Ọta Akhasẹ 5. Ẹbho ki ha riia ọne otọ nan an

‘Osẹnobulua dẹ dọ fuẹn ene riia ọne otọ nan an.’​—REVELATION 11:18.

● Agbaẹbho ọsi Kpor bhi otọ iNigeria, ọle okpea ọkpa natiọle Pirri da ha so udin. Ọnan hi iwẹnna nin ọle lu. Ọkpakinọn, ọle iyẹ sabọ lu ọne iwẹnna nan ranmhude abhii nan rẹ lu pẹtro nọn vẹ kua ọbhi ọne otọ, yẹ riia emhin an bhi ọne agbaẹbho. Pirri da yọle: “Ọne abhii gbono ehẹn ne ribhi ẹkẹ ẹdẹ a, si emianmhẹn ji mhan, yẹ riia amẹn nin mhan wọn an. Mẹn iyẹ mhọn ebi mẹn rẹ gbẹloghe egbe.”

ỌNE ỌTA AKHASẸ NAN BE GENE MUNSẸ? Eria ne fẹ otọ emhin ghe da tale ghe, iku nọn nabhi okpẹdẹ ukpe-ukpe khua sẹbhi ẹkpa cimẹnti ẹbo ọgban nyan iyisẹn (130,000,000). Alaba ene bunbun bhi ene iku nan khin. Bhiriọ, ele ikẹ wea. Rẹ gbera ọnan, eria wo ha noo emhin ne ribhi ọne otọ nan gbe. Ene guanọ otọ emhin fẹghe da yọle ghe, arẹmiẹn ọne otọ nan sabọ ne emhin nan ne sibhọre fikiere, ọ dẹ sẹ ukpe ọkpa bi uki isẹn nọn rẹ sabọ ne emhin nan noo bhi ukpe ọkpa fikiere. Nuiz pepa natiọle Sydney Morning Herald da yọle ghe, ahamiẹn beji ẹbho rẹ ha bun ọbhọ, iriọ ele yẹ rẹ ha noo emhin nọn ribhi ọne otọ nan, mhan dẹ guanọ otọ ọbhebhe nin mhan mun ba ọne otọ nin mhan da nyẹnlẹn nan.

BE ẸBHO ESO TAYẸ? Eria mhọn ẹwanlẹn. Ele dẹ sabọ guanọ uwedẹ ọbhebhe nin ele ha rẹ miẹn emhin nin ele guanọ. Mhan dẹ sabọ hẹnhẹn ọne otọ nan nin mhan riia a.

ẸMHỌANTA ELE BE TA? Ẹbho ne bunbun wo gene ha tale dagbare ghe, ọne otọ nan riia khian. Ọrẹyiriọ, ẹbho sẹyẹ wo ha riia ọle a.

BE UWẸ RIA ỌLE YẸ? Uwẹ be riale ọkhẹke nin Osẹnobulua dọ rẹkpa mhan nin ọne otọ nan hẹi riia fo sẹsẹsẹ?

Rẹ deba ene ọta akhasẹ isẹn nin mhan tẹmhọn ọlẹn, Baibo sẹyẹ tẹmhọn emhin esili ọkpa nọn da ha sunu bhi ẹghe ọkike ọsi ọne agbọn nan. Ọnin hi ọta akhasẹ nọnzi ehan nin mhan ki da zilo nyan.

[Ẹkpẹti]

“Otọ nọnsẹmhẹn nọn rẹ mhọn-ose a kiẹn itikun.”​—ERIN TAMBER, ỌRIA NỌN NYẸNLẸN BHI EJI A TIỌLE GULF COAST, UNITED STATES, ẸGHE NIN ỌLE RẸ HA TẸMHỌN EBI ABHII NỌN VẸ KUA RẸ RIIA EMHIN AN YẸ BHI UKPE 2010.

[Ọnọn nyan ifoto nọn ribhi apapale 8]

U.S. Coast Guard photo