Ẹmhọanta Nọn Ribhi Baibo Fi Iẹnlẹn Ọsi Eria Denọ

BE rẹkpa ọria nọn wo manman ha fi ono, nọn yẹ wo ha yi oyi rẹ fi iẹnlẹn nọnsọle denọ? Fẹ ebe rẹkpa ọle bhi ọkha nọnsọle nin ọle gbe.

“Mẹn da wo manman hoẹmhọn igamu nan da re ẹsin runẹ.”—RICHARD STEWART

UKPE NAN BIẸ ỌLE: 1965

AGBAẸBHO NỌN NA VAE: JAMAICA

OKHA NỌNSỌLE: OYI, SẸYẸ, ỌLE MANMAN WO FI ONO

EBI IẸNLẸN NỌNSẸMHẸN KA DIAYẸ: Eje bha manman tan ẹlo a bhi otọ Kingston bhi Jamaica mẹn da wanre. Ẹbho ne bunbun bha ha mhọn iwẹnna bhi enan. Emhin ebe da wo gba ijerebhe. Ofẹn da ha mun ẹbho ranmhude usun ẹbho kẹkẹ ne lu emhin ebe ne nẹga ele. Ẹghe rebhe mẹn rẹ wo ha hẹnmhọn avan nin ẹbho ha fi.

Inẹn mẹn wo manman ha wẹnna kaka rẹ rẹkpa mẹn bi obhio mẹn nin okpea bi okhuo. Ọle da manman wo ha dọnmhegbe rẹ re mhan yo isiku. Ọkpakinọn, ẹmhọn isiku bha yẹ mẹn. Emhin nọn manman wo ha yẹ mẹn hi, igamu nan da re ẹsin runẹ. Nin mẹn rẹ diọ bhi isiku dọ luẹ ebe, mẹn ki ha khian eji a da re ẹsin runẹ. Mẹn bhọ da yẹ hẹn ene ẹsin.

Ọ bha sẹ bue gbe, mẹn da manman dọ ha noo igho nọnsẹmhẹn gbera ọnikhẹ rẹ fi ono ọbhi ẹmhọn ọne igamu nan da re ẹsin runẹ. Iẹnlẹn esankan mẹn ki wo ha nyẹnlẹn. Mẹn da wo ha ne ikhuo nowẹ. Mẹn da ha sin itaba-ẹlinmhin, mẹn da yẹ ha yi oyi, beji mẹn ha da sabọ ha miẹn igho rẹ ha nyẹnlẹn iẹnlẹn esankan nin mẹn ha nyẹnlẹn, ha sin itaba-ẹlimhin, yẹ haosa bhi ono nin mẹn fi. Mẹn mhọn avan nesẹmẹn, ọkpakinọn, mẹn yi Osẹnobulua obulu ghe, mẹn bha gbe ọria soso a bhi ene ẹghe kẹkẹ nin mẹn rẹ dọ raa.

Akizẹbue, unakpa da miẹn mẹn mun yẹ mun mẹn ọbhi ighan. A ki fan mẹn fia bhi ighan, mẹn da kie munhẹn ha nyẹnlẹn bhi uwedẹ nọn imhẹn nin mẹn ka rẹ ha nyẹnlẹn. Mẹn da wo kie dọ khọ ọbhọ gbera ọnin mẹn ka ye khẹ. Ebi mẹn guanọ mẹn wo ha lu, ohu ebe ọkpa wo ha re mẹn, mẹn wo manman wo bhi uhọnmhọn. Ẹmhọn egbe mẹn ọkpa wo rẹtẹ mẹn. Bhi ẹlo ọsi ẹbho, mẹn bha diabe ọria nọn ha sabọ lu emhin ne sẹnian.

EBI BAIBO RẸ FI IẸNLẸN NỌNSẸMHẸN DENỌ YẸ: Bhi ene ẹghe nan rebhe, inẹn mẹn da munhẹn ha luẹ Baibo, yẹ dọ kiẹn ọkpa bhi Esali Jehova. Mẹn da dọ daghe ọle ghe inẹn mẹn ki wo fidenọ, bhiriọ mẹn da ha guanọ nin mẹn lẹn ebe sunu. Mẹn da munhẹn dọ ha gua-otọ ebe re inẹn mẹn fidenọ. Iriọ mẹn rẹ munhẹn deba Esali Jehova ha luẹ Baibo.

Mẹn da dọ kere ghe, iman-emhin ọsi Esali Jehova dikẹ bhi ọsi otuẹ nekẹle, mẹn da yẹ kere ghe, Baibo iman-emhin nọnsele nan vae. Ele ọkpa tẹmhọn Osẹnobulua na bhi uwa rẹ sẹbhi uwa, beji Kristiẹn bhi ore nin ọhẹnhẹn ka lu. (Matthew 28:19; Acts 20:20) Beji mẹn ki daghe oyẹẹ nọn ribhi ẹwẹ ele, ọnan da rẹ mẹn manman lẹn ghe, mẹn miẹn oga ẹmhọanta.—John 13:35.

Ranmhude emhin nin mẹn luẹle bhi Baibo, mẹn da dọ daghe ọle ghe ọ manman khẹke nin mẹn fi iẹnlẹn nọnsẹmẹn denọ. Mẹn da dọ luẹ kere ghe, ilọnmhọn igboghẹ iyẹẹ Osẹnobulua nin Jehova. Ahamiẹn mẹn ho nin mẹn lu ebe ti ọle bhọ, ọkhẹke nin mẹn fi iẹnlẹn nọnsẹmẹn denọ. (2 Corinthians 7:1; Hebrews 13:4) Ọ wo manman rẹso mẹn beji mẹn dọ luẹ kere ghe emhin nin mhan lu rẹso Jehova. Mẹn da luẹ ghe uwedẹ nin mẹn rẹ lu emhin dẹ sabọ ba Jehova bhi egbe la re ọle ha ghọnghọn. (Proverbs 27:11) Bhiriọ, mẹn da rẹban itaba-ẹlinmhin nin mẹn rẹ ha sin, mẹn da ne avan nesẹmẹn kua yẹ dọnmhegbe fi iẹnlẹn nọnsẹmẹn denọ. Eso bhi emhin ne manman nọghọ mẹn rẹ fidenọ bhi iẹnlẹn hi igboghẹ bi ẹmhọn ono nin mẹn rẹ ha fi.

Mẹn bha rẹ ka guanọ nin imọe mẹn lẹn ghe mẹn munhẹn ha deba Esali Jehova luẹ Baibo. Ọkpakinọn, beji mẹn ki tie ẹmhọn nọn ribhi Matthew 10:33 fo, ọne iria-eria nan nin mẹn rẹ ha mhọnlẹn da fidenọ. Bhi enin Jesu da yọle: “Ọria nọn hi ki rẹ khin nọn he imẹn bhi isira ẹbho, imen ki yẹ he ọle bhi isira Aba imẹn nọn ribhi okhun.” Ọne ulọnlẹn nan da wo rẹkpa mẹn rẹ taman imọẹ mẹn ghe, mẹn munhẹn deba Esali Jehova ha luẹ Baibo. Ọ da wo han ele ilo. Ele bha rẹọbhọ ghe ọria nọn diabe mẹn dẹ sabọ kiẹn Kristiẹn. Ọkpakinọn, mẹn da ji ele lẹn ghe, mẹn ida yẹ nyẹnlẹn iẹnlẹn esankan nin mẹn ka ha nyẹnlẹn khẹ.

ELELE NIN MẸN SẸ MIẸN: Beji inẹn mẹn ki daghe ọle ghe mẹn munhẹn ha re obọ rẹkhan ebi mẹn luẹ bhi Baibo, ọle da wo manman ha ghọnghọn. Ọle bha yẹ ha kpokpo egbe la ha riale asabọmiẹn emhin ebe mẹn wo ha lu bhi eji mẹn ye. Oyẹẹ nin mẹn bi inẹn mẹn mhọn da Jehova da rẹ mhan manman kie dọ sikẹ egbe. Ẹgheso, mẹn ha yere ebi mẹn ka diayẹ ẹghe nin mẹn rẹ ha nyẹnlẹn iẹnlẹn esankan, ọ ki wo han mẹn ilo ebi Osẹnobulua rẹ sabọ rẹkpa mẹn rẹ fidenọ yẹ. Mẹn iyẹ ne obọ ọbhi ilọnmhọn igboghẹ la ha nyẹnlẹn iẹnlẹn esankan beji mẹn ka lu khẹ.

Sade mẹn bha miẹn ẹmhọanta ne ribhi Baibo ọbhi egbe nọn, asabọmiẹn ighan mẹn ha rẹ ha ye nian, la mẹn yu. Bhi ejayenan nian, mẹn ki wo mhọn azagba-uwa nin eghọnghọn ye. Amhẹn nọn rẹkpa mẹn bi ọmọn nọn hẹnmhọn nin mẹn. Ọ manman wo re mẹn ghọnghọn rẹ deba ele ha ga Jehova kugbe. Mẹn manman yi Jehova obulu bhi isẹhoa nin ọle re nin mẹn rẹ dọ kiẹn ọkpa bhi eguọmhandia nọnsọle. Ọ yẹ wo manman ti mẹn bhọ nin ọkpa bhi ẹwẹ Esali Jehova rẹ vae dọ man mẹn ẹmhọanta ne ribhi Baibo. Ọ wo re mẹn ghọnghọn rẹ ha man ẹbho Baibo. Ogẹn ọsi Jehova nin ọle rẹ re isẹhoa nin mẹn rẹ dọ ha ga ọle.

[Ẹkpẹti]

“Mẹn dọ luẹ kere ghe emhin nin mhan lu rẹso Jehova, mẹn da luẹ ghe uwedẹ nin mẹn rẹ lu emhin dẹ sabọ ba Jehova bhi egbe la re ọle ha ghọnghọn”

[Adudu]

Imẹn, okhuo mẹn bi ọmọn okhuo nọnsẹmhẹn

[Adudu]

Mẹn da dọ daghe ọle ghe inẹn mẹn ki wo fidenọ