1. Bezẹle nin Jehova da man emhin?

ẸGHE ribhọ nin Jehova ọkpa rẹ ha nyẹnlẹn. Ọrẹyiriọ, ahiẹ bha hiẹ mun ọlẹn. Sade Jehova bha man emhin soso, ọle ha rẹ wo sabọ ha nyẹnlẹn khian. Ọrẹyiriọ, Jehova da ha guanọ nin emhin ebhebhe yẹ ha nyẹnlẹn yẹ ghọnghọn. Ranmhude oyẹẹ nin ọle mhọnlẹn, ọle da munhẹn ha man emhin.​—Ps. 36:9; 1 John 4:19.

2. Be ọ dia iJesu bi ẹhi nekẹle bhi egbe yẹ ẹghe nin Jehova rẹ man emhin?

² Emhin ọhẹnhẹn nin Jehova manlẹn hi Jesu Kristi. Ọle da noo iJesu rẹ man emhin rebhe rẹ sẹbhi ẹhi ne ribhi okhun. (Col. 1:16) Jesu wo ha ghọnghọn rẹ deba Aba ọle ha wẹnna. (Prov. 8:30) Ene ẹhi yẹ wo ha ghọnghọn. Bezẹle? Ranmhude, ẹlo ele sẹbhọ ebi Jehova rẹ man otọ bi okhun yẹ. Be ene ẹhi ki lu yẹ? Baibo da yọle ele da ha ghọnghọn yẹ gbabọ ẹghe nin Jehova rẹ man ọne otọ nan fo. Edandan iribhọ ghe ele sẹyẹ ha ghọnghọn ẹghe nin Jehova rẹ man emhin nekẹle rẹ sẹbhi mhan nin eria. (Job 38:7; Prov. 8:31) Emhin kẹkẹ nin Jehova manlẹn wo re oyẹẹ bi ẹwanlẹn nọnsọle man.​—Ps. 104:24; Rom. 1:20.

3. Beji 1 Corinthians 15:​21, 22 rẹman, be izọese ọsi Jesu ha sabọ lu nin mhan?

³ Ebi Jehova ha guanọ hi, nin mhan nin eria nyẹnlẹn bhi otọ nọn mhọn-ose a nin ọle manlẹn bhi ighegheghe. Sokpan, ẹghe nin Adam bi Eve rẹ mhọn akan-ehọ da Osẹnobulua, ele bha yẹ sabọ ha nyẹnlẹn bhi ighegheghe. Ọnan da yẹ wo rẹso imọn nin ele biẹ. (Rom. 5:12) Be iJehova ki lu yẹ? Bhi ọsi ẹjẹje, ọle da  tẹmhọn ebi ọle ha rẹ miẹn mhan nin eria fan yẹ. Jehova da mhanmhanlẹn ghe Ọmọn nọnsọle dẹ dọ yu beji a da miẹn ghe imọn nin Adam bi Eve ha biẹ ki miẹn umiẹnfan bhi obọ olukhọ bi uu. Sẹyẹ, ọle ki yẹ re iẹnlẹn ọsi ighegheghe nin ọrebhe ne zẹle nin ele rẹ ga ọle.​—John 3:16; Rom. 6:23; tie 1 Corinthians 15:​21, 22.

4. Inọnta nela mhan ha zilo nyan bhi ọne uhọnmhọn-ọta nan?

⁴ Inọnta ne bunbun ribhọ nin mhan ha sabọ ha nọọn rẹji ẹmhọn ariọkpanọ bhi uu nin Jehova vele. Be ariọkpanọ bhi uu ha rẹ sunu yẹ? Mhan dẹ be sabọ lẹn ẹbho nesẹmhan sade a riọ ele kpanọ bhi uu? Uwedẹ nela ariọkpanọ bhi uu ha rẹ re mhan ha ghọnghọn? Bezẹle nin oyẹẹ, ẹwanlẹn, bi iziẹngbe nọnsi Jehova ha da kie ha ti mhan bhọ sade mhan ria eria nyan ẹmhọn ariọkpanọ bhi uu? Bha ji mhan re ewanniẹn ọbhi ene inọnta nan.

5. Bezẹle nin mhan ha da sabọ yọle ghe ọ iyi osukpa Jehova ha wo rẹ riọ ẹbho rebhe kpanọ bhi uu?

⁵ Ẹghe nin Jehova ha rẹ noo iJesu rẹ riọ ẹbho kpanọ bhi uu, mhan dẹ sabọ yọle ọ iyi osukpa ọle ha rẹ riọ ọrebhe kpanọ. Bezẹle nin mhan da ta iriọ? Ranmhude, ahamiẹn Jehova wo re osukpa riọ ẹbho rebhe kpanọ bhi uu, ije rebhe ki wo zughu a. Sokpan, mhan lẹnmhin ghe, Osẹnobulua nọn lu emhin rẹkhan emhanmhan, ọle iJehova khin. Ọle lẹnmhin ghe, mhan ha lu emhin rẹkhan emhanmhan, ọle mhan ha da sabọ ha nyẹnlẹn bhi ọfure. (1 Cor. 14:33) Jehova bi Jesu bha wo re osukpa man ọne otọ nan, khere khere ẹle rẹ man ọlẹn nin mhan nin eria da sabọ nyẹnlẹn bhọ. Ẹwanlẹn bi iziẹngbe nọnsi Jehova zẹle nin ọle da sabọ lu ọnan. Jesu dẹ yẹ re ẹwanlẹn bi iziẹngbe man ẹghe nin ọle ha rẹ re ukpe uli rẹ gbẹloghe ọne otọ nan. Bhi ọne ẹghe nin, ọle bi  ẹbho ne ha miuhọnmhọn bhi Armageddon dẹ ko wẹnna kugbe hẹnhẹn ọne otọ nan khẹ ẹbho ne ha riọ kpanọ bhi uu.

6. Beji Acts 24:15 rẹman, eria nela ha deba ene iJehova ha riọ kpanọ bhi uu?

⁶ Iwẹnna nọn lu uhọnmhọn emhin nẹ nin ene miuhọnmhọn bhi Armageddon ha lu, ọle hi nin ele rẹ man ene ha riọ kpanọ bhi uu ẹmhọn Agbejele nọnsi Osẹnobulua bi uwedẹ nin Jehova guanọ nin mhan rẹ ha nyẹnlẹn. Bezẹle? Ranmhude eria ne bunbun ne ha riọ kpanọ dẹ deba usun nin Baibo tiọle ene bha khia. (Tie Acts 24:15.) Ahamiẹn ene eria nan guanọ nin ele miẹn elele bhi uyumhin nọnsi Jesu, ọkhẹke nin ele fi emhin ne bunbun denọ bhi iẹnlẹn nọnsele. Udede ẹsọn nọn nan rẹ man ene eria nan ẹmhọn iJehova ranmhude ele bha ka lẹn ọlẹn khẹ. Ọdeọde bhi ẹwẹ ele dẹ be ha mhọn ọria nọn ha man ele emhin beji mhan rẹ man ẹbho iBaibo ẹlẹnan? A dẹ be ne ele ọbhi agbotu kẹkẹ beji a ha da man ele emhin bhi enin, nin ele da yẹ sabọ deba man ẹbho nekẹle ne ha yẹ riọ kpanọ emhin? Mhan bha lẹn. Mhan dẹ mundia khẹ ẹghe nin. Ọkpakinọn, mhan lẹn sẹbhọ ghe, ukpe uli nin Jesu ha rẹ gbẹloghe ha ki fo, ẹbho rebhe ne ribhi ọne otọ nan ki ha mhọn ilẹnmhin nọnsi Jehova. (Isa. 11:9) Bhi ọne ukpe uli nin Jesu ha rẹ gbẹloghe, mhan dẹ wo ha miẹn iwẹnna ne bunbun ha lu yẹ sọnyẹnmhẹn.

7. Bezẹle nin ẹbho nesi Jehova ha da re ẹkẹ ẹjẹjẹ ha rẹkpa ẹbho ne ha riọ kpanọ bhi uu?

⁷ Bhi ukpe uli nin Jesu ha rẹ ha gbẹloghe, ẹbho nesi Jehova rebhe dẹ sẹ yẹ ha fi iẹnlẹn nọnsele denọ nin ele da sabọ ha lu ebe ti Jehova bhọ. Ele rebhe dẹ re ẹkẹ ẹjẹjẹ man, beji ele ha rẹ ha rẹkpa ene a riọ kpanọ bhi uu nin ele da sabọ sabọ khọn uwedẹ iẹnlẹn nọnsele nọn bha gba miotọ, yẹ ha lu iho nọnsi Jehova. (1 Pet. 3:8) Ẹbho nan riọ kpanọ bhi uu dẹ daghe ọle ghe, ẹbho nesi Jehova mhọn idegbere, ghe, ele yẹ fi iẹnlẹn nọnsele denọ nin ele da ha lu ebe ti Jehova bhọ. Bhiriọ, ọ ki ha ti ele bhọ rẹ deba ele ha ga iJehova.​—Phil. 2:12.

8. Bezẹle nin mhan ha da sabọ yọle ghe mhan dẹ sabọ lẹn ẹbho nesẹmhan sade a riọ ele kpanọ bhi uu?

⁸ Emhin ne bunbun ribhọ ne rẹ mhan rẹọbhọ ghe mhan dẹ sabọ lẹn ẹbho nesẹmhan sade a riọ ele kpanọ bhi uu. Bhi ọsi ijiẹmhin, beji ariọkpanọ ne ka sunu bhi ẹghe ẹdẹlẹ rẹman, asabọmiẹn Jehova dẹ kie man ẹbho ne yu, nin ele diabe beji ele ka dia, nin ele ha talọ beji ele ka rẹ talọ, yẹ ria eria beji ele ka rẹ ha ria eria ọkuẹsẹ ele yu. Yere ghe, Jesu re uu khọkhọ owe. Bhiriọ, ọle da yọle nan rẹ riọ ọria kpanọ bhi uu diabe nan rẹ riọ ọria bhi owe. (Matt. 9:​18, 24; John 11:​11-13) A ha riọ ọria bhi owe, ọle dẹ yẹ diabe ebi ọle ka dia khẹ, ọle dẹ yẹ ha talọ beji ọle ka rẹ talọ. Sẹyẹ, ọle dẹ yẹ sabọ ye emhin nin ọle lẹnlẹn re. Bha ji mhan fẹ ijiẹmhin ọsi Lazarus ghe. Egbe nọnsọle ki munhẹn ha wea ranmhude ọ ki sẹ ikpẹdẹ enẹn nin ọle yu. Ọrẹyiriọ, ẹghe nin Jesu rẹ riọ ọle kpanọ bhi uu, ibhio ọle da sẹyẹ sabọ lẹn ọlẹn. Ọle tobọle da sẹyẹ sabọ ye ele re.​—John 11:​38-44; 12:​1, 2.

9. Bezẹle nin mhan ha da sabọ yọle ghe ọ iyi egbe nọn gba fo eria ne yu ha rẹ riọ kpanọ bhi uu?

⁹ Jehova ve ive ghe ọria soso iribhọ nọn nyẹnlẹn bhi odotọ ugbẹloghe nọnsi Jesu nọn ha yọle ọle khọnmhọn. (Isa. 33:24; Rom. 6:7) Bhiriọ, egbe dẹ dan ọrebhe nan ha riọ kpanọ bhi uu. Ọkpakinọn, ọ iyi osukpa egbe ha rẹ wo gba nin ele. Ahamiẹn egbe nọn gba fo a rẹ riọ ele kpanọ bhi uu, ẹbho nesele ida yẹ sabọ lẹn ele. Asabọmiẹn khere khere, ọle egbe ha rẹ gba nin ọrebhe bhi ukpe uli nin Jesu ha rẹ gbẹloghe. Ọne ukpe uli nin Jesu ha rẹ gbẹloghe ha ki sotọ, ọle ki mun ọne ugbẹloghe nin Aba ọle. Bhi ọne ẹghe nin, ive rebhe nin Jehova vele ki  munsẹ rẹ sẹbhọ ghe, egbe ki gba nin ọrebhe.​—1 Cor. 15:​24-28; Rev. 20:​1-3.

10. Be ọ ha dia uwẹ bhi egbe yẹ sade uwẹ daghe ọria nin uwẹ hoẹmhọnlẹn riọ kpanọ bhi uu?

¹⁰ Be ọ ha dia uwẹ bhi egbe yẹ sade uwẹ daghe ọria nin uwẹ hoẹmhọnlẹn riọ kpanọ bhi uu? Uwẹ dẹ be ghọnghọn sẹ ọne uwẹ ha rẹ ha viẹ la ọne uwẹ ha rẹ ha jiẹ? Uwẹ dẹ be ghọnghọn sẹbhọ ghe uwẹ ki ha so illo rẹ gẹn iJehova? Ebi ọ hi ki rẹ dia mhan bhi egbe yẹ, mhan lẹn sẹbhọ ghe, ẹmhọn iJehova bi Jesu Kristi dẹ wo manman ha yẹẹ mhan ranmhude ele riọ ẹbho nesẹmhan kpanọ bhi uu.

11. Beji Jesu rẹman bhi John 5:​28, 29, elele nela eria ne re obọ rẹkhan uhi nọnsi Jehova ha miẹn?

¹¹ Eria ne ha riọ kpanọ bhi uu dẹ wo ha ghọnghọn beji ele ha rẹ wo ha fi uwedẹ iẹnlẹn nọnsele denọ nin ele da ha nyẹnlẹn bhi uwedẹ nọn yẹẹ iJehova. Ene ha gene re inian fi iẹnlẹn nọnsele denọ, ki miẹn iẹnlẹn ọsi ighegheghe bhi otọ ọfubhegbe. Ọkpakinọn, ene ha mhọn akan-ehọ da Osẹnobulua ki miẹn ugbekhuelo ọsi ighegheghe.​—Isa. 65:20; tie John 5:​28, 29.

12. Erọnmhọn nela Jehova ha nan nin ọrebhe ne da ha nyẹnlẹn bhi ọne otọ nan?

¹² Bhi odotọ ugbẹloghe nọnsi Jehova, ọta nọn ribhi Proverbs 10:22 ki munsẹ bhi egbe ẹbho nesọle. Enin yọle: “Erọnmhọn nin Jehova nan nin ọria, ọle re ọria fe. Ọle ine ọbalọ ba ọle.” Ẹlinmhin nọn khiale nọnsi Jehova dẹ rẹkpa ele rẹ kie manman ha re egbe khọkhọ iJesu Kristi. Egbe ki yẹ wo ha gba nin ele khere khere. (John 13:​15-17; Eph. 4:​23, 24) Egbe nọnsele ki yẹ wo ha danlan yẹ de ọbhọ ukpẹdẹ-ukpẹdẹ. Eghọnghọn dẹ wo vuọn ije rebhe bhi ọne ẹghe nin! (Job 33:25) Ọkpakinọn, elele nela uwẹ ha miẹn bhọ nian, sade uwẹ ria eria nyan ẹmhọn ariọkpanọ?

13. Beji Psalm 139:​1-4 rẹman, be ariọkpanọ bhi uu ha rẹ rẹman yẹ ghe Jehova manman lẹn mhan nọnsẹn?

¹³ Beji mhan ka zilo nyan, eria nin Jehova ha riọ kpanọ bhi uu dẹ sẹyẹ lẹn ebi ele lẹnlẹn, dẹ ha yi ene ele ka ha khin. Be ọnan rẹman? Ọ rẹman ghe, Jehova hoẹmhọn mhan sẹbhọ ghe ọle lẹn ebe ri mhan bhi ọkhọle, ebi emhin dia mhan yẹ bhi egbe, emhin nin mhan ta, bi ebi mhan lu. Bhiriọ, ọ dẹ lẹkhẹ nanlẹn rẹ riọ ọria nọn yu nin ọle ha yi ọria nin ọle ka khin khẹ. David nin Ojie lẹn sẹbhọ ghe, Jehova manman lẹn ọdeọde bhi ẹwẹ mhan. (Tie Psalm 139:​1-4.) Ọ ibe ti mhan bhọ rẹ lẹn ghe Jehova manman lẹn mhan nọnsẹn?

14. Bezẹle ofẹn ida yẹ ha mun mhan sade mhan ria eria nyan uwedẹ nin Jehova rẹ lẹn mhan nọnsẹn?

¹⁴ Mhan ha ria eria nyan uwedẹ nin Jehova rẹ lẹn mhan, mhan ida ji ofẹn ha mun mhan. Bezẹle? Yere ghe ẹmhọn mhan manman rẹtẹ ọle. Ọdeọde bhi ẹwẹ mhan manman ghan bhi ẹlo nọnsọle. Bhiriọ, ọle gbẹlokotọ daghe emhin kẹkẹ ne sunu bhi iẹnlẹn nọnsẹmhan ne zẹle mhan kiẹn eria nin mhan khin. Udede ikoudure ọnan khin rẹji mhan! Ukpẹdẹ ukpẹdẹ, Jehova ri mhan bhi ikeke nin ọle ha rẹkpa mhan. Bhiriọ, ọ bha khẹke nin mhan ha riale ghe mhan imhọn ọnọn rẹkpa mhan.​—2 Chron. 16:9.

15. Be emhanmhan nin Jehova mhọn ghe ọle dẹ riọ ẹbho kpanọ bhi uu rẹ rẹman yẹ ghe ọle mhọn ẹwanlẹn?

¹⁵ Ranmhude ofẹn uu nọn mun ẹbho, eghian ele dẹ sabọ sua ele ne ele lu emhin nin ele iguanọ nin ele lu nan hẹi gbe ele a. Ẹbho ne ribhi ibo nọnsi Esu, noo ofẹn uu rẹ si ẹbho ọbhọ nin ele lu emhin nin ele lẹn ghe ọ bha gba. Ele yẹ noo ọle rẹ zagha ikolu a. Ọkpakinọn, ele ida noo ofẹn uu rẹ si mhan ọbhọ nin mhan lu emhin nọn bha gba ranmhude mhan lẹnmhin ghe, eghian mhan ha rẹ gbe mhan an, Jehova  dẹ riọ mhan kpanọ bhi uu. (Rev. 2:10) Mhan wo lẹn sẹbhọ ghe, emhin soso iribhọ nin ele ha lu nin ele ha rẹ sabọ si mhan sibhi ibo nọnsi Jehova re. (Rom. 8:​35-39) Ẹwanlẹn Jehova wo rẹman nin ọle rẹ re ikhuaẹloghe nin mhan ghe ọle dẹ riọ ẹbho kpanọ bhi uu. Ranmhude ọne ikhuaẹloghe nan, ofẹn imun mhan aharẹmiẹn ẹbho ne ribhi ibo ọsi Esu yọle ghe ele dẹ gbe mhan an sade mhan bha lu ebi ele tale. Sẹyẹ, ọne ikhuaẹloghe nan wo re izebhudu nin mhan rẹ sun rẹkhan iJehova.

16. Inọnta nela ọkhẹke nin uwẹ nọọn egbe uwẹ le? Be ewanniẹn rẹji ene inọnta nan ha rẹ rẹkpa uwẹ rẹ lẹn si uwẹ gene mun udu tẹ iJehova?

¹⁶ Ahamiẹn eghian iJehova yọle ele dẹ gbe uwẹ a ranmhude uwẹ bha lu ebi ele tale, uwẹ dẹ rẹọbhọ ghe Jehova dẹ riọ uwẹ kpanọ bhi uu? Be uwẹ ha rẹ lẹn yẹ si uwẹ dẹ sabọ mun udu nyan iJehova bhi idia nọn sẹ inian? Uwedẹ ọkpa nin uwẹ ha rẹ lẹn hi, uwẹ ki nọọn egbe uwẹ ene inọnta nan, ‘Emhin rebhe nin mẹn lu bhi ukpẹdẹ ukpẹdẹ, rẹ sẹbhi ene khere khere be rẹman ghe mẹn mun udu nyan iJehova?’ (Luke 16:10) ‘Uwedẹ iẹnlẹn nọnsẹmhẹn be rẹman ghe, mẹn rẹọbhọ ghe Jehova dẹ gbẹloghe mẹn ahamiẹn mẹn mun ẹmhọn Agbejele nọnsọle kalo?’ (Matt. 6:​31-33) Ahamiẹn ehe hi ewanniẹn nọnsẹ rẹji ene inọnta nin, ọ rẹman ghe uwẹ mun udu tẹ iJehova, ghe uwẹ dẹ sabọ ziẹngbe ọnọghọ nọn hi ki rẹ khin nin uwẹ ha miẹn bhi ẹghe odalo.​—Prov. 3:​5, 6.

17. (a) Be emhanmhan nin Jehova mhọnlẹn nin ọle rẹ riọ ẹbho kpanọ bhi uu rẹ rẹman yẹ ghe ọle mhọn iziẹngbe? (b) Be imhan ha rẹ rẹman yẹ ghe iziẹngbe nin Jehova rẹman ti mhan bhọ?

¹⁷ Jehova re ẹghe yi fo nin ọle ha rẹ dọ fuẹn ọne agbọn Esu nan an. (Matt. 24:36) Ranmhude iziẹngbe nin ọle mhọnlẹn, ọle dẹ mundia fo nin ọne ẹghe sẹ ọkuẹsẹ ọle dunmhun ọne agbọn Esu nan an. Arẹmiẹn ọ ghọn ọlẹn rẹ kẹ riọ ene yu kpanọ, ọle sẹyẹ re iziẹngbe mundia khẹ ọne ẹghe nin. (Job 14:​14, 15) Ẹghe nọn mhẹn nẹ ọle rẹ yi nin ọle rẹ riọ ẹbho kpanọ bhi uu. Ọle dẹ ziẹngbe sẹbhi ọne ẹghe nin. (John 5:28) Ọkhẹke nọn ha ti mhan bhọ ghe Jehova mhọn iziẹngbe. Bezẹle? Ranmhude iziẹngbe nọnsi Jehova, ẹbho ne bunbun, rẹ sẹbhi imhan tobọmhan da sabọ fidenọ dọ ha ga ọle. (2 Pet. 3:9) Jehova guanọ nin ẹbho ne bunbun sabọ miẹn iẹnlẹn ọsi ighegheghe. Be imhan ha rẹ rẹman yẹ ghe iziẹngbe nin Jehova rẹman ti mhan bhọ? Mhan dẹ rẹman ghe ọ ti mhan bhọ sade mhan dọnmhegbe rẹ guanọ ẹbho ne muegbe nin ele rẹ miẹn iẹnlẹn ọsi ighegheghe, nin mhan da rẹkpa ele hoẹmhọn iJehova yẹ ha ga ọle.  (Acts 13:48) Bhiriọ, ele ki deba mhan miẹn elele ranmhude iziẹngbe nọnsi Jehova.

18. Bezẹle nọn da khẹke nin mhan ha re iziẹngbe rẹ ne ẹbho lu emhin?

¹⁸ Jehova ha rẹ fuẹn ọne agbọn nan an fo, ọle dẹ sẹyẹ mhọn iziẹngbe nin ikpe uli nin Jesu ha rẹ gbẹloghe gba, ọkuẹsẹ eria kiẹn eria nin egbe gba nan. Ọkuẹsẹ ọne ẹghe nin, Jehova muegbe nin ọle rẹ ha rẹhunmhan olukhọ nesẹmhan. Ọkhẹke nin mhan re egbe khọkhọ iJehova. Bhiriọ, mhan ki ha ghe eji ẹbho da mhẹn yẹ re iziẹngbe ne ele lu emhin. Bha ji mhan zilo nyan ijiẹmhin ọsi obhio mhan ọkpa nin okhuo nin ọdọ ọle wo ha ria eria ne gbe ahu rẹ sẹbhọ ghe, ọle da zobọ bhi ikolo oga. Ọle da yọle: “Ọnan da wo manman ha ba mẹn bhi egbe. Emhanmhan nesẹmhan rebhe da wo zughu a.” Bhi ẹkẹ enan rebhe, ọne obhio mhan nan da wo mhọn iziẹngbe da ọdọ ọle. Ọle da mun udu nyan iJehova, ọle bha ji egbe lọ ọle. Ọle da wo re egbe khọkhọ iJehova yẹ wo ha ghe eji ọdọ ọle da mhẹn. Ọle bha denọ ẹlo ọbhi ọne ọnọghọ. Ọle da yọle: “Ọdọ mẹn wo mhọn ikpẹ esili ne bunbun. Ọle yẹ wo dọnmhegbe nin ọle khọn ene iria-eria nan ne gba ahu.” Emhin kpataki nọn nin mhan rẹ re iziẹngbe ha ne ene ribhi azagba-uwa bi agbotu nesẹmhan lu emhin beji ele rẹ dọnmhegbe rẹ khọn ọnọghọ nin ele ye.

19. Be imhan ki muegbe rẹ lu nian?

¹⁹ Jesu bi ene ẹhi wo ha ghọnghọn ẹghe nan rẹ man ọne otọ nan fo. Bhi ẹghe odalo, ele dẹ yẹ wo manman ha ghọnghọn ẹghe nan ha rẹ miẹn ghe, ọrebhe bhi ọne otọ nan ki ha yi ẹbho nin egbe gba nan, ne hoẹmhọn iJehova, yẹ ga ọle. Ene iJehova ha ne ha khian okhun ne dọ deba iJesu gbẹloghe dẹ wo ha ghọnghọn beji ele ha rẹ ha daghe ghe, mhan nin eria ne ribhi ọne otọ nan wo sọnyẹnmhẹn bhi ẹsọn nin ele miẹnlẹn. (Rev. 4:​4, 9-11; 5:​9, 10) Ọ dẹ yẹ wo ha yi emhin eghọnghọn rẹji mhan rẹ daghe ghe, ọbalọ, emianmhẹn, akhiẹ, bi uu si egbe kie bhi ighegheghe. (Rev. 21:4) Ọkuẹsẹ ọne ẹghe nin, dọnmhegbe ha re egbe khọkhọ iJehova nin Aba mhan nọn mhọn oyẹẹ, ẹwanlẹn, bi iziẹngbe. Uwẹ ha lu iriọ, uwẹ ki sabọ ha ghọnghọn aharẹmiẹn uwẹ ribhi ọnọghọ. (Jas. 1:​2-4) Ọ manman ti mhan bhọ ghe, Jehova ve nin mhan ghe, ọle dẹ riọ ene yu kpanọ bhi uu!​—Acts 24:15.