹ ibhio mhan la agbotu nin Jehova noo. Ọta ohoghe ne sẹ inian sabọ rẹ wẹghe  urẹọbhọ nọnsẹmhan a. Bhiriọ, ọ bha khẹke nin mhan ha rẹọbhi ene ohoghe nan! Bezẹle? Ranmhude eria ne mhọn ọkhọle nọn fidọn, nin ẹmhọanta iyẹẹ, ele gha ene ọta ohoghe nẹga. Ele lu ọnan, nin ele rẹ si igbugan bi edandan re bhi ẹwẹ mhan. (1 Tim. 6:4, 5) Ele guanọ nin mhan rẹọbhi ene ọta ohoghe nan beji a da miẹn ghe mhan ida yẹ ha gba ẹkẹ ibhio mhan nin mhan ko ga.

16. Emhin nela ha sabọ denọ mhan ẹlo sibhi iwẹnna oga re?

¹⁶ Denọ ẹlo ọbhi ilọnmhọn oga. Beji a miẹn ọyokhọnlẹn nọnsi Jesu Timothy khin, ọle bha ji ẹfe bi ua ọsi ọne agbọn nan da denọ ọle ẹlo sibhi iwẹnna oga re. (2 Tim. 2:3, 4) Bii Timothy, bha ji mhan dọnmhegbe nin ẹmhọn ẹfe ọsi ọne agbọn hẹi sa mhan bhi ẹlo. Ranmhude, ọria a ha khu ọbhi ẹfe, oyẹẹ nin ọle mhọn da iJehova bi Ọta nọnsọle ki ha wẹghẹ a. Sẹyẹ, ọne ọria ida yẹ ha mhọn ọhubhudu rẹ ha lu iwẹnna itẹmhọn Osẹnobulua. (Matt. 13:22) Ọkhẹke nin mhan rebhe de obọ re bhi iẹnlẹn, yẹ ha noo ahu bi ẹghe nọnsẹmhan rẹ khu ọbhi ẹmhọn Agbejele.—Matt. 6:22-25, 33.

17-18. Be imhan ha rẹ sabọ gbega ikolu nin mhan bi Jehova ko mhọnlẹn yẹ?

¹⁷ Re ẹjẹje lu ebe khẹke. Ọyokhọnlẹn mhanmhan ebi ọle ha lu yẹ rẹ gbega egbe sade okhọnlẹn vae. Iriọ ọ yẹ khẹke nin mhan ha lu. Ahamiẹn mhan mhanmhan ebi mhan ha lu yẹ sade mhan miẹn ọkakale, mhan ki sabọ re ẹjẹje gbega emhin ne ghanlẹn nin Jehova mun mhan bhi obọ.

¹⁸ Bhi ọsi ẹmhọanta, ọkhẹke nin mhan lẹn ebi mhan ha jẹje lu yẹ sade mhan wo re osukpa daghe ifoto la ividio ne re ilọnmhọn oghẹ man, ugbele, la ọta ohoghe nin ẹbho ne de sibhi oga re gha nẹga. Ahamiẹn mhan muegbe ọbhi otọ ọkuẹsẹ ene emhin nan sunu, mhan ki sabọ rẹban okhẹnan nan miẹn bhọ. Sẹyẹ, mhan ki ha yi eria ne khiale bhi ẹlo nọnsi Jehova.—Ps. 101:3; 1 Tim. 4:12.

19. Erọnmhọn nela mhan ha miẹn sade mhan gbega emhin ne ghanlẹn nin Jehova mun mhan bhi obọ?

¹⁹ Ọkhẹke nin mhan gbega emhin nin Jehova mun mhan bhi obọ. Ene emhin nan hi, ẹmhọanta nin mhan luẹle bhi Baibo bi isẹhoa nin mhan mhọn rẹ man ẹbho ene ẹmhọanta. Mhan ha lu inian, mhan ki ha mhọn ọkhọle nọn khiale. Mhan ki yẹ ha nyẹnlẹn iẹnlẹn esili. Sẹyẹ, mhan ki miẹn eghọnghọn nọn nabhọre sade a rẹkpa ẹbho lẹn iJehova. Jehova dẹ re ahu nin mhan rẹ sabọ gbega emhin ne ghanlẹn nin ọle mun mhan bhi obọ.—1 Tim. 6:12, 19.