• UKPE NAN BIẸ ỌLE: 1957

• AGBAẸBHO NỌN NA VAE: AUSTRALIA

• OKHA NỌNSỌLE: MẸN MIẸN ỌKAKALE BHI EGBE BEJI MẸN HA YI OBHOKHAN

EBI IẸNLẸN NỌNSẸMHẸN KA DIAYẸ:

Eji a tiọle Newcastle, New South Wales bhi Australia, ọle mẹn da wanre. Mẹn hi ọmọn diọn bhi ẹwẹ imọn ihinlọn nin ene biẹ mẹn mhọnlẹn. Aba mẹn wo da anyọn gbe-egbe, yẹ fi bhi ẹlo, iriọ inẹn mẹn yẹ rẹ fi bhi ẹlo. Inẹn mẹn ki wo ha gbe mẹn ugbemhin oya, yẹ wo ha re unun ria mẹn a. Ọle ki ha taman mẹn ẹghe rebhe ghe ọria ebe mẹn khin, ghe mẹn de tuẹ a bhi agbọn aranlẹn. Ọnan ki wo re ofẹn ha mun mẹn

Ẹghe eso, mẹn isabọ yo isiku ranmhude itẹ nin inẹn mẹn zẹ mẹn bhi egbe bhi ugbemhin nin ọle gbe mẹn. Beji mẹn ha ribhi ikpe 11, ene gbẹloghe da re mẹn sibhi obọ ọsi ene biẹ mẹn re, ele da ha gbẹloghe mẹn. akizẹbue, ele da re mẹn diọbhi uwa ọsi otuẹ. Mẹn ki ribhi ikpe 14, mẹn da nẹ sibhi enin re. Mẹn bha ho nin mẹn fikie ha khian uwa, bhiriọ, mẹn da ha nyẹnlẹn bhi ughe ọsi Kings Cross nọn ribhi Sydney.

Beji a miẹn ughe mẹn ki da nyẹnlẹn, mẹn da dọ ha le ikhunmhun ne imhẹn, ha da anyọn gbe-egbe, ha ghe ifoto ọsi eria ne banọan, yẹ munhẹn ha gbe agbilẹ. Emhin ọkpa ribhọ nọn sunu nọn manman re ofẹn mun mẹn. Okpea nọn nyan uwa nin mẹn da ha nyẹnlẹn mhọn eji a da duje ọsasọn. Ẹdẹ ọkpa, Ọsemuan, ikpea eva da bu ọle re, ọle da yọle nin mẹn ha khian ẹkẹ ugha, mẹn rẹ ribhi enin, mẹn da ha họn ebi ele ta. Ọle da ha ho nin ọle khiẹn mẹn nin ele. Ele da mhanmhanlẹn nin ele rẹ mẹn nẹko bhi ẹkẹ okọ nan rẹ mun ihẹ, ele ki ririọ re imẹn ha khian Japan nin mẹn do ha wẹnna bhi eji a da khiẹn emhin. Ofẹn da ha mun mẹn, mẹn da na iwido san fia bhi ọne uwa igedege dọ guanọ urẹkpa.

Mẹn da miẹn okpea ọkpa nọn rẹnẹ vae bhi Sydney, mẹn da taman ọlẹn ebe sunu ji mẹn, mẹn da rẹ ha riale ghe ọle dẹ re igho nin mẹn. Okpakinọn, ọle da yọle nin mẹn vae bhi uwa nọnsọle, nin mẹn dọ le ebale yẹ khọa. Iriọ, mẹn ki rẹ wo ha ribhi enin. Ukpe ọkpa ki gbera, mhan da bọ egbe.

EBI BAIBO RẸ FI IẸNLẸN NỌNSẸMHẸN DENỌ YẸ:

Ẹghe nin mẹn rẹ deba Esali Jehova ha luẹ Baibo, emhin eso nin mẹn luẹ da re imẹn ha ghọnghọn, eso bha re imẹn ha ghọnghọn. Ẹkẹ da wo ha khọ mẹn beji mẹn lẹn ghe Esu si emhin ebe ne ribhi ọne agbọn nan; Rẹ na otọ ha de, a man mẹn le ghe Osẹnobulua si iloya nọnsẹmhan. Ọkhọle nọnsẹmhẹn da wo lọre beji mẹn dọ luẹ kere ghe Osẹnobulua ida tuẹ ẹbho a bhi agbọn eranlẹn. Ọ rele nin ọne iman-emhin nan mọn da re ofẹn mun mẹn.

Uwedẹ nin ene Esali Jehova rẹ ji Baibo da ha dia emhanmhan nọnsele da wo rẹso mẹn. Ele wo re obọ rẹkhan emhin nin ele man. Ọ ilẹkhẹ nan rẹ nin mẹn zilo, aharẹmiẹn mẹn ta ọta la lu emhin nọn bha gba, ene Esali Jehova ki sẹyẹ wo ha re ekpẹn bi oyẹẹ rẹ nin mẹn lu emhin.

Emhin nọn nọghọ mẹn nẹ ọle hi ẹlo nin mẹn rẹ ha ghe egbe mẹn, mẹn da ha ghe gbe mẹn bii ọria nọn bha se emhin soso. Mẹn da wo he egbe mẹn, ikpe ne bunbun rẹ gbera nin mẹn mianmẹn yẹ kiẹn ọkpa bhi ẹwẹ Esali Jehova, ọne ẹlo nan mẹn yẹ rẹ ha ghe egbe mẹn. Mẹn wo manman hoẹmhọn Jehova, sokpan mẹn bha rẹọbhọ ghe ọle dẹ sabọ hoẹmhọn ọria nọn diabe imẹn.

Ikpe 15, ki gbera nin mẹn mianmẹn, emhin da sunu nọn fi iria-eria nọnsẹmhẹn denọ. Beji obhio mhan ọkpa ha re ọta man bhi ikolo oga, ọle da tie James 1:23, 24. Ene ulọnlẹn nan bhi Baibo da re ọta nọnsi Osẹnobulua rẹ khọkhọ ughegbe nin mhan ha rẹ ha ghe egbe mhan beji Jehova rẹ ghe mhan. Bhiriọ, mẹn ki da ha riale, si ebi mẹn daghe bhi egbe nọnsẹmhẹn dikẹ bhi ebi Jehova daghe. Bhi ọsi ọhẹnhẹn, mẹn bha zẹwẹ ho nin mẹn re otọ nin ọne ira-eria nan. Mẹn da sẹyẹ wo ha riale ghe Jehova ida sabọ hoẹmhọn mẹn.

Ikpẹdẹ eso ki gbera, mẹn da tie eji ọkpa bhi Baibo nọn fi iẹnlẹn nọnsẹmhẹn denọ. Ọne Baibo da ha yi Isaiah 1:18, bhi enin Jehova da yọle “Bha vae nian, nin mhan talọ ọbhi ẹmhọn nin mẹn bi bha ko mhọnlẹn. Aharẹmiẹn olukhọ nọnsẹbha diabe emhin nọn gian, a dẹ re ọle kiẹn emhin nọn manman fua.” Ọ da dia mẹn ghe Jehova wo ha nin mẹn talọ, ọle da ha yi mẹn: “Vae Vicky nin mhan talọ bhi ẹmhọn nin mhan ko mhọnlẹn. Mẹn lẹn uwe, mẹn lẹn eji uwẹ da fiobọdọn, mẹn daghe ọkhọle nọnsẹ, mẹn hoẹmhọn uwẹ.”

Ọne asọn nin, mẹn bha sabọ wẹ. Mẹn bha sẹyẹ rẹọbhọ ghe Jehova dẹ sabọ hoẹmhọn mẹn, ọkpakinọn, mẹn da munhẹn ha ria eria nyan izọese nọnsi Jesu. Ọsukpa, ọ da wo khia mẹn bhi ẹlo ghe, ọrele nin Osẹnobulua mọn da mhọn itohan da mẹn, ọle yẹ wo ha re oyẹẹ nọnsọle man mẹn bhi uwedẹ kẹkẹ. Ọkpakinọn, ọ da diabe mẹn taman ọlẹn yọle: “Oyẹẹ nọnsẹ bha kpọnọ sẹbhi emhin nọn ha sẹ mẹn bhi egbe. Izọese ọsi Ọmọn nọnsẹ bha kpọnọ sẹ ebe ha gue olukhọ nọnsẹmhẹn.” Ọ da diabe mẹn wo taman Jehova ghe, mẹn bha guanọ izọese ọsi Ọmọn nọnsọle. Ọkpakinọn, nin mẹn rẹ ha ria-eria nyan izọese nọnsi Jesu, mẹn da munhẹn dọ ha rẹọbhọ ghe Jehova hoẹmhọn mẹn.

ELELE NIN MẸN SẸ MIẸN:

Ọkhọle iyẹ gbe mẹn asan, mẹn ki mhọn iẹnlẹn nọn mhẹn nian. Ibọdọ bi irẹ-ohkuo nọnsẹmhẹn ki wo dọ de ọbhọ nian. Mẹn wo manman ghọnghọn ghe, mẹn sabọ ha noo emhin ne sunu ji mẹn rẹ rẹkpa ẹbho ebhebhe. Mẹn wo manman dọ sikẹ Jehova.