Ọta Akhasẹ 2. Ukhunmhun
Ọta Akhasẹ 2. Ukhunmhun
“Ukhunmhun ki ha fi.”—MARK 13:8.
● Okpea ọkpa guanọ ebale vae bhi otọ iQuaratadji bhi agbaẹbho ọsi Niger. Ibhio ọle nin ikpea bi ibhio ọle nin ikhuo da bu ọle re bhi enin. Ukhunmhun nọn fi bhi idunmhun nọnsele, ọle zẹle nin ele da vae bhi eji obhio ele ye, si ele dẹ miẹn ebale le bhi enin. Sokpan, ele da kere ghe, ọne obhio ele nowẹ si ẹkẹ ru bhi uke ewa. Bezẹle nin ọle da nowẹ si ẹkẹ ru bhi uke ewa? Ọkhaẹmhọn ọkpa nọn ribhi ọne agbaẹbho da yọle ghe, ranmhude ẹkhọle lo ọle ghe ọle bha sabọ re ebale nin azagba-uwa nọnsọle le, ọle zẹle nin ọle da nowẹ si ẹkẹ ru.
ỌNE ỌTA AKHASẸ NAN BE GENE MUNSẸ? Bhi otọ agbọn rebhe, otuọnkpa bhi ẹwẹ itue ihinlọn imiẹn ebale le khọn bhi ukpẹdẹ. Bhi agbaẹbho ne bunbun bhi otọ Africa, otuọnkpa bhi ẹwẹ itue ea imiẹn ebale le hiehie bhi ikpẹdẹ eso. Nin uwẹ rẹ manman lẹn ebi a tẹmhọnlẹn, ji a yọle ghe azagba-uwa ọkpa ribhọ nin aba, inẹn, bi ọmọn ye. Ahamiẹn ebale nọn ha sẹ itue eva le ọkpa ele mhọnlẹn, otuọnkpa bhi ẹwẹ ele dẹ re ohanmhẹn wẹ. Ọ sabọ rẹ ha yi ọne aba, inẹn, la ọne ọmọn. Ọnan hi ebe sunu bhi azagba-uwa eso ẹlẹnan ranmhude ebale bha sẹ obọ.
BE ẸBHO ESO TAYẸ? Ọne otọ nan wo biẹ ebale nọn ha sẹ ọrebhe bhi ọne agbọn nan le. Ọkhẹke nin mhan gha ọne ebale nọnsẹn nọn da sẹ ọrebhe obọ.
ẸMHỌANTA ELE BE TA? Ẹmhọanta nọn ghe, ene mun ugbo dẹ sabọ mun udede ugbo beji ebale ha da bun gbera ọnikhẹ. Ene gbẹloghe dẹ sabọ lu ọle beji a ha da miẹn ghe, ebale nan miẹn bhi ene ugbo ki sẹ ọrebhe obọ. Ọrẹyiriọ, beji ele dọnmhegbe sẹ, ọ bha fo ele.
BE UWẸ RIA ỌLE YẸ? Ẹmhọn nọn ribhi Mark 13:8 be ha munsẹ? Ukhunmhun ibe sẹyẹ fi bhi otọ agbọn rebhe, arẹmiẹn ghe udede imasin ki wo ribhọ nan rẹ wẹnna bhi ugbo?
Ọnọghọ ọbhebhe ribhọ nin otọ-umunvẹa bi ukhunmhun kẹ sire. Ọkpa bhi ọta akhasẹ ne ribhi Baibo, ọle ọne emhin nan yẹ khin.
[Ẹkpẹti]
“Ibhokhan eso ne yulu ranmhude emianmhẹn kẹkẹ bọsi emianmhẹn udu, bi otolo ha rẹ nin sade ele miẹn ebale le nọnsẹn.”—ANN M. VENEMAN, ỌRIA NỌN KA RẸ HA SUN USUN NE MHỌN OBỌ BHI ẸMHỌN IBHOKHAN BHI AGBOTU NATIỌLE UNITED NATIONS.
[Adudu]
© Paul Lowe/Panos Pictures