Ọta Akhasẹ 1. Otọ-umunvẹa

“Otọ-umunvẹa ne khua dẹ ha sunu.”​—LUKE 21:11.

● Ẹghe nin otọ rẹ munveạ bhi agbaẹbho natiọle Haiti, eria ne dọ vidiọ uwa ne siẹn kua, da họn ghe ọmọn-obọ viẹ bhi ẹlẹ emhin ne siẹn kua. Iriọ ele rẹ guanọ ọlẹn bhi eji ọle da viẹ, yẹ hinmhin ọlẹn. Winnie hi elin ọsi ọne ọmọn nan. Ene biẹ ọle bha miuhọnmhọn ẹghe nin ọne emhin idunmhuri nan rẹ sunu.

ỌNE ỌTA AKHASẸ NAN BE GENE MUNSẸ? Ẹghe nin otọ-umunvẹa nọn khua rẹ sunu bhi Haiti bhi January 2010, ẹbho ne bun gbera 300,000, ele yuno. Sẹyẹ, ẹbho ne bun sẹbhi uli iyisẹn ea nyan ẹbo ọkpa da re ẹlo miẹn uwa nọnsele a. Ọ iyi agbaẹbho ọsi Haiti ọkpa otọ-umunvẹa nọn khua da sunu. Rẹ nabhi April 2009 rẹ dọ sẹbhi April 2010, otọ-umunvẹa ne khua ne sunu bhi otọ agbọn rebhe bun sẹbhi 18.

BE ẸBHO ESO TAYẸ? Otọ-umunvẹa ne sunu ẹlẹnan bha bun gbera ene ka sunu khẹ; ọkpakinọn, ranmhude emhin nin ekhẹn azemhinre zẹ ọle egbe dagbare, ọle zẹle nin mhan ki da hẹnmhọn ele gbera ọnikhẹ.

ẸMHỌANTA ELE BE TA? Ria ọne ẹmhọn nan: Baibo bha taman mhan eka otọ-umunvẹa nọn da ha sunu bhi ẹghe ọkike. Ọkpakinọn, ọ da yọle ghe “otọ-umunvẹa ne khua” dẹ ha sunu “bhi ije kẹkẹ.” Ọnan hi emhin nọn wo ha sunu ẹlẹnan.​—Mark 13:8; Luke 21:11.

BE UWẸ RIA ỌLE YẸ? Otọ-umunvẹa nọn khua be ha sunu beji Baibo tale?

Ọ iyi otọ-umunvẹa ọkpa ha wo rẹman ghe, ẹghe ọkike mhan da nyẹnlẹn. Ọkpa bhi ọta akhasẹ nọn munsẹ ẹlẹnan, ọle otọ-umunvẹa khin. Ji mhan zilo nyan ọta akhasẹ ọbhebhe.

[Ẹkpẹti]

Ọne emhin idunmhuri nan sẹ wo si iloya ji ẹbho ne bunbun.​—KEN HUDNUT, U.S. GEOLOGICAL SURVEY.

[Adudu]

© William Daniels/​Panos Pictures