HA DA ANYỌN ỌBHI OLEGHE

IẸNLẸN ọsi Tony nin mhan tẹmhọnlẹn bhi okhun ọlẹn dẹ rẹ sabọ mhẹn gbera iriọ sade ọle lu emhin nin ọle rẹ kẹ zobọ bhi anyọn nan da. Ọkpakinọn, ranmhude ghe anyọn nin ọle da imun ọlẹn, ọle da riale ghe ọ iyi emhin ebe nan rẹ da anyọn gbe. Ọne uwedẹ nan nin ọle rẹ ha ria eria be gba?

Eye. Ranmhude ọle isabọ re unun sibhi anyọn re, ọle zẹle nin ọle da ta iriọ. Aharẹmiẹn ghe Tony rẹọbhọ la ọle bha rẹọbhọ, ẹrere nọnsọle nọn rẹ ha rẹkpa ọle rẹ lẹn emhin nọn khẹke nin ọle lu iyẹ wẹnna nọnsẹn, ranmhude anyọn nin ọle da. Beji ọle ki rẹ ha da anyọn bubu a, ẹrere nọnsọle bha yẹ sabọ ha taman ọlẹn emhin nọn khẹke nin ọle lu.

Emhin ọbhebhe nọn zẹle ghe nin Tony da ha riale ghe anyọn nin ọle da ida sabọ lu ọle emhin soso hi, ọle bha guanọ nin ọle zobọ bhọ. Allen nin mhan ka tẹmhọnlẹn bhi uhọnmhọn-ọta nọn gbera bha ka rẹọbhọ ghe ọle da anyọn gbe. Ọle da yọle: “Mẹn ki ha do da anyọn beji a ha da miẹn ghe ẹbho bha lẹn. Mẹn ki ha ta ọta rẹ gua anyọn nin mẹn da, ranmhude mẹn bha guanọ nin mẹn zobọ bhi anyọn nan da.” Arẹmiẹn ẹbho daghe ọle ghe anyọn nan da riia elin ọsi Tony bi Allen a, ele veva bha rẹọbhọ ghe anyọn nin ele da lu ele emhin soso. Ọkhẹke nin ele wẹnna kaka nin ele da sabọ ha da anyọn ọbhi oleghe. Sokpan, be ọkhẹke nin ele lu?

Lu Emhin Nọn Khẹke!

Ẹbho ne bunbun ne rẹ ha da anyọn gbe khẹ ne zobọ bhọ, re obọ rẹkhan ebi Jesu tale nọn yọle: “Ahamiẹn ghe, ẹlo obera nọnsẹ ho nọn re uwẹ lu emhin ebe, zọ ọle re sibhọre, uwẹ ha re fi fia. Egbe bha yẹ gba nin uwẹ, ọle mhẹn nẹ ghe, a mun egbe nọnsẹ rebhe fiọbhi ẹkẹ Gẹhẹna.”—Matthew 5:29.

Ọkpakinọn, Jesu bha yọle ghe nin mhan gene ha hian egbe nọnsẹmhan fia. Ebi ọle ha ta hi nin mhan muegbe rẹ rẹban emhin nọn hi ki rẹ khin nọn ha sabọ riia ikolu nin mhan bi Jehova ko mhọnlẹn an. Bhi ọsi ẹmhọanta, ọ dẹ sabọ ha ba mhan bhi egbe ghe mhan iyẹ lu ebi mhan ka lu khẹ. Sokpan, mhan ha sabọ re obọ rẹkhan ebi Jesu tale, ọ ki gbega mhan bhi umueria nọn imhẹn bi idia nọn ha sabọ re mhan ha da anyọn gbe. Bhiriọ, ẹbho ha taman uwẹ ghe uwẹ da anyọn gbe, lu ebi khẹke nin uwẹ da sabọ ha da ọle bhi oleghe. a Ahamiẹn ghe uwẹ ida sabọ re obọ sibhọre sade uwẹ re ọle si unun hiehie, wo zobọ bhọ sẹsẹsẹ. Ebi ọ hi ki rẹ ba uwẹ bhi egbe sẹ yẹ ghe uwẹ zobọ bhọ, lẹn sẹbhọ ghe ọbalọ nin uwẹ ha miẹn bhọ sade ọ riia uwẹ iẹnlẹn an, ọle ha khọ ne.

Aharẹmiẹn ghe uwẹ ida anyọn gbe egbe, uwẹ be da ọle gbera ughu? Ahamiẹn iriọ nọn, be bhọ emhin nọn khẹke nin uwẹ lu, nin uwẹ da sabọ ha da anyọn ọbhi oleghe?

Ebe Ha Sabọ Rẹkpa Uwẹ

1.Rẹọbhọ ghe erọnmhọn dẹ sabọ rẹkpa uwẹ. Baibo re ọne adia nan nin ọrebhe ne ho ne lu emhin nọn ti Osẹnobulua nin Jehova bhọ. Ọ yọle: “Bhi emhin rebhe, bha ha re erọnmhọn, ubhiimhin bi ekhuẹnmhẹn rẹ taman Osẹnobulua ebi bha guanọ; bhiriọ, ọfure nọn na bhi obọ Osẹnobulua vae, nọn khua okhun gbera ilẹn-otọ-emhin rebhe, ki gbega ọkhọle nọnsẹbha bi ahu iria-eria nọnsẹbha rẹ na obọ iJesu Kristi.” (Philippians 4:6, 7) Emhin nela uwẹ ha sabọ taman Jehova bhi erọnmhọn nọn ha re ọkhọle nọnsẹ lọ re?

Miẹn-kue ghe uwẹ da anyọn gbe, ghe uwẹ tobuwe si amẹn nọn gba uwẹ egbe. Taman Jehova emhin nin uwẹ ho nin uwẹ lu nin uwẹ da sabọ khọn anyọn nin uwẹ da gbe. Bhiriọ, ọle ki re ọne ahu nin uwẹ rẹ khọnlẹn miẹn otọ. Baibo yọle: “Ọria nọn gbegue olukhọ nesọle, emhin ida kiọnlẹn nanlẹn, ọkpakinọn, a dẹ mhọn itohan da ọria nọn re olukhọ nesọle ka yẹ re obọ sibhọ re.” (Proverbs 28:13) Jesu yọle mhan dẹ sabọ nan erọmhọn yọle: “Hẹi mun mhan fiọ bhi edọnmhẹn, ọkpakinọn, hinmhin mhan bhi obọ ọsi ọne oria ọbe.” (Matthew 6:13) Be uwẹ ha ki rẹ sabọ re obọ rẹkhan erọnmhọn nin uwẹ nan yẹ. Sẹyẹ, ejela uwẹ ha da miẹn ewanniẹn rẹji erọnmhọn nin uwẹ nan?

2. Ọta nọnsi Osẹnobulua dẹ sabọ re ọne ahu nin uwẹ. “Ọta nọnsi Osẹnobulua nyẹnlẹnmhin, ọ yẹ mhọn ahu . . . Ọ sabọ lẹn ebi ọria ria bhi ọkhọle bi emhin nin ọle mhanmhan.” (Hebrews 4:12) Baibo nan tie yẹ ria eria nyan ẹdẹdẹ sẹ wo rẹkpa ẹbho ne bunbun ne rẹ ha da anyọn gbe khẹ rẹ sabọ zobọ bhọ. Ọkpa bhi ene gbẹn ebe nọnsi Psalm da yọle: “Eghọnghọn hi ọsi ọne ọria nin nọn bha khian bhi ibhude ọsi ene imhẹn, nọn bha mundia bhi uwedẹ ọsi ene lu olukhọ, ọle bha yẹ deba ene re emhin kpataki zojẹ dotọa. Ọkpakinọn, uhi nesi Jehova ti ọle bhọ, asọn bi odanmhẹn ọle rẹ tie ọle yẹ ria eria nyan ọlẹn. . . . Emhin rebhe nin ọle lu ki kiọnlẹn”—Psalm 1:1-3.

Baibo nin Allen deba Esali Jehova ha luẹ, ọle re ọne ahu nanlẹn rẹ sabọ khọn anyọn nan da gbe. Ọle da yọle: “Mẹn wo rẹọbhọ ghe sade ọ iyi Baibo bi adia ne ribhi Baibo ne rẹkpa mẹn rẹ zobọ bhi anyọn nan da gbe nọn, ọ ha rẹ bue nin mẹn yu.”

3. Ha mun egbe uwẹ ọbhi ibẹẹ. Baibo yọle ghe Kristiẹn eso ne rẹ ka ha da anyọn gbe egbe khẹ, “Ẹlinmhin ọsi Osẹnobulua nọnsẹmhan” da kpe ele khia. (1 Corinthians 6:9-11) Be ọnan rẹ sabọ sunu yẹ? Elinmhin nọn khiale da rẹkpa ele rẹ sabọ ha mun egbe ele ọbhi ibẹẹ. Bhiriọ, ele da sabọ khọn ọne ọkhọle nan rẹ da anyọn gbe egbe miotọ. Baibo yọle: “Bha hẹi ha da anyọn gbe egbe. Ranmhude ọ dẹ re bha ha re egbe bhi unun. Ọkpakinọn, bha wo ha lu emhin nọn ha re bha ha mhọn ẹlinmhin nọn khiale.” (Ephesians 5:18; Galatians 5:21-23) Jesu Kristi da yẹ taman mhan ghe, ‘Aba mhan nọn ribhi okhun [dẹ] re ẹlinmhin nọn khiale nin ene bhii ọle le.’ Bhiriọ, “ha nọọn, a ki re nin bha.”—Luke 11:9, 13.

Ẹbho ne guanọ nin ele ha ga Jehova bhi uwedẹ nọn yẹẹ ọle, dẹ sabọ ha mun egbe ele ọbhi ibẹẹ sade ele tie Baibo yẹ re ọkhọle rebhe nan erọnmhọn ji Jehova. Hẹi ji egbe lọ uwẹ rẹ ha lu iriọ. Sokpan, ha ye ọne ive nan re nọn yọle: “Ọnọn kọ emhin oriọn ki rọ iẹnlẹn ọsi ighegheghe bhi obọ ẹlinmhin. Bhiriọ, bha hẹi ji mhan zobọ bhi emhin esili nan lu. Ẹghe ha sẹ, mhan ki miẹn ọne elele sade mhan bha ji egbe lọ mhan.”—Galatians 6:8, 9.

4. Zẹ ikolu ne mhẹn. “Ọnọn rẹkhan ọria nọn mhọn ẹwanlẹn khian ki yẹ ha mhọn ẹwanlẹn, Ọkpakinọn, ọnọn rẹkhan uhuki khian ki miẹn ikuan-egbe.” (Proverbs 13:20) Ji imọẹ nesẹ lẹn ghe uwẹ dọnmhegbe nin uwẹ hẹi ha da anyọn gbe. Baibo ka tale khẹ ghe, uwẹ ha dọnmhegbe nin uwẹ rẹ zobọ bhi anyọn nan da gbe, imọẹ eso nin uwẹ ka rẹ ha mhọn khẹ ki ha re unun ji uwẹ. (1 Peter 4:3, 4) Muegbe nin uwe rẹ ze imọẹ nesẹ obọ ne sua uwẹ ọbhọ rẹ ha da anyọn gbe.

5. Len eji uwẹ ha sabọ da sẹ. “Bha hẹi yẹ ha re egbe khọkhọ uwedẹ nin ọne agbọn nan rẹ lu emhin. Ọkpakinọn, bha fi ọkhọle denọ nin bha da sabọ fi egbe denọ sẹsẹsẹ, bhiriọ, bha ki sabọ lẹn iho nọn mhẹn nọnsi Osẹnobulua, nọn gbale, nin Osẹnobulua miẹn ọbhi egbe.” (Romans 12:2) Ahamiẹn ghe Ọta nọnsi Osẹnobulua dia uwẹ rẹ lẹn eji uwẹ ha sabọ da anyọn sẹ, ghe uwẹ bha ji imọẹ nesẹ la ọne agbọn nan dia uwedẹ nin uwẹ rẹ da anyọn, uwẹ ki sabọ ha nyẹnlẹn bhi uwedẹ nọn yẹẹ Osẹnobulua. Sokpan, be uwẹ ha ki sabọ rẹ lẹn eji ọkhẹke nin uwẹ da anyọn sẹ yẹ?

Ahamiẹn uwẹ da anyọn rẹ sẹbhọ ghe ọ ire uwẹ ria eria nọnsẹn, ọnin rẹman ghe ọne uwẹ da bun gbe. Ahamiẹn uwẹ ho nin uwẹ da anyọn, hẹi da le sẹbhi eji ọ ha da ha mun uwẹ ọkuẹsẹ uwẹ zobọ bhọ. Lẹn eji ọkhẹke nin uwẹ da anyọn sẹ. Lẹn eji uwẹ ha da anyọn bun sẹ nọn ida mun uwẹ. Sẹyẹ, hẹi da gbera iriọ.

6. Dọnmhegbe rẹ ha yọle eye. “Uwẹ wo ji ‘Ehe’ nọnsẹ ha yi ehe, ‘Eye’ ki yẹ ha yi eye.” (Matthew 5:37) Ahamiẹn ọria sa anyọn nọn bunbun nin uwẹ da gbera eji ọkhẹke nin uwẹ da le sẹ, uwẹ ha re ekpẹn yọle eye. “Ji ọta nin bha ta ẹghe rebhe ha yi ọta esili, ọta nan re umhẹnlẹn ọi, nin bha da lẹn ebi bha ha rẹ ha wanniẹn ọdeọde yẹ.”—Colossians 4:6.

7. Guanọ urẹkpa bhi obọ imọẹ nesẹ bi azagba-uwa nọnsẹ. Imọẹ ọsaje ne hoẹmhọn Jehova ida sua uwẹ bhọ nin uwẹ da anyọn gbe. Bhiriọ, taman ele nin ele rẹkpa uwẹ beji uwẹ ha da sabọ ha da anyọn bhi oleghe. “Itue eva mhẹn nẹ otuọnkpa, ranmhude ele dẹ miẹn udede elele bhi iwẹnna obọ nọnsele. Ahamiẹn ghe ọkpa bhi ẹwẹ ele dere, ọzeva ọle ki rẹkpa ọle kpanọ mundia.” (Ecclesiastes 4:9, 10; James 5:14, 16) Usun natiọle The National Institute on Alcohol Abuse and Alcoholism nọn ribhi United States da yọle: “Ọ sabọ rẹ ha nọghọ uwẹ ẹgheso rẹ de obọ re bhi anyọn nin uwẹ da. Bhiriọ, taman ene ribhi azagba-uwa nọnsẹ bi imọẹ nesẹ nin ele rẹkpa uwẹ rẹ sabọ de obọ re bhi anyọn nin uwẹ da.”

8. Muegbe nin uwẹ rẹ de obọ re bhi anyọn nin uwẹ da. “Ha yi ọria nọn lu rẹkhan ọne ọta, ọ iyi ọnọn gheghe họn ọkpa, bi ọnọn re iria-eria nọn bha gba hiẹ egbe ọle. Ọkpakinọn, ọria nọn gbẹlokotọ fẹ ọne uhi nọn gbale ọsi umiẹnfan ghe nọnsẹn, sẹyẹ lu rẹkhan ọlẹn, ọria nọn re ọle wẹnna ọle khin, ọ iyi ọria nọn yelea ebi ọle họnlẹn; bhiriọ ọle ki miẹn eghọnghọn bhi ebi ọle lu.”—James 1: 22, 25.

Ebi Uwẹ Ha Rẹ Sabọ Rẹban Anyọn Nan Da Gbe Yẹ

Ọ iyi ẹbho rebhe ne manman da anyọn wo yi ọdanyọn. Ọkpakinọn, ẹbho eso sẹ wo da anyọn rẹ sẹbhọ ghe, anyọn nan da, da dọ gue ele egbe. Ranmhude ẹbho ne manman da anyọn dẹ sabọ ha khọnmhọn sade ele zobọ bhọ rẹ ha da le, ọkhẹke nin ele bu dọkitọ nin ọle rẹkpa ele. Allen da yọle: “Ẹghe nin mẹn rẹ ha zobọ bhi anyọn nan da, ọbalọ nin mẹn ha miẹn bhi egbe da wo ha khọ bhọ. Mẹn da dọ lẹn ghe Baibo nin mẹn luẹ ọkpa ida sabọ wo rẹkpa mẹn rẹ zobọ bhi anyọn nin mẹn da, ọ yẹ khẹke nin mẹn dọ guanọ urẹkpa bhi obọ dọkitọ.”

Ọkhẹke nin ẹbho ne ho ne ga Jehova nọnsẹn bu dọkitọ nin ọle rẹkpa ele, beji ele ha da sabọ zobọ bhi anyọn nan da. b Eso sabọ rẹ diọbhi họspita dọ gbẹloghe egbe ranmhude ele khọnmhọn nin ele rẹ zobọ bhi anyọn nan da. Sẹyẹ, eso sabọ rẹ le ikhunmhun nọn ha rẹkpa ele rẹ de obọ re bhi anyọn nin ele da la zobọ bhọ. Jesu da yọle: “Eria ne khọnmhọn guanọ ọbo, ọ iyi ene egbe daanlẹn.”—Mark 2:17.

Elele Ne Nabhọre Sade A Re Obọ Rẹkhan Ebi Jehova Tale

Bhi Baibo, Osẹnobulua da taman mhan uwedẹ nin mhan ha rẹ ha da anyọn, ranmhude ghe ọle guanọ nin mhan ha ghọnghọn bhi iẹnlẹn nian bi bhi ẹghe odalo. Ọ ki ribhi ikpe enẹn nyan uje nin Allen zobọ bhọ rẹ ha da anyọn, ọle da yọle: “Ọ wo manman ti mẹn bhọ nin mẹn rẹ lẹn ghe mẹn dẹ sabọ fidenọ, sẹyẹ ghe Jehova dẹ sabọ rẹkpa mẹn rẹ fidenọ. Ọ yẹ wo ti mẹn bhọ nin mẹn rẹ lẹn ghe . . . ” Allen da mundia khere, yẹ koko eviẹ mun mhọn bhi ẹlo beji ọle ha ye ene emhin nan re. “Ọ yẹ wo ti mẹn bhọ nin mẹn rẹ lẹn ghe Jehova lẹn idia nin mẹn yẹ, ẹmhọn mẹn rẹtẹ ọle. Sẹyẹ, ọle da wo re urẹkpa nin mẹn ha guanọ nin mẹn.”

Ahamiẹn uwẹ isabọ da anyọn bhi oleghe, uwẹ sabọ rẹ ha riale ghe uwẹ ida sabọ re obọ sibhi anyọn nan da re. Ọkpakinọn hẹi ji egbe lọ uwẹ. Allen bi ẹbho ne bunbun yẹ wo ka ha ribhi idia nin uwẹ yẹ nian, ẹle sabọ de obọ re bhi anyọn nan da, eso bhọ da rẹban ọlẹn sẹsẹsẹ. Ele wo ghọnghọn nin ele rẹ sabọ re obọ sibhọre, uwẹ dẹ yẹ sabọ ha ghọnghọn.

Ahamiẹn uwẹ zẹ rẹ da anyọn ọbhi oleghe la uwẹ yọle uwẹ ida da hiehie, lẹn sẹbhọ ghe Osẹnobulua hoẹmhọn uwẹ. Ọle da yẹ ve ọne ive nan nọn yọle: “Sade ibha gene re obọ rẹkhan uhi nesẹmhẹn, ọfure nọnsẹbha ki diabe ọsi ẹdẹ. Ikhiale nọnsẹbha ki diabe okpẹdẹ nọn fi yo fi re.”—Isaiah 48:18.

[Ebi a gbẹn ọbhi otọle]

[Ẹkpẹti/Adudu]

Mẹn Be Ha Da Anyọn Gbe?

Uwẹ sabọ rẹ ha nọọn egbe ẹ:

• Mẹn be da anyọn gbera ebi mẹn ka rẹ da le khẹ?

• Mẹn be da anyọn ẹghe-ẹghe gbera ebi mẹn ka rẹ da le khẹ?

• Anyọn nọn manman hian mẹn ki wo da?

• Anyọn mẹn be da rẹ rẹkpa egbe mẹn sade mẹn ribhi ọkakale?

• Ọmọẹ mẹn la ọria bhi azagba-uwa nọnsẹmhẹn be sẹ ka taman mẹn khẹ ghe mẹn da anyọn gbe?

• Anyọn nin mẹn da be sẹ ka si ẹmhọn ji mẹn bhi uwa, isi iwẹnna, la sade mẹn khian ẹbho?

• Uzana dẹ be sabọ gbera ghe mẹn bha da anyọn?

• Ọ be nọghọ mẹn rẹ deba ẹbho ne ida anyọn mun obọ?

• Mẹn be rẹhe nin ẹbho nin ele hẹi lẹn eka ọgọ anyọn nin mẹn da?

Ahamiẹn uwẹ lu ene emhin nan soso nan tẹmhọnlẹn, ọkhẹke nin uwẹ de obọ re bhi uwẹdẹ nin uwẹ rẹ da anyọn.

[Ẹkpẹti/Adudu]

Ebe Ha Rẹkpa Uwẹ Rẹ Sabọ Ha Da Anyọn Ọbhi Oleghe

Ọkuẹsẹ uwẹ da anyọn, ka ria eria nyan ene inọnta nan:

• Ọ be khẹke nin mẹn da anyọn?

Ebi uwẹ ha sabọ lu: Ahamiẹn ọria isabọ mun egbe ọle ọbhi ibẹẹ sade ọle da anyọn, ọ bha khẹke nin ọle ha da anyọn hiehie.

• Be mẹn ha da anyọn sẹ yẹ?

Ebi uwẹ ha sabọ lu: Beji a miẹn ghe anyọn dẹ sabọ re ọle nọghọ ọria rẹ ha ria eria nọnsẹn, ọkhẹke nin uwẹ ka mhanmhan ebi anyọn nin uwẹ ha da ha bun sẹ yẹ, ọkuẹsẹ uwẹ munhẹn ha da le.

• Ẹghela ọkhẹke nin mẹn rẹ da anyọn?

Ebi uwẹ ha sabọ lu: Hẹi da anyọn sade uwẹ ho nin uwẹ gua imoto, la sade uwẹ lu iwẹnna nọn khẹke nin uwẹ mun ẹlo ọi, sade uwẹ ho nin uwẹ lu iwẹnna oga soso, sade uwẹ hanmhan, la sade uwẹ mhọn ikhunmhun nin uwẹ le.

• Ejela mẹn ha da da anyọn?

Ebi uwẹ ha sabọ lu: Hẹi ha da anyọn bhi eji ẹbho da da anyọn gbe egbe, hẹi ha da le bhi ẹkhokho beji uwẹ ha da ha re ọle nẹhe nin ẹbho, hẹi ha da le bhi odalo ẹbho ne bha hoẹmhọn anyọn nan da.

• Họla mẹn ha deba da anyọn?

Ebi uwẹ ha sabọ lu: Imọẹ nesẹ bi ẹbho bhi azagba-uwa nọnsẹ ne ha sabọ rẹkpa uwẹ bhi iẹnlẹn uwẹ ha deba da anyọn. Hẹi ha deba ẹbho ne da anyọn gbe egbe da anyọn.

[Ẹkpẹti/Adudu]

Ọta Nọnsi Osẹnobulua Da Rẹkpa Ọria Nọn Ka Rẹ Ha Da Anyọn Gbe Egbe Khẹ

Supot nọn nyẹnlẹn bhi Thailand da wo manman ha da anyọn gbe egbe. Ẹghe nin ọle rẹ munhẹn ha da anyọn, ọsemuan-osemuan ọkpa ọle rẹ ha da le. Khere khere, ọle da dọ ha da le ọsewewiẹ bi ọsodanmhẹn. Ranmhude ghe ọle ho nin anyọn ha mun ọle, ọle da wo manman ha da le ẹghe-ẹghe. Bhi ọne ẹghe nan, ọle da deba Esali Jehova ha luẹ Baibo. Beji ọle ki dọ luẹ kere ghe nan rẹ ha da anyọn gbe egbe iyẹẹ Jehova, ọle da zobọ bhọ rẹ ha da anyọn. Akizẹbue, ọle da fikie dọ ha da anyọn gbe egbe. Ọnan da wo re egbe lọ azagba-uwa nọnsọle.

Ọkpakinọn, Supot yẹ wo hoẹmhọn Jehova, ọle guanọ nin ọle ga Ọle bhi uwedẹ nọn khẹke. Imọẹ nesi Supot da wo ha rẹkpa ọle, ele da yẹ wo ha ko azagba-uwa nọnsọle udu re, yẹ taman ele nin ele hẹi zobọ bhọ rẹ ha rẹkpa Supot. Bhi ọne ẹghe nan, ọta nọn ribhi 1 Corinthians 6:10 da rẹkpa Supot rẹ lẹn ebi emhin nin ọle lu khọ sẹ yẹ. Enin yọle: ‘Edanyọn gbe egbe ida nabhi Agbejele nọnsi Osẹnobulua.’ Ọle da dọ kere ghe ọkhẹke nin ọle manman dọnmhegbe rẹ rẹban anyọn nin ọle da.

Bhi ejayenan nian, Supot ki wo muegbe nin ọle rẹ rẹban anyọn nan da. Khere khere, ranmhude urẹkpa nin Supot miẹn bhi obọ ẹlinmhin nọn khiale nọnsi Osẹnobulua, ọta nọnsi Osẹnobulua, azagba-uwa nọnsọle bi bhi agbotu, ọle da dọ sabọ rẹban anyọn nin ọle da. Ẹghe nin ọle ki rẹ re egbe guẹ nin Jehova yẹ mianmiẹn, azagba-uwa nọnsọle da wo manman ha ghọnghọn. Ejayenan nian, Supot ki wo deba Jehova ha mhọn ikolu nọn ziẹnlẹn nin ọle mọn da guanọ. Ọle wo noo ẹghe nọnsọle rẹ rẹkpa ẹbho rẹ do lẹn Jehova.