1. Be iJehova re nin ọdeọde bhi ẹkẹ agbotu?

JEHOVA re ihe kẹkẹ nin ene ga ọle bhi ẹkẹ agbotu ranmhude ọle hoẹmhọn ele. Arẹmiẹn ghe iwẹnna kẹkẹ mhan lu bhi ẹkẹ agbotu, mhan rebhe sẹyẹ ghan bhi ẹlo nọnsi Jehova. Bhiriọ, ọkhẹke nin mhan ha mun ekpẹn nin egbe. Be iPaul nin odibo rẹ rẹkpa mhan rẹ lẹn ọnan?

2. Beji Ephesians 4:16 rẹman, bezẹle nọn da khẹke nin mhan ha wẹnna kugbe yẹ mun ekpẹn nin egbe?

² Beji a gbẹn ọbhi ọne iBaibo nin ọne uhọnmhọn-ọta nan diẹn mun, Paul nin odibo da rẹkpa mhan lẹn ghe, mhan ida sabọ taman obhio mhan yọle: “Mẹn bha miẹn ebi mẹn re ẹ lu.” (1 Cor. 12:21) Ahamiẹn mhan guanọ nin ọfure ha ribhi ẹkẹ agbotu, ọkhẹke nin mhan ha mun ekpẹn nin egbe, yẹ wẹnna kugbe. (Tie Ephesians 4:16.) Ahamiẹn mhan wẹnna kugbe bhi ọfure, oyẹẹ ki ha ribhi ẹkẹ agbotu. Sẹyẹ, ọne agbotu ki ha tuẹn okhun.

3. Be imhan ha zilo nyan bhi ọne uhọnmhọn-ọta nan?

³ Bhi ọne uhọnmhọn-ọta nan, mhan dẹ zilo nyan uwedẹ ea nin mhan ha rẹ sabọ ha re ekpẹn ne ibhio mhan lu emhin bhi ẹkẹ agbotu. Ọhẹnhẹn, mhan dẹ zilo nyan ebi ene ewanlẹn ha rẹ ha re ekpẹn ne egbe lu emhin yẹ. Ọzeva, mhan ki zilo nyan ebi mhan ha rẹ rẹman yẹ ghe, ibhio mhan ne bha sẹ bọ ọdọ la re okhuo ghan bhi ẹlo nọnsẹmhan. Ọzea, mhan ki luẹ ebi mhan ha rẹ ha re oyẹẹ man ẹbho ne isabọ zẹ urolo nọnsẹmhan nọnsẹn.

4. Adia nela Paul gbẹn ọbhi Romans 12:10 nọn khẹke nin ene ewanlẹn ha re obọ rẹkhan?

⁴ Ẹlinmhin nọn khiale nọnsi Jehova, ọle a rẹ zẹ ene ewanlẹn bhi ẹkẹ agbotu. Ọrẹyiriọ, ọdeọde bhi ẹwẹ ele mhọn ebi ele sabọ lu kẹkẹ. (1 Cor. 12:​17, 18) Asabọmiẹn ghe a wo la re eso kiẹn ewanlẹn bhi ẹkẹ agbotu. Bhiriọ, ele isẹ manman mhọn ilẹnmhin bọsi ene ewanlẹn nekẹle. Sẹyẹ, eso iyẹ manman sabọ lu iwẹnna oga, ranmhude idọmanlẹn la emianmhẹn. Ọrẹyiriọ, ọ bha khẹke nin ọwanlẹn soso bhi ẹkẹ agbotu ha riale ghe, ọwanlẹn ribhọ nọn imhọn ebi a ha sabọ re ọle lu. Bhiriọ, ọkhẹke nin ewanlẹn rebhe ha re obọ rẹkhan adia nọn ribhi Romans 12:10.​—Tie ọle.

5. Be ene ewanlẹn ha rẹ sabọ rẹman yẹ ghe, ele mun ekpẹn nin ene ewanlẹn nekẹle bhi ẹkẹ agbotu? Bezẹle nọn da khẹke nin ele ha lu iriọ?

⁵ Ene ewanlẹn dẹ rẹman ghe ele mun ekpẹn nin egbe sade ele ka egbe ehọ. Ọnan wo manman khẹke sade ele do ikolo nin ele rẹ zilo nyan ẹmhọn eso ne khẹke agbotu. Bezẹle? Ranmhude ebi a gbẹn ọbhi ebe Ọkhẹughe ọsi October 1, 1988. Ọne ebe da yọle ghe, ahamiẹn ene ewanlẹn do ikolo, ọkhẹke nin ele lẹn sẹbhọ ghe, Jesu dẹ sabọ noo ẹlinmhin nọn khiale rẹ rẹkpa ọnọn hi ki rẹ khin bhi ẹwẹ ele. Bhiriọ, ọne ọria ki sabọ noo iBaibo rẹ zẹ adia egbe dagbare nọn ha sabọ rẹkpa bhi ọne ẹmhọn nin ele zilo nyan. (Acts 15:​6-15) Ẹlinmhin nọn khiale wo rẹkpa ene ewanlẹn rebhe bhi ẹkẹ agbotu, ọ iyi ọkpa bhi ẹwẹ ele ọkpa.

6. Be ene ewanlẹn ha rẹ sabọ ha wẹnna kugbe yẹ? Elele nela agbotu ha miẹn bhọ sade ele lu iriọ?

⁶ Ọwanlẹn nọn mun ekpẹn nin ene ewanlẹn nekẹle ida wo ha guanọ nin ọle ka ha talọ ẹghe rebhe sade ele do ikolo. Sẹyẹ, ọle ida wo mun ọne ọta dẹ, la nin ọle ha riale ghe ebi ọle ta ẹghe rebhe wo gba. Ọkpakinọn, ọle ki re idegbere rẹ ta ebi ọle ria ọne ẹmhọn yẹ. Sẹyẹ, ọle ki fẹkẹ gbehọkotọ ha kaehọ sade ene ewanlẹn nekẹle talọ ọbhi ọne ẹmhọn. Ọnọn ki lu uhọnmhọn ẹmhin nẹ hi, ọle muegbe rẹ noo iBaibo yẹ lu rẹkhan adia nin “ọguọmhandia nọn mhọn ẹwanlẹn nan gba-ẹkẹ ọle” zẹ ọle egbe dagbare. (Matt. 24:​45-47) Ahamiẹn ghe  ene ewanlẹn mun ekpẹn nin egbe yẹ re oyẹẹ man sade ele zilo nyan ẹmhọn ne rẹtẹ agbotu, ẹlinmhin nọn khiale ki rẹkpa ele lẹn ebi ele ha khian ọne ẹmhọn yẹ nin ele da sabọ bọn agbotu okhun.​—Jas. 3:​17, 18.

7. Ẹlo nela Jesu rẹ ha ghe ẹbho ne bha bọ ọdọ la re okhuo?

⁷ Bhi ẹkẹ agbotu nọnsẹmhan, eria ne bọ ọdọ la re okhuo, bi azagba-uwa kẹkẹ, ele ribhọ. Sẹyẹ, ibhio mhan ne bha sẹ bọ ọdọ la re okhuo wo ribhọ. Ẹlo nela ọkhẹke nin mhan rẹ ha ghe ene ibhio mhan nan ne bha sẹ bọ ọdọ la re okhuo? Ọkhẹke nin mhan ha ghe ele beji Jesu rẹ ghe ele. Ẹghe nin Jesu rẹ ha ribhi ọne otọ nan, ọle bha re okhuo. Ọle da wo re ẹghe bi ahu nọnsọle rebhe rẹ ha lu iwẹnna nin Aba ọle mun nanlẹn. Ẹghe iribhọ nin Jesu rẹ yọle ghe oko nọn nin ọria rẹ bọ ọdọ la re okhuo. Ọle bha yẹ yọle ghe oko nọn nin ọria hẹi lu iriọ. Sokpan ọle da yọle ghe, Kristiẹn eso dẹ tobele zẹ ghe ele ida bọ ọdọ la re okhuo. (Matt. 19:​11, 12) Jesu wo ha mun ekpẹn nin ẹbho ne bha bọ ọdọ la re okhuo. Ọle bha ha re ẹlo gbe ele a. Ọle bha ha riale ghe ene bọ ọdọ la re okhuo mhẹn gbera ele.

8. Ibhude nela Paul re nin Kristiẹn bhi 1 Corinthians 7:​7-9?

⁸ Bii Jesu, Paul nin odibo bha re okhuo ẹghe nin ọle rẹ ha lu iwẹnna oga. Paul bha ha tale ghe emhin ọbe nọn sade Kristiẹn bọ ọdọ la re okhuo. Ọle lẹnmhin ghe ọdeọde hi ọnọn ha tobọle zẹ bhi ọne ẹmhọn nan. Ọkpakinọn, ọle da re ibhude nin Kristiẹn ghe, ọ dẹ ha yi emhin nọn mhẹn sade ele zẹ ghe ele ida bọ ọdọ la re okhuo ranmhude oga nọnsi Jehova. (Tie 1 Corinthians 7:​7-9.) Paul bha ha re ẹlo gbe iKristiẹn ne bha bọ ọdọ la re okhuo a. Ọle bhọ da re ọlasẹre nọn bha sẹ re okhuo ọbhi ihe nọn khua bhi oga nọnsi Jehova. Timothy * hi elin ọsi ọne ọlasẹre. (Phil. 2:​19-22) Bhiriọ, ọ iyi si ọria re okhuo la si ọle bha re okhuo ọkpa ọkhẹke nan ha ghe, ọkuẹsẹ a re ọle ọbhi ihe bhi ẹkẹ agbotu.​—1 Cor. 7:​32-35, 38.

9. Be ebe Ọkhẹughe ọsi October 1, 2012 tale rẹji eria ne bọ ọdọ la re okhuo, bi ene bha sẹ lu iriọ?

⁹ Jesu bi Paul nin odibo bha tale ghe oko nọn nin Kristiẹn rẹ bọ ọdọ la re okhuo, la nin ele hẹi lu iriọ. Bhiriọ, ẹlo nela ọkhẹke nin mhan rẹ ha ghe eria ne bọ ọdọ la re okhuo, bi ene bha sẹ lu iriọ? Ebe Ọkhẹughe ọsi October 1, 2012 da yọle: “Gene gene, ẹsele nọn na bhi obọ iJehova vae nọn, nin ọria rẹ bọ ọdọ la re okhuo, bi nin ọria  rẹ zẹ ghe ọle ida bọ ọdọ la re okhuo. . . . Jehova bha yọle ghe, ẹkhọle nọn sade ọria bha sẹ bọ ọdọ la re okhuo.” Bhiriọ, mhan dẹ ha mun ekpẹn nin ibhio mhan ne bha sẹ bọ ọdọ la re okhuo. Mhan ida ha zọn ele.

10. Be imhan ha rẹ rẹman yẹ ghe mhan mun ekpẹn nin ibhio mhan ne bha sẹ bọ ọdọ la re okhuo?

¹⁰ Be imhan ha rẹ rẹman yẹ ghe mhan mun ekpẹn nin ibhio mhan ne bha sẹ bọ ọdọ la re okhuo bhi idia nin ele ye? Ọkhẹke nin mhan ha mhọnlẹn bhi ọkhọle ghe, eso bhi ẹwẹ ene ibhio mhan nan tobọle zẹ ghe, ele isẹ da bọ ọdọ la re okhuo. Ọkpakinọn, arẹmiẹn eso guanọ nin ele bọ ọdọ la re okhuo, ele bha sẹ lu iriọ ranmhude ele bha sẹ miẹn ọria nọn yẹẹ ele. Sẹyẹ, eso ribhọ nin okhuo ele la ọdọ ele yu. Ebi ọ hi ki rẹ dia yẹ, ọ bha khẹke nin ene ribhi agbotu ha nọọn ọria nọn bha sẹ bọ ọdọ la re okhuo ebezẹle ele bha sẹ lu iriọ, la si ele guanọ nin ele rẹkpa ele guanọ ọria. Ọ iyi emhin ọbe sade ọria yọle nan rẹkpa ọle guanọ ọria. Sokpan, ọ dẹ sabọ ha yi emhin nọn ha ba ele bhi egbe, sade mhan wo tobọmhan dọ ha nọọn ele si mhan rẹkpa ele guanọ ọria. (1 Thess. 4:11; 1 Tim. 5:13) Bha ji mhan zilo nyan ebi ibhio mhan eso ne bha sẹ bọ ọdọ la re okhuo tale rẹji ọne ẹmhọn nan.

11-12. Emhin nela mhan ha lu ne ha sabọ re egbe lọ ibhio mhan ne bha sẹ bọ ọdọ la re okhuo?

¹¹ Ọfẹotughe ọkpa nọn bha sẹ re okhuo, nọn yẹ manman sasa bhi iwẹnna oga nin ọle lu da yọle ghe, elele ne bunbun ribhọ sade ọria bha sẹ bọ ọdọ la re okhuo. Ọle da yẹ yọle ghe, ọ wo re egbe lọ ọle sade ibhio mhan nọọn ọlẹn yọle: “Bezẹle nin uwẹ bha sẹ da re okhuo?” Obhio mhan ọbhebhe nọn bha sẹ re okhuo, nọn ga bhi Bẹtẹ da yọle: “Uwedẹ nin ibhio mhan eso rẹ lu emhin ki re imẹn ha riale ghe, ọkhẹke nan ha tohan ẹbho ne bha sẹ re okhuo la bọ ọdọ. Ọnan ki re ọria ha riale ghe, ọbalọ ọria nọn bha sẹ bọ ọdọ la re okhuo ye. Bhiriọ, ele iyẹ da ha ghe ọne idia nan bii ẹsele.”

¹² Obhio mhan nin okhuo nọn ga bhi Bẹtẹ da yọle: “Ibhio mhan eso ki ha riale ghe, ọrebhe ne bha sẹ bọ ọdọ la re okhuo ha sẹbhi eji a da re egbe re ahoho, ọdọ nin ele ha bọ la okhuo nin ele ha re ele guanọ sẹbhi enin. Ele ki ha riale ghe, ọrebhe ne bha sẹ bọ ọdọ la re okhuo wo guanọ eria nin ele ha bọ la nin ele ha re. Ẹghe nin Bẹtẹ nin mẹn da ga rẹ je mẹn diọ bhi agbaẹbho ọbhebhe nin mẹn dọ lu iwẹnna eso bhi enin, ukpẹdẹ nin ele re do ikolo oga mẹn rẹ sẹbhi enin. Obhio mhan nin okhuo nin mẹn ne dia da taman mẹn ghe, ibhio mhan nin ikpea eva nin mhan ko yi otu ribhi agbotu nọnsele. Arẹmiẹn ọle taman mẹn ghe, ọ iyi ghe ọle guanọ ọdọ nin mẹn, mhan ki sẹbhi Kindọn Họọ, ọle da si mẹn ha khian eji ene ibhio mhan nin ikpea eva ye. Ọnan da wo re ẹkhọle lo mhan an.”

13. Emhin nela re izebhudu nin obhio mhan nin okhuo ọkpa nọn bha sẹ bọ ọdọ?

¹³ Obhio mhan ọbhebhe nin okhuo nọn bha sẹ bọ ọdọ, nọn yẹ ga bhi Bẹtẹ da yọle: “Mẹn lẹn ibhio mhan nin ikhuo eso ne ki wanre, ne bha sẹ bọ ọdọ. Ele wo deziẹn nọnsẹn bhi oga, yẹ wo re eghọnghọn rẹkpa bhi agbotu. Ele ikiẹ egbe ghe ele imhọn ọdọ. Sẹyẹ, ele iriale ghe ele mhẹn gbera eria ne bọ ọdọ bi ene mhọn imọn.” Ọ wo yẹẹ mhan rẹ ha ribhi agbotu nin ọrebhe da re ẹlo nọn ghanlẹn rẹ ghe egbe, yẹ mun ekpẹn nin egbe. Bhi agbotu nọn sẹ iriọ, ene ibha ko ga ida wo gheghe a tohan uwẹ, ele ida ha mhọn ikhu da uwẹ, ele ida ha re ẹlo gbe uwẹ a, sẹyẹ, ele ida ha riale ghe uwẹ mhẹn gbera ele. Sokpan, uwẹ ki wo lẹn ghe, ele hoẹmhọn ẹn.

14. Be imhan ha rẹ rẹman yẹ ghe mhan mun ekpẹn nin ibhio mhan ne bha sẹ bọ ọdọ la re okhuo?

¹⁴ Ibhio mhan ne bha sẹ bọ ọdọ bi ene bha sẹ re okhuo dẹ ha ghọnghọn sade ikpẹ esili nin ele mhọn zẹle nin mhan da ghe ele bii eria ne ghanlẹn, ọ iyi ranmhude ele bha sẹ bọ ọdọ la ele bha sẹ re okhuo. Ọkhẹke nin mhan ha khuẹnmhẹn  ele ranmhude iwẹnna oga nin ele lu, ọ iyi nin mhan ha tohan ele. Bhiriọ, ele ida ha riale ghe mhan imhọn ebi mhan re ele lu bhi agbotu. (1 Cor. 12:21) Ele ki lẹn sẹbhọ ghe, mhan mun ekpẹn nin ele, ghe ọ ti mhan bhọ ghe ele ribhi agbotu nọnsẹmhan.

15. Uwedẹ nela ibhio mhan eso sẹ rẹ fi emhin denọ bhi iẹnlẹn nọnsele nin ele da sabọ lu ba eka nin ele lu bhi oga nọnsi Jehova?

¹⁵ Ẹlẹnan nian, ibhio mhan ne bunbun wo zegbere rẹ luẹ urolo ọgbọn nin ele da sabọ lu ba eka nin ele lu bhi iwẹnna oga. Nin ele da sabọ lu ọnan, ele fi emhin eso denọ bhi iẹnlẹn nọnsele. Bhi ọsi ijiẹmhin, ene ibhio mhan nan ha sibhi agbotu nan da zẹ urolo nọnsele re, ele ki diọ bhi agbotu nan da zẹ urolo ọbhebhe nin ele dọ rẹkpa ibhio mhan ne ribhi enin. (Acts 16:9) Ele tobele zegbere rẹ lu ọnan ranmhude ele guanọ nin ele lu ba eka nin ele lu bhi oga nọnsi Jehova. Arẹmiẹn ọ dẹ sabọ gbe ikpe ne bunbun ọkuẹsẹ ele sabọ ha zẹ ọne urolo ọgbọn nọnsẹn, ene ibhio mhan nan sẹyẹ sabọ rẹkpa ọne agbotu bhi uwedẹ ne bunbun. Ikpẹ esili nin ele rẹman, bi iwẹnna kẹkẹ nin ele lu bhi ẹkẹ agbotu sabọ ziẹn ibhio mhan ne ribhi ẹkẹ ọne agbotu. Ẹmhọn ene ibhio mhan nan ne zegbere rẹ rẹkpa wo manman ti mhan bhọ!

16. Be ene ewanlẹn fẹghe ọkuẹsẹ ele re ọria ọbhi ihe ọsi ọwanlẹn bhi agbotu la ọnọn zẹ sikẹ ene ewanlẹn?

¹⁶ Ọ bha khẹke nin ewanlẹn bhi agbotu tale ghe, obhio mhan nin okpea bha sẹ ọria nan ha re ọbhi ihe ọsi ọwanlẹn bhi agbotu, la ọnọn zẹ sikẹ ewanlẹn ranmhude ọle igheghe sabọ zẹ urolo nan noo bhi ọne agbotu nọnsẹn. Ebi Baibo yọle nan ha fẹghe ọkuẹsẹ a re ọria ọbhi ihe ọsi ọwanlẹn la ọnọn zẹ sikẹ ene ewanlẹn, ọle ewanlẹn bhi agbotu fẹghe ọkuẹsẹ ele re ọria ọbhi ihe, ọ iyi si ọne ọria sabọ zẹ ọne urolo nan noo bhi ọne agbotu la si ọle isabọ zẹ ọle.​—1 Tim. 3:​1-10, 12, 13; Titus 1:​5-9.

17. Inọnta nela ọkhẹke nin ene biẹ imọn zilo nyan sade ele diọ bhi agbaẹbho ọbhebhe?

¹⁷ Azagba-uwa eso kpanọ diọ bhi agbaẹbho ọbhebhe ranmhude ọnọghọ nọn ribhi agbaẹbho nọnsele, la nin ele dọ guanọ iwẹnna. Bhiriọ, imọn nesele sabọ rẹ ha yo isiku nan da noo urolo nan zẹ bhi ọne agbaẹbho. Sẹyẹ, asabọmiẹn ene biẹ ele dẹ luẹ ọne urolo nin ele da sabọ miẹn iwẹnna bhi ọne agbaẹbho. Ahakimiẹn agbotu ribhi enin nan da zẹ urolo nọnsele kii? Agbotu nọn zẹ urolo nela ọkhẹke nin ele deba, ọnọn noo urolo nan zẹ bhi ọne agbaẹbho la ọnọn zẹ urolo nọnsele?

18. Beji Galatians 6:5 rẹman, be imhan ha rẹ rẹman yẹ ghe mhan mun ekpẹn nin ọdafẹn-uwa bhi ebi ọle zẹ nin azagba-uwa nọnsọle?

¹⁸ Ọdafẹn-uwa, ọle ha tare agbotu nin azagba-uwa nọnsọle ha deba. Ọkuẹsẹ ọle lu iriọ, ọkhẹke nin ọle ria eria nyan ọnela azagba-uwa nọnsọle ha da manman miẹn elele. (Tie Galatians 6:5.) Ranmhude ọdeọde ha tobọle zẹ, ọ bha khẹke nin mhan ha talọ ọbhọ sade ọne odafẹn-uwa zẹ agbotu nin azagba-uwa nọnsọle ha deba. Bhiriọ, ebi ọle hi ki rẹ zẹ, bha  ji mhan miẹn ọne azagba-uwa ọbhi egbe yẹ ha re oyẹẹ ne ele lu emhin.​—Rom. 15:7.

19. Be ọkhẹke nin ọdafẹn-uwa bhii Jehova bhi erọnmhọn yẹ ria eria nyan?

¹⁹ Bhi obọ nọnkẹle, azagba-uwa eso sabọ rẹ ha ribhi agbotu nan da zẹ urolo nọnsele. Sokpan, asabọmiẹn imọn nesele isabọ zẹ ọne urolo nọnsẹn ranmhude urolo ọsi ọne agbaẹbho nin ele diọ, ọle ene imọn ki sabọ manman zẹ beji a miẹn ghe ọle ele noo bhi isiku bi eji ele da nyẹnlẹn. Bhiriọ, ọ ki ha nọghọ ele rẹ lẹn otọ ebi a tẹmhọn ọlẹn bhi ikolo oga nan da zẹ urolo nọnsele. Ranmhude ọnan, ele ida yẹ sabọ ha lu re alo bhi oga. Ahamiẹn azagba-uwa ribhi idia nọn sẹ inian, ọkhẹke nin ọne ọdafẹn-uwa nan erọnmhọn ji Jehova, yẹ ria eria nyan ebi ọle ha lu nin ọle da sabọ rẹkpa imọn nesọle sikẹ iJehova bi ene ga ọle. Ọle sabọ rẹ rẹkpa ene imọn guẹ ebi a rẹ zẹ urolo nọnsọle yẹ, la ọle ne ọne azagba-uwa rebhe ha khian agbotu nan da zẹ urolo nin ene imọn manman guẹ. Ebi ọne ọdafẹn-uwa hi ki rẹ zẹ, ọkhẹke nin agbotu nin ele ha diọ miẹn ele ọbhi egbe yẹ ha re ẹlo nọn ghanlẹn rẹ ghe ele.

20. Be imhan ha rẹ rẹman yẹ ghe mhan mun ekpẹn nin ibhio mhan ne luẹ urolo ọgbọn?

²⁰ Ranmhude ene idia nan rebhe nin mhan zilo nyan, agbotu ne bunbun sabọ ha mhọn ibhio mhan ne luẹ urolo nin ọne agbotu noo. Ọ sabọ ha nọghọ ele rẹ ta ebi ele mhọn bhi ọkhọle dagbare. Ọrẹyiriọ, ahamiẹn ọ iyi ebi ele guẹ urolo nọnsẹmhan sẹ mhan ghe, mhan ki sabọ ha daghe ebi oyẹẹ nin ele mhọn da iJehova ziẹn sẹ yẹ bi ọyaya nin ele rẹ ga ọle. Mhan ha daghe ebi ele rẹ re ikpẹ esili man yẹ, mhan ki manman ha mun ekpẹn nin ele yẹ re ẹlo nọn ghanlẹn rẹ ghe ele. Mhan ida ha re ẹlo gbe ele a ranmhude ele isabọ manman zẹ urolo nọnsẹmhan.

21-22. Mhan be mhọn ihe nin mhan ye bhi ẹkẹ agbotu nọnsi Jehova? Gbotọle fanọn an.

²¹ Mhan yi Jehova obulu nin ọle rẹ ne mhan ọbhi ihe kẹkẹ bhi agbotu nọnsọle. Aharẹmiẹn okpea la okhuo uwẹ khin, uwẹ bọ ọdọ la re okhuo fo la uwẹ bha sẹ lu iriọ, ọdọmanlẹn la ọlasẹre uwẹ khin, uwẹ manman sabọ zẹ urolo nan noo bhi agbotu nin uwẹ ye la uwẹ imanman guẹ rẹ zẹ ọle, lẹn sẹbhọ ghe uwẹ ghanmhin bhi ẹlo nọnsi Jehova bi agbotu nọnsọle!​—Rom. 12:​4, 5; Col. 3:​10, 11.

²² Bha ji mhan rebhe dọnmhegbe ha re obọ rẹkhan ebi mhan miẹn luẹ bhi ijiẹmhin nin Paul nin odibo tẹmhọnlẹn. Mhan ha lu iriọ, mhan ki dọ daghe ọle ghe, mhan mhọn ihe kpataki nin mhan ye bhi agbotu nọnsi Jehova. Sẹyẹ, mhan ki ha mhọn oyẹẹ da ibhio mhan yẹ re ẹlo nọn ghanlẹn rẹ ghe ele.