Ẹmhọn Ọsi Ene Tẹmhọn Agbejele

Iẹnlẹn Nọnsọle Da Dọ Kiọnlẹn

JESU yọle ghe ọle lẹn ihuan nesọle. (John 10:14) Ahamiẹn ọria mhọn ọkhọle esili, ọle yẹ hoẹmhọn ọfure bi ikhiakhiale, Jehova ki si ọle nin ọle dọ kiẹn odibo nọnsi Jesu. Ọria nọn sẹ inian ki dọ miẹn iẹnlẹn nọn mhẹn beji okhuo ọkpa nọn na bhi Belgium vae rẹ miẹn ọlẹn. Okha nọnsọle khọnan:

“Ẹghe nin egbe iẹnlẹn rẹ wo lọ mẹn, nin mẹn rẹ wo ha guanọ nin mẹn gbe egbe mẹn an, ọle Esali Jehova rẹ dọ so obọ bhi odẹ nọnsẹmhẹn. Ẹmhọn nin ele rẹman mẹn bhi Baibo rẹji ebi Osẹnobulua ha rẹ re ọkpẹnlẹn ọbhi ọkakale kẹkẹ ne vuọn ọne agbọn nan da wo ti mẹn bhọ. Ọkpakinọn ọ bha rẹ mẹn ghọnghọn rẹ lẹn ghe Osẹnobulua re otọ nin emhin ebe da ha sunu. Ọ sẹ ikpe elẹnlẹn nin mẹn zobọ bhọ rẹ ha yo otuẹ ranmhude mẹn he emhin ne bha gba ne sunu bhi enin. Sokpan, mẹn da dọ kere ghe ẹmhọanta iman-emhin ọsi Esali Jehova khin. Bhi ọsi ẹmhọanta, mhan nin eria ida sabọ nyẹnlẹn nọnsẹn sade Osẹnobulua bha dia mhan.

“Akizẹbue, imẹn bha yẹ miẹn ene ibhokhan Esali Jehova. Egbe iẹnlẹn da wo lọ mẹn. Mẹn da ha sin ebe sẹbhi pakẹti ọsi siga eva bhi ukpẹdẹ, mẹn bhọ da yẹ munhẹn ha le ikhumhun ne imhẹn. Ranmhude imẹn guanọ nin imẹn ne aba imẹn nin odede nọn yu talọ, imẹn da dọ ne obọ ọbhi ilọnmhọn ikpẹbo. Ranmhude ọnan, ẹlinmhin ebe da ha kpokpo imẹn ọsasọn. Ọnan da wo re ofẹn ha mun mẹn. Ọnan sunu na bhi ẹkẹ uki ne bunbun. Ọsasọn-ọsasọn, ofẹn ki ha mun imẹn nin imẹn ọkpa rẹ nowẹ.

“Ẹdẹ ọkpa beji imẹn ha khian nẹga, mẹn da na uwedẹ nin mẹn bha sẹ ka na khẹ, mẹn da sẹbhi eji ẹbho da ha bọn udede uwa. Ebho ne bunbun da ha wẹnna bhi enin. Mẹn ki sikẹ enin, mẹn da kere ghe Esali Jehova ele khin, Kindọn họọ nọnsele ele bọn. Ọnan da rẹ mẹn yere ẹghe nin ene Esali Jehova rẹ dọ ha man imẹn Baibo bhi uwa. Mẹn da yẹ ria emhọn ebi ọ ha rẹ wo dia yẹ sade ọrebhe bhi ọne agbọn nan wo nyẹn beji ele rẹ nyẹnlẹn.

“Ọ ha wo rẹ yẹẹ mẹn sade ele vae kie dọ ha man imẹn Baibo, bhiriọ mẹn da nin eso bhi ene Esali Jehova ne ha wẹnna bhi enin zilo. Mẹn da nan erọnmhọn ji Osẹnobulua, ikpẹdẹ igbe ki gbera, ọne okpea nọn ka ha man imẹn Baibo da re obọ so odẹ nọnsẹmhẹn. Ọle da yọle nin mhan kie munhẹn ha luẹ Baibo, mẹn da rẹọbhọ nin mhan rẹ munhẹn. Sẹyẹ ọle da tie mẹn vae bhi ikolo oga. Mẹn da gene yo. Ebi mẹn miẹn bhi enin da wo manman ti mẹn bhọ! Ọ rele nin mẹn mhọn da guanọ nin mẹn miẹn ẹbho ne mhọn ahoẹmhọn-egbe bi eghọghọn. Mẹn da gene dọ miẹn ele!

“Rẹ na bhi ẹghenin ha khian, mẹn da wo ha yo ikolo oga rebhe. Uzana ea ki gbera, mẹn da zobọ bhi iciga nan sin. Mẹn da muno ebe bi kasẹti ne diẹn mun ikpẹbo kua. Mẹn da dọ kere ghe ẹlinmhin ne imhẹn bha yẹ ha mhọn ahu bhi egbe mẹn. Mẹn da fi iẹnlẹn nọnsẹmhẹn denọ, yẹ munhẹn ha re obọ rẹkhan adia ne ribhi Baibo. Uki ea ki gbera, mẹn da munhẹn ha tẹmhọn Osẹnobulua. Uki ehan ki gbera, imẹn da mianmẹn. Ọ ki ribhi ikpẹdẹ eva nin imẹn mianmẹn, mẹn da munhẹn ha lu iwẹnna ọkanẹfan ọsi uki eso.

“Mẹn khuẹnmhin Jehova bhi emhin esili rebhe nin ọle lu nin imẹn. Iẹnlẹn nọnsẹmhẹn ki wo kiọnlẹn nian. Gene-gene, udede ugue ọle elin nọnsi Jehova khin, ọle mẹn da miẹn ugbega. (Proverbs 18:10) Beji ọ dia ọnọn gbẹn Psalm 84:10 bhi egbe, iriọ ọ yẹ dia imẹn bhi egbe. Ọle da gbẹn yọle ghe, ukpẹdẹ ọkpa bhi uwa oga nọnsẹ mhẹn gbera ikpẹdẹ uli bhi ijebhebhe! Mẹn zẹle nin imẹn rẹ mundia bhi unuro ọsi uwa nọnsi Osẹnobulua nọnsẹmhẹn, nin imẹn rẹ ha khian nẹga bhi ibọkpọ ọsi eria ne imhẹn.”

Ọne okhuo nan nọn ha mhọn ẹkẹ-omẹnhiẹn da dọ ha mhọn iẹnlẹn nọn kiọnlẹn. Iriọ ọ da yẹ ha khin rẹji ọria nọn hi ki rẹ khin nọn re ẹkẹ-ata rẹ guanọ Jehova.