Ọta Akhasẹ 6. Iwẹnna Itẹmhọn Agbejele
Ọta Akhasẹ 6. Iwẹnna Itẹmhọn Agbejele
“Ọne ọta nọn mhẹn ọsi Agbejele nan, a dẹ wewe ọle nabhi eji eria hi ki rẹ ha ye bhi ọne otọ nan rebhe.”—MATTHEW 24:14.
● Obhi agbaẹbho khere nọn ribhi obọ ọsi Pacific Ocean, ọle Vaiatea da nyẹnlẹn. Eji ọne agbaẹbho nan ye bha sire hiehie. Ikpeta ẹbho nyẹnlẹn bhi ọne idunmhun. Ọrẹyiriọ, Esali Jehova re ẹnẹ vae bhi ọne idunmhun nan dọ ha tẹmhọn Osẹnobulua man Vaiatea bi ẹbho nekẹle ne nyẹnlẹn bhi ọne idunmhun. Bezẹle nin Esali Jehova da dọnmhegbe rẹ ha vae bhi ọne agbaẹbho nan nọn bha sire? Ranmhude ele guanọ nin ọrebhe họn ẹmhọn Agbejele nọnsi Osẹnobulua.
ỌNE ỌTA AKHASẸ NAN BE GENE MUNSẸ? Esali Jehova wo tẹmhọn Agbejele nọnsi Osẹnobulua na bhi ije rebhe bhi ọne agbọn nan. Bhi ukpe 2010, Esali Jehova da gbe uri-agogo nọn bun gbera ẹbo iyisẹn ehan nyan ẹbo uli (1,600,000,000) rẹ tẹmhọn Osẹnobulua bhi agbaẹbho ne bun sẹbhi 236. A ha gha ọne ẹghe nan ọbhi uhọnmhọn ọsi ọdeọde bhi ẹwẹ ele, ọ ki ha yi ihuẹnlo ọgban nin ọdeọde rẹ ha tẹmhọn Osẹnobulua ukpẹdẹ-ukpẹdẹ. Bhi ẹkẹ ikpe igbe ne gbera nian, ebe nin ele sẹ printi yẹ gha nin ẹbho gbera ẹbo uli uje (20,000,000,000).
BE ẸBHO ESO TAYẸ? Ọ iyi ẹlẹnan a munhẹn ha tẹmhọn Osẹnobulua man ẹbho. Rẹ na otọ ha de, ọle ẹbho mọn da tale.
ẸMHỌANTA ELE BE TA? Ẹmhọanta nọn ghe ọ iyi ẹlẹnan ẹbho munhẹn ha tẹmhọn Osẹnobulua. Ọkpakinọn, a bha sẹ ka re inian tale khẹ. Obhi ẹghe khere bi eje bha kpọnọ gbe, ọle ẹbho da ka tale bhi ẹghe nọn gbera. Bhi ejayẹnan nian, Esali Jehova tale man ọrebhe bhi otọ agbọn rebhe. Ele bha zobọ bhi ọne iwẹnna arẹmiẹn ghe eria ne ribhi ihe de ele idobolo. * (Mark 13:13) A iha ele osa bhi ọne iwẹnna. Ele tobele zegbere rẹ noo ẹghe nọnsele rẹ lu ọne iwẹnna. Ọsọhẹ ele yẹ rẹ ne ebe nesele nin ẹbho. Ẹbho tobele re ọkhọle obele re igho re nan rẹ lu ọne iwẹnna.
BE UWẸ RIA ỌLE YẸ? A be gene ha tẹmhọn Agbejele nọnsi Osẹnobulua na bhi otọ agbọn rebhe? Uwedẹ nin ọne ọta akhasẹ nan rẹ ha munsẹ be rẹman uwẹ ghe emhin esili dẹ kẹ sunu bhi ẹghe odalo?
[Ebi a gbẹn ọbhi otọle]
^ udu ọle 6 Nin uwẹ rẹ luẹ ba ọnan, ghe ene vidio ea nan: “Faithful Under Trials,” “Purple Triangles,” bi “Jehovah’s Witnesses Stand Firm Against Nazi Assault,” nin Esali Jehova lu.
[Ẹkpẹti]
“Bhi ahu nọnsi Jehova, mhan dẹ sẹyẹ ha re ọhubhudu rẹ tẹmhọn Agbejele. Mhan dẹ manman dọnmhegbe nin mhan rẹ tale man ọrebhe.”—EBE UKPE ỌSI ESALI JEHOVA ỌSI 2010.